YOOSOMA 37
Eseeni Biibiliya Onlotta iye Voohima dha Nteko ni Nsurukhu?
Niire mootaka oxanka mwaha wa othoiwa nteko ni omaleliwa nsurukhu? Pooti onixankiha ophwanya nteko on’ya onikhalihera ophwanya eyooca, okathi omodharu, ninrumeelaka Yehova nkhama omphwanela iye. Masi Biibiliya onninivaha miruku dhooreera dhin’ya onikhalihera.
1. Eseeni Biibiliya onlotta iye voohima dha nteko?
Muluku ontthuna wiira nihakalale ni nteko ninvara nhu. Biibiliya onlotta wiira: ‘Khiyaavo etthu yootepa oreera wa ntthu ohikhanle opuha mireerelo dha nteko ovanre iye.’ (Musuweli 2:24) Yehova onniilipihera ovara miteko. Ndho hiyo, nihaana ontakiha owo niilipiheraka ovara nteko. Akhala wiira ninoopaka elo, ninoowerya onhakalaliha ni ophwanya ohakalala mweekumini mwihu.
Ovara nteko etthu yootepa otthuneya. Masi nihikhala-khale niirihaka nteko okhala wootepa otthuneya mweekumini mwihu oxira nkokhorela wihu Yehova. (Yohani 6:27) Akhala wiira ninoopweha opuro woopacera yootthuna ya Yehova mweekumini mwihu, owo onnilaihera onivaha itthu dhootheene ninramela nhu wiira nikhale akumi.
2. Tuuvi ori moonelo wooreera voohima dha nsurukhu?
Biibiliya onlotta wiira ‘nsurukhu onninikhapelela’. (Musuweli 7:12) Masi-tho onninilopola wiira nsurukhu khonwerya oniphwanyiha ohakalala weekhweeli. Tivondho, Biibiliya onnitumererya iye wiira nihiphete nsurukhu, masi ‘nihakalale ni itthu nirinhuna.’ (Munsome aHeeberi 13:5.) Napaka elo, enoonikhalihera ohiriipiwa nrima okathi ninoona nhu wiira khanaana nsurukhu omphiyera. Nitho, enoonikhalihera oxaka opaaca nsurukhu voohikhalela. (Miruku 22:7) Nitho ninooxaka wootothiwa oweetta axooku oolavilavi ni inamuna dha omphwanyiha nsurukhu mwa waakuveya.
3. Nin’ya orumeela dhai nsurukhu wiira naakhalihere atthu akinaku?
Yehova Muluku oovaha. Ndho, hiyo ninnitakiha ovaha wa Yehova vaavo ninkhala nhu ‘oolikana ene wiira naakawele atthu akina itthu nirinhuna.’ (1 Timootheyo 6:18) Hiyo ninnipaka elo nikhaliheraka muloko ni waakhalihera ale antthuna okhaliheriwa, saasaasa annihu Makiristau. Yehova khanvaha efaita mwaattelo wa itthu ninvaha nhu, masi onvaha efaita ele enniiriha ovaha. Akhala wiira ninoovaha ni nrima wootheene, ninoohakalala mweekumini mwihu ni ninoonhakalaliha Yehova.—Nsome Miteko 20:35.
NHUDHE ITTHU DHIKINA
Moone seeni oraawa vooreera opweha nteko nipuro nooreerela mweekumini mwihu ni ohakalala ni itthu nirinhuna.
4. Moopora munvara nnyu nteko pooti onvuwiha Yehova
Waataana wihu ni Yehova ohaana weettiha moopora ninoonela nhu nteko. Moone EVIIDIYU, nuuvinya mwaakhule makoho anttharelana.
Nkhama moonne nnyu eviidiyu, eseeni yoodhivenleni voohima dha moopora João aavara iye nteko?
Eseeni owo aapanke iye wiira apwehe nteko nipuro nooreerela?
Munsome aKolosi 3:23, 24, nuuvinya mwaakhule nikoho ninttharelana:
Seeni moonelo nhu voohima dha nteko oraawa wootepa otthuneya?
Ovara nteko etthu yootepa otthuneya. Masi nihikhala-khale nihiyaka nteko okhalaka etthu yootepa otthuneya oxira onkokhorela wihu Yehova
5. Oxukhurela itthu nirinhuna onniniphwanyiha ohakalala
Atthu awaatta khamphiyeriwa, ndho anniilipihera wiithukumanyera nsurukhu. Masi Biibiliya onnitumererya opaka etthu yoovirikana. Munsome 1 Timootheyo 6:6-8, nuuvinya mwaakhule nikoho ninttharelana:
Eseeni Biibiliya onnitumererya iye opaka?
Hata nihikhalakana itthu dhawaatta, ninoowerya okhala oohakalala. Moone EVIIDIYU, nuuvinya mwaakhule nikoho ninttharelana.
Hata erina nsurukhu vakhaani, eseeni eniiriha imudhi idha okhala dhoohakalala?
Ankhi akhala wiira hiyo nookhalana nsurukhu wawaatta masi nlelo nihikaphiyeriwa? Ntakihero na Yesu ninnoonihera wiira elo etthu yawoopiha. Munsome Luka 12:15-21, nuuvinya mwaakhule nikoho ninttharelana:
Eseeni nhundhe nnyu ni nlikanyiho na Yesu? —Moone eversu 15.
Munsome Miruku 10:22 noomala nlikanyihe ni 1 Timootheyo 6:10. Nuuvinya mwaakhule makoho anttharelana:
Eseeni nnoona nnyu okhala yootepa otthuneya: Niire okhala nxirikha a Yehova aahiidho okhalana nsurukhu wawaatta? Mwaha wa seeni?
Akhala wiira ntthu ontthuna okathi wootheene okhalana nsurukhu wawaatta, mixankiho seeni on’ya iye ophwanya?
6. Yehova onoonivaha itthu dhootheene dhinnithowa
Oxankiheya wihu ni nsurukhu aahiidho nteko pooti weehererya omwaamini wihu Yehova. Moone EVIIDIYU wiira moone etthu ninrerela nhu opaka okathi ninxankiheya nhu ni nteko aahiidho nsurukhu, nuuvinya mwaakhule makoho anttharelana.
Nkhama moonne nnyu eviidiyu, mixankiho seeni munna ole aariiyena?
Eseeni opanke iye wiira awerye ovilela mixankiho idho?
Munsome Matheyo 6:25-34, nuuvinya mwaakhule nikoho ninttharelana:
Eseeni Biibiliya onaalaihera iye atthu ale animpweha Yehova nipuro noopacera?
ATTHU AKINAKU ANLOTTA WIIRA: “Miyo kihaana wiilipihera ovara nteko wiira kicihe emudhi aka. Tivondho, nkinwerya orowela mithukumano dhootheene khuta esumana.”
Yawaatikhiwa seeni ya mBiibiliyani enookhupalihani wiira opweha nipuro noopacera onkokhorela Yehova yoothanla yooreerela opaka?
WUULUULA
Ovara nteko ni okhalana nsurukhu etthu yooreera, masi nihikhala-khale nihiyaka itthu idho iniirihaka ohiya onrumeela Yehova.
Ipontu dhuulupale
Eseeni en’ya wookhaliherani okhalana moonelo wooreera voohima dha nteko?
Ohakalala ni itthu nrinnyuna onookhaliherani dhai?
Mun’ya woonihera dhai wiira munniroromela yoolaihera ya Yehova ya waakhapelela atthu-ye?
NTHOKODHE ITTHU DHIKINA
Niire Biibiliya onlotta wiira nsurukhu etthu yootakhala?
“Niire Nsurukhu Maphattuwelo a Itthu Dhootheene Dhootakhala?” (Mwaha ori nsaaitini jw.org)
Moone moopora ovaha oninhakalaliha awa Muluku.
“Eseeni Biibiliya Onlotta iye Voohima dha Ovaha?” (Mwaha ori nsaaitini jw.org)
Niire oweetta acuuku enamuna ya oraara pahi?
“Moonelo wa Biibiliya Voohima dha Acuuku Amphwanyiha Nsurukhu” (Despertai!, Março de 2015)
Moone etthu yaankhalihenre nlopwana mmodha ottharuwa omweetta cuuku oolavilavi ni owiiyera atthu.
“Miyo Waanikidhivela Vawaatta Opaka Ikurida ni Ikhavalu” (A Sentinela, 1 de Novembro de 2011)