Nyuwo Nnoowerya Owanana Miyuupuwelo Dhoohiloka

1-2. Seeni ivaara dhikina nrummwa Paaulu aariipiwa iye nrima, ni seeni ninlotta nhu wiira miyoonelo-dhe inoolikana ni miyoonelo dhihu? (aRoma 7:21-24)

VAAVO nniiwa nnyu alottiwaka nrummwa Paaulu, eseeni enra mmuupuweloni mwinyu? Niire mummuupuwela misiyonaariyu oolipa nrima, aadhuwela ohudhiha saana, aahiidho ntthu aatinkhe iliivuru dhawaatta dha mbiibiliyani? Owo oopaka itthu idho dhootheene! Masi nkhama eniiraneya awa ni hiyo, ivaara dhikina owo aaniriipiwa nrima ni okhulumuwa. Nitho ivaara dhawaatta owo aaniwanana miyuupuwelo dhoohiloka.

² Munsome aRoma 7:21-24. Ewarakha awaatikhenle iye aRooma, Paaulu aahaaleela makristau miyoonelo-dhe dheidho dhinlikana ni miyoonelo dhihu. Hata Paaulu aari nkristau oolipa moomunepani, owo aahikhalana ekhotto yuulupale ya otthuna onhakalaliha Muluku ni okathi omodharu owanana miyuupuwelo dha otthuna opaka itthu dhoohiloka. Ohiya-vo, Paaulu aaniriipiwa nrima mwaha wa dhoovonya-dhe dha khalai ni nxankiho aaviriha iye mweekumini-mwe.

3. Eseeni nin’ya nhu othokorerya yoosoma ela? (Moone-tho “Oleeliheriwa wa Nuulumo.”)

³ Hata ivaara dhikina Paaulu aariipiwa nrima, owo khaahin’ye aweriwaka ni miyuupuwelo dhoohiloka.a Yoosoma ela, ninoothokorerya makoho ala anttharelana: Eseeni yaamwiiriha nrummwa Paaulo olotta wiira aari “ootakhaliwa”? Ndho, eseeni yaankhalihenre owanana miyuupuwelo dhoohiloka? Khi hiyo, nin’ya owerya dhai owanana miyuupuwelo dhoohiloka?

ESEENI YAAMWIIRIHA NRUMMWA PAAULU OKHALANA MIYUUPUWELO DHOOHILOKA?

4. Eseeni yaamwiiriha nrummwa Paaulu okhalana miyuupuwelo dhoohiloka?

⁴ Dhoovonya-dhe dha khalai. Ahinaakuve okhala nkristau, Paaulu yoowo aadhuweliwa okhala Saulu, aahipaka itthu dhaamwiirinhe othanana nhoolo-mwa. Mwa ntakihero, owo aahoona ni aahaakhuleliha wiiphiwa wa nlopwana mmodha oororomeleya aaitthaniwa Esteevau. (Mit. 7:58; 8:1) Nitho Saulu taahoolela ottharatthariwa moowali wa makristau.—Mit. 8:3; 26:9-11.

5. Paaulu aaidhoonela dhai mwaha wa dhoovonya-dhe dha khalai?

⁵ Nuumala okhala nkristau, nrummwa Paaulu aaniriipiwa nrima mwaha wa itthu aapanke iye khalai. Ni onkhala nkhama wiira vaavo okathi waavira awa, Paaulu aantepa oriipiwa nrima. Mwa ntakihero, okathi aawaatikhela iye ewarakha-ye yoopacera makristau a oKorintu mwaakha wa 55 Nuumala Kriistu Ora, owo aalontte wiira: ‘Nkimphwanela wiitthaniwa nrummwa, okhala wiira kaanittharatthara muloko wa Muluku.’ (1 aKor. 15:9) Nitho nuuvira iyaakha 5, ewarakha aawaatikhenle iye makristau a wEefesu, owo aalontte wiira aari ntthu ootepa ohikhalana efaita waaxira anna ni arokora ootheene. (aEefe. 3:8) Ni aamwaatikhelaka Timootiyu, Paaulu aalontte wiira owo ‘aahinveiha Muluku, aahaattharatthara arumeyi-ye ni aari awiidhoona.’ (1 Tim. 1:13) Nkahaya muupuwele moopora Paaulu oonela iye vaavo aasekurya iye miloko ni aaphwanya anna aahiidho amudhi-ya anna awo aattharatthara iye.

6. Nxankiho seeni nkina waanriipiha nrima Paaulu? (Moone-tho enoota.)

⁶ Nxankiho waamwiiriha woona owereya vawaatta. Paaulu aalontte wiira nxankiho owo waari nkhama ‘mwiiwa waaheliwe mweerutthuni-mwe.’ (2 aKor. 12:7) Paaulu khaalontte etthu yaanwereya, masi moolumo-ye annoonihera wiira woonawene waari nxankiho wa veerutthuni, mmuupuweloni aahiidho etthu ekina yaamwiiha oriipiha nrima.b

7. Seeni Paaulu waanliperya awa opaka itthu dhooreera okathi wootheene? (aRoma 7:18, 19)

⁷ Ohimalela. Ivaara dhikina Paaulu aaniriipiwa nrima mwaha wa ohimalela. (Munsome aRoma 7:18, 19.) Hata Paaulu aatthuna opaka itthu dhooreera, ohimalela waanimwiiriha opaka itthu dhoohiloka. Owo aaniilipihera opaka itthu dhooreera, ohiya itthu dhoonanara. (1 aKor. 9:27) Masi hata eri dhiidho, Paaulu aanivonya. Moohaakanyera, owo aaniriipiwa nrima nuumala olotta aahiidho opaka etthu aailipihera iye ohiya okhuma khalai!

ESEENI YAANKHALIHENRE NRUMMWA PAAULU OWERYA OWANANA MIYUUPUWELO DHOOHILOKA?

8. Nkhama inoonihera awa iwarakha dha Paaulu, eseeni yaankhalihera owo owerya owanana miyuupuwelo dhoohiloka?

⁸ Nkhama inoonihera awa iwarakha aatinkhe iye, Paaulu aanuupuwela vawaatta moopora munepa wa Muluku waakhanla awa onkhalihera owo vamodha ni makristau makina owerya owanana miyuupuwelo dhoohiloka. (aRoma 8:13; aGal. 5:16, 17) Ivaara dhawaatta Paaulu aanilotta mikhalelo ni itthu dhoohiloka makristau anreerela awa oxaka. (aGal. 5:19-21, 26) Elo enoonihera wiira Paaulu aanidhuwela dhoottettheya-dhe, aanisoma Dhawaatikhiwa ni aahoona marukunuso aareerela iye opaka wiira awerye owanana miyuupuwelo dhoohiloka. Ni moohaakanyera, owo aanivarihela nteko miruku aavaha iye atthu akina.

9-10. Eseeni yaankhalihera Paaulu owerya owanana miyuupuwelo dhoohiloka? (aEefeso 1:7) (Moone-tho efootu.)

⁹ Nnaamwi ivaara dhikina Paaulu aariipiwa nrima, dhaahikhala itthu dhawaatta dhaankhalihera ohakalala. Mwa ntakihero, owo aanihakalala vaavo aaleeliwa iye dhawiiraneya dhooreera dha anna a miloko dhikina. (2 aKor. 7:6, 7) Nitho aanihakalala mwaha wa okhalana waataana wooreera ni anna ni arokora. (2 Tim. 1:4) Ohiya-vo, Paaulu aanihakalala mwaha wa okhalana waataana woolipa ni Yehova ni onrumeela ni ‘yawuupusera ya nrima yooreera.’ (2 Tim. 1:3) Hata okathi yoole aatthukeliwe iye oRooma, Paaulu aahaatumererya anna ni arokora ‘otteeliwa nrima mwa Apwiya.’ (aFil. 4:4) Moolumo a Paaulu annoonihera wiira owo khuupuwela okathi wootheene dhoovonya-dhe ni mixankiho-dhe. Ndho enooneya wiira vaavo owo aariipiwa iye nrima, aaniilipihera owanana miyuupuwelo dhoohiloka wiira atthikele okhala oohakalala.

¹⁰ Etthu ekina yaankhalihera Paaulu owerya owanana miyuupuwelo dhoohiloka, waari wuupuwelela yawoopola nkhama etthu yavameekhaaya Yehova aanvanhe iye. (aGal. 2:20; munsome aEefeso 1:7.) Mwaha wa elo, aaniroromela wiira Yehova ammulevelela oreela wa nkuttho wa Yeesu Kriistu. (aRoma 7:24, 25) Ndho itthu idho dhaahinkhalihera Paaulu ‘onvarela nteko’ Muluku moohakalala.—aHeb. 9:12-14.

11. Ntakihero na Paaulu ninnilipiha dhai?

¹¹ Nkhama Paaulu, ni hiyo-tho pooti woona wiira ninnitthuneya wiilipihera wuupuwela, olotta aahiidho opaka itthu mwa enamuna eninhakalaliha Yehova. Ndho ivaara dhikina hiyo pooti oriipiwa nrima mwaha wa ohiwerya onhakalaliha Yehova okathi wootheene. Nrokora mmodha oniitthaniwa Elizac, yoowo orina iyaakha dhinxira 26, onnilotta etthu eninkhalihera owanana mixankiho-dhe, airaka: “Kinnilipa vawaatta mwaha wa odhuwela wiira nkhama Paaulu, ni miyo-tho kinnitthuneya opaka marukunuso. Ntakihero na Paaulu ninnoonihera wiira Yehova onnidhuwela mixankiho inaaphwanya arumeyi-ye.” Nkhama Paaulu, nin’ya owerya dhai onrumeela Yehova ni yawuupusera ya nrima yooreera ni moohakalala, hata ivaara dhikina nikhalakana miyuupuwelo dhoohiloka?

NIN’YA OWERYA DHAI OWANANA MIYUUPUWELO DHOOHILOKA?

12. Eseeni ninreerela nhu opaka wiira niwerye owanana miyuupuwelo dhoohiloka?

¹² Nhihiye okhala yoolema ya ovara miteko dhooreera dha omunepani. Okhalana yoolema ya ovara miteko dhooreera dha omunepani onninikhalihera wuupuwelela itthu dhooreera. Muupuwele ela: Vaavo niniilipihera nhu oca eyooca yooreerela, opaka exersiisiyu khuta nihiku ni orupa okathi omphiyera, ekumi nhu ennikhala saana. Mwa enamuna emodharu, hiyo ninnilipa vaavo nninsoma nhu Biibiliya, olaleerya, okocihera mithukumano, orowela ni wiirela mphantta. Ndho ohihiya wiilipihera opaka itthu idho, onoonikhalihera owanana miyuupuwelo dhoohiloka ni okhala oohakalala.—aRoma 12:11, 12.

13-14. Okhalana yoolema ya ovara miteko dhooreera dha omunepani waakhalihenre dhai anna ni arokora akina?

¹³ Nthokorerye yawiiraneya ya John, yoowo aaphwanyiwena eretta ya kanseri awoopiha arina iyaakha 39. Woopacerani, owo aaniriipiwa nrima vawaatta. Ndho mwaha wa elo, owo aanikoha wiira: “Seeni ekiphwannye awa eretta ela kiri rapasi?” Okathi owo, mwane aaira arina iyaakha tthaaru. Eseeni yaankhalihenre John owanana miyuupuwelo dhoohiloka? Owo onlotta wiira: “Nnaamwi kaakhulumuwa, kaaniilipihera wiira emudhi aka ehihiye okhalana yoolema ya ovara miteko dhooreera dha omunepani. Ndho naanirowela mithukumano dhootheene dha mmulokoni, nteko woolaleerya ni onkokhorela Muluku vatthekoni moohihiyerera, hata waari vooxankiha opaka elo.” Uupuwelelaka ottuli, John onlotta wiira: “Vaavo ntthu onoophwanya awa nxankiho muulupale onnikhulumuwa, masi nuuvira okathi onniphwanya ikuru ni woona opheta wa Yehova. Nkhupali wiira Yehova onawookhaliherani nkhama dhiidhaale okikhalihenre iye.”

¹⁴ Eliza, yoowo ninlotte nhu ottuli, onlotta wiira: “Okathi wootheene kinrowelaka mithukumano ni kimpaka aka yoosoma aka ya omwaneene, kinnoona wiira Yehova onnikiiwa kanvekelaka ni onnikipheta mweekhweeli. Ndho elo ennikihakalaliha vawaatta.” Nolan, yoowo onrumeela nkhama ntokweene a esirkwiitu wÀfrica vamodha ni amwaariye Diane, onlotta wiira: “Ninniilipihera ohihiya okhalana yoolema ya ovara miteko dhooreera dha omunepani, hata okathi ninkhumuwa nhu. Okathi wootheene Yehova onninikhalihera okhalana moonelo wooreera. Hiyo ninniilipihera wuupuwelela wiira Yehova onoonikhalihera ni onireeliha. Nnaamwi nihidhuwelaka moopora on’ya iye opaka, masi ninnikhupali elo.”

15. Eseeni nintthuneya nhu opaka wiira niwerye owanana miyuupuwelo dhoohiloka? Nvahe ntakihero.

¹⁵ Ninnitthuneya opaka itthu dhikina wiira niwerye owanana miyuupuwelo dhoohiloka. Mwa ntakihero, muupuwele wiira munwereiwa niparari. Wiira nwerye openuwa, ohiya pahi opaka exersiisiyu khuta nihiku, munnitthuneya opaka itthu dhikina. Nkhama othokodha etthu enkhumihera eretta elo aahiidho olotta ni meetiku. Mwa enamuna emodharu, wiira niwerye owanana miyuupuwelo dhoohiloka, nihaana othokodha ninrumeelaka Biibiliya ni iliivuru dhihu aahiidho olotta ni nkristau oolipa moomunepani wiira anikhalihere. Nirowe nithokorerye itthu dhikina ikhanle onikhalihera.

16. Itthu seeni ninreerela nhu opaka vaavo nimpacera nhu okhalana miyuupuwelo dhoohiloka? (Esalimo 139:1-4, 23, 24)

¹⁶ Munvekele Yehova wiira ookhalihereni odhuwela etthu enwiirihani okhalana miyuupuwelo dhoohiloka. Mwene Davidi khaakanyera wiira aanidhuweliwa saana ni Yehova. Tivondho aahinvekela wiira ankhalihere odhuwela etthu yaamwiiriha okhalana miyuupuwelo dhoohiloka. (Nsome Esalimo 139:1-4, 23, 24.) Ni nyuwo-tho pooti onvekela Yehova wiira ookhalihereni odhuwela etthu enwiirihani okhalana miyuupuwelo dhoohiloka ni wiira mphwanye omaaleleya. Nyuwo pooti wiikoha wiira: ‘Eseeni enkiiriha okhalana miyuupuwelo dhoohiloka? Niire yookhala etthu enkiiriha ivaara dhawaatta okhalana miyuupuwelo dhoohiloka? Niire vaavo dhinkiphwanya awa miyuupuwelo dhoohiloka, kinniilipihera wuupuwelela itthu dhooreera?

17. Miyaha seeni ninreerela nhu osoma wiira niwerye owanana miyuupuwelo dhoohiloka? (Moone-tho efootu.)

¹⁷ Nthanle miyaha dhinvarihana ni nxankiho nnyu vaavo mumpaka nnyu yoosoma ya omwaneene. Ivaara dhikina, osoma voohima dha nkhalelo mmodha wa Yehova pooti wookhaliherani vawaatta. Mwa ntakihero, wuupuwelela voohima dha nkuttho ni olevelela wa Yehova, waahinkhalihera vawaatta nrummwa Paaulu. Ni nyuwo-tho pooti opaka etthu emodharu nsomaka Eliivuru Enaakhaliherya Anamoona a Yehova Otokosa Myaha Sikumiheriwe, Índice das Publicações da Torre de Vigia aahiidho miyaha dhimphwanyaneya ni elottelo nnyu iri va jw.org dhinlotta voohima dha mikhalelo dha Yehova nkhama omoriwa ikharari, olevelela ni opheta woororomeleya. Nuumala ophwanye miyaha dhikhanle wookhaliherani, mpake eliista ni mpwehe opuro mun’ya nnyu nkawerya woona saana. Ndho mwampacera okhalana miyuupuwelo dhoohiloka, ntthikele osoma miyaha dhiri eliista elo. Nitho mwiilipihere ovarihela nteko itthu munsoma nnyu moovarihana ni nxankiho nnyu.—aFil. 4:8.

18. Miyaha seeni dhaakhalihenre anna ni arokora akina?

¹⁸ Eliza, yoowo ninlontte nhu ottuli, aahithokorerya yawiiraneya ya Yoobi okathi wa yoosoma-ye ya omwaneene. Owo onlotta wiira: “Nuumala osoma yawiiraneya ya Yoobi, koowerya woona wiira nkhama eniiraneya awa ni miyo, owo dhaahimphanya mixankiho dhawaatta okathi omodharu. Yoobi khaadhuwela seeni dhaamphwanya awa mixankiho idhe, masi hata eri dhiidho, owo khaahin’ye ororomela nikhalihero na Yehova.” (Yobi 42:1-6) Diane, yoowo ninlotte nhu ottuli, onlotta wiira: “Miyo vamodha ni amamunaka, noosoma voohima dha mikhalelo dha Yehova nirumeelaka eliivuru Achegue-se a Jeová. Ninninxukhurela vawaatta Yehova woona wiira onninikhalihera otakiha mikhalelo-dhe. Vaavo ninriipiwa nhu nrima mwaha wa dhoovonya dhihu, ninnuupuwela moopora Yehova onnihudhiha iye ni onnikhalihera iye wiira nikhale atthu oohakaalala. Ndho elo enniniiriha otepa omwaattamela.”—Yes. 64:8.

WUUPUWELELA NLIPELELO NIHU NA NHOOLO

19. Eseeni ninreerela nhu okhupali?

¹⁹ Ekhweelli wiira hata niilipiheraka opaka itthu dhootheene nithokorenrye nhu yoosoma ela, ivaara dhikina nikaankhalana miyuupuwelo dhoohiloka ni oriipiwa nrima. Masi nikhaliheriwaka ni Yehova, ninoowerya owanana miyuupuwelo dhoohiloka ni okhala oomaaleleya. Ndho nikhupali wiira mahiku awaatta, nikaankhalana yawuupusera ya nrima yooreera ni mathowa anniiriha onrumeela Yehova moohakalala.

20. Yoolakela seeni ninreerela nhu okhalana?

²⁰ Ootheene nhu nikhalena yoolakela ya ohihiya owanana miyuupuwelo dhoohiloka mwaha wa itthu nipanke nhu khalai, mixankiho dhihu aahiidho ohimalela. Nikhaliheriwaka ni Yehova, ninoowerya owanana miyuupuwelo dhoohiloka. (Esal. 143:10) Tivondho nihaana wuupuwelela nlipelelo nihu na nhoolo, okathi yoowo nin’ya nhu ohikhalana miyuupuwelo dhoohiloka. Ohiya-vo, khuta nihiku nikavenya nihikhanlena miyuupuwelo dhoohiloka ni niri oohakalala mwaha wa onrumeela Muluku nhu oopheta, Yehova!