Hiyo Ninnoona Okhala Vooreera Okhalana Waataana Woolipa ni Anna ni Arokora!

1-2. Eseeni eri yootepa otthuneya wa Yehova, ni eseeni owo ontthuna iye wiira nipake?

NIIRE mwaataka wuupuwelela wiira moopora ninaathokorerya nhu atthu akina etthu yootepa otthuneya vamaithoni va Yehova? Yeesu olontte wiira nihaana ompheta nkhwinhu nkhama niniipheta nhu. (Math. 22:37-39) Elo enhela mpuwa waareerela nrima hata ale ahininrumeela Yehova. Okathi nimpaka nhu elo, ninnintakiha Muluku nhu Yehova, yoowo ‘onnaakhumihera ndhuwa atthu ooreera nrima ni ootakhala nrima ni onnirupiha epula para atthu ootheene, anaxariya ni atthu ahikhanle anaxariya.’—Math. 5:45.

² Nnaamwi Yehova aaphetaka atthu ootheene, owo onaapheta mwa enamuna yavameekhaaya ale amwiiwelela. (Yohani 14:21) Owo ontthuna wiira nintakihe. Tivondho onnitumererya iye woonihera ‘waapheta vawaatta’ anna ni arokora. (1 Ped. 4:8; aRoma 12:10) Opheta onromoliwa-va, ohaana olikana ni opheta nimoonihera nhu mmudhi nhu aahiidho nxirikha nhu muulupale.

3. Eseeni ninreerela nhu wuupuwelela voohima dha opheta?

³ Opheta, onlikana ni nttaikho nkhaani onreerela okhapeleliwa wiira wuunnuwe. Nrummwa Paaulu ahaatumererya Makiristau airaka: ‘Nhihiye ophetana nkhama adhinna.’ (Heb. 13:1) Yehova ontthuna wiira nihihiye wunnuwihera waapheta wihu anna ni arokora. Yoosoma ela, nin’ya woona seeni ninreerela nhu olipiha waataana wihu ni anna ni arokora ni moopora nikhanle nhu ohihiya opaka elo.

SEENI NINREERELA NHU OKHALANA WAATAANA WOOLIPA NI ANNA NI AROKORA?

4. Moovarihana ni Esalimo 133:1, eseeni ninreerela nhu opaka wiira nihihiye ovaha efaita wiiraana nirinhuna ni anna ni arokora? (Moone-tho efootu.)

⁴ Nsome Esalimo 133:1. Voohaakanyera hiyo ninnikhupali ele nasaalimu aatinkhe iye wiira “ti vootepa oreera ni voohakalaliha” okhalana axirikha animpheta Yehova. Masi nkhama dhiidhaale ntthu onhiya iye owoona wiira ti wooreera nttaikho onoona iye khuta nihiku, naahikhalena ephoole pooti ohiya woona wiira ti wooreera wiiraana nirinhuna nkhama Makiristau. Woonawene elo pooti wiiraneya okhala wiira ninniwoona anna ni arokora khuta esumana. Masi nin’ya woonihera dhai wiira ninnivaha efaita okhala vamodha naawo? Waapheta wihu anna ni arokora onawunnuwa akhala wiira ninawuupuwelela efaita khuta mmodha oriiyena mmulokoni ni moopora oriiye ootthuneya wa hiyo.

5. Eseeni enkhumelela vaavo atthu akina anoona awa opheta ninooniherana nhu nkina ni nkhwe?

⁵ Vaavo atthu awaatta anreela awa woona mithukumano dhihu evaara yoopacera, awo annitikiniheya vawaatta mwaha wa opheta ninooniherana nhu nkina ni nkhwe. Ndho ivaara dhikina, elo ennaakhalihera okhupali wiira hiyo na Makiristau eekhweeli. Yeesu aalontte wiira: ‘Atthu ootheene anoodhuwela wiira mwa ahudheri aka, mooniherana ophetana nkina ni nkhwe.’ (Yohani 13:35) Nirowe nithokorerye yawiiraneya ya Chaithra, yoowo aasoma wuniversitaati ni aakhulenle onsoma Biibiliya ni Anamoona a Yehova. Owo aahaakhulela nlaleyo na orowa omoona konkereesu a nttetthe. Noomala orowa omoona konkereesu nihiku noopacera, owo aahinleela nrokora ansomiha Biibiliya wiira: “Miyo nkinatake okhupereliwa ni anaan’yari aka. Masi okonkereesuni winyu, atthu aakikhuparela ivaara 52 nihiku nimodha! Miyo kihoona opheta wa Yehova oreela wa emudhi ya omunepani. Ndho kintthuna wiirela mphanta emudhi ela.” Chaithra aahirowa vahoolo ni opatisiwe mwaakha wa 2024. Voohaakanyera, vaavo atthu ampacera woona mithukumano dhihu anoona awa miteko dhihu dhooreera, ohela mpuwa opheta ninooniherana nhu nkina ni nkhwe, elo enniwiiriha otthuna onrumeela Yehova.—Math. 5:16.

6. Okhala waataana woolipa ni anna ni arokora onnikhapelela dhai?

⁶ Okhala waataana woolipa ni anna ni arokora pooti onikhapelela. Paaulu ohaatumererya Makiristau airaka: ‘Nhihiye olipihana nkina ni nkhwe khuta nihiku . . . wiira ahikhale nnakhala mmodha a nyuwo on’ya wuumiha nrima ootothiwaka ni owerya wa etampi.’ (aHeb. 3:13) Vaavo ninkhulumuwa vawaatta pooti opacera ohiya weetta ephuro ya xariya. Okathi owo, Yehova pooti onrumeela munna aahiidho nrokora wiira anilipihe ni anivahe nikhalihero ninramela nhu. (Esal. 73:2, 17, 23) Ndho elo, pooti onikhalihera vawaatta.

7. Opheta onnikhalihera dhai okhala awiiraana? (aKolosi 3:13, 14)

⁷ Hiyo niniirela mphantta ekhurupu ya atthu aniilipihera wooniherana opheta nkina ni nkhwe. Ndho elo, enniniphwanyiha mareeliho awaatta. (1 Yoh. 4:11) Mwa ntakihero, opheta onniniiriha ‘ohihiya ovilelana nkina ni nkhwe.’ Ndho elo, ennikhalihera okhala awiiraana nkhama Makiristau. (Munsome aKolosi 3:13, 14; aEefe. 4:2-6) Nitho elo enniiriha mithukumano dhihu okhala dhootepa oreera ni dhoomaaleleya oxira mithukumano dhootheene dhimpakiwa moolumwinkuni.

NTTITTIMIHANE NKINA NI NKHWE

8. Yehova onnikhalihera dhai okhala awiiraana?

⁸ Mwiiriirya muulupale okhalana wiiraana olumwinku wootheene. Yehova onninikhalihera okhala awiiraana hata niri atthu ohimalela. (1 aKor. 12:25) Biibiliya onlotta wiira ‘noohudhiwa ni Muluku wiira niphetane nkina ni nkhwe.’ (1 aTes. 4:9) Ni muulumo makina, elo entaphulela wiira Yehova oninrumeela Biibiliya wiira anileele etthu ninreerela nhu opaka wiira nikhalena wiiraana woolipa ni anna ni arokora. Masi wiira ‘nihudhihiwa ni Muluku’ nihaana onsoma Biibiliya ni ephoole ni ovarihela nteko itthu ninhudha nhu. (aHeb. 4:12; Yak. 1:25) Ndho ti yeelo Anamoona a Yehova aniilipihera awa opaka.

9. Moovarihana ni aRoma 12:9-13, ontaphulelani opacera waattittimiha atthu akina?

⁹ Nuulumo na Muluku ninnihudhiha dhai okhalana waataana woolipa ni anna ni arokora? Nirowe nithokorerye ele Paaulu aalontte iye aRoma 12:9-13. (Munsome.) Nkhama anoonihera awa, moolumo a Paaulu anninitumererya ‘opacere waattittimiha atthu akina.’ Ndho elo entaphulelani? Elo entaphulela wiira nihaana waadhya inamuna dhoovirikana wiira nikhale oopacera aahiidho nraaci woonihere waapheta anna ni arokora, nikhalaka atthu oolevelela, oowaakhela aletto ni oovaha. (aEefe. 4:32) Nitho ohiya onlipelela munna aahiidho nrokora wiira apacere opaka elo, nkhale nyuwo mun’ya ‘oopacera’ olipiha waataana winyu nuuwo. Yeesu aahilotta mireerelo dhinkhumelela okathi nimpaka nhu elo, airaka: ‘Ovaha onnitepa ohakalaliha oxira ovahiwa.’—Mit. 20:35.

10. Eseeni ninreerela nhu opaka wiira noonihere wiilipihera ‘waattittimiha atthu akina’? (Moone-tho efootu.)

¹⁰ Etthu yoohakalaliha, woona wiira noomala Paaulu olotta wiira nihaana opacera waattittimiha atthu akina, owo onninitumererya okhala atthu ‘awiilipihera ohiya okhala ookhweya.’ Ntthu awiilipihera onnikhalana yoolakela vaavo onvara iye nteko. Owo oniluttuweliwa ni onnipaka dhootheene onwerya iye wiira aakhwanihera miteko onvahiwa iye. Miruku 3:27, 28 ennitumererya airaka: ‘Mwaaweryaka waakhalihera atthu akina, nhikhootte waakhalihera ale anreerela okhaliheriwa.’ Ndho, vaavo ninoona nhu wiira ookhala ntthu ontthuna okhaliheriwa, ninnipaka itthu dhootheene ninwerya nhu wiira ninkhalihere. Okathi onreerela awa opaka elo, khaninhiya, nuupuwelaka wiira onoora ntthu nkina wiira akhalihere.—1 Yoh. 3:17, 18.

11. Eseeni en’ya onikhalihera okhalana waataana woolipa ni atthu akina?

¹¹ Enamuna ekina nikhanle nhu woonihera waattittimiha anna ni arokora, okathi yoowo ampaka etthu enniwereya. aEefeso 4:26 onlotta wiira: ‘Nhihiye ndhuwa niputuwelaka nlelo nnanariwe.’ Mwaha wa seeni? Eveersu 27 enlotta wiira opaka elo pooti ‘onvaha opuro Diyaabu.’ Nkhama nindhuwela nhu, Yehova onninitumererya olevelelana nkina ni nkhwe anrumeelaka Biibiliya. aKolosi 3:13 onninitumererya ‘ohihiya olevelelana ni nrima wootheene.’ Waalevelela atthu akina onninikhalihera okhalana waataana woolipa naawo. Vaavo nimpaka nhu elo, ninnikhalihera ‘okhalana wiiwanana omodharu onkhumiheriwa ni munepa wawaarya ni nrettele onkhalihera wiiraana.’ (aEefe. 4:3) Etthu ninhudha nhu ti ela: Olevelela onninikhalihera okhala awiiraana ni a nrettele.

12. Yehova onnikhalihera dhai okhala atthu oolevelela?

¹² Ekhweeli wiira khonkhweya onlevelela ntthu opanke etthu eninananre. Masi nikhaliheriwaka ni munepa wawaarya wa Muluku ninoowerya opaka elo. Noomala onitumererya ‘ophetana nkina ni nkhwe’ ni okhala atthu ‘awiilipihera,’ Biibiliya onlotta wiira: ‘Munepa wawaarya woovaheni ikuru.’ Elo entaphulela wiira munepa wawaarya wa Muluku onoowerya onikhalihera okhala atthu “ooluttuweliwa ni a nthiti”. (aRoma 12:11) Muulumo ala anoonihera wiira munepa wa Muluku onoowerya onikhalihera owoonihera waapheta anna ni arokora ni waalevelela ni nrima wootheene. Ndho akhala wiira ninoovekela Yehova, nikhupali wiira onoonikhalihera opaka elo.—Luka 11:13.

‘OHIKHALE OKAWANYEYA ERIYARI NNYU’

13. Eseeni ekhanle okhumihera okawanyeya mmulokoni?

¹³ Mmulokoni aakhala ‘atthu a makhalelo ootheene.’ (1 Tim. 2:3, 4) Hiyo na atthu a mahuweliwo ni a makhalelo oovirikana. Elo entaphulela wiira pooti opaka dhoothala dhoovirikana voohima dha miyaha dha omwaneene, nkhama ikuwo dhoowara, wiikociha, marareelo ni enamuna yoolooliwa eretta. Masi naahikhalena ephoole, ovirikana iwo pooti okhumihera okawanyeya mmulokoni. (aRoma 14:4; 1 aKor. 1:10) Ndho okhala wiira Muluku oonihudhiha ophetana nkina ni nkhwe,’ nihaana oxaka owiiriha atthu akina woona wiira dhoothanla dhihu tiri dhootepa oreera.—aFil. 2:3.

14. Eseeni ninreerela nhu opaka okathi wootheene, ni mwaha wa seeni?

¹⁴ Nitho ninoowerya oxaka okhumihera okawanyeya mmulokoni, niilipiheraka okathi wootheene waattottopela ni waalipiha anna ni arokora. (1 aTes. 5:11) Okathi vakhaani ovinre, atthu awaatta yaahin’ye oreela mithukumano dhihu ni ovara nteko woolaleerya aahiidho yaakhumihiwe mmulokoni, aatthikela wiirela mphantta mulokoni wa Ekiristau. Ndho ninniwaakhela ni matata maili! (2 aKor. 2:8) Moone etthu enkhumelenle nrokora mmodha yoowo aahin’ye orowela mithukumano ni ovara nteko woolaleerya mwa iyaakha 10 ni otthikenle mmulokoni. Owo onlotta wiira: “Anna ni arokora yaahikaakhela voohakalala ni matata maili.” (Mit. 3:19) Etthu ekhaani anna ale yaapaka awa wiira yoonihere onreerela nrima nrokora ole, yaankhalihere dhai? Owo onlotta wiira: “Miyo kaahoona wiira ntata na Yehova naanikikhalihera wiira kitthikele okhala oohakalala nkhama khalai.” Ndho naahihiye okathi wootheene wiilipihera waalipiha atthu akina, pooti orumeeliwa ni Yeesu wiira naalipihe ale ‘alammwe ni alemeliwe.’—Math. 11:28, 29.

15. Etthu seeni ekina en’ya onikhalihera okhumihera wiiraana mmulokoni? (Moone-tho efootu.)

¹⁵ Nitho ninoowerya okhumihera wiiraana, nithanlelaka saana moolumo nhu. Yoobi 12:11 onlotta wiira: ‘Kira moolumo anlawihiwa ni maaru, nkhama dhiidhaale nlumi ninlawiha awa eyooca?’ Nkhama dhiidhaale ntthu onaapeya eyooca onlawiha iye aahiidho wootela ahinatthi waapula vaikho wiira oone akhala wiira yoodhiva, nihaana wuupuwelela moolumo nhu nihinatthi olotta. (Esal. 141:3) Okathi wootheene yoolakela nhu okhale olotta moolumo oolipiha, ooreera ni ‘anaaphwanyiha nreerelo ale anniwiriyana.’—aEefe. 4:29.

16. Taani otepasawene antumereriwa olotta moolumo oolipiha?

¹⁶ Otepasawene alopwana oothela ni anaan’yari, ahaana odhuwela olotta moolumo anlipiha ettheko. (aKol. 3:19, 21; Tito 2:4) Nitho asitokweene ahaana waalipiha ni waamaliha anna ni arokora nkhama amakampusi ankhapelela ipwittipwitthi dha Yehova. (Yes. 32:1, 2; aGal. 6:1) Okathi wootheene nuupuwelele moolumo a mbiibiliyani ani: ‘Ti nootepa oreera noolumo ninlottiwa okathi wooreerela!’—Mir. 15:23.

MOONIHERE OPHETA ‘ONOONEYA NI MITEKO NI OKHANLE WEEKHWEELI’

17. Nin’ya owerya dhai owoonihera anna ni arokora opheta onkhuma vanrimani?

¹⁷ Nrummwa Yoohaani onninitumererya woonihera ‘ophetana ohiya ni moolumo pahi, masi onooneya ni miteko ni okhanle weekhweeli.’ (1 Yoh. 3:18) Hiyo nintthuna wiira waapheta wihu anna ni arokora okhume vanrimani. Nin’ya owerya dhai opaka elo? Akhala wiira ninooviriha okathi niri vamodha ni anna ni arokora, ninoowerya okhalana waataana woolipa naawo ni waaapheta wihu onootepa wunnuwa. Tivondho, mwiivahe okathi wiira nkhale ni anna ni arokora onthukumanoni aahiidho nteko woolaleerya. Nitho mwiivahe okathi wiira mwaasekurye anna. Vaavo nimpaka nhu elo, ninnoonihera wiira ‘ninnihudhihiwa ni Muluku moopora woophetana nkina ni nkhwe.’ (1 aTes. 4:9) Ohiya-vo, ninawoona mweekumini mwihu wiira ‘ti vooreera ni voohakalaliha, anna okhala vamodha mwawiiraana!’—Esal. 133:1.