YOOSOMA 14
Nipake Eseeni Wiira Muluku Aakhulele Okokhorela Wihu?
Nkhama noonne nhu yoosoma evinre, Muluku khanaakhulela itiini dhootheene. Masi hiyo ninoowerya onkokhorela Muluku mwa enamuna enindhivela. Enamuna seeni “ya okokhorela [aahiidho, etiini]” Muluku onaakhulela iye? (Yakobo 1:27, enoota) Nirowe noone ele Biibiliya onhudhiha iye.
1. Okokhorela wihu ohaana ovarihana ni eseeni?
Okokhorela wihu ohaana ovarihana ni Biibiliya. Yesu ahinleela Muluku wiira: ‘Nuulumo ninyu ti neekhweeli.’ (Yohani 17:17) Ohiya otthara ele nuulumo na Muluku ninhudhiha awa, itiini dhawaatta dhinnivaha efaita dhoolema ni dhoohudhiha dha apinaatamu. Masi Yehova khammwaakhulela ntthu “onhiya wiiwelela dhooruma-dhe.” (Munsome Marko 7:9.) Ohiya-vo, ninnihakalaliha nrima wa Yehova vaavo nniwelela nhu ele Biibiliya onlotta iye.
2. Nin’ya onkokhorela dhai Yehova?
Nihaana onkokhorela Yehova pahi, mwaha wa wiira owo Mpattusa nhu. (Wiisuupulula 4:11) Elo entaphulela wiira nihaana oxaka okokhorela ilatarato ni atthu awaarya, okhala wiira opheta wihu ni okokhorela wihu ti wa Yehova.—Munsome Yesaya 42:8.
Okokhorela wihu ohaana okhala ‘waawarya ni onaakhuleliwa’ ni Yehova. (aRoma 12:1) Elo entaphulela wiira nihaana wiiwelela dhooruma-dhe ni opheta. Mwa ntakihero, atthu animpheta Yehova anniwelela dhooruma-dhe voohima dha othelana. Nitho khampaka itthu nkhama onvura sikaro, oca mirette dhoohapala aahiidho ohapaliwa.—Moone enoota.a
3. Seeni nintthuneya nhu onkokhorela Yehova vamodha ni atthu akina?
Yehova onninivekela orowa omithukumanoni okhala wiira owo onninipheta ni oodhuwela wiira opaka elo enoonikhalihera ophwanya ekumi yoohimala. Okathi ninthukumana nhu ni atthu akina mmulokoni, ninniwerya onvuwiha aahiidho onkokhorela Yehova. Enamuna emodha yoopaka elo ori wiipa icipo dhininvuwiha Muluku. (Nsome Esalimo 104:33) Wiipa onninivaha eparakha ya ‘waatthapela Apwiya [Yehova] . . . mmuthukumanoni mw’atthu aya.’ (Esalimo 111:1, 2) Ohiya-vo, okathi ninrowa nhu omithukumanoni, ninnalipiha atthu akina ni atthu awo anninilipiha.
NHUDHE ITTHU DHIKINA
Ndhuwele mathowa ammwiiriha Yehova ohaakhulela orumeela ilatarato vaavo nninkokhorela nhu. Nitho moone inamuna dhootthuneya dha moopora woonvuwiha Muluku.
4. Nihirumeele ilatarato wiira ninkokhore Muluku.
Nindhuwela dhai wiira Muluku khantthuna wiira nirumeele ilatarato aahiidho atthu awaarya naankokhorelaka? Moone EVIIDIYU, nuuvinya mwaakhule nikoho ninttharelana.
Okathi aatikhiwa iye Biibiliya, arumeyi akinaku a Muluku yaahehererya onkokhorela Muluku erumeelaka ilatarato. Mwaha wa opaka elo eseeni yaakhumelenle?
Atthu akinaku anlotta wiira annirumeela ilatarato wiira emwaattamela Muluku. Masi niire elo enamuna yooreera ya omwattamela Muluku? Munsome Okhuma 20:4-6 ni Esalimo 106:35, 36, nuuvinya mwaakhule makoho anttharelana:
Etthu seeni aahiidho elatarato nwoonne nnyu atthu erumeelaka wiira enkokhorele Muluku?
Niire Yehova onnindhivela okathi oniwoona iye atthu erumeelaka ilatarato wiira enkokhorele?
Nyuwo nnoonela dhai, niire etthu yooreera orumeela ilatarato wiira ninkokhorele Muluku?
5. Onkokhorela Yehova pahi onninikhalihera okhala otaphuwa mwa dhoohudhiha dhawootha
Moone moopora onkokhorela Yehova mwa enamuna yooreera onwenrya awa onitaphula mwa dhoohudhiha dhawootha. Moone EVIIDIYU.
Nsome Esalimo 91:14, nuuvinya mwaakhule nikoho ninttharelana:
Hiyo ninnoonihera wiira ninnimpheta Yehova okathi nininkokhorela nhu yoowo pahi. Ndho, eseeni Yehova onnilaihera iye nailipihera opaka elo?
6. Okathi wa mithukumano Empa ya Omwene hiyo ninninkokhorela Muluku
Hiyo ninninvuwiha Yehova ni ninnaalipiha atthu akina okathi ninkomentari nhu ni wiipa macipo omithukumanoni. Nsome Esalimo 22:23, nuuvinya mwaakhule makoho anttharelana:
Niire ennoodhivelani wiiwa ekomentaariyu omithukumanoni?
Niire mwaanitthuna wiipereperari wiira nkomentari?
7. Yehova onnihakalala okathi ninaaleela nhu atthu akina itthu ninhudha nhu
Ootheene nhu nookhalana eparakha yuulupale ya waaleela atthu akina ikhweeli dha mBiibiliyani. Nsome Esalimo 9:1 ni 34:1, nuuvinya mwaakhule nikoho ninttharelana:
Nyuwo moohudha ikhweeli dhawaatta dha mBiibiliyani. Etthu seeni mwaatthuna nnyu onleela ntthu nkina?
ATTHU AKINAKU ANLOTTA WIIRA: “Etthu yootthuneya kahiyo moopora nininkokhorela nhu Muluku. Masi yootthuneya onkokhorela Muluku ni nrima wootheene”
Niire nyuwo munnikhupali elo?
WUULUULA
Ninninhakalaliha Mpattusa nhu okathi nininkokhorerla nhu yeene pahi, ninninvuwiha omithukumanoni ni waaleela atthu akina itthu ninhudha nhu.
Ipontu dhuulupale
Nin’ya odhuwela dhai moopora wonkokhorela Muluku mwa enamuna enindhivela?
Seeni ninreerela nhu onkokhorela Yehova pahi?
Seeni nintthuneya nhu onkokhorela Yehova vamodha ni atthu akina ampaka yootthuna-ye?
NTHOKODHE ITTHU DHIKINA
Mwaha oni: “Vano Nkinkokhorela Ilatarato” nsome yaawiraneya ya nthiyana mmodha ohin’ye okokhorela ilatarato.
“Biibiliya Onnirukunusa Ikumi dha Atthu” (A Sentinela, 1 de Julho de 2011)
Nhudhe etthu en’ya wookhaliherani okomentari omithukumanoni.
“Munvuwihe Yehova Mmithukumanoni” (A Sentinela, Janeiro de 2019)
Moone moopora mithukumano dhinkhalihenre awa rapasi mmodha hata owo waanliperya orowa Empa ya Omwene.
Atthu awaatta ankhupali wiira Makiristau ahaana orumeela mwiikimanyo. Masi niire elo ekhweeli?
“Seeni Anamoona a Yehova Ahinrumeela awa Mwiikimanyo Wiira Enkokhorele Muluku?” (Mwaha ori nsaaitini jw.org)
a Enoota: Nin’ya woona miyaha idha dhoosoma dhikina.