Yehoyaada Ahoonihera Olipa Nrima

Yesabeeli ahikhalana mwaana nthiyana yoowo aitthaniwa Ataliya, owo ari oottakhala nrima nkhama amaama-ye. Ataliya aatheliwe ni mwene a oYuda. Noomala mwene owo okhwa, mwane Ataliya aahikhala mwene. Masi noomala mwane Ataliya okhwa, Ataliya ahiipaka okhala pwiyamwene a oYuda. Wiira awerye opaka elo, Ataliya ahiwiipha atthu ootheene yaarina ehakhi ya okhala mamwene, wahela mpuwa adhule. Ndho mwaha wa elo atthu ootheene yaanimoova Ataliya.

Nkhulupale muulupale anankuttho vamodha ni mwaariye Yohexeba, yaahidhuwela wiira itthu dhootheene Ataliya apaka iye dhaari dhootakhala. Tivondho moolipa nrima, Yehoyaada ni amwaariye yahinkusa ndhula yowo aitthaniwa Yowaasi, envitha ntempulu.

Okathi Yowaasi aphiyerinhe iye miyaakha 7, Yehoyaada ahathukumanya makhulupale ootheene a oYuda aleela wiira: ‘Nlipelele mikhora dha etempulu, ni ahihiwe hata ntthu mmodha avolowaka.’ Ndho Yehoyaada aahinkhaliha Yowaasi mwene, aahinwariha ekhara ya omwene. Ndho atthu ootheene a oYuda yaanikhuwela yiiraka: ‘Mwene akhale mahiku ootheene!’

Piyamwene Ataliya noomala wiiwa onyakula wa atthu ahitthimakela otempulu. Noomala ophiya amoona mwene ole mpheya, ahikhuwela airaka: “Atthu akirukunuwela! Atthu akirukunuwela!” Moottharelana makuulupale ale yahinkusa Ataliya enkhumihera ota wa etempulu, emwiipha. Ndho mwene ole athanliwe ari otaphuwa. Masi atthu Ataliya ahapunse iye ni mwettelo-ye wootakhala nanlelo khiyamanle. Ndho eseeni Yehoyaada aya iye opaka?

Yehoyaada vamodha ni atthu ootheene, yaahilaihera wiira yaaya ekankokhorela Yehova pahi. Tivondho atthu yaahipwesa etempulu ni ilatarato dhootheene dha Bayaali. Moottharelana Yehoyaada ahaathanla anankuttho, aLevi wiira awo ekavara nteko ntempulu. Ndho elo yamwaakhalihera atthu otthikela onkokhorela Yehova mwa enamuna yooloka. Mootharelana, Yehoyaada vamodha ni makhulpale yaahinkusa Yowaasi enroiha empa ya mwene ni enkilaathiha empa ya omwene. Mwaha awa elo atthu ootheene a oYuda yahihakalala vawaatta. Ndho nenna-va atthu yaanwerya onkokhorela Yehova ehihapusiwaka ni Ataliya, vamodha ni okokhorela wa Bayaali. Munniwerya woona moopora olipa nrima wa Yehoyaada wakhalihenra awa atthu awaatta?