Seeni Naatthuneya nhu Ovahiwa Yawoopola?

1-2. Seeni naatthuneya nhu woopoliwa? (aRoma 7:22-24) (Moone-tho efootu.)

NKAHAYA mmuupuwele nlopwana mmodha owatenle mpuwa wa epereetiyu emonre. Owo nanlelo nkumi, masi khanwerya okhuma opuro owo meekhe. Ndho khiyaavo etthu onwerya iye opaka, ohikhanle pahi okhuwela avekaka nikhalihero wiira akhumihiwe opuro owo.

² Apinaatamu ootheene nxankiho-ya onoolikana ni wa nlopwana owo. Mwa enamuna seeni? Nuumala Adamu onrukunuwela Yehova, owo aahikhala natampi. Moottharelana, owo aahaaraviha etampi elo ane ootheene. Ndho eseeni ekhumelenle? Apinaatamu ootheene aarava etampi, ni nkhama nlopwana ole, yaanitthuneya woopoliwa okhala wiira khiyaaawerya wiidhoopola meekha. Ewarakha Paaulu aawaatikhenle iye makristau a oRooma, aahilotta itthu inoonihera wiira ootheene nhu na epottha ya etampi. (Munsome aRoma 7:22-24.) Owo aahivekela wiira oopoliwe ‘erutthu yaanroiha wookhwani.’ Paaulu aaidhoona nkhama ntthu ahaawerya wiidhoopola, mwaha wa etampi niravihiwe nhu ni Adamu yeelo yaanroiha wookhwani. (aRoma 6:23) Nkhama Paaulu, ni hiyo-tho naanitthuneya woopoliwa!

3. Mwa inamuna seeni yawoopola ennikhalihera awa?

³ Paaulu khaamalinhe olotta mwaha ola ni moolumo ookhulumula. Nuumala Paaulu wiikoha airaka: ‘Taani on’ya okoopola erutthu ela enkiroiha wookhwani?’ Owo aahaakhula ahaakanyeraka airaka: ‘Kinninxukhurela Muluku, okhala wiira ookoopola anrumeelaka Yeesu Kriistu, Pwiya nhu!’ (aRoma 7:25) Paaulu aalotta nkuttho wawoopolaa wa Yeesu. Yawoopola enninikhalihera mwa inamuna tthaaru, (1) oleveleliwa itampi dhihu, (2) onivaha nlipelelo na okhala oomalela nhoolo, ni (3) otthikela waataana ni Mpattusa nhu. Vaavo nin’ya nhu othokorerya ipontu idha, ninawaacerera ompheta wihu Yehova, “Muluku, yoowo onnivaha nlipelelo.” (aRoma 15:13) Nitho ninawaacerera onxukhurela wihu Yeesu “mwaha wa onoopola.”—aKol. 1:14.

YAWOOPOLA ENNINIVAHA EPARAKHA YA OLEVELELIWA ITAMPI DHIHU

4-5. Seeni ootheene nhu naatthuneya nhu woopoliwa? (Musuweli 7:20)

⁴ Ootheene nhu naanitthuneya woopoliwa wiira nileveleliwe itampi dhihu. Apinaatamu ootheene toohimalela ni annittheka oreela wa moolumo ni miteko. (Munsome Musuweli 7:20.) Itampi dhikina ti dhuulupale. Mwa ntakihero, moovarihana ni Nlamulo na Moise, akhala wiira ntthu aanraruwa aahiidho omwiipha ntthu, nuuwo-tho ahaana wiiphiwa. (Onam. 20:10; Moth. 35:30, 31) Ekhweeli wiira itampi dhawaatta kahi dhuulupale, masi hata eri dhiidho, itampi. Mwa ntakihero, Davidi aalontte wiira: ‘Kinawiikasoopa wiira kihittheke ni moolumo aka.’ (Esal. 39:1) Voohaakanyera, ivaara dhikina moolumo nhu pooti onitthekiha.—Yak. 3:2.

⁵ Nkahaya muupuwele itthu mpanke nnyu ni nlontte nnyu. Niire mwaataka olotta etthu nuuvira okathi moona wiira kimwaareerela olotta? Niire mwaataka opaka etthu yaawiirinhe othanana? Moohaakanyera, ootheene nhu naataka opaka aahiidho olotta etthu nihaareerela nhu olotta aahiidho opaka. Biibiliya onlotta wiira: ‘Naalottaka wiira: ‘khinaana etampi,’ nnawiidhoototha, ni ekhweeli kheri ni hiyo.’—1 Yoh. 1:8.

6-7. Eseeni eniiriha oweryaneya Yehova olevelela itampi dhihu? (Moone-tho efootu.)

⁶ Yawoopola enniiriha oweryaneya Yehova olevelela itampi dhihu. (aEefe. 1:7) Masi elo khentaphulela wiira Yehova khanoona itthu nimpaka nhu aahiidho khadhininnanara itampi dhihu. Olotta ekhweeli, Yehova khonindhivela hata vakhaani vaavo nimpaka nhu etampi. (Yes. 59:2) Okhala wiira owo Muluku a xariya, yaanitthuneya etthu wiira Yehova alevelele itampi dhihu.

⁷ Nlamulo na Moise naanaavekela aisarayeeli ovaha mikuttho dha inama wiira ileveleliwe itampi-dha. (Onam. 4:27-31; 17:11) Mikuttho idho dhaathoonyera nkuttho muulupale wa Yeesu ni mareeliho waaya awa okhumihera. Nkuttho owo waamwiiriha oweryaneya Yehova olevelela itampi dhihu. Moolumo Paaulu aawaatikhenle iye makristau a oKorintu, annoonihera wiira owo aanidhuwela efaita oraawana nkhuttho wawoopola wa Yeesu. Nuumala olotta voohima dha itthu dhootakhala yaapanke awa khalai, owo ahaaleela wiira: ‘[Nyuwo] moorapihiwa, mooreerihiwa, mookhalihiwa anaxariya ni ndhina na Pwiya Yeesu Kriistu ni ikuru dha Muluku nhu.’—1 aKor. 6:9-11.

8. Eseeni munreerela nnyu opaka vaavo nniikocihera nnyu wiira nrowele nthukumano wa Wuupuwelela wa ntano?

⁸ Vaavo nniikocihera nnyu wiira nrowele nthukumano wa Wuupuwelela ntano, mwiivahe okathi wiira muupuwelele ele entaphulela awa olevelela wa Yehova wa nyuwo. Mwa ntakihero, oreela wa nkuttho wa woopola khamuntthuneya wiivaha nthowa mwaha wa itampi dhinyu dha khalai dheidho nttharunwe nnyu. Masi ankhi akhala wiira onnooliperyani okhupali elo? Woonawene nyuwo pooti olotta wiira: ‘Miyo kinnikhupali wiira Yehova pooti okilevelela, masi miyo nkinwerya wiilevelela. Akhala wiira nnoona dhiidho, nhiliyale ela: Yehova tonnilevelela, owo onvaha Mwane, Yeesu, ehakhi ya oniphukela. Yehova khoovanheni nyuwo aahiidho pinaatamu nkina nritti wa onthanla taani omphwanela omoreliwa ikharari nuuwo aahiidho naari. Biibiliya onlotta wiira: ‘Neetta mwawaarya nkhama dhiidhaale [Yehova] ori iye awaarya, . . . ephome ya Yeesu, Mwaana a Muluku, ennittipiha itampi dhihu dhootheene.’ (1 Yoh. 1:6, 7) Nihaana okhupali ni nrima wootheene ekhweeli elo, nkhama dhiidhaale ninkhupali nhu dhoohudhiha dhikina dha mbiibiliyani. Yawoopola ehiiriha oweryaneya wiira Yehova animorele ikharari, ni Nuulumo-ne ninlotta wiira ‘okathi wootheene owo ori oolikana ene wiira alevelele.’—Esal. 86:5.

YAWOOPOLA ENNINIVAHA NLIPELELO NA OKHALA OOMALELA

9. Ohiya pahi itthu dhootakhala, nuulumo nawi etampi, ninhela mpuwa eseeni? (Esalimo 51:5 ni enoota)

⁹ Mbiibiliyani, nuulumo nawi “etampi” khanintaphulela pahi itthu dhootakhala nimpaka nhu, masi-tho ninhela mpuwa nkhalelo nhu wa ohimalela nin’yariwanhuna. (Nsome Esalimo 51:5 ni enoota.) Ndho ohiya pahi nkhalelo owo oniiriha opaka itthu dhootakhala, onniniiriha owereiwa, wuuluvala ni okhwa. Tivondho anaahima akhaani ahitanke opaka etampi anwereiwa awa ni okhwa. Nitho nno nthowa ninwiiriha atthu ooreera nrima vamodha ni ootakhala nrima ohaawa ni okhwa. Ndho okhala wiira ootheene nhu na odhuulu wa Adamu, noorava etampi.

10. Adamu ni Eeva yoonenle dhai nuumala ottheka?

¹⁰ Nkahaya muupuwele moopora yoonenle awa nuumala anamathelana oopacera ottheka. Etampi, yaahikhumihera marukunuso muulupale mweekumini-mwa. Nuumala Adamu ni Eeva onrukunuwela Yehova, naanaanoru yaahiriipiwa nrima vawaatta mwaha wa ohiiwelela nlamulo na Yehova, nlamulo nenno ‘naatikhiwe vanrimani-va.’ (aRoma 2:15) Nitho naananoru awo yaahoona wiira yaahipaka etthu yootakhala. Ndho elo yaahiwiiriha wiikhunela ni wiipitha wiira ehooniwe ni Mpattusa-ya. (Maph. 3:7, 8) Adamu ni Eeva yaahipacera wiivaha nthowa, oxanka, wiidhoona ohiphareleleya ni wuuliwa muru. Okhuma nihiku nne, awo yaaniwanana miyuupuwelo idho mpakha okhwa.—Maph. 3:16-19.

11. Mixankiho seeni dhinniphwanya mwaha wa okhala oohimalela?

¹¹ Nkhama dhiidhaale yaairanen’ye awa ni anamathelana oopacera, nkhalelo nhu wa ohimalela onniniiriha wiivaha nthowa, oxanka, wiidhoona ohiphareleleya ni wuuliwa muru. Tivondho ohimalela, onninikhumihera mixankiho mweerutthuni ni mmuupuweloni. Hata niilipiheraka opaka itthu dhootheene ninwerya nhu, khaninwerya omaliha mixankiho idho meekhinhu. Mwaha wa seeni? Okhala wiira Biibiliya onlotta wiira, okhuma nenne Adamu ni Eeva atthenke awa apinaatamu ekaankhalana mixankiho. (aRoma 8:20) Ndho mwaha owo onaahela mpuwa apinaatamu ootheene. Mwa ntakihero, muupuwele wiilipihera anamalamulela ampaka awa wiira ekhapelele elapo, omaliha otakhala, ohaawa ni okhaliha nrettele elapo yootheene. Masi wiilipihera iwo, ti weetheru okhala wiira khanwerya omaliha mixankiho. Ndho nlipelelo seeni yawoopola ennivaha awa mwaha wa okhala oohimalela?

12. Nlipelelo seeni ennivaha awa yawoopola?

¹² Yawoopola enninivaha nlipelelo wiira ‘dhoopattusiwa khadhinrowa-tho okhala ipottha dha etampi.’ (aRoma 8:21) Elo entaphulela wiira elapo epheya vaavo nin’ya nhu okhala oomalela, khaninrowa oriipiwa nrima mwaha wa mixankiho dha veerutthuni ni mmuupuweloni. Nitho khaninrowa oriipiwa nrima mwaha wa wiivaha nthowa, oxanka, wiidhoona ohiphareleleya aahiidho wuuliwa muru. Ohiya-vo, wiilipihera wihu okhapelela elapo ni okhala ni nrettele ni atthu akina khonrowa okhala weetheru. Masi okaankhumela saana nilamuleliwaka ni ole onooponle, ‘Nkhulupale a Nrettele’, Yeesu Kriistu.—Yes. 9:6, 7.

13. Etthu seeni ekina munreerela nnyu wuupuwelela vaavo nniikocihera nnyu wiira nrowele nthukumano wa Wuupuwelela wa ntano?

¹³ Nkahaya muupuwele moopora ekumi nnyu en’ya wa okhala nuumala okhalana erutthu yoomalela. Khuta nihiku nvenyaka ni ekumi yooreera, nhixankaka wiira nyuwo aahiidho atthu nnaapheta nnyu anoovoliwa etala, owereiwa aahiidho okhwa. Hata olelo-va, nnoowerya okhalana nrettele ‘mpharelelaka nlipelelo . . . nenno nri nkhama nankura a ekumi nhu, ninnikhalihera okhala oolipa.’ (aHeb. 6:18, 19) Nkhama dhiidhaale nankura oninkhalihera iye paarkhu ohittepattepa, nlipelelo ninyu nnawookhaliherani olipiha waamini winyu ni ovilela mixankiho dhootheene munviriha nnyu olelo-va. Tivondho nkhupali wiira Yehova ‘onnaatthuvela ale ammwaadhya ni nrima wootheene.’ (aHeb. 11:6) Ndho nimaaliho mumphwanya nnyu nenna-va ni nlipelelo ninyu na nhoolo, ninweryaneya pahi mwaha wa yawoopola.

YAWOOPOLA ENNINIVAHA EPARAKHA YA OTTHIKELA WAATAANA NI MULUKU

14. Etampi ehononne dhai waataana wihu ni Mpattusa nhu, ni mwaha wa seeni?

¹⁴ Nuumala Adamu ni Eeva ottheka, apinaatamu yaahivalaana ni Muluku ni khiyaawerya-tho otthikela waataana nuuwo. Biibiliya onlotta wiira apinaatamu ootheene, avalaana ni Mpattusa. (aRoma 8:7, 8; aKol. 1:21) Mwaha wa seeni? Okhala wiira malamulo a Yehova toomalela, owo khanaakhulela ohiya etampi epakiwaka okathi wootheene. Anhimaka Yehova, Biibiliya onlotta wiira: ‘Maitho nnyu aatepa okhala ooloka vahimphwanela awa woona etthu yootakhala.’ (Hab. 1:13) Etampi yookhumihera ovalaana, onlikana ni nlitti nuulupale ni nawiisa eriyari ya apinaatamu ni Muluku. Tivondho khaavo a hiyo aawerya okhala nxirikha a Yehova ehikhanle eponti ennaataaniha aahiidho ennikhalihera okumana. Ndho eponti elo, yawoopola, yeelo enniiriha oweryaneya otthikela waataana ni Muluku.

15. Okhwa wa Yeesu wiirinhe dhai oweryaneya apinaatamu otthikela waataana ni Muluku?

¹⁵ Biibiliya onlotta wiira Yeesu ‘tori nkuttho onttipiha itampi dhihu.’ (1 Yoh. 2:2) Nuulumo na ekereku nitaphuleliwe nawi ‘onttipiha,’ pooti otaphulela ‘etthu enaataaniha’. Ndho, onweryaneya dhai yawoopola okhala etthu enaataaniha? Masi nihuupuwele wiira okhwa wa Yeesu waahimwiiriha Yehova otteeliwa nrima. Ohiya-vo, yawoopola ennikhalihera malamulo a xariya a Yehova ni ennimwiiriha Yehova waakhulela otthikela waataana ni apinaatamu. (aRoma 3:23-26) Khalai Yehova ‘aanaathokorerya’ okhala anaxariya ale yaankokhorela moororomeleya, hata Yeesu ahinatthi okhwa. (Maph. 15:1, 6) Mooporani? Owo onipaka elo arumeelaka yawoopola yaaya ovahiwa nhoolo. Yehova aanikhupali ni nrima wootheene wiira Mwane, Yeesu, aanvaha ekumi-ye nkhama nkuttho wawoopola. (Yes. 46:10) Yawoopola yoohula ephuro wiira apinaatamu ewerye otthikela waataana ni Muluku.

16. Itthu seeni dhikina munreerela nnyu wuupuwelela vaavo nniikocihera nnyu wiira nrowele nthukumano wa Wuupuwelela wa ntano? (Moone-tho efootu.)

¹⁶ Muupuwele ele entaphulela awa wa nyuwo otthikela waataana ni Muluku. Mwa ntakihero, nkhama Yeesu ohudhinhe iye, nyuwo pooti onthokorerya Yehova nkhama “Tiithi” nnyu. (Math. 6:9) Ivaara dhikina, nyuwo pooti onthokorerya Yehova nkhama ‘Nxirikha’ nnyu. Ndho vaavo nimmwiitthana nhu Yehova nkhama “Tiithi” nhu aahiidho ‘Nxirikha’ nhu, nihaana woonihera nttittimiho nuulupale. Mwaha wa seeni? Okhala wiira na atthu oohimalela ni hata niweryaka okhala axirikha a Yehova, hiyo khinaaphwanela eparakha elo. Masi mwaha wa yawoopola ninniwerya okhalana waataana wooreera ni Yehova. Anrumeelaka Yeesu, Yehova ohiiriha oweryaneya ‘waataana-tho ni itthu dhootheene . . . Akhalihaka nrettele ni ephome ya Yeesu, yiittiwe vanttaikhoni va nihaasero.’ (aKol. 1:19, 20) Tivondho ninoowerya okhala atthu oohakalala mwaha wa okhala axirikha a Yehova hata niri atthu oohimalela.

YAWOOPOLA ENNOONIHERA WIIRA YEHOVA TOOMORIWA IKHARARI

17. Yawoopola enoonihera dhai wiira Yehova toomoriwa ikharari? (aEefeso 2:4, 5)

¹⁷ Yawoopola ennoonihera wiira Yehova ‘toomoriwa ikharari vawaatta.’ Owo ‘oonivaha ekumi . . . nnaamwi naari ookhwa ene mwaha wa itampi dhihu.’ (Munsome aEefeso 2:4, 5.) Nkhama dhiidhaale ntthu owateenle mpuwa wa epereetiyu emonre onkhuwela iye wiira akhaliheriwe okhuma opuro owo, ‘ootheene arina nrima wooloka wiira yaakhele ekumi yoohimala,’ annikhuwela evekaka nikhalihero. (Mit. 13:48) Ndho Yehova onnaavaha nikhalihero nno arumeelaka ihapari dhooreera dha Omwene, wiira ewerye ondhuwela owo vamodha ni Mwane, Yeesu. (Yohani 17:3) Akhala wiira Satana uupuwela wiira etampi opanke Adamu ni Eeva yaamwiiriha ohiweryaneya waakhwanela yoolakela ya Yehova, owo aamwiidhoototha.

18. Etthu seeni yootepa ootthuneya ninreerela nhu ohiliyala vaavo ninuupuwelela nhu yawoopola?

¹⁸ Vaavo ninuupuwela nhu mireerelo yawoopola dhinkhumihera awa, nihiliyale etthu emodha yootepa otthuneya. Nihaana wuupuwela wiira Yehova khavanhe pahi yawoopola wiira awoopole apinaatamu, masi-tho oovaha wiira avaanye wootha Satana aakhumihenre iye exarti ya Weedeni. (Maph. 3:1-5, 15) Nitho Yehova onnirumeela yawoopola wiira atteelihe ndhina-ne, ooniheraka wiira itthu dhootheene Satana onlotta iye voohima dha owo ti dhawoothiwa. Okhala wiira yawoopola enniiriha oweryaneya woopoliwa etampi ni okhwa, elo enamuna emodha enoonihera wiira Yehova, Muluku oopheta. Ni mwaha wa ooreera nrima wuulupale wa Yehova, owo onninaakhulela onkhalihera wiira amwaakhule Satana. (Mir. 27:11) Ndho nyuwo mun’ya woonihera dhai wiira munnixukhurela yawoopola? Yoosoma enttharelana ninaawakhula nikoho nno.