YOOSOMA 18
Nin’ya Waadhuwela Dhai Makiristau Eekhweeli?
Olumwinku wootheene, atthu ibiliyawu dhawaatta anniihima okhala Makiristau. Masi hata eri dhiidho, dhookhupali ni dhoohudhiha-dha ti dhoovirikana. Ndho, nin’ya waadhuwela dhai Makiristau eekhweeli?
1. Ontaphulelani okhala Nkiristau?
Nkiristau nhudheri, niire dho, ntthareli a Yesu Kiristu. (Nsome Miteko 11:26.) Etthu seeni enoonihera wiira ntthu owo ntthareli a Yesu? Yesu aalontte wiira: ‘Nyuwo mwaahihiye otthara moolumo aka, munookhala tthiri ahudheri aka.’ (Yohani 8:31) Elo entaphulela wiira Nkiristau eekhweeli ohaana wiiwelela ele Yesu ohudhinhe iye. Itthu dhootheene Yesu aapaka iye ni aahudhiha iye dhaanivarihana ni nuulumo na Muluku. Emodha-modharu, itthu dhootheene Makiristau ampaka awa dhihaana ovarihana ni Biibiliya.—Munsome Luka 24:27.
2. Makiristau eekhweeli anoonihera dhai opheta?
Yesu aahaaleela atthareli-ye wiira: ‘Mphetane nkina ni nkhwe, nkhama dhiidhaale miyo kinoophetaakani.’ (Yohani 8:31) Yesu oonihenre dhai wiira aanapheta ahudheri-ye? Owo aanaakhalihera ni waalipiha ahudheri-ye ni aaniviriha okathi wawaatta ari nawo. Ohiya-vo, owo aahileva ekumi-ye wiira awoopole. (1 Yohani 3:16) Emodha-modharu, Makiristau eekhweeli khanilotta pahi wiira annaapheta atthu. Masi annoonihera wiira anniphetana ni moolumo ni miteko.
3. Nteko seeni Makiristau eekhweeli anvara awa?
Yesu aahaaruma ahudheri iye ovara nteko wootepa otthuneya. Owo “aahaaruma waalaleerya atthu Omwene wa Muluku.” (Luka 9:2) Makiristau oopacera, khiyaalaleerya pahi mapuro atthu yathukumana awa wiira enkokhorele Muluku. Masi-tho yaanilaleerya mapuro awaattiwa ni mmawaani. (Nsome Miteko 5:42; 17:17.) Nitho olelo, Makiristau eekhweeli annilaleerya ikhweeli dha mBiibiliyani khuta opuro anaaphwanya awa atthu. Moohakanyera, awo annaapheta atthu. Tivondho, awo annihakalala orumeela okathi ni ikuru-dha wiira yaahudhihe atthu nhupi wa mBiibiliyani yoowo onaamaaliha atthu ni waavaaha nlipelelo.—Marko 12:31.
NHUDHE ITTHU DHIKINA
Moone ovirikana orivo wa Makiristau eekhweeli ni atthu ale ahintthara dhohudhiha dha Yesu ni ahintthara ntakihero-ne.
4. Makiristau a ekhweeli anniilipihera waadhya ekhweeli eri mBiibiliyani
Makiristau oopacera yaaniiwelela Nuulumo na Muluku, yaanilaleerya ihapari dhooreera ni yaaniphetana nkina ni nkhwe
Atthu awaatta aniihima okhala Makiristau khanvaha efaita ekhweeli ya mBiibiliyani. Moone EVIIDIYU, nuuvinya mwaakhule nikoho ninttharelana.
Itthu seeni itiini dhiniihima okhala Makiristau dhinhudhiha awa dhinvirikana ni idhe Yesu ohudhiha iye?
Yesu oohudhiha ekhweeli ya Nuulumo na Muluku. Munsome Yohani 18:37, nuuvinya mwaakhule nikoho ninttharelana:
Nkhama Yesu olontte iye, nin’ya waadhuwela dhai Makiristau ‘aneettela ekhweeli’?
5. Makiristau eekhweeli annilaleerya ekhweeli eri mBiibiliyani
Makiristau oopacera yaaniiwelela Nuulumo na Muluku, yaanilaleerya ihapari dhooreera ni yaaniphetana nkina ni nkhwe
Ahinatthi otthikela wiirimu, Yesu aahaavaha atthareli-ye nteko yoowo onivariwa mpakha olelo-va. Munsome Matheyo 28:19, 20 ni Miteko 1:8, nuuvinya mwaakhule nikoho ninttharelana:
Niire ihapari dhooreera dhaaya olaleiwa elapo emodha? Ndho dhaaya olaleiwa mpakha liini?
6. Makiristau eekhweeli annipaka ele anhudhiha awa
Eseeni yankhupalinhe nlopwana oniitthaniwa Tom wiira aahiphwanya Ekiristau yeekhweeli? Moone EVIIDIYU, nuuvinya mwaakhule makoho anttharelana:
Nkhama moonne nnyu eviidiyu, eseeni yamwiirinhe Tom ohiya weettela etiini?
Eseeni yaankhupalinhe Tom wiira oophwanya ekhweeli?
Itthu nimpaka nhu dhookhalana owerya wuulupale oxira moolumo nhu. Munsome Matheyo 7:21, nuuvinya mwaakhule nikoho ninttharelana:
Eseeni eri yootthuneya wa Yesu, niire moolumo nhu aahiidho tiile ninoonihera nhu ni miteko?
7. Makiristau eekhweeli anniphetana moohoothererya
Makiristau oopacera yaaniiwelela Nuulumo na Muluku, yaanilaleerya ihapari dhooreera ni yaaniphetana nkina ni nkhwe
Niire Makiristau a ekhweeli annaakhulela oleva ikumi-dha wiira ewoopole annaya dhinaaphwanya mixankiho? Moone EVIIDIYU, nuuvinya mwaakhule makoho anttharelana.
Nkhama moonne nnyu eviidiyu, eseeni yaamwiirinhe Lloyd oleva ekumi-ye wiira amoopole Johansson?
Nnoona wiira ele Lloyd opanke iye ennoonihera wiira owo Nkiristau eekhweeli?
Munsome Yohani 13:34, 35, nuuvinya mwaakhule makoho anttharelana:
Ahudheri a Yesu (aahiidho Makiristau eekhweeli) yaaya othokoreryana dhai nkina ni nkhwe? Niire yaaya othokoreryana mwaha wa okhala a eraasa aahiidho elapo emodha?
Niire yaamooniherana ophetana hata okathi wa ekhotto?
ATTHU AKINAKU ANLOTTA WIIRA: “Nyuwo pooti weettela khuta etiini muntthuna nnyu, etthu yootthuneya onkhupali Yesu Kiristu.”
Etestu seeni mwaaya nnyu orumeela wiira mmoonihere ntthu owo moopora wa waadhuwela Makiristau eekhweeli?
WUULUULA
Makiristau eekhweeli anniiwelela ele Biibiliya onlotta iye, annooniherana ophetana weekhweeli ni annilaleerya ihapari dhooreera dhiri mBiibiliyani.
Ipontu dhuulupale
Itthu dhootheene Makiristau ampaka awa ni anlotta awa dhinvarihana ni eseeni?
Mikhalelo seeni dhinnikhalihera waadhuwela Makiristau eekhweeli?
Nteko seeni muulupale Makiristau eekhweeli anvara awa?
NTHOKODHE ITTHU DHIKINA
Nhudhe itthu dhikina voohima dha ekhurupu ya atthu aniilipihera otthara ntakihero na Yesu ni weettela ele ohudhinhe iye.
Moone yawiiraneya ya nthiyana mmodha yoowo ohin’ye okhala fereira aphwanya “emudhi yeekhweeli ni yawiirana ya omunepani”.
“Awo Yaanaakhula Makoho aka Enrumeelaka Biibiliya!” (A Sentinela, 1 de Abril de 2014)
Moone moopora Makiristau eekhweeli anoonihera awa waapheta annaya antthuna okhaliheriwa.
Okhaliheriwa Anna Dhaphwannye Ihasara dha Ephattu.—Ekhaani (3:57)
Moone moopora Makiristau eekhweeli olelo-va ettharaka ntakihero na Makiristau a khalai aniiwelela awa ele Yesu ohudhinhe iye.
“Itthu Seeni Dhinaadhuweliha Makiristau Eekhweeli?” (A Sentinela, 1 de Março de 2012)