Abrahaamu ni Saara Annin’yara Mwaana

Abrahaamu ni Saara yaahiviriha miyaakha dhawaatta ethelanne. Awo yaahihiya empa-ya Uri ni mireerelo-dha ekarowa okhala ntentani. Masi ata ori dhiidho Saara khaikhupanyera, okhala wiira aninroromela Yehova.

Saara anitthuna vawaatta okhalana mwaana, tivoondho aahinleela Abrahaamu wiira: ‘Mmuthele nrumeyi aka Akaari wiira ooyareleni mwaana, ndho miyo kinoonthokorerya mwaana owo nkhama mwanaka.’ Nuuvira okathi vakhani, Akaari ahin’yara mwaana ni Abrahaamu, yowo aitthaniwa Esmayiili.

Nuuvira miyaakha dhawaatta, Abrahaamu arina miyaakha 99 ni Saara arina 89, awo yaahisekuryiwa ni alopwana araru. Abrahaamu aahakusa wiira yaakilathi vamuruthini ni ece vakhani. Nyuwo munnidhuwela alopwana ale yaari ani? Awo yaari malaikha! Mmodha a yawo aahinleela Abrahaamu wiira: ‘Mwaakha onra, okathiya yoola, nyuwo ni mwaarinyu atthu anoon’yara mwaana.’ Saara ari ntentani aniwiwa atthu ale okathi yaavanela awa. Nuuvenya aahipacera otheya ni akuupuwela wiira: ‘Miyo kihuluvala, kin’ya owerya dhai on’yara mwaana?’

Nuuvira mwakha mmodha, Saara aahikhalana mwaana, nkhama dhiidhale nlaikha na Yehova nalontta awa. Abrahaamu aahinvaha ndhina na wiira Isaakhi, nenno nintaphulela “Otheya.”

Okathi Isaakhi aariyeena miyakha 5, Saara aahoona wiira Esmayiili aahipacera onhadhula mwane. Okhala wiira Saara aanitthuna onkhapelela mwane, aahinvekela Abrahaamu wiira amwiikare Akaari ni mwane Esmayiili. Woopacerani, Abrahaamu khakhulenle opaka elo. Masi Yehova aahinleela Abrahamu wiira: ‘Mpake ele Saara onoovekelaiyeni. Miyo kinonkhapelela Esmayiili. Masi itthu kolaihenraakani dhin’ya waakhwanela orwela wa Isaakhi.’