Etthu Ekhanle Waakhalihera Athiyana Anviriha Nxankiho Woohadhuliwa
“IMILYAU dhawaatta dha athiyana a iyaakha dhoovirikana olumwinku wootheene, aataka oviriha nxankiho owo. Niire nyuwo mwa mmodha a athiyana awo? Moone seeni Muluku onxanka iye ni ophareleleya winyu ni ele on’ya iye opaka wiira amalihe ohadhuliwa wa athiyana.”
Ala moolumo oopacera ari mwaha oni: “As mulheres e a sua segurança—O que diz a Bíblia,” yoowo ori va jw.org. Wookhidherani wa epaaxina elo, nnoophwanya elinkhi ekhanle wookhaliherani obaxari mwaha owo eformaatu PDF. Nyuwo pooti wimpirimiri mwaha owo ni okhuna wiira okhale efolyetu ya ipaaxina sese. Nrokora mmodha oniitthaniwa Stacy yoowo onkhala wEstados Unidos, onlotta wira: “Miyo kahimpirimiri ikoopiya vakhaani dha mwaha owo. Nuumala-vo, miyo vamodha ni nrokora nkina naahiroiha ikoopiya idho opuro ankhapeleliwa athiyana anviriha mixankiho, nttetthe yoowo onlaleerya muloko aka.”
Nthiyana mmodha onvara nteko opuro owo aahinkoha nrokora ole akhala wiira aammuhiyera ikoopiya dhawaatta wiira aakawele athiyana ankhala opuro owo. Yookhumelela-ya, dhaahikaiwa ifolyetu dhinxira 40 vamodha ni ikartau dha osekurya esaaiti jw.org dhimphiyera 30. Nihiku naattharelana, nkhulupale a opuro owo aahiveka wiira yooniheriwe athiyana ootheene yaakhala opuro ole, moopora empakiwa awa yoosoma ya Biibiliya.
Stacy ni arokora akina aili yaahiphwanya-tho mareeliho opuro nkina ankhapeleliwa athiyana anviriha mixankiho. Awo yaahiwerya okawa opuro owo ikoopiya thanu dha efolyetu elo ni yaahivekeliwa oruuha dhikina. Nthiyana mmodha onvara nteko opuro owo, aalontte wiira: “Ewarakha ela enawaakhalihera athiyana ankhala opuro ola. Ni ti yeelo naaramela nhu.” Nihiku arokora awo yaatthikenle awa osekurya opuro owo, athiyana awaatta yaahithukumana wiira yoone moopora empakiwa awa yoosoma ya Biibiliya ni aili yaalontte wiira yaatthuna orowa woona nthukumano wuumalani wa esumana Empa ya Omwene.
Stacy onlotta wiira: “Yaari etthu yoophara nrima owoona moopora atthu yaahakalala awa vaavo yaasoma awa itthu dhooreera iri mpuwa wa mwaha owo. Nuumala wimpirimiriwa ni okhuniwa, efolyetu elo enniwiiriha atthu otthuna osoma, ni enamuna emodha yooreerela yoorumeela wiira naalaleerye nhupi wa Omwene athiyana anviriha nxankiho woohadhuliwa. Yaari etthu yoophara nrima owoona moopora atthu yaahaakalala awa nuumala waakhela nhupi ori efolyetu elo. Ndho ninnitthuna ni nrima wootheene woona moopora Yehova on’ya iye oreeliha wiilipihera wihu wiira nihihiye waakhalihera athiyana nkhama awo naalaleeryaka ihapari dhooreera.”