Ihasara 6 Dhoottharelana

Moise ni Arooni yaahitthikela orowa onleela Farawo wiira: Muluku onlotta wiira mwaahaahiye Aisarayeeli erowa, Weexiitu wootheene anoodhalawo aphuure.’ Ndho yahikhumelelawo aphuure uulupale ni ooluma ittheko dha atthu a weexiitu. Masi aphuure awo khiyaaphin’ye ittheko dha Aisarayeeli. Ehasara ela ni dhaattharelana dhaakhumelela pahi atthu a Weexiitu. Okathi Farawo oonne iye elo aahinleela Moise wiira: Munvekele Muluku nnyu wiira aamalihe aphuure ala, ndho atthu kinawaahiya erowe. Okathi Yehova aamalinhe iye aphure ale, Farawo aahirukunsa mupuwelo-ye.

Tivondho Yehova anleenle iye Moise wiira inama dhootheene dha atthu a Weexiitu ikaanwereiwa ni inookhwa. Nihiku naattharelana inama dha atthu a Weexiitu dhaahipacera owereiwa ni okhwa! Inama dha atthu a wiIsarayeeli paahi ti dhahanle iri ikumi. Farawo aahidhuwela elo masi okhala wiira aari awiikuserera, Khawaakhulelinhe Aisarayeeli orowa.

Ndho Yehova aahinleela Moise wiira akuse ettuurwa atathele odhulu. Vaavo ettuurwa elo yaapacenre awa omorela vathi, atthu a Weexiitu ni inama-dha yahaaphwanya makhwatta muulupale ni oowereya vawaatta. Hata eri dhiidho Farawo khawaakhulelinhe Aisarayeeli orowa.

Moottharela Yehova aahinruma Moise onleela Farawo wiira: ‘Okhala wiira nhaawateriha atthu aka orowa, meelo enookhumelela epula ya maralala.’ Nihiku naattharelana Yehova aahiiriha orupa epula yawaatta ni itari. Etthu nkhama ele khiyaatanke wiireya Weexiitu. Epula ele yaahihonona mittaikho ni itthu dhootheene dhaaliwe mmatta. Masi nttetthe yaakhala-wa aIsarayeeli epula elo khiyaaphin’ye. Ndho Farawo aahinleela Moise wiira: ‘Munvekele Muluku nnyu Yehova wiira amalihe epula ela! Nuumala-vo atthu pooti orowa.’ Vaavo elo yaamwanrye awa, Farawo aahirukunsa muupuwelo-ye.

Ndho Moise aahinleela Farawo wiira: ‘Mapalaka, anookhura itthu dhootheene ihanle mmatta ihihononiwe ni epula.’ Ndho yaahikhumelela mapalaka awaatta yaawo yaakhunre mittaikho ni itthu dhootheene dhaahanle mmatta. Farawo aahinleela Moise wiira: ‘Munvekele Yehova wiira amalihe mapalaka ala.’ Yehova aahimaliha mapalaka ale, masi Farawo khaahin’ye wiikuserera.

Moottharelana Yehova aahinruma Moisa wiira: ‘Mookolele ntata ninyu wiirimu.’ Vaavo Moise aapanke iye elo, nanaanoru yaahikhumelela ewiriphi. Mpuwa wa mahiku mararu atthu a Weexiitu khiyaawerya woona etthu. Masi nttetthe yakhalawo aIsarayeeli khiyaaphinyewo epiiphi ele.

Farawo aahimwiitthana Moise akanleela wiira: ‘Nyuwo ni atthu nnyu atthu pooti orowa. Masi atthu ehikuse inama-dha.’ Moise ahaakhula wiira: ‘Ninookusa inama dhihu wiira nanvahe nkuttho Yehova.’ Farawo aahinanariwa vawaatta. Ndho aahikhuwela ohoolo wa Moise ni Arooni airaka: ‘Atthu ekhume-vo! Atthu katthikela owoona vaava, miyo kinoowiipha.’