Nhihiye Ottottela Nreerelo Itthu dha Omunepani Yehova Onnivaha Iye

1. Wiira nikhale akumi, Yehova onipattunse ni dhootthuneya seeni? (Matheyo 5:3)

YEHOVA aapattunse apinaatamu adhuwelaka wiira annitthuneya okhalana itthu wiira ekhale akumi. Mwa ntakihero, hiyo ninnitthuneya okhalana eyooca, ikuwo ni opuro wookhala. Ndho naakhalena itthu idho dhootthuneya, hata okhalaka okathi vakhaani, ekumi nhu pooti okhala yooxankiha aahiidho okhwa. Ohiya pahi Yehova onipattusa ni dhootthuneya dha veerutthuni, owo onnidhuwela wiira yookhala etthu ekina apinaatamu antthuneya awa, ori olakiheriwa nuuwo. (Munsome Matheyo 5:3.) Ndho wiira niphwanye ohakalala weekhweeli, nihaana odhuwela wiira ninnitthuneya olakiheriwa ni Muluku ni ohihiya ottottela nreerelo elo.

2. Ontaphulelani ‘odhuwela wiira munnitthuneya olakiheriwa ni Muluku’? Nvahe nlikanyiho

² Ontaphulelani ‘odhuwela wiira ninnitthuneya olakiheriwa ni Muluku’? Elottelo ya ekereku, moolumo ala aninhima ntthu ori masikhini aahiidho nasimola nkhalelo wa omunepani. Ndho moolumo awo anniniiriha omuupuwela ntthu onveka esimola, yoowo owanre ikuwo dhoothaala ni okilaanthi waattamela mphuroni. Othana onkhala vandhuwani ni ohiyu onniriiriwa vawaatta. Owo khanwerya ophwanya eyooca ni atthu awaatta annixaka omwaattamela mwaha wa ikuwo owanre iye. Ndho mwaha wa elo, onniriipiwa nrima ni onnikhulumuwa. Masi hata eri dhiidho, owo onnidhuwela wiira onnitthuneya okhaliheriwa ni ntthu nkina wiira awerye okhalana itthu dhinninthowa. Mwa enamuna emodharu, ntthu ondhuwela wiira onnitthuneya olakiheriwa ni Muluku, niire dho, ori oothowa, aahiidho nasimola nkhalelo wa omunepani, onnidhuwela wiira onnitthuneya okhaliheriwa ni Muluku mweekumini-mwe. Tivondho owo onnitthuna vawaatta ottottele nreerelo itthu dha omunepani Yehova onnaavaha iye ale animpheta.

3. Eseeni nin’ya nhu woona yoosoma ela?

³ Yoosoma ela, nin’ya woona etthu ninhudha nhu ni ntakihero na nthiyana a oFeniisiya, yoowo aanvekenle Yeesu nikhalihero. Yawiiraneya elo, ennilotta mikhalelo miraru anreerela awa wunnuwihera ale andhuwela wiira annitthuneya olakiheriwa ni Muluku. Moottharelana, ninoothokorerya ntakihero na Pheeduru, Paaulu ni Davidi, alopwana yaawo yaalipihera okoca olakiheriwa ni Muluku.

ETTHU NINHUDHA NHU NI WIIYEVIHA, OKHANYERERA NI WAAMINI WA NTHIYANA A OFENIISIYA

4. Eseeni nthiyana a oFeniisiya aanvekele iye Yeesu?

⁴ Nihiku nimodha, nthiyana mmodha a oFeniisiya aahimwaattamela Yeesu. Mwane a nthiyana ‘aanihaawa vawaatta mwaha wa nlaikha nootakhala naanvolonwe.’ (Math. 15:21-28) Nthiyana owo aahikokhora akanvekela Yeesu wiira ankhalihere. Nirowe noone etthu ninhudha nhu ni ntakihero na nthiyana a oFeniisiya nithokoreryaka mikhalelo miraru oonihenre iye okathi aamwaattamenle iye Yeesu.

5. Mikhalelo seeni nthiyana a oFeniisiya oonihenre iye, ni Yeesu aapankeni? (Moone-tho efootu.)

⁵ Nthiyana a oFeniisiya aahoonihera wiiyeviha. Eseeni enniiriha olotta dhiidho? Okhala wiira owo khaananariwe nuumala Yeesu onlikanyiha ni mwaasaana a mwalapwa, woonawene aari mwaasinama yoowo atthu yahaari ayuuda yaahuwa awa mmawannya. Mwaakhanle wiira nuuwo mwa nthiyana ole a oFeniisiya, eseeni mwaaya nnyu opaka? Niire mwaannanariwa ni ohiya oveka nikhalihero? Nthiyana a oFeniisiya, khaapanke elo. Ohiya pahi okhala awiiyeviha, owo aahoonihera okhanyerera ahihiyaka onvekela nikhalihero Yeesu. Eseeni yaamwiirinhe opaka elo? Okhala wiira aanimwaamini Yeesu. Ndho waamini wuulupale wa nthiyana ole, waahimwiiriha Yeesu opaka etthu wiira ankhalihere. Nnaamwi Yeesu aalontte wiira ‘aarummwe orowa wa aisarayeeli, yaawo yaari nkhama ipwittipwitthi irimeenle’, owo aahiikara nlaikha nne nootakhala naanvolonwe mwane nthiyana ole ahaari n’yuuda.

6. Eseeni ninhudha nhu ni yawiiraneya ya nthiyana a oFeniisiya?

⁶ Nkhama nthiyana ole, wiira nihihiye ottottela nreerelo itthu dha omunepani Yehova onnivaha iye, nihaana wuunuwihera mikhalelo nkhama wiiyeviha, okhanyerera ni okhalana waamini woolipa. Okhala wiira ntthu awiiyeviha khanhiya okanyerera oveka nikhalihero na Muluku. Nitho nihaana olipiha omwaamini wihu Yeesu ni waaroromela ale onaarumeela iye wiira aweettihe ahudheri-ye. (Math. 24:45-47) Yehova ni Yeesu, annihakalala onivaha itthu dha omunepani vaavo ninoonihera nhu mikhalelo idho. (Mmoone Yakobo 1:5-7.) Vano, nirowe noone etthu ninreerela nhu opaka wiira nittottele nreerelo itthu dha omunepani Yehova onnivaha iye, nithokoreryaka ntakihero na Pheeduru, Paaulu ni Davidi.

NKHAMA PHEEDURU, NHIHIYE WIICIHA NKHALELO WA OMUNEPANI

7. Nritti seeni Yeesu aanvanhe iye Pheeduru, ni eseeni owo aareerela iye opaka? Ntthokihere. (aHeeberi 5:14–6:1)

⁷ Nirowe nithokorerye ntakihero na nrummwa Pheeduru. Owo aari mmodha a ayuuda oopacera okhupali wiira Yeesu aari Mesiya, yoowo Yehova aanrumeela iye wiira aahudhihe atthu ‘moolumo a ekumi yoohimala.’ (Yohani 6:66-68) Ahinaatthi otthikela wiirimu, Yeesu aahinvaha nritti Pheeduru, airaka: ‘Ncihe ipwittipwitthi dhaka.’ (Yohani 21:17) Pheeduru aahaakhwanihera yoothanleliwa ele moororomeleya, ni Yehova aahinrumeela wiira aatikhe iliivuru piili dha mbiibiliyani. Masi Pheeduru aanitthuneya wiiciha nkhalelo wa omunepani. Mwa ntakihero, owo aanisoma iwarakha nrummwa Paaulu aatinkhe iye uupuseriwaka ni Muluku. Pheeduru aanikhupali wiira itthu dhikina Paaulu aatinkhe iye dhaari ‘dhoovila wiiwasasa.’ (2 Ped. 3:15, 16) Masi hata eri dhiidho, Pheeduru aahikhanyerera osoma itthu idho dhaalikana ni ‘eyooca yoolipa’, akhupaliki wiira akhaliheriwaka ni Yehova, aanwerya wiiwasasa ni ovarihela nteko ele aahudha iye.—Munsome aHeeberi 5:14–6:1.

8. Pheeduru oonenle dhai nuumala ovahiwa malakihero ni nlaikha?

⁸ Pheeduru aahoonihera omwaamini Yehova vaavo aaiwelenle iye malakihero aavahiwe iye. Mwa ntakihero, Pheeduru ari epooma ya oXoopi, aahoona yawoonihiwa emodha. Yawoonihiwa elo, nlaikha nimodha naahinruma Pheeduru wiira aiphe ni akhuure inama dheidho moovarihana ni Nlamulo na Moise, dhaari dha mwiikho. Mwa moonelo wa ayuuda, yooruma elo yaari yoohiloka. Tivondho woopacerani, Pheeduru aahaakhura airaka: ‘Pwiiya, nkinkhuura nnakhala vakhaani, okhala wiira mwaano mwaka khenayemo etthu ya mwiikho ni enkhoottihiwa ni nlamulo.’ Ndho nlaikha nno naahinleela wiira: ‘Nhiye wiitthana okhala dhamwiikho itthu Muluku oreerinhe iye.’ (Mit. 10:9-15) Pheeduru aahiiwelela ni aahirukunsa moopora uupuwela iye. Eseeni ennikhupaliha? Okhala wiira nuumala woona yawoonihiwa ele, yaahuura alopwana araru yaarummwe ni Korneeliyu, yoowo ahaari n’yuuda envekela Pheeduru wiira atthare wiira yakumane ni pwiya awa. Okhala wene, ayuuda yanaathokorerya atthu yahaari ayuuda okhala amwiikho. Ndho vaakhala wiira Pheeduru khiyaankhumelela yawoonihiwa ele, owo khaakhala-khala aakhulelaka ovolowa empa ya nlopwana ole ahaari n’yuuda. (Mit. 10:28, 29) Masi Pheeduru aahaakhulela naanaanoru malakihero aavahiwe iye ni Yehova voohima dha mwaha ole. (Mir. 4:18) Owo aahinlaleerya Korneeliyu vamodha ni atthu ootheene a ettheko-ye ni aahihakalala owoona awo yaakhulelaka ekhweeli, yaakhelaka munepa wawaarya ni epatisiwaka.—Mit. 10:44-48.

9. Mireerelo seeni nimphwanya nhu vaavo niniilamaleliha nhu oca eyooca yoolipa ya omunepani?

⁹ Nkhama Pheeduru, nihaana okathi wootheene osoma ikhweeli dhoopacera dha Nuulumo na Muluku, dheidho dhinlikana ni nipele. Ohiya-vo, nihaana wiilamaleliha oca eyooca yoolipa ya omunepani, niire dho, ikhweeli dhoovila wiiwasasa. Ndho wiira nipake elo, tivootthuneya wiivaha okathi ni wiilipihera wiira niwerye wiiwasasa ikhweeli dhawiisera aahiidho dhoovila dha mbiibiliyani. Mwaha wa eseeni? Vaavo nimpaka nhu elo ninniphwanya mireerelo miili. Woopacera, ninnihudha itthu dhawaatta voohima dha Yehova dheidho dhinnikhalihera wunnuwihera ompheta wihu ni onttittimiha. Ni wanaaili, elo enoonitumererya waaleela atthu akina voohima dha Tiithi nhu a wiirimu. (aRoma 11:33; Wiis. 4:11) Ohiya-vo, ntakihero na Pheeduru ninninihudhiha etthu ekina: Vaavo ankhumelela awa marukunuso voohima dha moopora niniiwasasa nhu Nuulumo na Muluku, nihaana okhala awaakuva orukunsa muupuwelo nhu ni moopora nimpaka nhu itthu. Opaka elo enoonikhalihera ohihiya wiiciha nkhalelo wa omunepani ni okhala ootthuneya vamaithoni va Yehova.

NKHAMA PAAULU, NHIHIYE OWARA IKUWO DHA OMUNEPANI

10. Otaphulelani owara saana ikuwo nkhalelo wa omunepani (aKolosi 3:8-10)

¹⁰ Wiira niwerye onhakalalihe Yehova, nihaana ottottela nreerelo itthu ikina onnivaha iye, dheidho iri ikuwo dha omunepani. Moolumo ala antaphulelani? Nrummwa Paaulu aatinkhe wiira ‘nirule ontthu wa khalai’ ni niware ‘ontthu wa naanaano.’ (Munsome aKolosi 3:8-10.) Owara ontthu wa naanaano, ontthuneya okathi ni wiilipihera. Mwa ntakihero, okhuma okathi nrummwa Paaulu aari iye rapasi aaniilipihera otthuna onhakalaliha Yehova. (aGal. 1:14; aFil. 3:4, 5) Masi okhala wiira khaadhuwela ekhweeli voohima dha yoolakela ya Muluku, owo aari masikhini nkhalelo wa omunepani. Nitho ohiya pahi ohidhuwela ekhweeli voohima dha Yeesu, owo aari awiidhinnuwiha ni ‘awiidhoona.’ (1 Tim. 1:13) Ndho vaaphwana nkhama Paaulu khaawanre saana ikuwo nkhalelo wa omunepani.

11. Marukunuso seeni Paaulu aareerela iye opaka? Ntthokihere.

¹¹ Ahinaakuve okhala nkristau, Paaulu aari ntthu awaakuva onanariwa. Yawiiraneya eri eliivuru ya Miteko, ennoonihera wiira Paaulu aahaananariwela ahudheri a Yeesu ni ‘aahilakela waahaasa ni owiipha.’ (Mit. 9:1) Masi nuumala okhala nkristau, moohaakanyera Paaulu aahiilipihera vawaatta wiira arule mikhalelo dha ontthu wa khalai. (aEefe. 4:22, 31) Masi hata eri dhiidho, okathi omodha owo ni Barnabe yaanyakulihana awa, Paaulu aahinanariwa vawaatta. (Mit. 15:37-39) Masi elo khiyaamwiirinhe otthikela ottuli. Paaulu khaahin’ye ‘omana erutthu-ye’, niire dho, wiilipihera wiira ahiye mikhalelo dha khalai, wiira ahikhoottiwe ni Yehova.—1 aKor. 9:27.

12. Eseeni yaankhalihere Paaulu ohihiya wiilipihera opaka marukunuso?

¹² Paaulu aahiwerya opaka marukunuso ni owara ontthu wa naanaano mwaha wa okhala ntthu awiiyeviha. (aFil. 4:13) Nitho nkhama Pheeduru, Paaulu ‘aalipa ni ikuru dhinkhuma wa Muluku.’ (1 Ped. 4:11) Masi hata eri dhiidho, ivaara dhikina aanikhulumuwa mwaha wa dhoovonya-dhe. Ndho vaavo elo yaairaneya awa, owo aanuupuwelela itthu dhooreera Yehova aampakenle iye khalai. Opaka elo waaninkhalihera ohihiya wiilipihera opaka marukunuso wiira anhakalalihe Muluku.—aRoma 7:21-25.

13. Nin’ya owerya dhai ontakiha Paaulu?

¹³ Hiyo ninoowerya ontakiha Paaulu nidhuwelaka wiira moohixikha okathi nivirinhe nhu ninrumeelaka Yehova, nihaana wiilipihera orula ontthu wa khalai ni owara ontthu wa naanaano, yoowo ori ikuwo dha omunepani Yehova onnivaha iye. Mwa ntakihero, akhala wiira ninoonanariwa ni ntthu aahiidho onlottela etthu yoohiloka, nihuupuwele wiira khaninkhala-khala niweryaka onhakalaliha Yehova. Ohiya-vo, nihihiye wiilipihera orukunsa moopora ninuupuwela nhu ni nimpaka nhu itthu. (aRoma 12:1, 2; aEefe. 4:24) Ndho wiira nipake elo, nihaana wuupuwelela mwaha ola wootepa otthuneya: Moovirikana ni ikuwo dha veerutthuni dheidho ninvukuliha nhu wiira nilikanena, hiyo nintthuneya wiivukula aahiidho wiikocihera wiira niwerye owara ikuwo dha omunepani Yehova onnivaha iye. Tivondho etthu ninreerela nhu opaka ori waakhulela opaka marukunuso wiira niwerye okhala moovarihana ni malamulo a Yehova.

NKHAMA DAVIDI, NHIHIYE OKHALA OPURO WOOKHAPELELEYA WA OMUNEPANI

14-15. Yehova onnikhapelela dhai? (Esalimo 27:5) (Moone-tho efootu ya ekaapa.)

¹⁴ Wiira niphwanye ohakalala weekhweeli, ohiya pahi okhalana eyooca ni ikuwo dha omunepani, nihaana okhala opuro wookhapeleleya wa omunepani. Opuro owo eseeni, ni nin’ya owerya dhai okhupali wiira niri ookhapeleleya opuro owo?

¹⁵ Mwene Davidi aahilotta voohima dha opuro wa omunepani Yehova onnivaha iye. (Nsome Esalimo 27:5.) Yehova onnikhapelela dhai? Owo onnilaihera wiira khiyaavo etthu atthu akina akhanla awa opaka wiira ehonone waataana wihu nuuwo en’ya okhumela saana. (Esal. 34:7; Yes. 54:17) Nnaamwi Satana vamodha ni atthu aninkhalihera erina owerya, awo khanwerya onikhumihera nxankiho wa mahiku ootheene. Hata awo eniiphaka, Yehova onoonihihimusa. (1 aKor. 15:55-57; Wiis. 21:3, 4) Nitho Yehova onninikhalihera ovilela mixankiho dheidho dhikhanle oniiriha ohiya onrumeela. (Mir. 12:25; Math. 6:27-29) Ni Tiithi nhu oopheta oonivaha emudhi ya omunepani ya anna ni arokora yaawo annilipiha ni asitokweene annikhalihera olipiha waamini wihu. (Yes. 32:1, 2) Nitho vaavo ninthukumana nhu Empa ya Omwene, ninnihudha inamuna dhikina nikhanle nhu ottottela nreerelo nikhalihero ni okhapeleliwa ni Yehova.—aHeb. 10:24, 25.

16. Yehova aankhapelenle dhai Davidi?

¹⁶ Okathi Davidi aamwiiwelela iye Yehova, owo aaninkhapelela wiira ihimphwanye mixankiho inaaphwanya ale ampaka itampi moolakelela. (Moone Miruku 5:1, 2.) Masi okathi Davidi aahiya iye omwiiwelela Yehova, dhaanimphwanya mixankiho mwaha wa dhoothanla-dhe dhoohiloka. (2 Sam. 12:9, 10) Ndho, ankhi okathi Davidi dhaamphwanya awa mixankiho ahaana nthowa? Okathi owo, Davidi aanintthukulela nrima Yehova anleelaka itthu dhaanxankiha, ni Yehova aanimmaaliha anleelaka wiira aanimpheta ni aammukhapelela.—Esal. 23:1-6.

17. Nin’ya owerya dhai ontakiha Davidi?

¹⁷ Ninoowerya ontakiha Davidi ninvekelaka Yehova miruku wiira nipake dhoothanla. Nitho ninnidhuwela wiira pooti oniphwanya mixankiho, ohiya mwaha wa ohikhapeleliwa ni Yehova, masi mwaha wa dhoothanla dhihu dhoohiloka. (aGal. 6:7, 8) Ndho okathi dhinniphwanya awa mixankiho nihaana nthowa, ninnitthukulela nrima nhu Yehova, nikhupaliki wiira owo onookhapelela mirima dhihu ni miyuupuwelo dhihu.—aFil. 4:6, 7.

NHIHIYE OTTOTTELA NREERELO ITTHU DHA OMUNEPANI YEHOVA ONNIVAHA IYE

18. Atthu awaatta anoonela dhai olakiheriwa ni Yehova, ni nin’ya owerya dhai ohihiya ottottela nreerelo itthu dha omunepani Yehova onnivaha iye? (Moone-tho ifootu.)

¹⁸ Yawaatikhiwa ya mwaakha wa 2026 enlotta wiira: ‘Oohakalala taale andhuwela wiira annitthuneya olakiheriwa ni Muluku.’ Elo etthu yootepa otthuneya saasaasa olelo-va. Mwaha wa eseeni? Okhala wiira ninkhala eriyari ya atthu ahinaakhulela olakiheriwa ni Muluku, yaawo aninkokhorela mwa enamuna enaadhivela. Ni akina anroromela muupuwelo wa apinaatamu. Ndho mwaha elo, awo khanhakalala. Tivondho nihaana oxaka waatakiha atthu awo. Ndho nin’ya owerya dhai ohihiya ottottela nreerelo itthu dha omunepani Yehova onnivaha iye? Nikhalakana yoolema ya onsoma Biibiliya, owara ontthu wa naanaano ni waakhulela okhapeleliwa ni Yehova.