Ihasara Tthaaru Dhoopacera

Weexiitu Anaisarayeeli yaakhanyereriwa ovara miteko nkhama ipottha. Ndho Yehova aahinleela Moise ni Arooni orowa onleela Farawo wiira: ‘Mwaahiye atthu aka erowe yakikokhorele moothakoni.’ Masi Farawo aari ntthu awiikuserera, ndho aahaakhula wiira: ‘Miyo nkintthuna wiiwa ele Yehova onlotta iye ni nkinkhala-khala khaahiyaka Anaisarayeeli erowaka!’ Mwaha wa elo, Farawo aahinanariwa ni aahaacerera miteko aavariha iye Anaisarayeeli. Munnidhuwela etthu Yehova aapanke iye? Owo aahikhumihera ihasara 10 dhoohirya Weexiitu. Yehova aahinleela Moise wiira: ‘Mwanleele Farawo wiira, okhala wiira nyuwo nnookhootta okiiwelela, maadhi ootheene a Nratthi Niilu anoothatuwa ephome. Moise aahirowa olootta ni Farawo. Okathi Arooni aamanne iye maadhi ale ni ttootto-ye, maadhi ootheene a nratthi Niilu yaahithatuwa ephome ni ihopa dhootheene dhaahuukhwa!’ Okhuma okathi-ya yoole maadhi a nratthi ole khiyaawuryeya. Masi hata eri dhiidho, Farawo khaahin’ye Anaisarayeeli orowa onkokhorela Yehova.

Noovira esumana emodha Yehova aahinleela Moise wiira: ‘Nrowe-tho mwanleele Farawo wiira okhala wiira onookhotta waahiya atthu aka orowa, Weexiitu wootheene anoodhala-wo anaphulu!’ Ndho Arooni aahinkusa ttootto-ye anttukhulela odhulu, tivondho Weexiitu wootheene yaahidhalawo anaphulu. Anaphulu awo yaaniphwanyaneya khuta opuro vakaamani ata ntixelani. Tivondho Farawo aahimwiirela Moise wiira anvekele Yehova omaliha ihasara idhe nitho aahilaihera wiira aamwaahiya Aisarayeeli orowa onkokhorela Muluku-ya. Yehova aahimaliha ehasara ele ya anaphulu. Okhala wiira wEexiitu wootheene waaninkha-wo, atthu a Weexiitu yaahaattottela anaphulu ootheene ookhwa ewuukela. Hata eri dhiidho Farawo aahaakhottiha Anaisarayeeli orowa!

Tivondho Yehova aahinleela Moise wiira: Mmuleele Arooni wiira ankuse ttootto-ye ammanena vathi wiira ntthupi nithatuwe ipilimithi. Arooni aahipaka elo ni dhaahikhumelela ipilimithi dhawaatta. Okathi atthu a wEexiitu yoonna awa ele, yaahinleela Farawo wiira ihasara idha dhinkhuma wa Muluku. Masi ata eri dhiidho Farawo ahaakhoottihera Anaisarayeeli orowa.