Nhihiye Waavekelela Atthu Akina

1. Eseeni ennikhupaliha wiira mavekelo nhu tootepa otthuneya wa Yehova?

NIVEKELO yoovaha yootepa oreera. Muupuwele ela: Yehova oovaha malaikha miritti dhoovirikana. (Esal. 91:11) Nitho Yehova oonvaha miritti dhuulupale Mwane. (Math. 28:18) Masi niire veene onthanla ntthu nkina wiira akawiriyana mavekelo nhu? Naari. Yehova ‘Namaiwa mavekelo.’ (Esal. 65:2) Owo tonniiwa vaavo ninvekela nhu.

2. Seeni nrummwa Paaulu ori iye ntakihero nooreera voohima dha waavekelela atthu akina?

² Nnaamwi niri ootaphuwa onvekela Yehova ninleelaka itthu dhinnixankiha, masi-tho niliyale waavekelela atthu akina. Nrummwa Paaulu oovaha ntakihero nooreera nintthuneya nhu otthara. Mwa ntakihero, owo aahiwaatikhela ewarakha anna a muloko wa wEefeso airaka: “Nkinahiye wooromolani kaavekelaka.” (aEefe. 1:16) Nitho Paaulu aanaavekelela atthu aadhuwela iye aromolaka madhina-ya. Mwa ntakihero, owo aahinleela Timootiyu wiira: “Kinnimuxukhuru Muluku, . . . okathi wotheene kinvekela aka, kinniwuupuwelani othana ni ohiyu.” (2 Tim. 1:3) Nrummwa Paaulu aahikhalana mixankiho dhawaatta mweekumini-mwe ni aaninvekela Yehova anleelaka mixankiho idho. (2 aKor. 11:23; 12:7, 8) Masi hata eri dhiidho, owo aaniivaha okathi wiira aavekelele atthu akina.

3. Eseeni ekhanle oniiriha ivaara dhikina oliyala waavekelela atthu akina?

³ Ivaara dhikina hiyo pooti oliyala waavekelela atthu akina. Mwaha wa seeni? Nrokora mmodha oniitthaniwa Sabrinaa onnilotta etthu emodha ekhanle oniiriha oliyala waavekelela atthu akina. Owo onlotta wiira: “Olumwinku ola ninkhala nhu pooti onikhumelela mixankiho nahaalipelela nhu. Ndho mwaha wa elo, hiyo pooti opacera ovaha ephoole pahi mixankiho dhihu ni wiivekelela.” Niire mwaataka okhalana moonelo owo? Akhala wiira ti dhiidho, yoosoma ela enawookhaliherani: (1) Woona seeni ori awa wootthuneya waavekelela atthu akina ni (2) itthu dhin’ya wookhaliherani opaka elo.

SEENI NINTTHUNEYA NHU WAAVEKELELA ATTHU AKINA?

4-5. “Owerya wuulupale” wa mavekelo nhu onaakhalihera dhai atthu akina? (Yakobo 5:16)

⁴ Waavekelela atthu akina ‘wookhalana owerya wuulupale.’ (Munsome Yakobo 5:16.) Mavekelo nhu anoowerya waakhalihera atthu akina. Yeesu aanidhuwela wiira mavekelo anniwerya onkhalihera ntthu. Mwaha wa odhuwela wiira nrummwa Pheeduru aammukhootta, Yeesu aahilotta wiira: ‘Masi kinninsafatali Muluku wiira waamini winyu ohihononeye.’ (Luka 22:32) Nitho Paaulu aanidhuwela wiira mavekelo aakhalana owerya. Okathi Paaulu aatthukeliwe iye moohixariya oRooma, owo aahimwaatikhela ewarakha Filemooni airaka: ‘Tthiri kinniroromela wiira mwaha wa mavekelo nnyu kinootaphuliwa kitthikele weiwo.’ (Fil. 22; moone enoota) Ndho eseeni yaakhumelenle? Nuuvira okathi vakhaani, Paaulu aahikhumihiwa nkateya atthikela ovara nteko woolaleerya.

⁵ Masi elo khentaphulela wiira mavekelo nhu aakhalana owerya wa onkhanyerera Yehova opaka khuta etthu ninvekela nhu. Yehova onniwiriyana mavekelo ampakiwa ni arumeyi-ye ni ivaara dhikina onnaakhula moovarihana ni ele avekenla awa. Odhuwela elo, onninitumererya ohihiya onvekela Yehova ninleela aka mixankiho dhihu, niroromelaka wiira owo onawaakhula mwa enamuna onoona iye oreerela.—Esal. 37:5; Mmoone 2 aKorinto 1:11.

6. Moovarihana ni matakihero nithokorenrye nhu, eseeni eniireya vaavo ninaavekelela nhu atthu akina? (1 Pedru 3:8)

⁶ Waavekelela atthu akina onninikhalihera ‘waamorela ikharari.’ (Munsome 1 Pedru 3:8.) Ntthu oomoriwa ikharari onnoona owereya wa atthu akina ni onnipaka etthu wiira aakhalihere. (Marko 1:40, 41) Waavekelela atthu akina onnikhumihera mireerelo dhawaatta. Mwa ntakihero, ntokweene mmodha oniitthaniwa Michael onlotta wiira: “Vaavo kinaavekelelaka atthu akina, kinnidhuwela saana mixankiho anviriha awa ni elo ennaacerera waapheta waka. Miyo kinniidhoona okhala vakhiviru naawo, hata awo ehidhuwelaka elo.” Ntokweene nkina oniitthaniwa Richard, onlotta wiira: “Vaavo nininvekelela nhu ntthu, elo enninitumererya opaka etthu wiira ninkhalihere. Ndho vaavo nimpaka nhu etthu wiira ninkhalihere ntthu owo nininvekelela nhu, ninnikhalihera waakhuliwa wa nivekelo nno.”

7. Waavekelela atthu akina onnikhalihera dhai woona mixankiho dhihu mwa enamuna yookhalela? (aFilipi 2:3, 4) (Moone-tho ifootu.)

⁷ Waavekelela atthu akina onninikhalihera woona mixankiho dhihu mwa enamuna yookhalela. (Munsome aFilipi 2:3, 4.) Ootheene nhu ninnikumanana mixankiho dhoovirikana okhala wiira ninkhala olumwinku oneettihiwa ni Satana. (1 Yoh. 5:19; Wiis. 12:12) Okhalana yoolema ya waavekelela atthu akina onninuupusera wiira ‘[annihu] a olumwinku wootheene annihaawa nkhama [hiyo].’ (1 Ped. 5:9) Piyoneera mmodha oniitthaniwa Katherine onlotta wiira: “Waavekelela atthu akina onnikuupusera wiira kahi meekhaaka kinviriha mixankiho. Ndho wuupuwelela elo, ennikikhalihera ohitepasa oxanka mwaha wa mixankiho kinviriha aka.”

ATTHU AWO ANNITTHUNA OVEKELELIWA NI HIYO

8. Taani ninreerela nhu waavekelela? Nvahe ntakihero.

⁸ Taani ninreerela nhu waavekelela? Hiyo pooti waavekelela atthu oovirikana. Mwa ntakihero, hiyo pooti waavekelela atthu ale anwereiwa, marapasi ankhanyereriwa opaka itthu dhoohiloka oskola ni ale anviriha mixankiho mwaha wa wuuluvala. Nitho anna ni arokora awaatta anninyokhiwa ni amudhi-ya aahiidho ni ikuveernu. (Math. 10:18, 36; Mit. 12:5) Mwaha wa ohiiwanana wa anapoliitika, anna akina annitthawa opuro yaakhala awa ehiya mampa-ya. Akina annihaawa mwaha wa ihasara dha ephattu. Woonawene anna ni arokora awo khaninaadhuwela. Masi vaavo ninaavekelela nhu, ninnoonihera wiira ninniiwelela yooruma ya Yeesu ya ‘ophetana nkina ni nkhwe.’—Yohani 13:34.

9. Seeni nintthuneya nhu waavekelela ale anholeela mmutthenkesoni mwa Yehova vamodha ni adhaariya?

⁹ Nitho hiyo pooti waavekelela ale anhoolela mmutthenkesoni mwa Yehova. Elo enaahela mpuwa anna a Nikhuru Noolamulela ni anamakhalihera-ya, anna a Ekomisawu ya Efiliyaali, asitokweene anhoolela miteko dhikina obeteeli, asitokweene a esirkwiitu, asitokweene a mmulokoni ni arumeyi ookhalihera. Nnaamwi anna awo evirihaka mixankiho, annivara miteko dhawaatta mooluttuweliwa wiira enikhapelele. (2 aKor. 12:15) Mwa ntakihero, ntokweene mmodha a esirkwiitu, onlotta wiira: “Nxankiho aka muulupale ori okhala ottaiwene ni anaan’yari aka. Awo ahuuluvala ni anoowereiwa. Masi koodhuwela wiira nrokoraka ni amamune annaakhapelela awo. Ndho kinniriipiwa nrima mwaha wa ohiwerya waakhalihera nkhama kaatthuna aka.” Hiyo khaniwerya odhuwela mixankiho anna awo anviriha awa. Masi hiyo pooti waavekelela. (1 aTes. 5:12, 13) Nitho nihaana waavekelela adhaariya okhala wiira annaakhalihera moororomeleya wiira ekawerya waakhwanihera dhoothanleliwa anaakhela awa.

10-11. Niire opaka mavekelo anaahela mpuwa anna ni arokora ootheene anninhakalaliha Yehova? Ntthokihere.

¹⁰ Nkhama noonne nhu, hiyo pooti waavekelela anna ni arokora oovirikana. Mwa ntakihero, hata nihuupuwelaka madhina a anna ni arokora awo, ivaara dhawaatta ninninvekela Yehova wiira aakhalihere ale atthukeliwe nkateya, aahiidho akhweliwe ntthu yaampheta awa. Ntokweene mmodha oniitthaniwa Donald, onlotta wiira: “Hiyo nookhalana anna ni arokora awaatta yaawo anviriha mixankiho, ndho elo enniniiriha ivaara dhikina opaka nivekelo nnaahela mpuwa atthu ootheene nivekaka wiira Yehova aakhalihere atthu a olumwinku wootheene anviriha mixankiho.”

¹¹ Niire mavekelo awo anninhakalaliha Yehova? Moohaakanyera anninhakalaliha! Hiyo khanindhuwela saana itthu annihu anramela awa. Ndho kahi etthu yootthekeya opaka nivekelo nnaahela mpuwa atthu ootheene naaromolaka anna ni arokora oovirikana. (Yohani 17:20; aEefe. 6:18) Mavekelo nkhama awo annoonihera wiira ‘ninnaapheta anna a olumwinku wootheene.’—1 Ped. 2:17.

MWAAVEKELELE ATTHU AKINA MOOLULUWANYA

12. Okhala atthu oovaha ephoole on’ya onikhalihera dhai opaka mavekelo ooluluwanya?

¹² Nhaana ovaha ephoole. Ohiya opaka mavekelo anaahela mpuwa anna ni arokora ootheene, nhaana waavekelela mooluluwanya. Niire muloko nnyu ookhala ntthu orina eretta ehimpenuiwa? Niire ookhala rapasi oriipiwe nrima, mwaha wa mixankiho onviriha iye oskola? Niire munnindhuwela munna aahindho nrokora, oniilipihera onhuwa mwane meekhe ‘attharaka malakihero a Yehova’? (aEefe. 6:4) Akhala wiira nnoovaha ephoole nnoowerya owoonela othunku atthu, ni elo enawootumereryani waavekelela mooluluwanya.b—aRoma 12:15.

13. Eseeni en’ya onikhalihera waavekelela anna ni arokora nihinaadhuwela nhu?

¹³ Mwaavekelele anna ni arokora nromolaka madhina-ya. Hiyo ninoowerya opaka elo waahela mpuwa anna ni arokora nihinaadhuwela nhu. Mwa ntakihero, anna ni arokora awaatta a oCingapura, oCrimeia, wEritreia ni oRussia aatthukeliwa nkateya. Hiyo ninoowerya ophwanya eliista ya madhina a anna ni arokora awo nsaaitini jw.org.c Ntokweene a esirkwiitu mmodha oniitthaniwa Brian, onlotta wiira: “Miyo kihoona wiira waatikha ndhina na munna aahiidho nrokora mmodha otthukeliwe, nuumala-vo kikaromola ndhina-ne kuutuperyaka onnikikhalaihera wuupuwelela ni onvekelela kiromolaka ndhina-ne.”

14-15. Eseeni en’ya onikhalihera opaka mavekelo ooluluwanya?

¹⁴ Mpake mavekelo ooluluwanya. Michael, yoowo ninlontte nhu ottuli, onnitthikela olotta airaka: “Vaavo kinsomaaka nsaaitini jw.org dhawiiraneya dha mweekumini dha anna atthukeliwe, kinniilipihera wiipweha nipuro-na ni wuupuwelela moopora kaayaaka woonela vaakhanle wiira ti miyo kitthukeliwe. Moohaakanyera kaanxaka moopora woomphwanya ntthu aaya akaakhapelela amwaaraka. Ndho elo ennikiiriha waavekelela anna oothela atthukeliwe nkateya.”—aHeb. 13:3, enoota.

¹⁵ Wuupuwelela mixankiho anviriha awa khuta nihiku anna atthukeliwe nkateya pooti onikhalihera waavekelela mooluluwanya. Mwa ntakihero, hiyo pooti ovekela wiira makwarta a nkateya ekaakhapelela saana anna awo, ni makhulupale ewaakhulelihe onkokhorela Yehova mootaphuwa. (1 Tim. 2:1, 2) Nitho hiyo pooti ovekela wiira ntakihero na anna awo oororomeleya nilipihe muloko ori opuro awo, ni wiira atthu ahininrumeela Yehova yaakhulele nhupi ninlaleya nhu. (1 Ped. 2:12) Ohiya-vo, miruku idha pooti onikhalihera vaavo ninaavekelala nhu anna anvilela mixankiho dhoovirikana. Vaavo ninvaha nhu ephoole, ninniwerya waavekelela anna ni arokora niromolaka madhina-ya, ni ninnipaka mavekelo ooluluwanya anoonihera wiira ‘ophetana wihu nkina ni nkhwe onnitepa waacerereya.’—1 aTes. 3:12.

NKHALENA MOONELO WOOREERA VOOHIMA DHA MAVEKELO NNYU

16. Moonelo seeni ninreerela nhu okhalana voohima dha mavekelo nhu? (Matheyo 6:8)

¹⁶ Nkhama noonne nhu, mavekelo nhu anoowerya onkhalihera ntthu onviriha mixankiho. Masi nihaana okhalana moonelo wooreera vaavo nimpaka nhu mavekelo awo. Okathi ninvekela nhu, kahi wiira nininleela Yehova etthu ohindhuwela iye. Nitho hiyo khanintthuneya onvaha miruku ninleelaka enamuna yooreera ya ophuka mwaha mmodha. Yehova onnidhuwela mixankiho dhootheene arumeyi-ye anviriha awa ehinaakuve onvekela ni ehinaakuve atthu akina odhuwela. (Munsome Matheyo 6:8.) Akhala wiira ti dhiidho, seeni nintthuneya nhu waavekelela atthu akina? Ohiya pahi mathowa noonne nhu yoosoma ela, waavekelela atthu akina enamuna emodha ninoonihera nhu wiira ninnaapheta. Ndho Yehova onnihakalala vawaatta vaavo onwoona iye arumeyi-ye ettharaka ntakihero-ne na okhala atthu oopheta.

17-18. Nlikanyiho seeni ninnikhalihera okhalana moonelo wooreera voohima dha mavekelo nhu?

¹⁷ Ivaara dhikina, pooti okhala nkhama mavekelo nhu khawenrye onkhalihera ntthu owo. Masi hata eri dhiidho, awo annoonihera wiira ninnaapheta anna, ni Yehova onnivaha ephoole elo. Wiira niiwasase elo, nirowe nithokorerye nlikanyiho nimodha: Nkahaya muupuwelo ettheko emodha erina anaahima aili akhaani; mmodha anlopwana, nkina anthiyana. Nuumala-vo, ole anlopwana onniwereiwa vawaatta. Ndho ole anthiyana onnaavekela apaapa-ye airaka: “Safatali paapa, mpake etthu wiira munkhalihere nrokoraka. Owo khanreela owereiwa vawaatta!” Ekhweeli wiira paapa owo onnoona owereya wa mwane, onnimpheta ni onnipaka itthu dhootheene onwerya iye wiira ankhapelele. Vano, nkahaya muupuwele moopora owo aaya iye ohakalala nuumala omoona mwane anthiyana axankaka ni nrokoriye ni avekaka wiira awo enkhalihere.

¹⁸ Mwa enamuna emodharu, Yehova ontthuna wiira nikapaka elo. Owo ontthuna wiira nithokoreryane ni olevelelana nkina ni nkhwe. Vaavo nimpaka nhu elo, ninnixaka wiipheta meekhihu, masi ninnoonihera wiira ninnaapheta anna ni arokora ni nrima wootheene. Ndho Yehova onnoona vaavo nimpaka nhu elo. (2 aTes. 1:3; aHeb. 6:10) Nitho nkhama noonne nhu, ivaara dhikina mavekelo nhu pooti onkhalihera ntthu onviriha mixankiho mweekumini-mwe. Tivondho, nihikhala-khale niliyalaka waavekelela atthu akina.