YOOSOMA 05
Biibiliya Nhupi Muluku Onaaroihela iye Apinaatamu
Yehova oonivaha etthu yootepa otthuneya: Biibiliya. Owo orina iliivuru 66 ikhaani-ikhaani. Ndho woonawene pooti wiikoha wiira: ‘Biibiliya okhumme owi? Taani ori mwaneene Biibiliya?’ Wiira naakhule makhoho ala, nirowe noone moopora Biibiliya ophin’ye iye olelo-va.
1. Akhala wiira Biibiliya aatikhiwe ni atthu, seeni niniira nhu Nuulumo na Muluku?
Biibiliya aatikhiwe ni alopwana 40 ni dhoovira iyaakha 1.600 aatikhiwaka. Opaceriwe waatikhiwa mwaakha wa 1513 Ahinatthi Kiristu Ora ni omalihiwe mwaakha wa 98 Noomala Kiristu Ora. Biibiliya aatikhiwe ni atthu a makhalelo oovirikana. Akina yaari amakampusi, anamaciya ni mamwene. Masi hata eri dhiidho, Biibiliya ootheene tawiiwanana. Elo eweryanen’ye dhai? Yooweryaneya okhala wiira Biibiliya onkhuma wa Muluku. (Munsome 1 aTesaloonika 2:13.) Miruku yaatikha alopwana ale mBiibiliyani, khidhaari dhaawa. Masi awo ‘yaahilotta moolumo a Muluku yeettihiwaka ni nnepa wawaarya.’a (2 Pedru 1:21) Ndho Muluku aarumeenle nnepa-ye wawaarya wiira aakhalihere alopwana ale waatikha miyuupuwelo-dhe.—2 Timootheyo 3:16.
2. Muluku aaruuhenle aani Biibiliya?
Muluku oompaka Biibiliya para “atthu a maloko ootheene, a mahimo ootheene, a mattaava ootheene ni makhuli ootheene.” (Munsome Wiisuupulula 14:6.) Mwaha wa elo, Muluku ohiiriha wiira Biibiliya aphwanyaneye ilottelo dhawaatta oxira iliivuru dhootheene. Olelo-va atthu awaatta anoowerya osoma ihapari dhooreera dha mBiibiliyani, moohixikha elapo ankhala awa ni elottelo-ya.
3. Yehova onsunke dhai Biibiliya?
Biibiliya khareere oviriha mixankiho dhawaatta, masi hata eri dhiidho, khiyaavo etthu emoocelinhe Yehova olaleya nhupi-ye. Mwa ntakihero, Biibiliya aatikhiwe irumeeliwaka iwarakha dhawaakuva opereya. Ndho oweryanen’ye dhai Biibiliya oniphwanya olelo-va? Alopwana yaampheta Biibiliya yaanikopiyari ivaara dhawaatta Nuulumo na Muluku ni ephoole. Nxankiho nkina okhala wiira atthu yaarina owerya yaahehererya ommala-maliha Biibiliya. Masi alopwana akina yaahileva ikumi-dha wiira emwaakihere Biibiliya. Elo ennoonihera saana ele Yesaya 40:8 onlotta iye wiira: “Masu a Muluku ahu annikhala mahiku othene.”
NHUDHE ITTHU DHIKINA
Moone moopora Muluku aarumme iye atthu omwaatikha Biibiliya, moopora omwaakihenre iye ni moone etthu opanka iye wiira atthu ootheene ewerye osoma Nuulumo-ne.
4. Taani ori Mwaneene Biibiliya?
Moone EVIIDIYU. Nuuvinya munsome 2 Timootheyo 3:16, ni mwaakhule makoho anttharelana.
Akhala wiira Biibiliya aatikhiwe ni atthu, seeni eniiriwa iye Nuulumo na Muluku?
Nyuwo nnoona wiira nihaana okhupali wiira Muluku aahaaruma apinaatamu waatikha miyuupuwelo-dhe?
Mwaneene emperesa pooti onruma nanteko-ye waatikha ewarakha, masi nhupi ti wa mwaneene emperesa. Emodha-modharu, Muluku aaharuma atthu omwaatikha Biibiliya, masi nhupi ori mBiibiliyani okhumme wa Muluku
5. Biibiliya khareere ovira mixankiho dhawaatta masi oowerya okophola
Okhala wiira Biibiliya Nuulumo na Muluku, ndho moohaakanyera owo oomwaakihera. Biibiliya khareere oviriha mixankiho dhawaatta. Ovinya khalai atthu yaarina owerya yaahehererya omala-maliha Nuulumo na Muluku. Mwa ntakihero, ahooleli a itiini yaanakhottihera atthu onsoma Biibiliya. Masi hata eri dhiidho atthu awaatta yaahileva ikumi-dha wiira emwaakihere Biibiliya. Nirowe nindhuwele nlopwana mmodha owenrye opaka elo, moone EVIIDIYU, nuuvinya mwaakhule makoho anttharelana.
Mwaha wa odhuwela wiira atthu awaatta yaahiilipihera wiira emwaakihere Biibiliya, niire elo enniwiirihani odhiveliwa onsoma Biibiliya? Mwaha wa eseeni?
Nsome Esalimo 119:97, nuuvinya mwaakhule nikoho ninttharelana:
Eseeni yaawiirinhe atthu awaatta oleva ikumi-dha wiira entaphulele ni onkawa Biibiliya?
6. Biibiliya eliivuru ya atthu ootheene
Biibiliya eliivuru ehireere otaphuleliwa ni okaiwa oxira iliivuru dhootheene. Nsome Miteko 10:34, 35, nuuvinya mwaakhule makoho anttharelana:
Seeni Muluku ontthuna iye wiira Nuulumo-ne nitaphuleliwe ni okaiwa ilottelo dhawaatta?
Etthu seeni ehinreera woodhivelani voohima dha Biibiliya?
Atthu anaattamela
100%
olumwinku wootheene
anninsoma Biibiliya ni elottelo-ya
Biibiliya onnipwhanyaneya
3.000
ilottelo dhene
nteronene aahiidho oohimalela
Ahimpirimiriwa aBiibiliya amphiyera aahiidho anaattamela
5.000.000.000,
oxira iliivuru dhootheene
ATTHU AKINAKU ANLOTTA WIIRA: “Biibiliya eliivuru ya khalai yaatikhiwe ni apinaatamu.”
Nyuwo nnoonela dhai muupuwelo owo?
Etthu seeni enoonihera wiira Biibiliya Nuulumo na Muluku?
WUULUULA
Biibiliya Nuulumo na Muluku ni Muluku oopaka etthu wiira niwerye okhalana Biibiliya.
Ipontu dhuulupale
Biibiliya ontthuna olottani aahimaka wiira Muluku aahaaruma atthu wiira yaatike Nuulumo-ne?
Etthu seeni ehinreera woodhivelani voohima dha otaphuleliwa ni okaiwa wa Biibiliya?
Nnoonela dhai mwaha wa Biibiliya owerya okophola mixankiho dhawaatta? Nnoonela dhai vano ndhuwenle nnyu wiira Muluku ohiilipihera wiira ooleeleni nhupi-ye?
NTHOKODHE ITTHU DHIKINA
Nsome dhawiiraneya dha Biibiliya, ovinya okathi yoole aatikhiwa iye ni matata mpakha olelo ontaphuleliwa iye.
“Biibiliya Ophin’ye dhai Mahiku nhu Ala” (Despertai!, Novembro de 2007)
Moone moopora Biibiliya okophonle iye mixankiho miraru dhuulupale.
Moone mixankiho dhaaphwannye atthu yaantaphulela Biibiliya.
Biibiliya khareere okopiyariwa ni otaphuleliwa ivaara dhawaatta. Eseeni en’ya wookhupalihani wiira nhupi wa mBiibiliyani khorukunsiwe?
“Niire Biibiliya Nirinhuna Olelo ti Yoole a Khalai?” (Mwaha ori nsaaitini jw.org)
a Yoosoma 07, nin’ya ohudha wiira nnepa wawarya ikuru Muluku onrumeela iye wiira apake khuta etthu ontthuna iye.