YOOSOMA YA MWAHA 33
NCIPO 4 “Yehova ti Makampusi aka”
Mwaakhulele Opheta wa Yehova
‘Miyo kihoothanlani ni opheta woororomeleya.’—YER. 31:3; Tradução do Novo Mundo da Bíblia Sagrada.
ETTHU NIN’YA NHU OHUDHA
Nin’ya woona seeni nintthuneya nhu waakhulela opheta wa Yehova ni etthu ninreerela nhu opaka wiira nilipihe okhupali wihu wiira owo onninipheta.
1. Eseeni ewiirinheni wiivahererya wa Yehova? (Moone-tho efootu.)
NIIRE munnuupuwela nivekelo mwaapanke nnyu munleelaka Yehova wiira mwaatthuna onrumeela ekumi nnyu yootheene? Nyuwo mwaahipaka yoothanla elo, okhala wiira mwaahindhuwela saana Yehova ni mwaanimpheta. Tivondho mwaahinlaihera Yehova wiira mwaampweha opuro woopacera opaka yootthuna-ye ni khimwaare nhiye ompheta ni nrima nnyu wootheene, ni muupuwelo nnyu wootheene ni ikuru dhinyu dhootheene. (Mar. 12:30) Ndho okhuma nenne mwiivaherenrye nnyu, ompheta winyu Yehova onnitepa olipa. Nkahaya muupuwele wiira ntthu mmodha onnookohani wiira: “Niire munnikhupali wiira munnimpheta Yehova?” Moohaakanyera nyuwo mwaammwaakhula ntthu owo moohovelele, mwiiraka: “Miyo kinnimpheta vawaatta Yehova oxira itthu dhootheene.”
Niire munnuupuwela opheta wuulupale mwaarinnyuna ni Yehova okathi mwaaivaherenrye nnyu ni opatisiwa? (Moone ettima 1)
2-3. (a) Yehova ontthuna wiira nikhupali eseeni? (Yeremiya 31:3) (b) Eseeni nin’ya nhu woona yoosoma ela?
2 Vano, nkahaya muupuwele wiira ntthu nkina onnookohani wiira: “Niire nyuwo munnikhupali wiira Yehova onnoophetani?” Niire nyuwo mwaamoovelela waakhula muupuwelaka wiira Yehova khanoophetani? Nrokora mmodha yoowo ohuiwale ettheko ahooniheriwa iye ophetiwa okathi aari iye mwaana, onlotta wiira: “Miyo nkinaakanyera wiira kinnimpheta Yehova ni nrima wootheene. Masi ivaara dhawaatta kinniikoha akhala wiira mweekhweeli Yehova onnikipheta.” Masi eseeni en’ya wookhaliherani odhuwela moopora Yehova onwoonelaiyeni?
3 Yehova ontthuna wiira nyuwo nkhupali ni nrima wootheene wiira owo onnoophetani. (Munsome Yeremiya 31:3; Tradução do Novo Mundo da Bíblia Sagrada.) Yehova ohoothanlani wiira nkhale nxirikha-ye. Ndho okhuma nenne mwiivaherenrye nnyu mpatisiwa, Yehova ohoovahani etthu yootepa otthuneya ori opheta-we woororomeleya. Elo entaphulela wiira owo onnoophetani vawaatta ni khankhala-khala oonyanyalakani. Okhala wiira Yehova onniwoonihera opheta-we woororomeleya arumeyi-ye ootheene oororomeleya, elo enoonihera wiira onniwoona okhala ootthuneya woohelani mpuwa nyuwo. (Mal. 3:17) Yehova ontthuna wiira nkhupali wiira onnoopheta nkhama Paaulu aakhupali iye wiira aaniphetiwa ni Yehova. Okhupali wiira aaniphetiwa ni Yehova, waahimwiiriha Paaulu waatikha wiira: ‘Tthiri, kinnikhupali wiira nnakhala okhwa, aahiidho ekumi, wala malaikha, nnakhala ikuveernu, aahiidho itthu dhikhanle nenna-va wala itthu dhin’ya okhumelela nhoolo, nnakhala owerya, wala itthu iri odhulu, nnakhala itthu dha vathi, aahiidho itthu ipattusiwe, khadhinwerya onivalaanya ni opheta wa Muluku.’ (aRoma 8:38, 39) Yoosoma ela, nin’ya woona seeni eri awa etthu yootthuneya okhupali wiira Yehova onninipheta ni etthu ninreerela nhu opaka wiira nikhupali elo.
SEENI NINTTHUNEYA NHU OKHUPALI WIIRA YEHOVA ONNINIPHETA?
4. Muupuwelo seeni wawootha Satana ontthuna iye wiira nikhupali, ni nin’ya owerya dhai okhootta muupuwelo owo?
4 Okhupali wiira Yehova onninipheta, onninikhalihera okhootta ‘miteko dhoolavilavi’ dha Satana. (aEefe. 6:11) Satana onnipaka itthu dhootheene onwerya iye wiira aniirihe ohiya onrumeela Yehova. Enamuna emodha ompaka iye elo, ori omwarya-mwarya muupuwelo wawootha wa wiira Yehova khannipheta. Masi nhiliyale owo onnipaka elo wiira aniphare. Biibiliya onninlikanyiha Satana ni mwatto. (1 Ped. 5:8, 9) Akhalawene amwatto waadhivela waaphara asinama ookhweya ni ahinwerya wiidhaakiha. Mwa enamuna emodharu, Satana onnirumeela muupuwelo owo saasaasa vaavo ninriipiwa nhu nrima mwaha wa itthu dhinikhumelenle khalai ni mixankiho ninviriha nhu nenna-va aahiidho wuupuwela moopora ekumi nhu en’ya awa okhala nhoolo. (Mir. 24:10) Satana ontthuna wiira nitteettheye wiira nihiye onrumeela Yehova. Masi ninoowerya ‘onkhootta Diyaabu’ vamodha ni miteko-dhe dhootheene dhoolavilavi akhala wiira khaninhiya olipiha okhupali wihu wiira Yehova onninipheta.— Yak. 4:7.
5. Seeni eri awa etthu yootthuneya okhupali wiira Yehova onninipheta?
5 Okhupali wiira Yehova onninipheta, onnilipiha waataana wihu nuuwo. Eseeni enniiriha olotta dhiidho? Okhala wiira Yehova onipattunse mwa enamuna enniiriha woona okhala etthu yootthuneya owoonihera waapheta atthu akina ni woona oreera vaavo nimphetiwa nhu. Vaavo ntthu nkina onoonihera iye onipheta, elo enniniiriha ompheta ntthu owo. Mwa enamuna emodharu, okathi ninkhupali nhu wiira Yehova onninipheta ni onninivaha efaita, elo enniniiriha otepa ompheta Yehova. (1 Yoh. 4:19) Nitho vaavo nintepa nhu ompheta Yehova, owo onnitepa-tho onipheta. Biibiliya onoonihera saana elo airaka: ‘Mmwaattamele Muluku, vano owo onoowaattamelani.’ (Yak. 4:8) Masi eseeni ninreerela nhu opaka wiira nikhupali ni nrima wootheene wiira Yehova onninipheta?
ESEENI EN’YA ONIKHALIHERA WAAKHULELA OPHETA WA YEHOVA?
6. Eseeni en’ya onikhalihera okhupali wiira Yehova onninipheta?
6 Nlotte mooluluwanya ni nvekele okathi wootheene. (Luka 18:1; aRoma 12:12) Vakhala wiira onnireerela, munvekela Yehova ivaara dhawaatta khuta nihiku wiira ookhalihereni wiidhoona nkhama onwoonelaiyeni. Ekhweeli wiira ivaara dhikina nrima nhu pooti onoototha ni oniiriha opacera wuupuwela wiira Yehova khannipheta. Masi nhiliyale wiira Yehova muulupalesa oxira nrima nnyu. (1 Yoh. 3:19, 20) Yehova onnoodhuwelani saana ni onnoona itthu dhooreera wa nyuwo dheidho nhinwerya nnyu woona mwaaneene. (1 Sam. 16:7; 2 Wah. 6:30) Tivondho nhoovelele ‘onleela’ mixankiho dhinyu wiira ookhalihereni okhupali wiira onnoophetani. (Esal. 62:8) Nuumala ovekela, nkhale moovarihana ni mavekelo nnyu nttharaka ipontu dhinttharelana.
7-8. Isaalimu dhinnikhalihera dhai okhupali wiira Yehova onninipheta?
7 Nkhupali Nuulumo na Yehova. Okhala wiira Yehova aahaavaha munepa-ye wawaarya atthu amwaatinkhe Biibiliya, nikhupali wiira itthu yaatinkhe awa voohima dha Yehova ti dheekhweeli. Alottaka voohima dha Yehova, Davidi aatinkhe wiira: ‘Yehova ori vakhiviru va atthu ariipiwe nrima; owo onniwoopola ale akhulumunwe.’ (Esal. 34:18) Okathi munkhulumuwa nnyu, woonawene pooti opacera wuupuwela wiira nri meekhinnyu. Masi nhiliyale wiira Yehova oolaihera okhala vakhiviru va nyuwo saasaasa okathi owo wooxankiha, okhala wiira onnidhuwela wiira munnitthuna okhaliheriwa nuuwo. Esaalimu ekina Davidi aatinkhe wiira: ‘Nthukumanye maithori aka mmurupani mwinyu mwa esapala.’ (Esal. 56:8) Yehova onniriipiwa nrima vawaatta vaavo onwoonaiyeni nvirihaka mixankiho. Nkhama dhiidhaale maadhi ari mmurupani mwa esapala, ari awa ootepa otthuneya wa ntthu oneetta nkwaha moothakoni, Yehova onnivaha efaita maithori nnyu ni khankhala-khala aliyalaka owereya nnoona nnyu. Esalimo 139:3, ninsoma wiira: ‘Nyuwo [Yehova] . . . munnidhuwela iphuro dhaka dhootheene.’ Yehova onnoona itthu dhootheene mumpaka nnyu, masi owo onnivaha ephoole itthu dhooreera muniilipihera nnyu opaka. (aHeb. 6:10) Mwaha wa seeni? Okhala wiira owo onnivaha efaita wiilipihera winyu wiira munhakalalihe.a
8 Arumeelaka dhawaatikhiwa dha mbiibiliyani dhoomaaliha, Yehova ommalaka nkhama onlotta wiira: “Miyo kintthuna wiira nyuwo ndhuwele wiira kinnoopheta vawaatta ni kinnoovaha efaita yuulupale.” Masi nkhama noonne nhu woopacerani wa yoosoma ela, Satana onnimwarya-mwarya muupuwelo wa wootha wa wiira Yehova khanoophetani. Ndho akhala wiira ivaara dhikina nnoopacera waakanyera vakhala wiira Yehova onnoophetani, mweemele vakhaani ni mwiikohe wiira: ‘Taani kinreerelaka onkhupali, ‘tiithi a wootha’ Satana aahiidho ‘Muluku eekhweeli’?’—Yohani 8:44; Esal. 31:5.
9. Eseeni Yehova onaalaihera iye ale animpheta? (Okhuma 20:5, 6)
9 Muupuwelele moopora Yehova onwoonela iye ale animpheta. Moone ele Yehova anleenle iye Moise ni aisarayeeli. (Munsome Okhuma 20:5, 6.) Yehova onnilaihera wiira khanhiya owoonihera opheta woororomeleya ale animpheta. Moolumo ala anninikhupaliha wiira Muluku toororomeleya, owo khankhala-khala akhoottaka waapheta arumeyi-ye animpheta. (Neh. 1:5) Tivondho akhala wiira munnaakanyera vakhala wiira Yehova onnoophetani, mweemele vakhaani ni mwiikohe wiira: ‘Kiire kinnimpheta Yehova?’ Ndho akhala wiira munnimpheta ni munnipaka itthu dhootheene wiira munhakalalihe, nkhupali ni nrima wootheene wiira owo onnoophetani vawaatta. (Dan. 9:4; 1 aKor. 8:3) Ni moolumo makina, elo entaphulela wiira vakhala wiira munnikhupali wiira munnimpheta Yehova, nhikhala-khale mwaakanyeraka wiira owo onnoophetani. Ndho onroromeleya winyu ni ompheta winyu Yehova, onawookhaliherani okhupali wiira khankhala-khala onyanyalakani.
10-11. Yehova ontthuna wiira moonele dhai nkuttho wawoopola? (aGalasia 2:20)
10 Muupuwelele yawoopola. Nkuttho wawoopola wa Yeesu, etthu yuulupale ni yootepa otthuneya Yehova aavanhe iye apinaatamu. (Yohani 3:16) Niire yoovaha elo ti yootthuneya wa nyuwo? Aayo! Moone ele yaamwiiraneenle nrummwa Paaulu. Muupuwele wiira mwaha wa itampi dhuulupale aapanke iye khalai ahinaakuve okhala nkiristau, dhaanimwiiriha Paaulu owanana miyoonelo ni miyuupuwelo dhoohiloka hata nuumala okhala nkiristau. (aRoma 7:24, 25; 1 Tim. 1:12-14) Masi owo aanoona nkuttho wawoopola nkhama etthu yootepa otthuneya Yeova anvanhe iye. (Munsome aGalasia 2:20.) Nhiliyale wiira Yehova tamuupusenre nrummwa Paaulu waatikha voohima dha mwaha owo. Nitho itthu dhootheene iri mbiibiliyani dhihaatikhiwe wiira inihudhihe etthu. (aRoma 15:4) Moolumo a Paaulu annoonihera wiira Yehova ontthuna wiira nyuwo moone nkuttho wawoopola, nkhama yoovaha yavameekhaya ovanheiyene. Ndho vaavo mumpacera nnyu woona nkuttho wawoopola mwa enamuna elo, nnoolipiha okhupali winyu wiira Yehova onnoophetani.
11 Ninninxukhurela vawaatta Yehova mwaha wa onruma Yeesu ora valaponi wiira anikhwele. Masi nthowa nikina naamwiirinhe Yeesu ora valaponi, waari waahudhiha atthu ekhweeli voohima dha Muluku. (Yohani 18:37) Ekhweeli elo, enhela mpuwa wiira Yehova onnaapheta vawaatta ane.
MOOPORA YEESU ONNIKHALIHERA IYE WAAKHULELA OPHETA WA YEHOVA
12. Seeni nintthuneya nhu okhupali ele Yeesu olontte iye voohima dha Yehova?
12 Okathi Yeesu aari iye valaponi, waanindhivela waaleela atthu akina voohima dha ontthu wa Tiithye Yehova. (Luka 10:22) Nookhalana mathowa awaatta anniiriha okhupali ele Yeesu olontte iye voohima dha Yehova. Mwaha wa seeni? Okhala wiira Yeesu ahinatthi ora valaponi, aahiviriha iyaakha dhawaatta akhalaka wiirimu vamodha ni Yehova. (aKol. 1:15) Ndho okathi owo aari iye wiirimu, Yeesu aaniwerya woona moopora Yehova aapheta iye ane oororomeleya. Masi Yeesu onnikhalihera dhai okhupali wiira Yehova onninipheta?
13. Yeesu ontthuna wiira nimoonela dhai Yehova?
13 Yeesu ontthuna wiira nikhalena moonelo mmodharu oriiyeene voohima dha Yehova. Arumeelaka Ivanxeelyu Yeesu onnimwiitthana Yehova nkhama “Tiithi” ivaara dhinxira 160. Nitho okathi aalotta iye ni atthareli-ye, owo aanirumeela moolumo nkhama “Tiithi nnyu” aahiidho “Tiithi nnyu a wiirimu.” (Math. 5:16; 6:26) Yeesu ahinatthi ora valaponi, arumeyi oororomeleya a khalai yaanirumeela moolumo oovirikana a nttittimiho enhimaka Yehova nkhama ‘Nanwerya Dhootheene,’ ‘Muluku Avadhulusa,’ ‘Mpattusa Muulupalesa,’ aahiidho moolumo makina. Masi Yeesu aanirumeela ivaara dhawaatta nuulumo nawi “Tiithi.” Ennooneya wiira Yeesu ontthuna wiira nikamoonela Yehova nkhama ommoonela iye, Tiithi oopheta, onaapheta vawaatta ane. Vano, nirowe noone matakihero maili Yeesu aarumeenle iye nuulumo nawi “Tiithi” atthunaka olotta voohima dha Yehova.
14. Yeesu oonihenre dhai wiira khuta mmodha a hiyo tootepa ootthuneya vamaithoni va Tiithi nhu a wiirimu, Yehova? (Matheyo 10:29-31) (Moone-tho efootu.)
14 Woopacerani, nithokorerye moolumo a Yeesu ari Matheyo 10:29-31. (Munsome.) Iphera apalame akhaani ahinwerya ompheta ni onkokhorela Yehova. Masi hata eri dhiidho, Tiithi nhu a wiirimu onnaavaha efaita ni onnindhuwela vaavo ephera emodha emmorela awa vathi. Vano, nkahaya muupuwele moopora Yehova onnivaha iye efaita ni onikhapelele khuta mmodha hiyo nininrumeela moororomeleya mwaha wa ompheta! Elottaka moolumo awi ‘maihi ootheene a mmuruni mwinyu, akontariwa,’ enoota eri Bíblia de estudo ya eveersu 30 enlotta wiira: “Mwaha wa Yehova waadhuwela ahudheri a Yeesu hata ni itthu dhoomalela oyeva, elo enoonihera wiira onnaathokorerya vawaatta.” Moohaakanyera, Yeesu ontthuna wiira khuta mmodha a hiyo akhupali wiira tootepa otthuneya vamaithoni va Tiithi nhu a wiirimu, Yehova.
Yehova onnivaha efaita ni onnidhuwela vaavo ephera emodha emorela awa vathi. Nkahaya muupuwele moopora Yehova onnoovaha iye efaita, nyuwo muninrumeela moororomeleya mwaha wa ompheta! (Moone ettima 14)
15. Antaphulelani moolumo a Yeesu ari Yohani 6:44 anlotta voohima dha Tiithi-ye a wiirimu?
15 Moone ntakihero na naili nenno Yeesu aarumenle iye nuulumo nawi “Tiithi.” (Munsome Yohani 6:44.) Mooreera nrima, Tiithi nnyu a wiirimu, ohoothanlani wiira mundhuwele ni mpacere ompheta. Eseeni emwiirinhe Yehova opaka elo? Okhala wiira ohoona nrima nnyu ni mikhalelo dhinyu dhooreera. (Mit. 13:48) Enoota eri Bíblia de estudo ya Yohani 6:44, enlotta wiira woonawene Yeesu aahilotta moolumo ala aatthuna olotta moolumo ari Yeremiiya, yaawo ari yawaatikhiwa ya muru wa mwaha ola, Yehova aaleenle iye aisarayeeli airaka: ‘Miyo kihoothanlani ni opheta woororomeleya, [aahiidho nkihin’ya owooniherani opheta woororomeleya].’ (Yer. 31:3; Tradução do Novo Mundo da Bíblia Sagrada; mmoone Hoseya 11:4.) Muupuwele ele moolumo ala antaphulela awa. Tiithi nnyu a wiirimu onnoona mikhalelo dhinyu dhooreera dheidho woonawene mwaaneene nhinwerya nnyu woona.
16. (a) Eseeni Yeesu onnihudhiha iye voohima dha Yehova, ni seeni nintthuneya nhu okhupali elo? (b) Eseeni en’ya wookhaliherani okhupali wiira Yehova Tiithi munreerela nnyu okhalana? (Moone ekwaaturu eni: “Tiithi Ootheene nhu Ninreerela nhu Okhalana.”)
16 Vaavo Yeesu aalotta iye wiira Yehova Tiithi nhu, vaaphwana nkhama aalotta wiira: “Ohiya pahi Yehova okhala Tiithi aka, owo-tho Tiithi nnyu. Miyo kinthuna wiira nkhupali wiira owo onnoopheta ni onoothokoreryani vawaatta.” Ndho akhala wiira ivaara dhikina munnipacera waakanyera vakhala wiira Yehova onnoophetani, muupuwele ni nkhupali moolumo a Yeesu, okhala wiira okathi wootheene owo onlotta ekhweeli ni onindhuwela saana Yehova.—1 Ped. 2:22.
NHIHIYE OLIPIHA OKHUPALI WINYU WIIRA YEHOVA ONNOOPHETANI
17. Seeni nintthuneya nhu ohihiya olipiha okhupali wihu wiira Yehova onninipheta?
17 Ootheene nhu nihihiye opaka itthu dhootheene ninwerya nhu wiira nilipihe okhupali wihu wiira Yehova onninipheta. Nkhama noonne nhu yoosoma ela, nwanani nhu Satana, onnipaka itthu dhootheene onwerya iye wiira aniirihe ohiya onrumeela Yehova. Ndho wiira anikhumule, Satana onnimwarya-mwarya muupuwelo wa wootha wa wiira Yehova khannipheta. Masi nihikhala-khale nikhupaliki muupuwelo owo wa wootha wa Satana!—Yobi 27:5.
18. Eseeni munreerela nnyu opaka wiira nhihiye olipiha okhupali winyu wiira Yehova onnoophetani?
18 Yoosoma ela, moowerya woona ele munreerela nnyu opaka wiira Yehova ookhalihereni wiidhoona nkhama onwoonelayeni. Nnoowerya opaka elo, munvekelaka Yehova okathi wootheene wiira ookhalihereni woona mikhalelo dhinyu dhooreera dheidho owo onwerya iye woona wa nyuwo. Muupuwelele dhawaatikhiwa dha mbiibiliyani inoonihera moopora Yehova onaavaha iye efaita atthu ale animpheta. Nhiliyale wiira Yehova khankhala-khala ahiyaka owoonihera opheta atthu ale animpheta. Nitho muupuwele mathowa anwiirihani woona nkuttho wawoopola okhala yoovaha yootepa otthuneya wa nyuwo. Ni nkhama Yeesu ohudhinhe iye, nkhupali wiira Yehova Tiithi nnyu a wiirimu. Ndho akhala wiira ntthu nkina onnookohani wiira: “Niire nyuwo munnikhupali wiira Yehova onnoophetani?” Moohaakanyera nyuwo nnoowerya waakhula wiira: “Aayo! Miyo kinniilipihera khuta nihiku opaka itthu dhootheene kinweryaka wiira koonihere ompheta!”
NCIPO 154 Ophenta Khonimala