Makoho Ampakiwa ni Atthu Ansoma Iliivuru Dhihu

“Muupuwelo” seeni moohilokela Yehova on’ya iye ohela vanrimani va anamalamulela?

Elottaka voohima dha opacera wa maxakha muulupale, yawaatikhiwa ya Wiisuupulula 17:16, 17 enlotta wiira: “Manyaka 10 ni enama yoowali moonale anyu, sinrowa omunyokha muthiyana namararuwa, sinoomwaakha itthu sawe sotheene, ni sinrowa omuhiya ohiwanre etthu. Nave, sinookhuura erutthu awe ni sinrowa ompaha voomalela ni mooro. Tthiri, Muluku oohela vamurimani vaya ophavela opaka ele onuupuwela awe, eyo piiyo, opaka etthu emosa-ru otheene aya anuupuwela aya, owiirihaka ovaha enama yoowali omwene aya.” Khalai iliivuru dhihu dhaalotta wiira muupuwelo Yehova on’ya iye ohela vanrimani va anamalamulela, waari owiiriha awo opwetesa itiini dhawootha.

Masi waanitthuneya opaka marukunuso voohima dha moopora naaiwasasa nhu. ‘Muupuwelo’ Yehova on’ya iye ohela vanrimani va anamalamulela, onoowiiriha awo ovaha ‘enama yoowali omwene-ya.’ Wiira niiwasase moopora eprofesiiya elo en’ya awa waakhwanela, nirowe nithokorerye makoho anttharelana.

Taani anromoliwa eprofesiiya ela? “Nthiyana namararuwa” yoowo ondhuweliwa okhala “Babilooniya Muulupale”; onthoonyera ntthenkeso wa itiini dhawootha dha olumwinku wootheene. ‘Enama yoowali yooseera’ enthoonyera ntthenkeso wa Liga das Nações. Owo okhumiheriwe mwaakha wa 1919 ni yoolakela ya okhaliha nrettele olumwinku wootheene olelo-va ondhuweliwa okhala Nações Unidas. (Wiis. 17:3-5) “Manyaka 10” anthoonyera anamalamulela ootheene ankhalihera enama yoowali.

Ovarihana seeni orivo eriyari ya nthiyana namararuwa ni enama yoowali yooseera? Nthiyana namararuwa okilaanthi vadhulu wa enama yoowali. Elo entaphulela wiira onnireeliha wiira ekamwiiwelela.

Eseeni en’ya omwiiranela nthiyana namararuwa? Enama yoowali ni manyaka 10, ‘anoomwiitta nthiyana namararuwa’ mpakha omwaakha mihakhu-dhe dhootheene ni woonihera wiira owo tootakhala. Nitho awo anoopaka yootthuna ya Yehova empwetesaka moomalela. (Wiis. 17:1; 18:8) Opwetesiwa iwo ti wa itiini dhawootha. Masi elo ehinaakuve wiireya, Yehova onoowiiriha anamalamulela opaka etthu ehitanke wiiraneya.

Eseeni Yehova on’ya iye owiiriha anamalamulela opaka? Owo onoowiiriha anamalamulela opaka ele ‘onuupuwela iye,’ niire dho, wiira awo ‘evahe owerya ni okhulupale-ya enama yoowali [yooseera]’ yeelo enthoonyera Nações Unidas. (Wiis. 17:13) Nkahaya muupuwele ele etaphulela awa elo. Niire anamalamulela tan’ya othanla ovaha owerya ni okhulupale enama yoowali? Naari! Eprofesiiya ela enoonihera wiira Muluku ton’ya owiiriha opaka elo. (Mir. 21:1; mmoone-tho Yesaya 44:28.) Niire marukunuso awo an’ya okhumelela vakhaani-vakhaani? Naari! Elo en’ya wiiraneya mwawaakuveya ni mootutusera. Nuumala-vo enama yoowali enoorumeela ikuru evahiwe awa wiira epake ele Yehova olakelenle iye wiiriha itiini dhawootha, epwetesaka moomalela.

Ndho eseeni nintthuneya nhu olipelela? Hiyo khanintthuneya olipelela woona aahiidho wiiwa ihapari dhilottaka wiira anamalamulela aapacera vakhaani-vakhaani onkhalihera Nações Unidas. Etthu ninlipelela nhu ti ela: mootutusera ni mwawaakuveya Yehova onoowiiriha anamalamulela ovaha enama yoowali owerya-wa. Ndho nuumala wiiraneya elo, ninoodhuwela wiira maxakha muulupale ahanle opacera. Ndho nilipelelaka wiiraneya elo, nihaana okhala ‘awiikocela ni anuupuwela saana,’ okhala wiira moohilokela anookhumelela marukunuso mootutusera!—1 aTes. 5:6.