Opheta wa Yehova Onkhala Mahiku Ootheene

1-2. Nxankiho seeni makiristau awaatta anviriha awa?

NKAHAYA mmuupuwele paarku ari eriyari ya nlima okathi enoopa awa ettheku yuulupale ni meepi enkakhelaka odhulu ni vathi. Akhala wiira atthu anwenle paarku owo khaninrumeela nankura, meepi pooti onkakha enroihaka khuta opuro. Masi apweheriwa nankura, paarku owo onoowerya okhala oophareleleya wiira ahiroihiwe ni meepi okathi enoopa awa ettheku yuulupale.

² Okathi munviriha nnyu nxankiho muulupale, nyuwo pooti wiidhoona nkhama paarku ori eriyari ya nlima okathi enoopa awa ettheku yuulupale. Ni muupuwelo nnyu pooti orukunuwa. Okathi nkina nyuwo pooti okhupali wiira Yehova onnoophetani ni wookhaliherani, masi nuuvira okathi pooti opacera waakanyera akhala wiira owo onnoona mixankiho munviriha nnyu. (Esal. 10:1; 13:1) Woonawene nxirikha nnyu pooti olotta moolumo oolipiha yaawo an’ya owiirihani okhala saana. (Mir. 17:17; 25:11) Masi nuuvira okathi nyuwo pooti otthikela waakanyera opheta wa Yehova muupuwelaka wiira owo ohoonyanyalani. Eseeni en’ya wookhaliherani nkhama nankura okathi owo wooxankiha? Ni moolumo makina mun’ya owerya dhai ohihiya okhupali wiira Yehova onnoophetani ni wookhaliherani?

3. (a) Ontaphulelani ‘opheta woororomeleya’ onlottiwa Esalimo 31:7 ni 136:1? (b) Seeni ninlotta nhu wiira Yehova ntakihero nuulupale na opheta woororomeleya? (Moone-tho efootu.)

³ Etthu nkhanle nnyu orumeela nkhama nankura okathi owo wooxankiha, ori wuupuwelela opheta woororomeleya wa Yehova. (Nsome Esalimo 31:7; 136:1.) Nuulumo nawi “opheta woororomeleya” nirumeeliwe iveersu idha, pooti otaphulela waataana woolipa ni ohimmala ntthu onkhalaiyena ni ntthu nkina. Yehova ntakihero nuulupale na ntthu orina opheta woororomeleya. Biibiliya onlotta wiira Yehova ‘toodhareya opheta woororomeleya.’ (Okhu. 34:6, 7; Tradução do Novo Mundo.) Nitho Biibiliya onnilotta voohima dha Yehova airaka: ‘Opheta winyu woororomeleya, ti wuulupale wa atthu ootheene anoovekelani.’ (Esal. 86:5) Moolumo ala antaphulela wiira Yehova khankhala-khala aanyanyalaka arumeyi-ye oororomeleya. Wuupuwelela wiira Yehova toororomeleya, onoowerya woolipihani okathi munviriha nnyu nxankiho muuluple.—Esal. 23:4.

NHILIYALE WIIRA OPHETA WA YEHOVA ONIIRELA MPHANTTA DHOOHUDHIHA DHOOPACERA DHA MBIIBILIYANI

4. (a) Dhoohudhiha seeni dhoopacera dha mbiibiliyani nhudhenre nnyu okathi mwaapacenre nnyu onsoma Biibiliya? Nvahe ntakihero (b) Seeni ohinweryaneya awa ntthu nkina woohihani okhupali dhoohudhiha idho?

⁴ Enamuna ekina ya onrumeela nankura okathi wooxankiha, ori ohiliyala wiira opheta wa Yehova oniirela mphantta dhoohudhiha dhoopacera dha mbiibiliyani. Moolumo a wiira “dhoohudhiha dhoopacera dha mbiibiliyani” antaphulelani wa nyuwo? Woonawene nyuwo munnuupuwela dhoohudhiha dheekhweeli dha Nuulumo na Muluku dheidho nhudhenre nnyu okathi mwaapacenre nnyu onsoma Biibiliya. Mwa ntakihero, nyuwo moohudhera wiira ndhina na Muluku ti Yehova, Yeesu Mwaana Mmodheene a Muluku, atthu akhwiye khandhuwela etthu ni wiira elapo enookhala eparayiisu mwemmo apinaatamu an’ya awa okhala mahiku ootheene. (Esal. 83:18; Mus. 9:5; Yohani 3:16; Wiis. 21:3, 4) Nuumala nyuwo okhupali wiira dhoohudhiha idho ti dheekhweeli, khaavo ntthu owenrye owiirihani ohiya okhupali elo. Mwaha wa seeni? Okhala wiira moowerya woona wiira aakhala mathowa awaatta anniiriha okhupali wiira dhoohudhiha idho ti dheekhweeli. Nirowe nithokorerye moopora woona opheta wa Yehova nkhama yoohudhiha yoopacera ya mbiibiliyani on’ya awa wookhaliherani ohaakanyera wiira Yehova onnoovahani efaita ni onnoona nxankiho munviriha nnyu.

5. Onweryaneya dhai ntthu ophola, niire dho, ohiya okhupali dhoohudhiha dhawootha? Ntthokihere.

⁵ Okathi mwaapacenre nnyu onsoma Biibliya, eseeni yookhalihenreni okhootta dhoohudhiha dhawootha? Woonawene etthu yookhalihenreni waari olikanyiha ele mwaahudhihiwa nnyu etiini mwaari nnyu khalai ni ele Biibiliya onhudhiha iye. Mwa ntakihero, muupuwele wiira khalai nyuwo mwaanikhupali wiira Yeesu ni Muluku ntthu mmodharu. Okathi mwaapacenre nnyu onsoma Biibiliya, woonawene mwaahiikoha wiira: ‘Niire yoohudhiha ela ti yeekhweeli?’ Masi nuumala wiiwasasa saana ele Biibiliya onhudhiha iye voohima dha mwaha owo, nyuwo mwaahoona wiira kahi ekhweeli. Ndho mwaahihiya okhupli yoohudhiha ele yawootha ni mpacera okhupali yoohudhiha ya mbiibiliyani ya wiira: Yeesu ‘yoopattusiwa yoopacera mwa dhoopattusiwa dhootheene’ ni wiira ‘owo Mwaana mmodheene a Muluku.’ (aKol. 1:15; Yohani 3:18) Ekhweeli wiira pooti ‘olipa’ ophola vanrimani, niire dho, ohiya okhupali dhoohudhiha idho dhawootha. (2 aKor. 10:4, 5) Masi nuumala nyuwo opaka elo, khantthikenle-tho okhupali dhoohudhiha idho dhawootha.—aFil. 3:13.

6. Eseeni enookhupalihani wiira ‘opheta woororomeleya wa Yehova onkhala mahiku ootheene’?

⁶ Nyuwo pooti opaka etthu emodharu ni ele Biibiliya onhudhiha iye voohima dha opheta wa Yehova. Okathi munviriha nnyu nxankiho mmodha ni mpacera waakanyera opheta wa Yehova, mwiikohe wiira: ‘Niire kookhalana mathowa ankiiriha wuupuwela dhiidho?’ Nlikanyihe itthu nnaakanyera nnyu voohima dha opheta wa Yehova ni moolumo ari Esalimo 136:1, yeelo eri yawaatikhiwa ya mwaha ola. Seeni Yehova onlotta iye wiira opheta-we ti “woororomeleya”? Seeni moolumo a wiira ‘opheta-we woororomeleya onkhala mahiku ootheene’ antthikeliwa awa ivaara 26 esaalimu ela? Nkhama nithokorenrye nhu, opheta woororomeleya Yehova onwoonihera iye arumeyi-ye, oniirela mphantta dhoohudhiha dhoopacera dha mbiibiliyani dheidho mwaahundhe nnyu okathi mwaapacenre nnyu onsoma Biibiliya. Muupuwelo wa wiira Yehova khanoothokoreryani ni khanoophetani, kahi weekhweeli. Nkhootte mwawaakuveya muupuwelo owo, nkhama dhiidhaale mwaaya nnyu okhootta khuta yoohudhiha yawootha!

7. Dhawaatikhiwa seeni dhinnikhupaliha wiira Yehova onninipheta?

⁷ Biibiliya onnilotta itthu dhawaatta inoonihera wiira Yehova onninipheta. Mwa ntakihero, Yeesu aahaaleela atthareli-ye wiira: ‘Nyuwo mookhalana efaita yuulupale oxira iphera dhawaatta.’ (Math. 10:31) Yehova mwaneene aahaaleela atthu-ye wiira: ‘Kinawoolipihani, aayo, kinawookhaliherani. Kinawoopharelani ni ntata naka neelopwana naxariya.’ (Yes. 41:10) Moone moopora moolumo ala ari awa oolipiha. Yeesu khaalontte wiira ‘nyuwo pooti okhalana efaita yuulupale,’ ni Yehova khaalontte wiira ‘pooti wookhaliherani.’ Ohiya-vo, awo alontte wiira: ‘Nyuwo mookhalana efaita yuulupale’ ni ‘kinawookhaliherani.’ Vaavo munviriha nnyu nxankiho mmodha ni mpacera waakanyera opheta wa Yehova, dhawaatikhiwa idha inawookhaliherani ohiya pahi odhuwela wiira Yehova onnoophetani, masi-tho okhupali elo ni nrima wootheene. Dhawaatikhiwa idha dhinnilotta mathowa anniiriha okhupali wiira Yehova onninipheta. Ndho akhala wiira ninawuupuwelela dhawaatikhiwa idha ni onvekela Yehova, ninoowerya olotta moolumo ari 1 Yohani 4:16 niiraka: ‘Hiyo ninnidhuwela ni okhupali wiira Muluku onninipheta.’a

8. Eseeni munreerela nnyu opaka akhala wiira nanlelo munnaakanyera opheta wa Yehova?

⁸ Masi ankhi akhala wiira nanlelo munnaakanyera opheta wa Yehova? Nlikanyihe ele nnuupuwela nnyu ni ele mundhuwela nnyu voohima dha Yehova. Kahi wiira itthu dhootheene ninuupuwela nhu ti dheekhweeli, masi ele Biibiliya onhudhiha iye voohima dha opheta wa Yehova ti yeekhweeli. Ndho wuupuwela wiira Yehova khannipheta, onlikana ni okhootta okhupali wiira opheta nkhalelo-ye muulupale.—1 Yoh. 4:8.

MUUPUWELELE MOOPORA YEHOVA ‘ONOOPHETAIYENI’

9-10. Eseeni Yeesu aatthuna iye olotta ni moolumo ari Yohani 16:26, 27 yaawo ani: ‘Atiithi annoophetani’? (Moone-tho efootu.)

⁹ Ninoowerya ohudhera voohima dha opheta wa Yehova nithokoreryaka moolumo Yeesu aaleenle iye atthareli-ye airaka: Atiithi annoophetani.’ (Munsome Yohani 16:26, 27.) Yeesu khaalontte moolumo ala wiira aalipihe pahi ahudheri-ye. Vaavo ninsoma nhu iveersu dha ottuli, ninnoona wiira Yeesu khaalontte moolumo ala mwaha wa moopora ahudheri-ye yaaidhoonela awa. Ohiya-vo, owo aalotta voohima dha ovekela.

¹⁰ Yeesu aaira amalakaru waaleela ahudheri-ye wiira yaahaana ovekela erumeelaka ndhina-ne, ohiya onvekela owo. (Yohani 16:23, 24) Elo yaari etthu yootthuneya para awo. Okhala wiira Yeesu aari nxirikha-ya, woonawene nuumala owo ohihimusiwa, ahudheri-ye yaanitthuna onvekela. Woonawene yuupuwela wiira waapheta-we waammwiiriha waawiriyana ni waaleela a Tiithye wiira aakhalihere. Masi Yeesu aalontte wiira khiyaatthuneya wuupuwela dhiidho. Mwaha wa seeni? Okhala wiira owo aaleenle wiira: ‘Atiithi annoophetani.’ Ekhweeli ela enniirela mphantta dhoohudhiha dhoopacera dha mbiibiliyani voohima dha ovekela. Nthokorerye ele moolumo awo antaphulela awa wa nyuwo: Oreela wa yoosoma nnyu ya Biibiliya, moondhuwela saana ni opacera ompheta Yeesu. (Yohani 14:21) Masi, nkhama makiristau a eseekulu yoopacera, nyuwo nhaana onvekela Muluku ndhuwelaka wiira owo ‘onnoophetani.’ Niire nyuwo munnoonihera wiira munnikhupali moolumo ala okathi wootheene nninvekela nnyu Yehova?—1 Yoh. 5:14.

NDHUWELE ETTHU ENWIIRIHANI WAAKANYERA OPHETA WA YEHOVA

11. Seeni Satana on’ya iye ohakalala akhala wiira ninoopacera waakanyera opheta wa Yehova?

¹¹ Eseeni enwiirihani waakanyera opheta wa Yehova? Nyuwo pooti waakhula wiira Satana tonniiriha wuupuwela dhiidho, ni elo ekhweeli. Okhala wiira ‘Satana ontthuna onikhuura,’ owo aanhakalala omoona ntthu aakanyeraka opheta wa Yehova. (1 Ped. 5:8) Hata Yehova oonihenre wiira onninipheta anivahaka nkuttho wawoopola, Satana ontthuna wiira nikaidhoona nkhama atthu ahaana efaita. (aHeb. 2:9) Ndho taani on’ya ohakalala akhala wiira ninoopacera waakanyera opheta wa Yehova, ninookhulumuwa ni ohiya onrumeela Yehova? Moohaakanyera, Satana. Okhala wiira Satana ooyeleela opheta wa Yehova, ontthuna wiira ni hiyo-tho naakanyere opheta wa Yehova. Tivondho onnirumeela ‘olavilavi’ wiira aniirihe wuupuwela wiira hiyo khanimphwanela ophetiwa ni Yehova. (aEefe. 6:11) Ndho vaavo nindhuwela nhu wiira owo ontthuna oniiriha okhupali wiira Yehova khannipheta, ninoowerya olipiha yoolakela nhu ya ‘onkhootta Diyaabu.’—Yak. 4:7.

12-13. Moopora seeni etampi niravihiwe nhu ekhanle awa oniiriha waakanyera opheta wa Yehova?

¹² Yookhala-tho etthu ekina ekhanle oniiriha waakanyera opheta wa Yehova. Eseeni? Etampi niravihiwe nhu. (Esal. 51:5; aRoma 5:12) Etampi yoowiiriha apinaatamu ottaivelana ni Muluku. Nitho yoohonona muupuwelo, nrima ni erutthu nhu.

¹³ Etampi yookhumihera miyuupuwelo dhoohiloka, dheidho dhinniiriha wiivaha nthowa, oxanka, wiidhoona ohiphareleleya ni wuuliwa muru. Hiyo pooti okhalana miyuupuwelo idho okathi yoole nimpaka nhu etampi. Masi elo pooti wiireya mwaha wa okhala atthu oohimalela, weiwo ohinvarihana ni yoolakela ya Muluku anipattusaka. (aRoma 8:20, 21) Nkhama dhiidhaale ncinka aahiidho moota ophutunwe ohinwerya awa weetta saana, hiyo atthu oohimalela, khaninwerya opaka itthu dhootheene saana nkhama Yehova aalakenle iye anipattusaka. Tivondho khanintikhina vaavo ivaara dhikina ninaakanyera nhu opheta wa Yehova. Akhala wiira elo enawiiraneya, nihiliyale wiira Yehova, ‘Muluku muulupale ni awoopiha, . . . oniwoonihera opheta woororomeleya ale animpheta ni aneettela dhooruma-dhe.’—Neh. 1:5.

14. Wuupuwelela yawoopola on’ya onikhalihera dhai ohiya waakanyera opheta wa Yehova? (aRoma 5:8) (Moone-tho ekwaaturu eni: “Nkhootte ‘Wootothiwa ni Owerya wa Etampi.’”)

¹⁴ Ekhweeli wiira ivaara dhikina, hiyo pooti wuupuwela wiira khanimphwanela ophetiwa ni Yehova. Ndho etthu enniiriha waakanyera opheta wa Yehova, okhala wiira opheta-we ti wuulupale ni wavameekhaaya. Khiyaavo etthu nikhanle nhu opaka wiira niphwanele ophetiwa ni Yehova. Masi hata eri dhiidho, nkuttho yoowo Yehova onivanhe iye wiira anilevelele itampi dhihu, onnoonihera wiira onninipheta. (1 Yoh. 4:10) Nhiliyale wiira Yeesu aareenle owoopola anatampi, ohiya apinaatamu oomalela. (Munsome aRoma 5:8.) Khaavo ntthu onwerya opaka itthu dhootheene moomalela, ni Yehova onnidhuwela wiira khaninwerya opaka elo. Vaavo nindhuwela nhu wiira ohimalela pooti oniiriha waakanyera opheta wa Yehova, nihaana wiilipihera wiira nirukunse moopora ninuupuwela nhu.—aRoma 7:24, 25.

NTHANLE OHIHIYA OKHALA OOROROMELEYA

15-16. Eseeni ninreerela nhu okhupali naahihiye okhala oororomeleya wa Yehova, ni mwaha wa seeni? (2 Samuweli 22:26)

¹⁵ Yehova ontthuna wiira nipake yoothanla yooreera ya ohihiya okhala oororomeleya wa veene. (Otum. 30:19, 20) Ndho napaka elo, nikhupali ni nrima wootheene wiira owo khanhiya okhala oororomeleya wa hiyo. (Munsome 2 Samuweli 22:26.) Akhala wiira khaninhiya okhala oororomeleya wa Yehova, nikhupali wiira owo akaannikhalihera khuta okathi onniphwanya awa nxankiho mweekumini mwihu.

¹⁶ Nkhama nithokorenrye nhu, nookhalana mathowa awaatta yaawo ari nkhama nankura annikhalihera ohihiya okhala oolipa okathi ninviriha nhu mixankiho. Nitho nkhama Biibiliya onhudhiha iye, ninnidhuwela wiira Yehova onninipheta ni akaannikhalihera. Akhala wiira nyuwo nnoopacera waakanyera opheta wa Yehova, pooti wuupuwelela voohima dha ele mundhuwela nnyu okhala yeekhweeli, ohiya ele nnuupuwela nnyu okhala yeekhweeli. Tivondho nihihiye okhupali ekhweeli ya mbiibiliyani eni: Opheta woororomeleya wa Yehova onkhala mahiku ootheene.