Yehova Onniniiriha ‘Otteeliwa Nrima Vawaatta’

1-2. (a) Nxankiho seeni atthu awaatta anviriha awa olelo-va? (b) Eseeni nin’ya nhu woona yoosoma ela?

ATTHU awaatta olelo-va, annipaka itthu dhootheene anwerya awa wiira ekhale atthu oohakalala. Masi hata yiilipiheraka, otteeliwa nrima amphwanya awa ti wa okathi vakhaani. Atthu akina anniriipiwa nrima vawaatta ni anuupuwela wiira khadhinkhala-khala itthu iweettelaka saana. Nitho woonawene arumeyi akina a Yehova onnaaphwanya nxankiho owo. Okhala wiira ninkhala ‘mahiku ookhidhera,’ ninnilipelela oniphwanya mixankiho dhuulupale dheidho ikhanle oniiriha oxanka aahiidho oriipiwa nrima vawaatta.—2 Tim. 3:1.

² Yoosoma ela, nin’ya woona itthu ikhanle oniiyera ohakalala wihu ni itthu nikhanle nhu opaka wiira nitthikele okhala oohakalala. Masi wiira nipacere, nirowe nindhuwele taani okhanle onikhalihera okhala oohakalala.

YEHOVA ONOOWERYA ONIKHALIHERA OKHALA ATTHU OOHAKALALA

3. Dhoopattusiwa dhinnihudhihani voohima dha Yehova? (Moone-tho ifootu.)

³ Yehova okathi wootheene toohakalala. Nitho owo ontthuna wiira ni hiyo nikahakalala. Tivondho owo oopaka itthu dhawaatta dhinniiriha okhala oohakalala. Mwa ntakihero, ninnihakalala vaavo ninoona nhu eplaneeta yooreera yeelo ninkhalanhumo, ikoore dhoovirikana, asinama eraaraka ni oca eyooca yoodhiva. Mweekhweeli Yehova onninipheta ni ontthuna wiira nipuhe ekumi!

Mwaasaana a etthepo: Image © Romi Gamit/Shutterstock; asaana a pinkwi: Vladimir Seliverstov/500px via Getty Images; asaana a ipuri: Rita Kochmarjova/stock.adobe.com; akolfiinyu aili: georgeclerk/E+ via Getty Images

4. (a) Eseeni emmwiiriha Yehova ohihiya okhala oohakalala hata oonaka mixankiho ninviriha nhu? (b) Eseeni Yehova ompaka iye wiira anikhalihere okhala oohakalala? (Esalimo 16:11)

⁴ Yehova onniriipiwa nrima vaavo onnoona iye nivirihaka mixankiho. Masi hata eri dhiidho, Biibiliya onninlotta Yehova okhala ‘Muluku oohakalala.’ (1 Tim. 1:11) Ndho eseeni emmwiiriha Yehova ohihiya okhala oohakalala? Nthowa nimodha okhala wiira Yehova onnidhuwela wiira moohilekela onoomaliha mixankiho dhootheene dhinniriipiha nrima. Masi mpakha ophiya okathi owo, Yehova khanhiya onikhapelela ni onikhalihera vaavo ninriipiwa nhu nrima. Owo onnipaka elo anikhaliheraka okhala oohakalala. (Nsome Esalimo 16:11.) Nirowe noone moopora owo aankhalihenre iye Mwane Yeesu okhala oohakalala.

5-6. Mathowa seeni ammwiiriha Yeesu okhala ntthu oohakalala vawaatta?

⁵ Yeesu ntthu oohakalala vawaatta oxira dhoopattusiwa dhootheene dha Yehova. Mwaha wa seeni? Nirowe nithokorerye mathowa maili. (1) ‘Owo eruku ya Muluku ohinooneya’ ni onnitakiha moomalela mikhalelo dha Tiithye. (aKol. 1:15; 1 Tim. 6:15.) (2) Yeesu ooviriha okathi wawaatta ari vamodha ni a Tiithye yaawo ari Maphattuwelo oohakalala.

⁶ Yeesu onnihakalala mwaha wa opaka itthu dhootheene a Tiithye aninruma awa. (Mir. 8:30, 31; Yohani 8:29) Mwaha wa Yeesu okhala oororomeleya, owo onninhakalaliha vawaatta Yehova.—Math. 3:17.

7. Nin’ya owerya dhai ophwanya otteeliwa nrima weekhweeli?

⁷ Nitho hiyo ninoowerya ophwanya otteeliwa nrima weekhweeli naahihiye omwaattamela Yehova, yoowo ori Maphattuwelo oohakalala. Vaavo ninviriha nhu okathi wawaatta nihudhaka voohima dha Yehova ni ontakiha, elo enniniiriha otepa oohakalala. Nitho ninniphwanya otteeliwa nrima vaavo nimpaka nhu yootthuna ya Yehova nidhuwelaka wiira ninninhakalaliha.a (Esal. 33:12) Ekhweeli wiira ivaara dhikina hiyo pooti oviriha okathi wawaatta aahiidho vakhaani niriipiwaka nrima. Ndho vaavo eniiraneya awa elo, niire entaphulela wiira Yehova khanhakalala ni hiyo? Naari! Yehova onnidhuwela wiira na atthu oohimalela ni ivaara dhikina ninniriipiwa nrima aahiidho oxanka. (Esal. 103:14) Vano, nirowe noone itthu ikhanle oniiriha ohiya okhala oohakalala ni itthu ninreerela nhu opaka wiira nitthikele okhala oohakalala.

NHIHIYE ETTHU EKINA EWIIYERAKANI OOHAKALALA WINYU

8. Eseeni ekhanle onikhumelela mwaha wa mixankiho dha mweekumini?

⁸ Etthu yoopacera ekhanle oniiyera ohakalala wihu: Mixankiho dha mweekumini. Niire nyuwo munviriha nxankiho nkhama ottharatthariwa, ihasara dha ephattu, osikhini, owereiwa aahiidho wuuluvala? Mixankiho nkhama idho pooti oniriipiha nrima vawaatta saasaasa akhala wiira khiyaavo etthu nikhanle nhu opaka wiira nirukunse makhalelo nhu. Biibiliya onnoonihera wiira ‘oxankiheya onnimwiiriha ntthu oriipiwa nrima.’ (Mir. 15:13) Nuumala ntokweene mmodha oniitthaniwa Babis okhweliwa muulupale-ye vamodha ni anaan’yari-ye mpuwa wa miyaakha misese, olontte wiira: “Miyo kaaidhona okhala meekhaaka ni khaavo ntthu aakhanle okikhalihera. Nitho ivaara dhikina kaaniriipiwa nrima vawaatta okhala wiira atthu awo ehinakhwe kaanitthuna oviriha okathi wawaatta kiri vamodha naawo, masi khiwaaweryaneya.” Moohaakanyera, mixankiho dha mweekumini pooti oniiriha okhulumuwa ni oriipiwa nrima.

9. Eseeni en’ya onikhalihera otthikela okhala oohakalala? (Yeremiya 29:4-7, 10)

⁹ Eseeni en’ya onikhalihera otthikela okhala oohakalala? Ninoowerya otthikela okhala oohakalala, nihitepaka oxanka ni makhalelo nhu ni oxukhurela itthu nrinhuna. Atthu a moolumwinkuni anhudhiha wiira etthu en’ya waakhalihera okhala oohakalala okhalana itthu dhootheene onramela awa. Masi elo kahi ekhweeli. Mwa ntakihero, Yehova aahaaleela ayuuda yaari weepotthani oBabilooniya wiira yaahaana opaka itthu dhootheene yaawerya awa wiira ekahakalala ni makhalelo-ya mapheya. (Munsome Yeremiya 29:4-7, 10.) Eseeni ninhudhera nhu? Nihaana waakhulela makhalelo nhu ni oxukhurela itthu dhooreera nirinhuna. Nhiliyale wiira okathi wootheene Yehova onawookhaliherani. (Esal. 63:7; 146:5) Mwa ntakihero, Effie yoowo ohinwerya weetta mwaha wa omwiira asitenti, onlotta wiira: “Yehova, amudhi aka ni anna ni arokora a mmulokoni, yaahikikhalihera ni okilipiha vawaatta. Ndho kintthuna onxukhurela Yehova vamodha ni atthu ootheene mwaha wa itthu ankipakela awa mpakha nenna-va. Nitho kinniilipihera wiira kikhale ntthu oohakalala.”

10. Seeni nintthuneya nhu okhala oohakalala hata okathi ninviriha nhu mixankiho?

¹⁰ Hata okathi dhinniphwanya awa mixankiho aahiidho dhinaaphwanya awa amudhi nhu, ninoowerya okhala oohakalala.b (Esal. 126:5) Mwaha wa seeni? Okhala wiira ohakalala wihu khonlipa ni makhalelo nhu. Piyoneera mmodha oniitthaniwa Maria, onlotta wiira: “Okathi ntthu onviriha iye mixankiho masi ahikahiya okhala oohakalala, elo khentaphulela wiira khanoona owereya mwaha wa mixankiho idho. Ohiya-vo, elo enoonihera wiira ntthu owo onninroromela Tiithi nhu a wiirimu wiira onoonkhalihera ohihiya okhala oohakalala moohixikha mixankiho onviriha iye. Nhiliyale wiira hata nvirihaka mixankiho dhuulupale nenna-va, idho ti dha okathi vakhaani. Moohilekela mixankiho dhootheene inoomala.

11. Ntakihero na nrummwa Paaulu ninnikhalihera dhai?

¹¹ Woonawene ivaara dhikina vaavo ninviriha nhu mixankiho, pooti opacera wuupuwela wiira Yehova oohiya onireeliha. Akhala wiira elo enawiiraneya, tivamiruku wuupuwelela matakihero a arumeyi oororomeleya a Yehova a khalai yaawo yaavirinhe mixankiho dhuulupale. Moone ntakihero na nrummwa Paaulu. Owo aahithanliwa ni Yeesu wiira aalaleerye ‘atthu a maloko ootheene vamodha ni mamwene ni aisarayeeli.’ (Mit. 9:15) Elo yaari eparakha yuulupale! Masi hata eri dhiidho, Paaulu aahikhalana mixankiho dhawaatta. (2 aKor. 11:23-27) Niire mwaha wa mixankiho Paaulu aaviriha iye, elo yoonihera wiira Yehova aahihiya onreeliha? Moohaakanyera naari! Masi mwaha wa ohihiya ovilela, elo yoonihera wiira aanireelihiwa ni Yehova. (aRoma 5:3-5) Ndho akhala wiira munviriha mixankiho, nkhupali ni nrima wootheene wiira Yehova khanhiya wooreelihani mwaha wa wiilipihera winyu onrumeela moororomeleya.

12. Ohiiraneya etthu naalipelela nhu onniiyera dhai ohakalala wihu?

¹² Etthu ya naaili ekhanle oniiyera ohakalala wihu: Ohiiraneya etthu naalipelela nhu. (Mir. 13:12) Ompheta ni onxukhurela wihu Yehova, onniniiriha okhalana dhoolukama dha otthuna waacerera nteko nninvarela nhu. Masi akhala wiira dhoolukama dhihu khadhinvarihana ni makhalelo nhu, elo pooti onikhulumula. (Mir. 17:22) Piyoneera mmodha oniitthaniwa Holly, onlotta wiira: “Miyo kaanitthuna vawaatta orowela Eskola ya Anamalaleerya a Omwene, orumeela elapo ekina aahiidho okhalihera nteko wooteka oRamapo. Masi nuuvira okathi, makhalelo aka yaahirukunuwa ni nkaawerya waakhwanihera dhoolukama dhaka. Ndho kaahinyoonyiheya. Etthu yooriipiha nrima vawaatta nitthunaka opaka itthu dhawaatta mmutekoni mwa Yehova, masi nihikawerya.” Nitho arumeyi awaatta a Yehova anoonela dhiidho.

13. Akhala wiira makhalelo nhu khannaakhuleliwa waakhwanihera dhoolukama dhihu, eseeni ninreerela nhu opaka?

¹³ Eseeni en’ya onikhalihera otthikela okhala oohakalala? Nhiliyale wiira Yehova khannivekela opaka etthu nihinwerya nhu. Owo onninivaha efaita hata nihiweryaka opaka itthu atthu akina ampaka awa. Yehova ontthuna wiira nikhale atthu awiiyeviha ni oororomeleya. (Mik. 6:8; 1 aKor. 4:2) Masi etthu Yehova onvaha iye efaita mikhalelo dhihu dhooreera, ohiya itthu nihinwerya nhu opaka. Niire ti vookhalela wiilipihera opaka etthu ninoona nhu wiira khaninwerya?c Moohaakanyera naari! Akhala wiira khamunwerya opaka itthu dhikina mmutekoni mwa Yehova mwaha wa makhalelo nnyu, mwiilipihere opaka idhe munwerya nnyu. Mwa ntakihero, niire nyuwo mwaanwerya onkhalihera rapasi mmodha aahiidho waalipiha anna ni arokora awuuluvala? Niire mwaanwerya okhalana yoolukama ya onsekurya ntthu mmodha, onlikarela aahiidho omwaatikhela mensaaxe wiira munlipihe? Akhala wiira nnawiilipihera waakhwanihera dhoolukama nkhama idha moovarihana ni makhalelo nnyu, Yehova onawoorelihani oovahakani otteeliwa nrima! Nitho nhiliyale wiira nhoolo ninookhalana eparakha ya onrumeela Yehova mwa inamuna dhoovirikana nihitanke nhu wuupuwelela. Holly yoowo ninlontte nhu ottuli, onnimaliha olotta airaka: “Miyo kinnikilaathi kinuupuwela wiira: ‘Kookhalana nlipelelo na okhala mahiku ootheene.’ Ni kikhaliheriwaka ni Yehova, okathi owo kinoowerya waakhwanihera dhoolukama dhaka.”

14. Etthu seeni ekina ekhanle oniiyera ohakalala wihu?

¹⁴ Etthu ya neeraru ekhanle oniiyera ohakalala wihu: Otthuna wiidhiveliha. Atthu awaatta annirumeela interneeti wiira emwaramwarye muupuwelo wa wiira ntthu onoowerya okhala oohakalala apakaka itthu dhootheene inindhivela. Ndho naahivahe ephoole, pooti opacera wuupuwela wiira opaka ni othuma itthu dhinnidhivela ni weetta mikwaha, itthu idho pooti oniiriha ohakalala. Ekhweeli wiira kahi vootthekeya opaka itthu idho. Yehova onipattunse wiira nikadhiveliwa ni itthu dhooreera. Masi atthu awaatta yeeherenrye opaka itthu dhaadhivela, nhoolo-mwa ahoona wiira itthu idho khidhaaphwanyinhe ohakalala weekhweeli. Piyoneera mmodha oniitthaniwa Eva, onlotta wiira: “Vaavo ntthu yoolakela-ye yuulupale enkhala awa wiidhiveliha, owo khamphiyeriwa.” Okhalana yoolakela ya wiidhiveliha, pooti oniiriha oriipiwa nrima ni okhulumuwa.

15. Eseeni ninhudhera nhu ni yawiiraneya ya mwene Salomooni?

¹⁵ Ninoowerya ohudhera etthu ni yawiiraneya ya mwene Salomooni moopora otthuna wiidhiveliha onkhumihera awa oriipiwa nrima. Owo aaheehererya ophwanya ohakalala weekhweeli apakaka khuta etthu yaandhivela nkhama oca eyooca yoodhiva, owiriyana macipo ooreera ni othuma itthu dhootheene dhooreera dhaariwo okathi ole. Masi itthu idho khidhaamphwanyinhe ohakalala aaramela iye. Owo olontte wiira: ‘Maitho khamphiyeriwa ni itthu anoona awa ni maaru khamphiyeriwa ni itthu aniiwa awa.’ (Mus. 1:8; 2:1-11) Miyuupuwelo dha moolumwinkuni voohima dha ophwanya ohakalala weekhweeli onlikana ni nsurukhu ohinciwa. Miyuupuwelo idho dhinkhala nkhama wiira ti dhooreera, masi khadhimphwanyiha ohakalala weekhweeli.

16. Waakhalihera atthu akina oniiriha dhai otthikela okhala oohakalala? (Moone-tho ifootu.)

¹⁶ Eseeni en’ya onikhalihera otthikela okhala oohakalala? Yeesu onihudhinhe wiira ‘ovaha onnitepa ohakalaliha oxira ovahiwa.’ (Mit. 20:35) Ntokweene mmodha oniitthaniwa Alekos, onlotta wiira: “Miyo kinniilipihera opaka itthu ikhaani wiira kaakhalihere atthu akina. Opaka elo, onnikiiriha oxaka wiidhuupuwela mootepana ni ennikihakalaliha.” Eseeni nkhanle nnyu opaka wiira mwaakhalihere atthu akina? Mwamoona ntthu oriipiwe nrima, mpake etthu wiira munlipihe. Woonawene nyuwo pooti ohiwerya omaliha nxankiho-ye, masi nnoowerya onlipiha munwiriyanaka ni ephoole, onreerela nrima ni omuupusera onvekela Yehova anleelaka nxankiho onviriha iye. (Esal. 55:22; 68:19) Nitho nyuwo pooti onkhalihera owo woona wiira Yehova khannyanyanle. (Esal. 37:28; Yes. 59:1) Mwa ntakihero, nyuwo pooti ompakela itthu nkhama onkhalihera waapeya eyooca aahiidho orowa weetta vamodha nuuwo. Nitho nyuwo pooti okhuma nuuwo nteko woolaleerya, opaka elo enoonlipiha. Mwaakhulele orumeeliwa ni Yehova wiira mwaalipihe atthu akina. Vaavo ninrumeela nhu okathi nhu wiira naakhalihere atthu akina, ninniphwanya ohakalala weekhweeli!—Mir. 11:25.

17. Eseeni ninreerela nhu opaka wiira niwerye ophwanya otteeliwa nrima weekhweeli? (Esalimo 43:4)

¹⁷ Ohihiya omwaattamela Tiithi nhu a wiirimu Yehova, onoonikhalihera ophwanya ohakalala weekhweeli. Biibiliya onlaihera wiira Yehova onooniiriha ‘otteeliwa nrima vawaatta.’ (Nsome Esalimo 43:4.) Tivondho moohixikha mixankiho ninviriha nhu, khanintthuneya otepa oxanka aahiidho woova. Akhala wiira ninoonroromela Yehova yoowo ori Maphattuwelo oohakalala, ninoowerya ophwanya otteeliwa nrima weekhweeli!—Esal. 144:15.