Hata Kaari Ntthu Awuuliwa Muru Vawaatta, Kaahikhala Misiyonaariya

Miyo kiyariwe mwaakha wa 1951 oViena, elapo ya wÁustria. Anaan’yari aka yaari a etiini Katoolika. Miyo kaari ntthu awuuliwa muru, masi hata eri dhiidho kaaninvekela Muluku ivaara dhawaatta. Okathi kaaraakana iyaakha 9, apaapa yaahipacera onsoma Biibiliya ni Anamoona a Yehova. Ndho nuuvira okathi vakhaani, amma yaahipacera-tho onsoma Biibiliya vamodha ni apaapa.

Nuuvira okathi, naahipacera orowela mithukumano muloko wa oDöbling, oViena. Nkhama emudhi naanipaka itthu dhawaatta vamodha. Mwa ntakihero, naaninsoma Biibiliya vamodha, orowela mithukumano dha mmulokoni ni wiivahererya okocihera opuro aapakiwa asembeleiya. Okathi kaaraka mwaana, apaapa yaahikitumererya ompheta vawaatta Yehova. Moohaakanyera, apaapa yaanikivekelela miyo vamodha ni nhimaaka wiira nannuwa nikhale mapiyoneera. Masi okathi ole, yoolukama aka khiyaari yeelo.

OPACERA NTEKO WA MULUKU WA OKATHI WOOTHEENE

Miyo kipatisiwe mwaakha wa 1965. Okathi owo, kaarina iyaakha 14. Masi waanikiliperya waalaleerya atthu kahaadhuwelaka. Ivaara dhikina kaanidhuwela wiira aakhala adhimwali awaatta yaadhuwela itthu dhawaatta okixira miyo, ndho kaatthuna wiira awo ekadhiveliwa ni miyo. Nuuvira okathi vakhaani kipatisiwe, kaahipacera weetta ni atthu yahaanrumeela Yehova. Nnaamwi waakidhivela weetta naawo, yaawuupusera ya nrima aka yaanikiphukela okhala wiira kaaniviriha okathi wawaatta kiri vamodha ni atthu yaahari Anamoona a Yehova. Miyo kuupuwela wiira nkaare kiwerye ohiya weetta naawo. Ndho eseeni yaakikhalihenre opaka elo?

Moohakalaliha okathi ole naahimwaakhela mwali mmodha aathamenle muloko nhu, yoowo aarina iyaakha 16 aaitthaniwa Dorothée. Miyo kaahitikiheya noomala woona wiira owo aaniluttuweliwa olaleerya empa ni empa. Ekhweeli wiira miyo kaari muulupale onxira veene, masi owo aaniluttuweliwa ovara ntekoni woolaleerya okixira miyo. Ndho miyo kaahipacera wuupuwela wiira: ‘Anaan’yari aka Anamoona a Yehova, masi Dorothée khaavo hata mmudhi-ye mmodha ohudhe ekhweeli. Owo onkhala ni amaamaye anwereiwa, masi hata eri dhiidho, okathi wootheeene kanhiya ovara nteko woolaleerya!’ Ndho ntakihero-ne, naahikitumererya waacerera nteko kininvarelaka Yehova. Ndho nuuvira okathi vakhaani, miyo vamodha ni Dorothée naahipacera orumeela nkhama mapiyoneera ookhalihera, moottharelana naahikhala mapiyoneera ookilaatheya. Oluttuweliwa wa Dorothée waahikikhalihera opacera odhiveliwa ni nteko woolaleerya. Owo aahikikhalihera opaceriha yoosoma ya Biibliya, yoopacera. Nuuvira okathi waahipacera okikhweela ovaanela ni atthu voohima dha Biibiliya mmawaani, mphuroni ni mapuro makina oovirikana.

Nanlelo ohimanle mwaakha mmodha kirumeelaka nkhama piyoneera ookilaatheya, munna Heinz a wÁustria aahithamela muloko nhu. Owo aahudhenre ekhweeli okathi aaronwe iye onsekurya muulupaleye aari Namoona a Yehova oCanadá. Heinz aakhenle yoothanleliwa ya ora orumeela nkhama piyoneeru a vameekhaaya muloko nhu wa oViena. Miyo kaahidhiveliwa vawaatta nuuwo. Heinz aahikhalana yoolukama ya okhala misiyonaariyu masi miyo yoolukama aka khiyaari yeelo. Tivondho woopacerani nkaanleenle wiira kaahidhiveliwa nuuwo. Nuuvira okathi, naahipacera onamorari ni naahithelana nikarumeela vamodha nkhama mapiyoneeru wÁustria.

WAAKHWANIHERA YOOLUKAMA NHU YA OKHALA MAMISIYONAARIYU

Okathi wootheene Heinz aanikileela yoolukama-ye ya okhala misiyonaariyu. Hata owo ahitanke okikhanyerera okhalana yoolukama emodharu, aanikikhalihera wuupuwelela voohima dha mwaha owo, akikohaka wiira: “Okhala wiira kinaana anaahima niire naanwerya waacerera nteko nininvarela nhu Yehova?” Okhala wiira kaari ntthu awuuliwa muru, kaanova okhala misiyonaariya. Ekhweeli wiira kaari piyoneera, masi nteko wa omisiyonaariyu koona wiira waari wootepa oxankiha. Masi hata eri dhiidho, moopisa nrima Heinz khaahin’ye okikhalihera wuupuwelela voohima dha mwaha owo. Nitho Heinz aahikikhalihera ohitepa oxanka ni nkhalelo aka wa wuuliwa muru ni woova, akitumererya woona etthu kaakhanle aka opaka wiira kaakhalihere atthu akina. Voohaakanyera miruku-dhe dhookikhalihera vawaatta.

Vakhani-vakhani, kaahipacera odhiveliwa ni yoolukama ya okhala misiyonaariya, ndho nuuvira okathi naahaatikha epetisawu nivekelaka orowela eskola ya oXileyaadi. Masi munna mmodha a ekomisawu ya efiliyaali aahikileela wiira kahaana ohudhera olotta saana toko ekelesi. Nuuvira miyaakha miraru niilipiheraka ohudhera olotta saana ekelesi, naahitikiniheya ni yoothanleliwa naakhenle nhu ya orowa orumeela muloko wa elotelo ya eyuskolaviyaanu oSalzburgo, wÁustria. Naahiviriha iyaakha 7 nirumeelaka nttetthe ole, ohela mpuwa mwaakha mmodha Heinz aarumeela iye nkhama ntokweene a esirkwiitu, nisekuryaka miloko vamodha. Hata elottelo ya elapo ele eservukrowaata yaari yoolipa, hiyo naahiwerya okhalana dhoosoma dha Biibiliya dhawaatta.

Ndho mwaakha wa 1979, ana a ekomisawu ya efiliyaali yaahinivekela orowa oviriha okathi vakhaani niri oBulgária. Okhala wiira nteko nhu waanikhoottihiwa elapo ele, anna yaahinileela wiira nikalotta wiira naakelenlewo weetta ifeeriya. Nitho khinaavara nteko woolaleerya elapo ele. Masi naahikusa iliivuru ikhaani-ikhaani wiira naannye arokora athanu yaakhala oSofia ekapitaali ya oBulgária. Miyo kaanova vawaatta, masi Yehova aahikikhalihera waakhwanihera yoothanleliwa ele yoohakalaliha. Woona olipa nrima ni ohakalala wa arokora ale athanu moohixikha nxankiho yaaviriha awa waakhanle owiiriha otthukeliwa nkateya, waahikikhalihera olipa nrima wiira kipake khuta etthu kaaya aka orummwa mmutthenkesoni mwa Yehova.

Nuuvira okathi vakhaani naahitthikela waatikha epetisawu nivekelaka orowela eskola ya oXileyaadi, ndho moohakalaliha ekwaha ela naahaakhuliwa. Hiyo nuupuwela wiira naaya nikasoma eskola ya ekelesi ya wEstados Unidos. Masi Novembro a 1981, eskola ya oXileyaadi yaahipacera osommwa oWiesbaden, wAlemanha. Okhala wiira naasoma ni elottelo ya elemaawu, ndho elo yaanikikhalihera wiiwasasa itthu kaasoma aka. Niire munnidhuwela elapo naathanleliwe nhu?

ORUMEELA ELAPO YAAHONONIWE NI EKHOTTO

Yoothanleliwa nhu yaaari orowa orumeela oQuênia, masi efiliyaali ya oQuênia yaahinikoha akhala wiira naanwerya orumeela wUganda. Masi mwa iyaakha 10 dhaavinre ottuli nkhulupale aatoropa aaitthaniwa Idi Amin, aahimala-maliha ekuveernu ya wUganda ni apacera olamulela elapo ele. Ndho olamulelo-ye waahiwiiriha okhwa atthu awaatta ni waahikhumihera mixankiho dhawaatta. Mwaakha wa 1979, olamulelo wa Idi Amin, waahimala-malihiwa. Woonawene nyuwo munniwerya wiiwasasa wiira kaaniidhoona ohiphareleleya mwaha wa othamela elapo yaawaniwa ekhotto. Masi okhala wiira eskola ya oXileyaadi yaahinikhalihera onroromela Yehova, hiyo naahaakhulela yoothanleliwa ele.

Ekumi wUganda yaari yooxankiha. Kuveernu khaawerya waavaha atthu maadhi, enerxiiya ni itthu dhikina dhaathowa. Atelefooni yaahihiya ovara nteko, dhaanoompwa ikapwitthi ni atthu yaaniiyeriwa saasaasa ohiyu. Ndho vaavo vaaila awa, atthu ootheene khiyaakhuma owaani wiira ahire ntthu awiiyere aahiidho owiipha. Nnaamwi anna ni arokora a wUganda yaaviriha mixankiho nkhama idho, awo khiyaahin’ye olipiha waamini-wa.

Mwaakha wa 1982, miyo vamodha ni Heinz naahiphiya oKampala ekapitaali ya wUganda. Miyeeri mithanu dhoopacera, naakhala owannye Sam ni Christina Waiswa vamodha ni ane athanu ni amudhi-ye asese. Okhala wiira emudhi ele khiyaarina eyooca yaaphiyera, awo yaahilimalela waapeya ekwaha emodha khuta nihiku. Masi hata eri dhiidho, awo yaahoonihera okhala atthu oowaakhela aletto ekhumihaka khuta etthu yaakhalaawana wiira nice vamodha. Okathi wootheene nivirinhe nhu nikhalaka ni emudhi Waiswa, miyo vamodha ni Heinz noohudha itthu dhawaatta inikhalihenre mweekumini mwihu nkhama mamisiyonaariyu. Mwa ntakihero, hiyo noohudha orumeela maadhi vakhaani okathi ninrumeela nhu ixovoro. Mwaakha wa 1983, miyo vamodha ni Heinz naahiwerya ophwanya empa nhu mphantta nkina waari woophareleleya wa oKampala.

Hiyo waaninidhivela ovara nteko woolaleerya oKampala. Miyo kinnuupuwela wiira mweeri mmodha naahivaha ireviista dhinxira 4.000! Masi etthu yaatepa onidhivela, waari woona moopora atthu awo yaadhiveliwa awa ni ekhweeli okhala wiira yaaninttittimiha Muluku ni yaanitthuna vawaatta wiiwa voohima dha Biibiliya. Miyo ni Heinz khuta ntthu aahikhalana dhoosoma dha Biibiliya 10 aahiidho 15. Nitho etthu ekina yoohakalaliha okhala wiira naahiwerya ohudhera itthu dhawaatta ni anaskola nhu. Mwa ntakihero, naanihakalala vaavo naawoona nhu awo erowelaka mithukumano mwentto khuta esumana, owo khiyaadhiliha ni okathi wootheene yaakhala oohakalala.

Mwaakha wa 1985 ni 1986, ohiiwanana wa anapoliitika waahikhumihera ikhotto piili wUganda. Ivaara dhawaatta naaniwoona anaahima ekunse ikapwitthi dhuulupale ni eware ikuwo dha etoropa, yeemenle nramphani yaakocelaka atthu yaakavira. Okathi ole wooxankiha, hiyo naaninvekela Yehova ivaara dhawaatta wiira anikhalihere okhala atthu aakhili, oxaka wiikhumihera mixankiho ni ohitepasa woova okathi naalaleerya nhu. Yehova aahaakhula mavekelo nhu. Ndho vaavo naamphwanya nhu ntthu oonihera odhiveliwa ni ihapari dhooreera dha mbiibiliyani, naaniliyala nxankiho nhu wa woova.

Nitho waaninidhivela waalaleerya atthu a ilapo dhikina. Mwa ntakihero, naahindhuwela ni naahipacera osoma ni Murat vamodha ni amwaariye Dilbar Ibatullin, yaawo yaari a oTartaristão, elapo ya oRússia. Murat okathi ole aari meetiku. Anamathelana ale yaahirowa vahoolo mpakha opatisiwa ni nenna-va anninrumeela Yehova moororomeleya. Nuuvira okathi vakhaani, kaahindhuwela-tho Tatjana Vileyska a wUcrânia yoowo aaviriha nxankiho akatthuna wiidhiipha. Nuumala owo opatisiwa, aahitthikela wUcrânia ni aahikhalihera otaphuleliwa iliivuru dhihu elottelo ya wuukraniyanu.a

YOOTHANLELIWA EPHEYA

Mwaakha wa 1991, naahirowa weetta ifeeriya wÁustria. Ndho nuumala ophiya, efiliyaali ya elapo ele yaahinivaha ewarakha yaalotta wiira naahaakhela yoothanleliwa epheya ya orowa orumeela oBulgária weiwo mwa iyaakha dhawaatta nteko nhu woolaleerya waakhoottihiwa awa. Masi moohakalaliha okathi ole kuveernu a ilapo dha wEuropa, aahiwaakhuleliha Anamoona a Yehova olaleerya mootaphuwa ohela mpuwa oBulgária. Nkhama kilontte aka ottuli, miyo ni Heinz nirowaka evaara yoopacera oBulgária naahikusa ireviista vakhaani moohidhuweliwa vaavo nteko nhu woolaleerya waakhoottihiwa awa elapo ela. Masi ekwaha ela naarummwe orowa ovara nteko woolaleerya elapo ele.

Anna yaahinitumererya ohitthikela wUganda masi orowa pere-pere mpakha oBulgária. Tivondho naahitthara malakihero naavahiwe nhu ni khinaatthikenle owaani wUganda wiira nakocihere itthu dhihu aahiidho waalaiha anna ni arokora a opuro ole. Ohiya-vo, naahirowa eBeteeli ya wAlemanha nikusa ekaaro nipacerara weetta nkwaha mpakha ophiya oBulgária. Hiyo naathanleliwe orowa orumeela ekhurupu yaarina anamalaleerya 20 oSofia.

Hiyo nooviriha mixankiho dhoovirikana oBulgária. Woopacera waari ohidhuwela olotta ebuulkaru elottelo yeelo yaalottiwa elapo ele. Yanaaili, iliivuru dhaaphwanyaneya ni elottelo ya ebuulkaru dhaari piili, eliivuru A Verdade Que Conduz à Vida Eterna ni Meu Livro de Histórias Bíblicas. Yaneeraru, hiyo naanoona okhala voolipa opaceriha dhoosoma dha Biibiliya. Masi hata naaviriha mixankiho idhe, ekhurupu nhu yaaniluttuweliwa ni yaanirowa vahoolo. Masi atthu a ekerexa Ortodookisa khiyaadhiveliwa vaavo yoona awa ekhurupu ele eyaaka vahoolo, ndho mwaha wa elo yaahipacera onittharatthara.

Mwaakha wa 1994, kuveernu a elapo ele vamodha ni atthu awaatta a oBulgária yaahipacera waathokorerya Anamoona a Yehova nkhama etiini yaakhootthihiwa. Mpakha elo yaahiiriha otthukeliwa anna akina. Atthu yaanirumeela ixornaale ni televisau wiira elaleye itthu dhawoothiwa voohima hiyo. Awo yaalotta wiira Anamoona a Yehova yaanaahiya ana ekhwaka mwaha wa okhootta oheleliwa ephome ni yaanaatumererya akhwa wiidhiipha. Ivaara dhawaatta vaavo naalaleerya nhu atthu yaanikhuwela ohoolo wihu, owiitthana mapoliisiya ni onivonyera itthu. Vano, khivaaweryaneya oruuhiwa iliivuru elapo ele ni waari vooxankiha waalukari opuro wiira nipake mithukumano. Miyo kinnuupuwela evaara emodha mapoliisiya yaaniphwannye awa nipakaka mithukumano emaliha dhihiphin’ye opontha. Miyo ni Heinz khannatake oviriha mixankiho dhiidhaale. Atthu a elapo ele yaari oovirikana ni a wUganda yaawo yaadhiveliwa wiiwa ihapari dhooreera. Masi eseeni yaanikhalihenre ovilela mixankiho idhe dhootheene?

Okhala vamodha ni anna ni arokora a opuro ole woonikhalihera vawaatta. Awo yaanihakalala mwaha wa ohudha ekhweeli ni yaanixukhurela okhala vamodha naawo. Ootheene nhu naanikhapelelana ni okhaliherana nkina ni nkhwe. Okhala vamodha naawo, woonihudhiha oohakalala ni khuta yoothanleliwa ninvahiwa nhu naahihiye waapheta atthu.

Nuuvira okathi, itthu dhaahitthikela okhala saana oBulgária. Mwaakha wa 1998, nteko nhu woolaleerya elapo ele waahitthikela waakhuleliwa ni naanaanoru dhaahipacera ophwanyaneya iliivuru dhawaatta dha elottelo ya ebuulkaru. Mwaakha wa 2004, yaahivareriwa epereetiyu epheya ya efiliyaali ya elapo ele. Olelo-va, oBulgária dhookhalawo miloko 57 ni anamalaleerya 2.953. Mwaakha ovinre, atthu amphiyera 6.475 yaahoona nthukumano wa Wuupuwelela. OSofia weiwo yaariwo arokora athanu pahi, nenna-va dhookhalawo miloko 9! Mweekhweeli hiyo noowerya woona atthu oomalela oyeva ekhalaka nttitthi muulupale oBulgária.—Yes. 60:22.

OVILELA MIXANKIHO DHA MWEEKUMINI

Miyo kooviriha nxankiho woowereiwa iretta dhawaatta. Ivaara dhawaatta dhaahikhala itthu dhaakiipela, ehela mpuwa okiipela etthu vamuru. Ekwaha emodha kaanitthuneya olooliwa eretta yuulupale, ndho kaahiroihiwa wÍndia weiwo kooperariwe aka mpuwa wa iwoora 12 wiira ekhumihiwe etthu yaakiipenle vamuru. Ndho naahimaka eBeeteli ya elapo ele kilipelelaka wiira kipenuwe. Nuumala openuwa naahitthikela yoothanleliwa nhu oBulgária.

Ndho okathi owo, Heinz aahipacera-tho owereiwa eretta yuulupale yoorikarika omphwanya ntthu eniitthaniwa Huntington. Mwaha wa eretta elo, waaninxankiha weetta, olotta ni wiittikinya. Ndho owo aanitthuna nikhalihero naka saasaasa vaavo eretta-ye yaatepa awa. Ivaara dhikina miyo kaanilamwa onkhapelela kihikoona etthu yoopaka. Masi moohakalaliha aahikhala munna mmodha aaitthaniwa Bobi, yoowo aankusaka Heinz wiira aalaleerye vamodha nuuwo. Munna Bobi khuuleliwa muru okhuma nuuwo hata ivaara dhikina Heinz ahaawerya olotta saana ni atthu aahiidho ahaawerya weetta saana. Ndho akhala wiira kaanitthuneya ovara itthu dhikina, Bobi aakhala oolikana ene okikhalihera onkhapelela Heinz. Nnaamwi naathanlale ohikhalana anaahima olumwinku ola, Yehova aahinivaha Bobi nkhama mwanihu!—Mar. 10:29, 30.

Nitho Heinz aaniwereiwa eretta ya kanseri. Mooriipiha nrima, amamunaka akhwiye mwaakha wa 2015. Nuumala Heinz okhwa, kinniidhoona ohikhala oophareleleya okhala wiira owo aanikikhalihera ohitepa oxanka. Onnikixankiha ohikhala vamodha ni ntthu kaanlamalenle aka vawaatta. Masi mmuupuweloni mwaka, owo nanlelo nkumi! (Luka 20:38) Ivaara dhawaatta kinnuupuwela moolumo-ye ooreera ni miruku-dhe vaavo kinvirihaka nihiku. Kinnihakalala vawaatta iyaakha dhootheene kivirinhe aka vamodha ni Heinz ninvarelaka nteko Yehova.

KINNIXUKHURELA NIKHALIHERO NA YEHOVA

Mweekhweeli Yehova ookikhalihera okathi wootheene kaaviriha aka mixankiho. Nitho ookikhalihera owanana nxankiho aka wa wuuliwa muru ni okhala misiyonaariya onaapheta atthu. (2 Tim. 1:7) Nikhaliheriwaka ni Yehova, miyo ni nhimaaka ninvara nteko wa Muluku wa okathi wootheene. Nenna-va owo vamodha ni amamune anrumeela esirkwiitu ya elottelo ya eserviyaanu, wEuropa. Moohaakanyera, mavekelo ootheene apaapa yaapaka awa aahaakhuliwa!

Yoosoma aka ya Biibiliya, ennikikhalihera okhalana nrettele wa mmuupuweloni. Okathi wootheene wooxankiha, koohudha ‘ovekela moohihiyerera’ nkhama Yeesu. (Luka 22:44) Yehova onnaakhula mavekelo aka aarumeelaka axirikha aka yaawo ooreera nrima ni oopheta a muloko aka wa oNadezhda, oSofia. Awo annikilaleya wiira nace ni oraara vamodha ni annikixukhurela, ndho elo ennikiiriha ohakalala vawaatta.

Miyo okidhivela wuupuwelela nlipelelo na ohihimusiwa. Kinnuupuwelela kiwoonaka anaan’yari aka ohoolo wa empa nhu, ephwaneliwe nkhama nihiku yaathelanne awa. Nhimaaka aapeyaka eyooca yoodhiva. Kinnimuupuwelela Heinz araaka ni ekhavalu-ye. Wuupuwelela itthu idho, onnikikhalihera okhumiha muupuwelo dhoohiloka ni dhinnikiiriha otepa onxukhurela Yehova.

Vaavo kinuupuwela aka itthu dhootheene dhooreera Yehova okivanhe iye ni idhe onlaihera iye nhoolo, kinnikhupali moolumo a Davidi aari Esalimo 27:13, 14 yaawo aalontte iye wiira: ‘Kaaya okhala dhai, kihaamini wiira kaamoona ooreera nrima wa Yehova nanlelo kiri ene nkumi? Munlipelele Yehova; nlipe nrima ni mwiilipihe. Aayo, munlipelele Yehova.’