Aisarayeeli Anninlaihera Yehova Etthu Yootthuneya

Noomala ovira miyeeri miili Aisarayeeli ekhumme Weexiitu, yaahiphiya Omwaako Sinaayi ni yaahiviriha okathi vakhaani eri opuro ole. Ndho Yehova aahinleela Moise wiira awele vadhulu va mwaako. Ndho akanleela-tho wiira: ‘Miyo koowoopola Aisarayeeli weepotthani. Akhala wiira awo anawiiweleela itthu dhootheene kinaarumaka, awo anookhala atthu aka avameekhaaya.’ Moise aahikhuruwa vadhulu va mwaako ni aaleela Aisarayeeli itthu dhootheene aleeliwe iye ni Yehova. Nyuwo munnidhuwela etthu Aisarayeeli yaakhunla awa? Awo yaakhunle wiira: ‘Hiyo nikaampaka itthu dhootheene Yehova onnirume iye.’

Moise aahitthikela-tho Omwaako Sinaayi. Ni Yehova aahinleela wiira: ‘Yavira mahiku maraaru, miyo kinoora olootta ni nyuwo. Ndho mwaaleele atthu awo wiira ehiwele Omwaako Sinaayi.’ Moise aahikhuruwa vadhulu va mwaako ni aahaleela Aisarayeeli wiira yikocihere, okhala wiira Yehova aaya waaleela etthu yootepa otthuneya.

Noovira mahiku maraaru, Aisarayeeli yaahoona meeku ooripa ni odherima Vamwaako Sinaayi. Nitho yaahiwa oruuma wa itari ni nlope. Moottharelana, yaahona etthu yaavarela nkhama mooro ekhuruuwaka vamwaako. Anaisarayeeli yaahoova vawaatta. Ni vamwaako vale wahidhalavo mwiisi ni wanithukumelavo vawaatta. Nitho oruma wa nlope wanitepa wacerereeya. Ndho variyari wa mooro, Aisarayeeli yaahiwa ndhu na Muluku niiraka: ‘Miyo ka Yehova. Nyuwo nhinkokhorele Muluku nkina oohikhala miyo.’

Moise aahitthikela-tho owela Vamwaako Sinaayi, ni Yehova ahinvaha malamulo yaawo Aisarayeeli yareerela awa otthara. Malamulo awo yalootta moopora Aisarayeeli yaaya-wa ekankokhorela Muluku ni yaanilootta itthu yaarereela awa opaka ni ohipaka. Moise aahatikha malamulo awo ni ahisoma ohoolo wa Aisarayeeli ootheene. Ndho awo yaahinlaihera Muluku yiiraka: ‘Hiyo nikaampaka itthu dhootheene munniruma nnyu.’ Masi niire yaahakhwanihera itthu dhootheene yalaihenra awa?