YOOSOMA 59
Nvilele Ottharatthariwa Moolipa Nrima!
Nenna aahiidho nhoolo, Makiristau ekhweeli annilipelela onyokhiwa ni ottharatthariwa. Niire nihaana woova elo?
1. Seeni ninlipelela nhu ottharatthariwa?
Biibiliya onlotta wiira: ‘Ootheene ale antthuna onrumeela Muluku nkhama ahudhiri a Kiristu Yesu, nitho anoottharatthariwa.’ (2 Timootheyo 3:12) Yesu ahittharatthariwa okhala wiira khairela mphantta olumwinku wa Satana. Nitho hiyo khanniirela mphantta olumwinku. Tivondho, khanintikhina vaavo ninttharatthara nhu ni ikuveernu ni itiini dha olumwinku ola.—Yohani 15:18, 19.
2. Nin’ya wiilokihera dhai wiira nivilele ottharatthariwa?
Tivootthuneya nenna-va olipiha onroromela wihu Yehova. Tivondho, mwiivahe okathi khuta nihiku wiira nvekele ni munsome Biibiliya. Nhihiye orowela mithukumano dha mmulokoni. Ndho itthu idha dhootheene, dhinawoovahani ikuru wiira nvilele ottharatthariwa, elo enhela mpuwa ovilela ottharatthariwa ni amudhi nnyu. Nrummwa Paulo, yoowo ohireere ottharatthariwa ivaara dhawaatta, olontte dho: ‘Yehova tonkikhalihera. Miyo nkinrowa woova etthu.’—aHeeberi 13:6.
Etthu ekina en’ya onikhalihera waacerera olipa wihu nrima ori okhalela nthiti nteko woolaleerya. Olaleerya onnaacerera onroromela wihu Yehova ni onninikhalihera oxintta owoova atthu. (Miruku 29:25) Ndho nakhala olipa nrima nenna-va wiira nilaleerye, ninookhala oolikaneene wiira nihihiye olaleerya, vaavo kuveernu on’ya iye weehererya oniwateeriha olaleerya.—1 aTesaloonika 2:2.
3. Ovilela on’ya onikhalihera dhai vaavo ninttharatthariwa nhu?
Ekhweeli wiira khaavo ntthu onindhivela ottharatthariwa aahiidho onyokhiwa. Masi vaavo ninvilela nhu waamini wihu onnitepa olipa. Nitho ninnitepa omwaattamela Yehova, okhala wiira ninnoona mweekumini mwihu wiira onikhalihera anivahaka ikuru vaavo nuupuwela nhu wiira khaninne niwerya ovilela ottharatthariwa. (Munsome Yakobo 1:2-4.) Vaavo Yehova onnoona iye nihaawaka onnoona owereya. Masi owo onnihakalala vaavo onnoona iye nivilelaka. Biibiliya onlotta wiira: ‘Masi, mwaavilelaka ohaawa mwaha woopaka itthu dhooreera, elo etthu emmudhivela Muluku.’ (1 Pedru 2:20) Yehova onnaalaihera ale an’ya ovilela mpakha wookidherani wiira anoophwanya ekumi yoohimala olumwinku yoowo ohin’ya okhala ottharatthariwa aahiidho onyokhana.—Matheyo 24:13.
NHUDHE ITTHU DHIKINA
Moone moopora onweryaneya awa okhala oororomeleya wa Yehova, hata nittharatthariwaka. Nitho moone moopora opaka elo enkhumihera awa mareeliho.
4. Nyuwo nnoowerya ovilela onyokhiwa ni amudhi nnyu
Yesu aanidhuwela wiira amudhi nhu khenne edhiveliwe yanoonaka ninrumeelaka Yehova. Munsome Matheyo 10:34-36, nuuvinya mwaakhule nikoho ninttharelana:
Eseeni enkhumelela akhala wiira ntthu mmodha vatthekoni oothanla onrumeela Yehova?
Wiira moone ntakihero nimodha, moone EVIIDIYU, nuuvinya mwaakhule nikoho ninttharelana.
Eseeni mun’ya nnyu opaka akhala wiira mmudhi nnyu aahiidho nxirikha nnyu onnoowateerihani onrumeela Yehova?
Nsome Esalimo 27:10 ni Marko 10:29, 30. Nuuvinya mwaakhule nikoho ninttharelana:
Yoolaihera ela en’ya wookhaliherani dhai ovilela onyokhiwa ni amudhi ni axirikha nnyu?
5. Nhihiye onrumeela Yehova hata nttharatthariwaka
Tivootthuneya okhala olipa nrima wiira nihihiye onrumeela Yehova vaavo atthu akina anniwateeriha awa opaka elo. Moone EVIIDIYU, nuuvinya mwaakhule nikoho ninttharelana.
Matakihero a eviidiyu ela anlipiha dhai waamini winyu?
Nsome Miteko 5:27-29 ni aHeeberi 10:24, 25. Noomala osoma dhawaatikhiwa idha, mwaakhule nikoho ninttharelana:
Seeni oraawa vootthuneya ohihiya onrumeela Yehova hata nteko woolaleerya ni mithukumano dhikhotthihiwaka?
6. Yehova onawookhaliherani ovilela
Anamoona a Yehova a makhalelo ni a dhoolema dhoovirikana khanhiya onrumeela Yehova moororomeleya hata ettharatthariwaka. Wiira moone etthu yaakhalihenre anna awo, moone EVIIDIYU. Nuuvinya mwaakhule nikoho ninttharelana.
Nkhama moonne nnyu eviidiyu, eseeni yaakhalihenre anna ale ovilela?
Munsome aRoma 8:35, 37-39 ni aFilipi 4:13. Noomala osoma dhawaatikhiwa idha, mwaakhule nikoho ninttharelana:
Dhawaatikhiwa idha dhinlipiha dhai ororomela winyu wiira onniweryaneya ovilela dhaweeha?
Munsome Matheyo 5:10-12, nuuvinya mwaakhule nikoho ninttharelana:
Seeni munreerela nnyu okhala oohakalala hata nttharatthariwaka?
Arumeyi awaatta a Yehova aawerya ovilela ottharatthariwa. Nitho nyuwo nnoowerya!
ATTHU AKINAKU ANLOTTA WIIRA: “Miyo nkinne kiwerye ovilela ottharatthariwa.”
Dhawaatikhiwa seeni dhaaya onkhalihera ntthu owo okhala oolipa nrima?
WUULUULA
Yehova onnivaha efaita wiilipihera wihu wiira ninrumeele hata nittharatthariwaka. Ndho nikhaliheriwaka ni owo, ninoowerya ovilela!
Ipontu dhuulupale
Seeni Makiristau anlipelela awa ottharatthariwa?
Mun’ya wiilokihera dhai nenna-va wiira nwerye ovilela ottharatthariwa?
Seeni munreerela nnyu okhupali wiira onniweryaneya onrumeela Yehova hata nttharatthariwaka?
NTHOKODHE ITTHU DHIKINA
Moone moopora Yehova ankhalihenre iye munna mmodha ovilela noomala otthukeliwa nkateya mwaha woohiirela mphantta olumwinku.
Moone etthu yaakhalihenre anamathelana amodha onrumeela Yehova hata yaanyokhiwa.
Moone moopora mun’ya nnyu ovilela ottharatthariwa.
“Mwiilokihere Nenna-va Mwaha Woottharatthariwa Nhoolo” (A Sentinela, Julho de 2019)
Moone nthowa ninniiriha ohitikhina vaavo ninnyokhiwa nhu ni amudhi. Nitho moone moopora nkhele nnyu ohihiya okhalana nrettele ni okhala oororomeleya wa Yehova.
Ekhweeli Khenruuha, ‘Nrettele, Masi Ohiiwanana’” (A Sentinela, Julho de 2019)