Omwene wa Muluku Eseeni?

Omwene wa Muluku nhupi muulupale wa mBiibiliyani. Yehova on’ya orumeela Omwene yoola wiira airihe elapo okhala eparayiisu. Masi Omwene wa Muluku eseeni? Nindhuwela dhai wiira Omwene owo woopacera olamulela? Eseeni Omwene wa Muluku owenrya awa opaka? Ndho Omwene owo on’ya opakani nhoolo? Yoosoma ela ni dhoosoma piili dhinttharelana inawaakhula makoho ala.

1. Omwene wa Muluku eseeni ni taani ori Mwene a Omwene owo?

Omwene wa Muluku ekuvernu ekhumiheriwe ni Yehova Muluku. Nitho Yesu tori Mwene a Omwene wa Muluku ni owo onlamulela ari wiirimu. (Matheyo 4:17; Yohani 18:36) Biibiliya onlotta wiira Yesu: ‘onrowa olamulela nkhama Mwene mahiku ootheene.’ (Luka 1:32, 33) Nkhama Mwene a Omwene wa Muluku, Yesu onawaalamulela atthu ootheene valaponi.

2. Taani an’ya olamulela vamodha ni Yesu?

Yesu khan’ya olamulela meekhe. ‘Atthu a mahimo ootheene, ni a ilottelo dhootheene, ni a makhuli ootheene ni a maloko ootheene . . . anrowa okhala mamwene wiira elamulele elapo.’ (Wiisuupulula 5:9, 10) Atthu akavi en’ya olamulela vamodha ni Yesu? Okhuma okathi Yesu aariiye valaponi, atthu awaatta annikhala Makiristau. Niire Makiristau ootheene an’ya olamulela vamodha ni Yesu wiirimu? Naari. Masi atthu amphiyera 144.000 tan’ya olamulela vamodha ni Yesu wiirimu. (Munsome Wiisuupulula 14:1-4.) Makiristau makina aniirela mphantta atthu a Muluku an’ya okhala valaponi vaava elamuleliwaka ni Omwene wa Muluku.—Esalimo 37:29.

3. Seeni Omwene wa Muluku oraawa wootepa oreerera oxira ikuvernu dha apinaatamu?

Hata ikuvernu dha apinaatamu dheeheryeryaka opaka itthu dhooreera, khidhaana owerya woopaka itthu dhintthuna awa. Ohiya-vo, ivaara dhikina ikuvernu idho dhinnimootariwa eyavo ekuvernu ekina woonawene ehintthuna mireerelo dha atthu enaalamulela awa. Masi Namalamulela a Omwene wa Muluku, yoowo ori Yesu, khankhala-khala amootariwaka aahiidho orantteliwa wiira ayevo ntthu nkina. Muluku ‘ookhumihera omwene ohinkhala-khala opwetesiwaka.’ (Daniyeli 2:44) Yesu on’ya olamulela elapo yootheene ni onawaathokoryerya atthu ootheene mwa enamuna emodharu. Owo toopheta, tooreera nrima ni taxariya ni onawaahudhiha atthu ootheene othokoryeryana nkina ni nkhwe mwa enamuna yoophetana, yooreerana nrima ni mwaxariya.—Munsome Yesaya 11:9.

4. Omwene wa Muluku onoolamulela elapo yootheene

Owerya Yesu Kiristu oriiyena wa olamulela ti wuulupale waaxira apinaatamu atanke olamulela. Munsome Matheyo 28:18, nuuvinya mwaakhule nikoho ninttharelana:

• Okhulupale Yesu oriiyena ovirikanne dhai ni okhulupale anamalamulela opinaatamu araawana?

Ivaara dhawaatta anamalamulela opinaatamu anirantteliwa aahiidho annimootariwa ni anlamulela mphantta mmodha wa elapo. Ndho khi voohima dha Omwene wa Muluku? Munsome Daniyeli 7:14, nuuvinya mwaakhule makoho anttharelana:

• Seeni oraawa vooreera odhuwela wiira Omwene wa Muluku ‘khonre opwetesiwe’?

• Seeni oraawa vooreera odhuwela wiira Omwene wa Muluku onoolamulela elapo yootheene?

5. Ikuvernu dha apinaatamu dhinnireerela orantteliwa

Seeni onreerela awa Omwene wa Muluku oranttela ikuvernu dha apinaatamu? Moone EVIIDIYU, nuuvinya mwaakhule nikoho ninttharelana.

EVIIDIYU: Omwene wa Muluku Eseeni? —Ekhaani (1:41)

• Mixankiho seeni ikuvernu dha apinaatamu dhinkhumihera awa?

Munsome Musuweli 8:9, nuuvinya mwaakhule nikoho ninttharelana:

• Nnoona wiira Omwene wa Muluku onnireerela onrattela ikuvernu dha apinaatamu? Mwaha wa seeni?

6. Omwene wa Muluku wookhalana anamalamulela andhuwela makhalelo nhu

Okhala wiira Yesu yoowo ori mwene nhu ootaka okhala valaponi nkhama pinaatamu, tivondho owo ‘onnidhuwela otteettheya wihu.’ (aHeeberi 4:15) Ohiya-vo, Yehova ohaatthanla alopwana ni athiyana ororomeleya amphiyera 144.000 ‘atthu a mahimo ootheene, ni a ilottelo dhootheene, ni a makhuli ootheene ni a maloko ootheene’ wiira yaalamulele vamodha ni Yesu.—Wiisuupulula 5:9.

• Nnoonela dhai odhuwela wiira Yesu vamodha ni ale an’ya olamulela ni owo annidhuwela mixankiho dhinniphwanya? Mwaha wa seeni?

7. Malamulo a Omwene wa Muluku tootepa oreera oxira malamulo a ikuvernu dha apinaatamu

Ikuvernu dha apinaatamu dhinnipaka malamulo wiira dhaakhalihere ni dhaakhapelele atthu anaalamulela awa. Nitho Omwene wa Muluku wookhalana malamulo yaawo atthu onaalamulela awa anreerela awa weettela. Munsome 1 aKorinto 6:9-11, nuuvinya mwaakhule makoho anttharelana:

• Nnoona wiira olumwinku waaya okhala dhai waakhanle wiira atthu ootheene anniiwelela malamulo a Omwene wa Muluku?a —Moone enoota

• Nnoona wiira Yehova okhalana ehakhi yootthuna wiira apinaatamu yiiwelele malalamulo a Omwene-ye? Mwaha wa seeni?

• Eseeni enoonihera wiira atthu ahiniiwelela malamulo awo anoowerya opaka marukunuso?—Moone eversu 11.

WUULUULA

Omwene wa Muluku ekuvernu eri wiirimu en’ya olamulela elapo yootheene.

Ipontu dhoolupale

• Taani ari anamalamulela a Omwene wa Muluku?

• Seeni Omwene wa Muluku oraawa wootepa oreera oxira ikuvernu dha apinaatamu?

• Eseeni Yehova ontthuna iye wiira atthu epake wiira elamuleliwe ni Omwene-ye?

NTHOKODHE ITTHU DHIKINA

Moone etthu Yesu aahudhiha iye voohima dha opuro oraawa Omwene wa Muluku.

“Niire Omwene Etthu Eri Vanrimani?” (Mwaha ori nsaaitini jw.org)

Seeni Anamoona a Yehova anoona awa okhala wootepa othuneya wiiwelela Omwene wa Muluku ohiya ikuvernu dha apinaatamu?

Awo Ahivaheryerye Okhalihera wa Omwene wa Muluku 1:43

Moone etthu Biibiliya onlotta iye voohima dha atthu 144.000 Yehova athalale iye wiira yaalamulele vamodha ni Yesu.

“Taani Anrowa Wiirimu?” (Mwaha ori nsaaitini jw.org)

Eseeni yamwiirihe nthiyana yoowo awaleliwe nkateya okhupali wiira Muluku onoowerya omaliha ohixariya moolumwinkuni?

“Waadhyawaka Exariya Moolumwinkuni Moohixariya” (Despertai!, Novembro de 2011)