YOOSOMA 25
Tiivi Eri Yoolakela ya Muluku wa Hiyo?
Biibiliya onnoonihera wiira ekumi ya apinaatamu ‘waakuva omala ni waattana mixankiho.’ (Yobi 14:1) Niire Muluku ontthuna wiira ekumi nhu ekhale dhiidha? Akhala wiira naari, tiivi yaari yoolakela ya Muluku apattusaka apinaatamu? Niire nhoolo yoolakela elo enawiireya? Onawoodhivelani odhuwela waakhuliwa wa makoho ala mBiibiliyani.
1. Ekumi seeni Yehova ontthuna iye wiira hiyo nikhalena?
Yehova ontthuna wiira hiyo nikhalena ekumi yootepa oreera. Noomala opattusa elapo, owo aahaapweha apinaatamu oopacera, Adamu ni Eva, eparayiisu yooreera yaitthaniwa exardi ya Weedeni. Noomala, “Muluku aharèriha, àhimeryaka wira: Mwayareke an’inyu, munjerereyeke: musareyeke mulaponi mothene. Mwettiheke elapo yothene.” (Maphattuwelo 1:28) Yehova aatthuna wiira Adamu ni Eva ekhalene anamwane, yiirihe elapo yootheene okhala eparayiisu ni ekhapelele aahiidho esuke inama. Yoolakela-ye owo aatthuna wiira atthu ootheene ekhalena ekumi yooreera ni yoohimala.
Ekhweeli wiira yoolakela ya Muluku nleelo khiyiiranen’ye.a (Moone enoota.) Masi hata eri dhiidho, yoolakela aye khemootaren’ye. (Yesaya 46:10, 11) Muluku nleelo ontthuna wiira apinaatamu awiiwelela ekhale mahiku ootheene ni ekhalena ekumi yooreera.—Munsome Wiisuupulula 21:3, 4.
2. Nin’ya owerya dhai okhalana ekumi yoohakalaliha nenna-va?
Yehova onipattuse ni ‘yootthuna ya omunepani’, niire dho, otthuna ondhuwela ni onkokhorela yeene. (Munsome Matheyo 5:3-6.) Owo ontthuna wiira nikhalena oxirikha woolipa ni yeene, ‘nitthare iphuro dhe dhootheene, nimphete,’ ni ninrumeele ‘ninrima nhu wootheene.’ (Otumererya 10:12; Esalimo 25:14) Ndho napaka elo, ninoowerya okhalana ohakalala weekhweeli, hata nikumanakana mixankiho. Onkokhorela Yehova onniiriha ekumi nhu okhalana yoolakela.
NHUDHE ITTHU DHIKINA
Moone opheta wuulupale Yehova onihenre iye vaavo aakocihera iye elapo wiira hiyo nikhalemo. Nitho moone ele Biibiliya onhudhiha iye voohima dha yoolakela ya ekumi.
3. Yehova ontthuna wiira apinaatamu ekhalena ekumi yoohakalaliha
Moone EVIIDIYU, nuuvinya, mwaakhule nikoho ninttharelana:
Eseeni yaamwiirinhe Muluku opattusa elapo yooreera dhiidha?
Munsome Musuweli 3:11, nuuvinya, mwaakhule nikoho ninttharelana:
Eseeni Yehova opwenhe iye vanrima vihu? Ndho, elo enooniherani voohima dha yoolakela aye wa hiyo?
4. Yoolakela ya Yehova khemootaren’ye
Nsome Esalimo 37:11, 29 ni Yesaya 55:11, nuuvinya, mwaakhule nikoho ninttharelana:
Nindhuwela dhai wiira yoolakela ya Yehova wa hiyo khemootaren’ye?
Empa ehoononen’ye enniweryaneya oreheryeeriwa. Emodha-modharu, hata elapo ehoononiwaka ni apinaatamu, Yehova onooreheryeera wiira ekhaliwe ni atthu animpheta
5. Onkokhorela Yehova onniiriha ekumi nhu okhalana yoolakela
Odhuwela yoolakela ya ekumi enooniiriha okhala oohakalala. Moone EVIIDIYU, nuuvinya mwaakhule nikoho ninttharelana.
Odhuwela yoolakela ya ekumi erukunusale dhai ekumi ya Terumi?
Munsome Musuweli 12:13, nuuvinya, mwaakhule nikoho ninttharelana:
Okhala wiira Yehova onipakela itthu dhawaatta, nin’ya omoonihera dhai onxukhurela?
ATTHU AKINAKU YOOKOHANI WIIRA: “Tiivi eri yoolakela ya ekumi?”
Mun’ya waakhula dhai?
WUULUULA
Yehova ontthuna wiira nikhale mahiku ootheene valaponi ni nikhalena ekumi yoomalela. Vaavo nininkokhorela nhu ni nrima nhu wootheene, ekumi nhu enookhalana yoolakela nenna-va.
Ipontu dhuulupale
Tiivi yaari yoolakela ya Yehova wa Adamu ni Eva?
Nindhuwela dhai wiira yoolakela ya Muluku wa apinaatamu khemootaren’ye?
Ekumi nnyu en’ya okhalana dhai yoolakela?
NTOKODHE ITTHU DHIKINA
Moone etthu enoonihera wiira exardi ya Weedeni tthiri yaahikhala.
“Niire Exardi ya Weedeni Etthu Yeekhweeli Aahiidho Yawoothiwa?” (A Sentinela, 1 de Janeiro de 2011)
Moone etthu ennikhupaliha wiira elapo enookhala mahiku ootheene.
“Niire Elapo Enoopwetesiwa?” (Mwaha ori nsaaitini jw.org)
Moone ele Biibiliya onlotta iye voohima dha yoolakela ya ekumi.
“Tiivi Eri Yoolakela ya Ekumi?” (Mwaha ori nsaaitini jw.org)
John uupuwela wiira aahikhalana itthu dhootheene mweekumini mwe. Moone moopora odhuwenle iye wiira yaaninhalela etthu mweekumini mwe.
a Enoota: Yoosoma enttharelana, nin’ya woona etthu yeerinhe yoolakela ya Muluku ohaakhwanela.