Ntakihe Wiiyeviha wa Yehova

1. Seeni wiiyeviha wa Yehova ori awa wootikiniha?

VAAVO munwoona nnyu olelo-va anamalamulela a olumwinku ola, nnoonela dhai? Niire awo tawiiyeviha? Moohaakanyera naari. Masi moovirikana naawo, Yehova, yoowo ori Nanwerya Dhootheene, tawiiyeviha. (Esal. 113:5-8) Wiiyeviha oniirela mphantta ontthu wa Yehova. Khaavo ntthu awiiyeviha onxira Yehova. Owo khanoonihera wiidhinuwiha aahiidho wiikuserera hata vakhaani. Yoosoma ela, nin’ya woona inamuna sese dhooreera dha ontthu wa Yehova ni ninawoona moopora inamuna idho inoonihera awa wiira owo tawiiyeviha. Nitho ninawoona moopora Yeesu aatakinhe iye wiiyeviha wa Tiithye. Othokorerya inamuna idho, onoonikhalihera otepa omwaattamela Yehova ni otakiha wiiyeviha-we.

YEHOVA ORI OOLIKANA ENE ONIWIRIYANA

2. Eseeni Esalimo 62:8 enoonihera awa voohima dha Yehova? (Moone-tho efootu ya ekaapa.)

² Okhala wene, khonkhweya olotta ni atthu awiikuserera. Atthu awiikuserera yuupuwelaka wiira tootepa otthuneya waaxira atthu akina, annaathokorerya atthu awo moowali, ndho elo enniwiiriha atthu akina woova owaattamela. Masi Yehova toovirikana vawaatta ni atthu awo! Okhala wiira Tiithi nhu a wiirimu tawiiyeviha, owo onninilaleya omwaattamela ni onleela itthu dhootheene dhinnixankiha mmuupuweloni ni vanrimani vihu. (Nsome Esalimo 62:8.) Nkhama dhiidhaale paapa oopheta oninwiriyana iye ni ephoole mwane okathi oninleela iye mixankiho-dhe, Yehova onniwiriyana ni ephoole mavekelo a arumeyi-ye. Owo ohiiriha waatikhiwa mbiibiliyani mavekelo awaatta arumeyi-ye a khalai. Ndho elo ennoonihera wiira owo ori oolikana ene oniwiriyana. (Yox. 10:12-14; 1 Sam. 1:10-18) Masi ankhi akhala wiira ninuupuwela wiira khanimphwanelela onvekela Yehova mwaha wa dhoovonya dhihu?

3. Eseeni enookhupalihani wiira Yehova ontthuna wiira nkanvekela okathi wootheene?

³ Hiyo ninoowerya omwaattamela Yehova oreela wa nivekelo, hata noonaka wiira khanimphwanelela ophetiwa nuuwo. Eseeni enniiriha olotta dhiidho? Nlikanyiho Yeesu aapanke iye voohima dha mwaana aakhume vaate, aahinlikanyiha Yehova ni paapa ooreera nrima yoowo aarina mwane aahononne mireerelo-dhe dhootheene ni uupuwela wiira khaarowa waakheliwa atthikela owaani. Ndho paapa ole oonenle dhai nuumala omoona mwane ari ottaiwene atthikelaka owaani? Yeesu olontte wiira nuumala paapa ole omoona mwane, ‘aahintthimakela, ankhupaarela, ananvaha epeexu.’ (Luka 15:17-20) Yehova onoolikana ni paapa ole. Mwa ntakihero, vaavo atthu ariipiwe nrima mwaha wa dhoovonya-dha aahiidho mixankiho anviriha awa aninvekela awa Yehova, mwa wiiyeviha onnaawiriyana ni ephoole. (Wikh. 3:19, 20) Ndho othunku ni opheta, onnimwiiriha Yehova waatthimakela atthu awo wiira aalipihe ni waamaaliha. (Yes. 57:15) Yehova “onnitthimakela” dhai olelo-va? Ivaara dhawaatta onnipaka elo arumeelaka asitokweene, amudhi nhu ari makiristau aahiidho anna ni arokora akina. (Yak. 5:14, 15) Yehova onninivaha nikhalihero nno okhala wiira ontthuna wiira nimwaattamele.

4. Yeesu oonihenre dhai wiira aari ookhweya olottana?

⁴ Yeesu onintakiha dhai Tiithye? Nkhama Atiithye, Yeesu tawiiyeviha. Ndho mwaha wa elo, atthu yaakhala ootaphuwa omwaattamela. Nitho awo khiyoovelela ompakela makoho. (Mar. 4:10, 11) Vaavo Yeesu aakoha iye etthu voohima dha mwaha mmodha, awo yaakhala ootaphuwa olotta moonelo-ya. (Math. 16:13-16) Ohiya-vo, vaavo awo yaavonya awa, khiyoova yuupuwelaka etthu Yeesu aaya iye opaka, okhala wiira yaanidhuwela wiira owo tooreera nrima, oomoriwa ikharari ni oopisa nrima. (Math. 17:24-27) Mwaha wa Yeesu wiilipihera waatakiha Atiithye, waahaakhalihera atthareli-ye ondhuwela saana Yehova. (Yohani 14:9) Awo yaahiwerya woona wiira Yehova tawiiyeviha ni ori oolikana ene waawiriyana atthu, moovirikana ni ahooleli a itiini a okathi ole yaawo yaari oowali, awiidhinnuwiha ni oolipa olottana.

5. Wiiyeviha onnikhalihera dhai atthu akina waakhwela olotta ni hiyo?

⁵ Nin’ya owerya dhai ontakiha Yehova? Vaavo ninkhala nhu awiiyeviha, elo enniwiiriha atthu akina waakhwela olotta ni hiyo. Wiiyeviha onoonikhalihera oxaka okhala a nrima, wiikuserera ni opweha mathowa, mikhalelo dheidho ikhanle owiiriha atthu akina waaliphera olotta ni hiyo. Masi wiiyeviha onoonikhalihera okhala ooreera nrima, oopisa nrima ni oolevelela, mikhalelo dheidho dhikhanle owiiriha atthu akina waakhwela olotta ni hiyo. (aKol. 3:12-14) Nitho etthu yootthuneya saasaasa asitokweene wiilipihera okhala oolikana ene waawiriyana atthu akina. Ndho wiira epake elo, ahaana wiilipihera oviriha okathi vamodha ni anna ni arokora. Elo entaphulela wiira vaaweryaneyaka, awo ahaana wiilipihera orowela mithukumano Empa ya Omwene, ohiya woona enrumeelaka telefooni. Ni moovarihana ni makhalelo-ya, ahaana wiilipihera olaleerya empa ni empa vamodha ni anna ni arokora. Ndho vaavo asitokweene aniilipihera awa oviriha okathi vamodha ni anna ni arokora, elo enawaakhalihera anna awo waakhwela olotta naawo okathi antthuna awa okhaliheriwa.

YEHOVA ONNAATHOKORERYA ATTHU AKINA

6-7. Nvahe matakihero maili anoonihera wiira Yehova onnaathokorerya atthu akina ni onaakhulela orukunsa moonelo-ye?

⁶ Ivaara dhawaatta atthu awiikuserera yuupuwelaka wiira tootepa otthuneya waaxira atthu akina, khanaakhulela orukunsa moonelo-ya. Masi moovirikana naawo, Yehova khari dhiidho. Hata okathi wootheene adhuwelaka etthu yooreerela opaka, mwawiiyeviha onnaathokorerya atthu akina aakhulelaka moonelo-ya. Mwa ntakihero, moone moopora Yehova aanthokorenrye iye Miriyamu nrokoriye Moise. Miriyamu vamodha ni Arooni, yaahipaka etthu yoohiloka yoonihera ohinttittimiha Yehova mwaha wa omwaapa Moise, yoowo anthonyera Yehova. Mwaha wa opaka elo, Yehova aahinanariwa vawaatta ni Miriyamu, ankhumihera maretta. Nuumala wiiraneya elo, Arooni aahinvekela Moise wiira ankhalihere Miriyamu, mwawaakuveya Moise aahinvekela Yehova wiira ampenuse Miriyamu. Ndho, eseeni Yehova aapanke iye? Yehova khoonihera wiikuserera hata vakhaani akhoottaka orukunsa etthu ampake iye Miriyamu. Masi mwawiiyeviha, owo aahaakhulela yoovekela ya Moise ampenusa Miriyamu.—Moth. 12:1-15.

⁷ Nitho ninniwerya woona wiira Yehova tawiiyeviha vaavo ninuupuwela nhu moopora aanthokorenrye iye mwene Ezekiiya. Mwa ntakihero, orumeelaka profeeta Yeesaaya, Yehova aahinleela mwene Ezekiiya wiira aankhwa. Ndho Ezekiiya aahinvekela Yehova anlaka wiira ampenuse. Mooreera nrima, Yehova aahiiwa nivekelo na Ezekiiya ni aahinleela wiira aamwaacerera iyaakha 15 dha ekumi-ye. (2 Mam. 20:1, 5, 6) Moohaakanyera, wiiyeviha onnimwiiriha Yehova waathokorerya atthu akina aakhulelaka moonelo-ya.

8. Matakihero seeni anoonihera wiira Yeesu onnaathokorerya atthu akina? (Marko 3:1-6)

⁸ Yeesu onintakiha dhai Tiithye? Yeesu aahoonihera wiira onnaathokorerya atthu akina vaavo aakhalihera iye okathi wootheene. Mwa ntakihero, Yeesu anaapenusa aretta nihiku na esaabadu, hata moowali ahooleli a itiini yaakhoottiha opakiwa elo nihiku nno. (Munsome Marko 3:1-6.) Nitho olelo-va, nkhama nhooleli a muloko wa ekiristau, Yeesu onnoonihera mwawiiyeviha wiira onnaathokorerya atthu akina. Mwa ntakihero, vaavo ntthu mmodha mmulokoni ompaka iye etampi yuulupale, owo onnimpisera nrima anvahaka okathi wiira arukunse mweettelo-ye.—Wiis. 2:2-5.

9. Nin’ya owerya dhai wuupuwelela ni opaka itthu dhinoonihera wiira ninaathokorerya atthu akina? (Moone-tho ifootu.)

⁹ Nin’ya owerya dhai ontakiha Yehova? Nihaana wiilipihera otakiha wiiyeviha wa Yehova nooniheraka waathokorerya atthu akina oreela wa moopora ninuupuwela nhu ni itthu nimpaka nhu. (Yak. 3:17) Mwa ntakihero, anaan’yari anaathokorerya ana, nnaamwi ehaakhulela mweettelo woohiloka, awo khanlipelela wiira ana ahaana opaka itthu anuupuwela awa wiira khanwerya. Yakobi oovaha ntakihero nooreera voohima dha mwaha owo, nkhama onoonihera iye Maphattuwelo 33:12-14. Ohiya-vo, anaan’yari awiiyeviha ni anaathokorerya ana, annixaka waalikanyiha ana moohikhalela. Nitho tivootthuneya asitokweene waathokorerya atthu akina. Mwa ntakihero, ntokweene mmodha onoopaka elo axakaka wuumelela moonelo-ye, masi aakhulelaka moonelo wa asitokweene akina akhala wiira khonvirikanya malakihero a mbiibiliyani. (1 Tim. 3:2, 3) Ndho ootheene nhu nihaana wiilipihera wiiwasasa moonelo wa atthu akina, hata moonelo nhu ori woovirikana. (aRoma 14:1) Tivondho khuta ntthu mmulokoni ohaana wiilipihera wiira ‘atthu ootheene edhuwele wiira khanthipelela moonelo-ye.’—aFil. 4:5.

YEHOVA TOOPISA NRIMA

10. Yehova oonihenre dhai wiira toopisa nrima?

¹⁰ Woonawene nyuwo munniwerya woona wiira atthu awiikuserera khantthuna olipelela etthu. Mwaha wa wiikuserera, awo khawerya opisa nrima. Masi Yehova toovirikana vawaatta ni atthu awo, owo toopisa nrima waaxira atthu ootheene. Mwa ntakihero, okathi wa Nowe, Yehova aalontte wiira aanlipelela iyaakha 120 wiira aapwetese atakhali. (Maph. 6:3) Ndho elo yaahinvaha okathi Nowe wiira aahuwe ane, ni oteka ekalawa akhaliheriwaka ni atthu ootheene ettheko-ye. Nuuvira okathi, nlaikha nimodha naarummwe ni Yehova naahoonihera opisa nrima vaavo Abrahaamu aampakela iye makoho voohima dha opwetesiwa wa epooma ya oSodoma ni oKomora. Ndho vaakhanle wiira nlaikha nno naari nawiikuserera, woonawene naammwaakhula Abrahaamu niiraka: ‘Nyuwo mwaani nkhanle okipakela makoho awo?’ Masi nintakihaka Yehova, nlaikha nno naahimpisera nrima Abrahaamu.—Maph. 18:20-33.

11. Moovarihana ni 2 Pedru 3:9, eseeni emmwiiriha Yehova opisa nrima olelo-va?

¹¹ Nitho olelo-va, mwawiiyeviha Yehova onnoonihera opisa nrima. Owo onnilipelela okathi wooreerela wiira amalihe olumwinku ola. Eseeni emmwiiriha Yehova opisa nrima? ‘Okhala wiira khantthuna wiira apwetesiwe nnakhala ntthu mmodha. Masi ontthuna wiira atthu ootheene erukunse nrima.’ (Munsome 2 Pedru 3:9.) Niire Yehova ompisa nrima mahala ene? Naari! Olelo-va, atthu imilyawu dhawaatta aathanla omwaattamela Yehova ni okhala axirikha-ye. Nitho ninlipelela wiira atthu akina ahanle anoopaka etthu emodharu. Masi opisa nrima wa Yehova onoomala. Ekhweeli wiira Yehova onnaapheta apinaatamu, masi elo khentaphulela wiira onawaahiya epakaka itthu dhootakhala mahiku ootheene. Tivondho owo onoomaliha otakhala wootheene.—Hab. 2:3.

12. Yeesu ontakiha dhai opisa nrima wa Yehova?

¹² Yeesu onintakiha dhai Tiithye? Okhuma khalai, Yeesu onnitakiha opisa nrima wa Yehova. Yeesu onnimoona Satana alottaka itthu dhawootha voohima dha Yehova vamodha ni arumeyi-ye oororomeleya. (Maph. 3:4, 5; Yobi 1:11; Wiis. 12:10) Nitho olelo-va, Yeesu onnoona mixankiho dhuulupale dhinaaphwanya apinaatamu. Moohaakanyera owo onnitthuna vawaatta ‘opwetesa miteko dha Diyaabu’! (1 Yohani 3:8) Eseeni eninkhalihera Yeesu olipelela moopisa nrima ophiya okathi Yehova on’ya iye onruma wiira apwetese miteko dha Diyaabu? Okhala wiira Yeesu tawiiyeviha, owo oohiya itthu dhootheene mmatatani mwa Yehova, adhuwelaka wiira torina ehakhi ya othanla okathi wooreerela opaka elo.—Mit. 1:7.

13. Yeesu aapisenre dhai nrima arummwa-ye, ni eseeni yaamwiirinhe opaka elo?

¹³ Nitho okathi Yeesu aari iye valaponi, aanaapisera nrima arummwa-ye. Mwa ntakihero, okathi arummwa yaanyakulihana awa etthunaka ondhuwela taani aari muulupale, Yeesu khaanyanyanle uupuwelaka wiira khiyaakhala-khala erukunsaka muupuwelo-ya. Ohiya-vo, owo aahivikaniha waapisera nrima. (Luka 9:46; 22:24-27) Owo aanikhupali wiira nuuvira okathi, awo yaampaka marukunuso. Niire nyuwo mwaataka opaka yoovonya emodharu ivaara dhawaatta? Akhala wiira ti dhiidho, niire khamunxukhurela mwaha wa okhalana Mwene awiiyeviha ni oopisa nrima?

14. Nin’ya owerya dhai okhala atthu oopisa nrima?

¹⁴ Nin’ya owerya dhai ontakiha Yehova? Wiira niwerye wuupuwela ni opaka itthu nkhama Yehova, nihaana okhalana ‘muupuwelo wa Kiriistu.’ (1 aKor. 2:16) Nin’ya owerya dhai odhuwela muupuwelo wa Kiriistu? Elo kheniiraneya meekha. Nihaana osoma Ivanxeelyu wiira nidhuwele. Nuumala osoma, niivahe okathi wiira nuupuwelele ele ninhudhera nhu ni dhawiiraneya idho voohima dha moopora Yeesu uupuwela iye. Nitho nihaana onvekela Yehova wiira anikhalihere otakiha opisa nrima ni wiiyeviha wa Yeesu. Ndho vaavo niniilipihera nhu odhuwela ni okhalana muupuwelo wa Kiriistu, ninoowerya ontakiha Yehova niipiseraka nrima hiyo naakaneene vamodha ni anna ni arokora.—Math. 18:26-30, 35.

YEHOVA ONNAAVAHA EFAITA ATTHU AWIIYEVIHA

15. Nlotte matakihero anoonihera wiira Yehova onnaavaha efaita atthu awiiyeviha. (Esalimo 138:6)

¹⁵ Nsome Esalimo 138:6. Nkahaya muupuwele eparakha yuulupale araawana atthu awiiyeviha ya odhuweliwa ni Nkhulupale a Olumwinku Wootheene! Moone matakihero vakhaani anoonihera wiira okhuma khalai, Yehova onnaavaha efaita atthu awiiyeviha. Woonawene akina a yaawo khininaadhuwela saana, masi Yehova ohiiriha waatikhiwa mbiibiliyani. Nirowe nithokorerye matakihero vakhani. Moise uupuseriwaka ni Yehova, aahaatikha ndhina na nfirimeera mmodha aaitthaniwa Deebora. Owo aari nrumeyi oororomeleya a ettheko ya Isaakhi ni Yakobi mwa iyaakha 125! Hata nihidhuwelaka itthu dhawaatta voohima dha nthiyana owo oororomeleya, Yehova ohiiriha waatikhiwa mbiibiliyani yooniheraka wiira aaniphetiwa vawaatta. (Maph. 24:59; 35:8) Nuuvira okathi, Yehova aahinthanla Davidi, yoowo aari rapasi nkhaani ni makampusi, wiira akhale mwene a nloko na aisarayeeli. (2 Sam. 22:1, 36) Nitho nuumala Yeesu oyariwa, Muluku aahiruma malaikha orowa wa amakampusi awiiyeviha ni aahoonihera wiira aanaavaha efaita aavahaka eparakha ya opacera odhuwela wiira Mesiya aahiyariwa esitati ya oBeteleheemu. (Luka 2:8-11) Nitho Yehova aahoonihera onvaha efaita Simiyooni ni Aana, awiirihaka omoona Mwane vaavo Mariya ni Yooseefi yaanroihale awa otempulu. (Luka 2:25-30, 36-38) Mweekhweeli, ‘hata Yehova akhalaka odhulu, onnaathokorerya atthu awiiyeviha’!

16. Yeesu aatakinhe dhai moopora Tiithye onaavaha iye efaita atthu?

¹⁶ Yeesu onintakiha dhai Tiithye? Nkhama a Tiithye, Yeesu onaapheta atthu awiiyeviha ni ahinooneliwa vatthu. Okathi aari iye valaponi, owo aahaahudhiha ale ‘yahaasomme ni atthu pure’ ikhweeli voohima dha Omwene wa Muluku. (Mit. 4:13; Math. 11:25) Nitho Yeesu aahaapenusa aretta mwa enamuna yaawiiriha awo woona wiira aanaapheta ni waattittimiha. (Luka 5:13) Ohiyu wookhidhera ahinatthi okhwa, Yeesu aahivara nteko waavariwa ni ipottha arapihaka manawu a arummwa-ye. (Yohani 13:5) Nitho ahinathi otthikela wiirimu, Yeesu aahoonihera wiira onnaathokorerya atthareli-ye awiiyeviha, aavahaka nteko wa waakhalihera atthu akina ophwanya ekumi yoohimala.—Math. 28:19, 20.

17. Nin’ya woonihera dhai wiira ninnaavaha efaita atthu? (Moone-tho efootu.)

¹⁷ Nin’ya owerya dhai ontakiha Yehova? Hiyo ninnoonihera wiira ninnaavaha efaita atthu vaavo ninaalaleerya nhu ihapari dhooreera atthu ootheene, moohixikha mahuweliwo-ya, ekoore ya erutthu-ya, ni akhala wiira toosomasa aahiidho naari. Nitho ninnoonihera wiira ninnaavaha efaita anna ni arokora naathokoreryaka okhala ootepa otthuneya onixira hiyo, moohixikha itthu ninwerya nhu opaka aahiidho iparakha nirinhuna. (aFil. 2:3) Yehova onnihakalala vaavo mwawiiyeviha ninkhala nhu ‘oopacera’ aahiidho nraaci waapheta ni waattittimiha atthu akina mwa inamuna dhoovirikana.—aRoma 12:10; Sof. 3:12.

18. Eseeni enwiirihani otthuna otakiha wiiyeviha wa Yehova?

¹⁸ Vaavo niniilipihera nhu otakiha wiiyeviha wa Tiithi nhu oopheta a wiirimu, elo enoonikhalihera otepa waawiriyana atthu akina, waathokorerya ni okhala oopisa nrima. Ohiya-vo, nkhama Yehova, ninawaavaha efaita ni waattittimiha atthu akina. Tivondho nhiliyale wiira wiilipihera wihu otakiha wiiyeviha wa Yehova onnooniiriha okhala atthu ootepa otthuneya vamaithoni-ve!—Yes. 43:4.