Mun’ya Woonihera Dhai Oxukhurela Winyu Yawoopola?

1-2. Nkuttho wawoopola wa Yeesu ohaana onitumererya opaka eseeni, ni mwaha wa seeni? (2 aKorinto 5:14, 15) (Moone-tho efootu.)

WAAKHANLE wiira nwateenle mpuwa wa epereetiyu emonre, ara ntthu awoopolani, niire khimwaanxukhurela ntthu owo mwaha wa woopola ekumi nnyu? Hata eriwo atthu akina yoopoliwe vamodha ni nyuwo, moohaakanyera nyuwo mwaaneeneya mwaampaka etthu wiira mmoonihere oxukhurela winyu ni onleela wiira khamunkhala-khala nliyalaka etthu oopakenleiyeni.

² Nkhama noonne nhu yoosoma evinre, hiyo naanitthuneya woopoliwa etampi ni okhwa. Ndho nkuttho wawoopola wa Yeesu, onninivaha (1) eparakha ya oleveleliwa itampi dhihu, (2) nlipelelo na okhala oomalela nhoolo, ni (3) eparakha ya otthikela okhalana waataana ni Muluku. Nitho owo ohiiriha oweryaneya okhalana nlipelelo na okhala mahiku ootheene elapo epheya ya Yehova. Yawoopola ennoonihera opheta wuulupale wa Yeesu, weiwo aawoonihera iye apinaatamu okhuma khalai ahinaakuve ora valaponi. (Mir. 8:30, 31) Nrummwa Paaulu aatinkhe wiira ‘opheta wa Kriistu tonnitumererya.’ (Munsome 2 aKorinto 5:14, 15.) Elo entaphulela wiira opheta wa Yeesu ohaana onitumererya woonihera oxukhurela ni ohiliyala ele onipakenle iye.

3. Seeni khuta ntthu okhanle iye woonihera oxukhurela yawoopola mwa enamuna yoovirikana ni atthu akina?

³ Eseeni munreerela nnyu opaka wiira moonihere oxukhurela yawoopola? Waakhula winyu pooti ovirikana ni wa atthu akina. Wiira nilikanyihe: Nkahaya nwuupuwelele atthu araru aneetta nkwaha eyaaka elapo emodharu, masi ekhumaka ilapo dhoovirikana. Mwaha wa khuta ntthu okhuma elapo-ye, iphuro an’ya awa otthara dhin’ya okhala dhoovirikana. Mwa enamuna emodharu, “ephuro” muntthara nnyu wiira moonihere oxukhurela yawoopola, pooti okhala yoovirikana ni ya atthu akina. Muupuwelelaka elo, yoosoma ela ninoothokorerya ekhurupu tthaaru dha atthu: (1) Anaskola a Biibiliya, (2) makristau oopatisiwa, ni (3) ale ahin’ye onrumeela Yehova ni othukumana vamodha ni muloko.

ANASKOLA A BIIBILIYA

4. Yehova onwoonela dhai anaskola a Biibiliya?

⁴ Akhala wiira mwa naskola a Biibiliya, muupuwele ela: Moopora nnoonela nnyu ihapari dhooreera, onnoonihera wiira nyuwo mwa mmodha a atthu yaale Yehova onaakhalihera iye wiira ekhale axirikha-ye. (Yohani 6:44; Mit. 13:48) ‘Yehova tonthokodha mirima dha atthu.’ Elo entaphulela wiira owo onnoona wiilipihera winyu ohudhera voohima dha veene ni onnihakalala marukunuso mumpaka nnyu wiira nkhalena oxirikha woolipa nuuwo. (Mir. 17:3; 27:11) Masi elo enweryaneya pahi mwaha wa yawoopola. (aRoma 5:10, 11) Nhikhala-khale nliyalaka elo.

5. Anaskola a Biibiliya an’ya owerya dhai ovarihela nteko miruku iri aFilipi 3:16?

⁵ Akhala wiira nyuwo mwa naskola a Biibiliya, mun’ya woonihera dhai oxukhurela yawoopola? Nnoowerya opaka elo nttharaka miruku nrummwa Paaulu aavanhe iye makristau a oFilipi airaka: ‘Hata nironwe vahoolo, nitepe weettela ephuro emodharu.’ (aFil. 3:16) Abiibiliya akina, eveersu ela etaphuleliwe wiira: “Nihaana ohihiya ephuro yeelo nintthara nhu nenna-va.” Tivondho nhihiye etthu aahiidho ntthu oohihakani weettela ephuro elo emphwanyiha ekumi.—Math. 7:14; Luka 9:62.

6. Eseeni anaskola a Biibiliya anreerela awa opaka akhala wiira onnaaliperya ohiya yoolema ehinindhivela Yehova? (Otumererya 30:11-14) (Moone-tho efootu.)

⁶ Ankhi akhala wiira onnooliperyani waakhulela yoohudhiha emodha ya mbiibiliyani nhudhenre nnyu naanaano? Nthokodhe voohima dha yoohudhiha elo ni munvekele Yehova wiira ookhalihereni wiiwasasa saana. (Esal. 86:11) Akhala wiira nanlelo onnooliperyani wiiwasasa yoohudhiha elo, nhihiye onsoma Biibiliya, woonawene nuuvira okathi nnawiiwasasa saana mwaha owo. Ankhi akhala wiira onnooliperyani ohiya yoolema emodha ehinindhivela Yehova? Nhiliyale wiira Yehova khankhala-khala aavekelaka apinaatamu oohimalela etthu ahinwerya awa opaka. Nyuwo nnoowerya okhala moovarihana ni malamulo-ye. (Munsome Otumererya 30:11-14.) Ni Yehova onnilaihera wookhaliherani. (Yes. 41:10, 13; 1 aKor. 10:13) Tivondho nhihiye wiilipihera omwiiwelela Yehova. Nkuupuwelela itthu dhootheene Yehova oovanheiyeni, saasaasa yawoopola. Vaavo ompheta winyu Yehova onaacerereya awa, nnawoona wiira ‘dhooruma-dhe khadhinlipa weettela.’—1 Yoh. 5:3.a

7. Eseeni maparasi anhuiwa ettheko ya Anamoona a Yehova anreerela awa wuupuwelela?

⁷ Ankhi nyuwo marapasi munhuiwa ettheko ya Anamoona a Yehova? Mweekhweeli, nyuwo mwa anaskola a Biibiliya ootepa otthuneya wa atthu awo anoohuwani. Biibiliya onlotta wiira: ‘Mmwaattamele Muluku, vano owo onoowaattamelani.’ (Yak. 4:8; 1 Wah. 28:9) Vaavo mumpaka nnyu itthu wiira mmwaattamele Yehova, nuuwo-tho onnipaka etthu emodharu wiira akhale nxirikha nnyu muulupale. Yehova khanoothokoreryani pahi nkhama ntthu oniirela mphantta ekhurupu ya atthu aninkokhorela. Yehova onninthanla khuta ntthu, waahela mpuwa ale ahuiwe ettheko ya Anamoona a Yehova. Masi eseeni yiirinhe oweryaneya wiira nkhalena waataana ni Yehova? Yawoopola, yeelo nhinreerela nnyu oliyala. (aRoma 5:1, 2) Ndho nnoonela dhai wuupuwelela ele entaphulela awa wa nyuwo okhwa wa Yeesu nihinaphiye nihiku na nthukumano wa Wuupuwelela wa ntano? Nuumala-vo, muupuwelele moopora muntthuna nnyu weettiha ekumi nnyu ni dhoolukama dha omunepani munreerela nnyu waakhwanihera wiira moonihere oxukhurela yawoopola yeelo Yehova oovanheiyeni.b

MAKRISTAU OOPATISIWA

8. Makristau oopatisiwa yoonihenre dhai wiira annaamini yawoopola?

⁸ Akhala wiira nyuwo mwa nkristau oopatisiwa, nhoonihera waamini yawoopola. Mwa ntakihero, nyuwo moopaka marukunuso mweekumini mwinyu nkhalaka moovarihana ni malamulo a Yehova wiira nwerye okhala nxirikha-ye. Nyuwo nhiiwelela yooruma ya olaleya ihapari dhooreera ni waapaka ahudheri mwaahudhihaka atthu akina voohima dha Yehova ni Yeesu. Nitho nhiivaherera wa Yehova mpatisiwa. Woonawene nyuwo mooviriha nxankiho wa ottharatthariwa mwaha wa onrumeela Yehova. (2 Tim. 3:12) Ndho ohihiya winyu ovilela moororomeleya, onnoonihera wiira munnimpheta Yehova ni munnixukhurela yawoopola.—aHeb. 12:2, 3.

9. Eseeni makristau oopatisiwa anreerela awa odhuwela?

⁹ Nkhama makristau oopatisiwa, nihaana odhuwela wiira naahivahe ephoole, pooti opacera oliyala efaita yawoopola eraawana mweekumini mwihu. Elo eniiraneya dhai? Nthokorerye ele yaawiiranenle makristau a wEefesu. Awo yaahoonihera ovilela, ni Yeesu aahaattottopela mwaha wa elo. Masi owo aahaaleela wiira: ‘Nyuwo moohiya opheta mwaarinnyuna woopacerani.’ (Wiis. 2:3, 4) Moolumo a Yeesu annoonihera wiira hata nkristau nanlelo apakaka mavekelo, orowela mithukumano ni ovara nteko woolaleerya, pooti opaka itthu idho nkhama yoolema pahi, ohiya mwaha wa opheta Yehova. Eseeni munreerela nnyu opaka moona wiira ompheta winyu Yehova woopacera ovukuwa?

10. Mun’ya owerya dhai opaka ele Paaulu aantumerenrye iye Timootiyu? (1 Timootheyo 4:13, 15)

¹⁰ Nrummwa Paaulu aahintumererya Timootiyu ‘wuupuwelela’ ni okhalela “nthiti” miteko dha omunepani. (Munsome 1 Timootheyo 4:13, 15.) Ni nyuwo-tho pooti wuupuwelela itthu munreerela nnyu opaka wiira nhihiye okhalela nthiti onkokhorela Yehova. (aRoma 12:11) Mwa ntakihero, nyuwo pooti wiivaha okathi wiira nkocihere saana mithukumano. Opaka elo pooti wookhaliherani ottottela nreerelo nthukumano wootheene. Aahiidho nyuwo pooti wiiriha yoosoma nnyu ya omwaneene okhala yooreera mwiivahaka okathi on’ya wookhaliherani wuupuwelela ele munsoma nnyu ni opaka elo opuro woomaaleleya. Nkhama dhiidhaale ontthuneya awa opweha ikhuni vaikho wiira mooro ohittiphe, nhaana wiilipihera opaka itthu idho wiira nhihiye woonihera oxukhurela yawoopola ni itthu dhikina Yehova onoovahaiyeni. Ndho vaavo ninaattamela awa nihiku na Wuupuwelela, nnoonela dhai wuupuwelela mareeliho nrinnyuna mwaha wa okhala Namoona a Yehova? Moohaakanyera, opaka elo enawookhaliherani waacerera oxukhurela winyu yawoopola yeelo enoovahani eparakha ya okhala nxirikha a Yehova.

11-12. Akhala wiira ivaara dhikina munnikhulumuwela nteko woolaleerya, niire elo entaphulela wiira Yehova oohiya woovahai munepa-ye wawaarya? Ntthokihere. (Moone-tho efootu.)

¹¹ Akhala wiira khamunkhalela nthiti okokhorela weekhweeli nkhama khalai, nhikhulumuwe ni nhuupuwele wiira Yehova oohiya woovahani munepa-ye wawaarya. Muupuwele ele nrummwa Paaulu aawaatikhenle iye makristau a oKorintu voohima dha nteko-ye woolaleerya, airaka: ‘Hata kipakaka elo kihitthunaka, nanlelo kinniroromeliwa ni Muluku wiira kivare nteko ola.’ (1 aKor. 9:17) Eseeni Paaulu aatthuna iye olotta ni moolumo ala?

¹² Ivaara dhikina Paaulu aanikhulumuwela nteko woolaleerya. Masi hata eri dhiidho, owo aahilakela ohihiya olaleerya hata ivaara dhikina aakhulumuwa. Nyuwo nnoowerya opaka etthu emodharu. Nkhalena yoolakela ya opaka ele eri yooreera, hata wooliperyakani opaka elo. Nyuwo pooti onvekela Yehova wiira ookhalihereni okhala oolikana ene ni ophwanya ikuru wiira nwerye opaka ele onoovekelaiyeni. (aFil. 2:13) Nhihiye opaka itthu dhinwiirihani omwaattamela Yehova. Ndho nkhupali wiira nuuvira okathi, ompheta winyu Yehova onootthikela okhala woolipa.

13. Eseeni en’ya onikhalihera odhuwela akhala wiira ‘nanlelo ninneettela waamini’?

¹³ Ivaara dhikina, etthu yootthuneya ottara malakihero Paaulu aavanhe iye makristau a oKorintu airaka: ‘Okathi wootheene mwiivarerye wiira moone akhala wiira nanlelo munneettela waamini. Mwiivarerye wiira ndhuwele saana ontthu nnyu.’ (2 aKor. 13:5) Mwa ntakihero, nyuwo pooti wiikoha wiira: ‘Niire kinnipweha nipuro noopacera Omwene wa Muluku mweekumini mwaka?’ (Math. 6:33) ‘Niire maraarelo aka annoonihera wiira kinninyokha itthu dhootakhala?’ (Esal. 97:10) ‘Niire kiniilipihera okhumihera nrettele ni wiirana mmulokoni?’ (aEefe. 4:2, 3) Nthukumano wa Wuupuwelela, okathi wooreerela wiira nuupuwelele ele Yehova vamodha ni Yeesu anipakenle awa. Nitho onninivaha eparakha ya wiivarerya wiira noone akhala wiira ninninhakalaliha Kriistu, ohiya wiihakalaliha na adhineene.c

ALE AHIN’YE ONRUMEELA YEHOVA NI OTHUKUMANA VAMODHA NI MULOKO

14. Eseeni enwiiriha anna ni arokora akina ohiya onrumeela Yehova ni othukumana vamodha ni muloko?

¹⁴ Anna ni arokora akina, aaviriha okathi aahiidho iyaakha dhawaatta ehin’ye orowela mithukumano. Mwaha wa eseeni? Akina mwaha wa mixankiho dha mweekumini. (Luka 21:34) Akina aahiya orowela mithukumano mwaha wa olotteliwa aahiidho opakeliwa etthu yaaweren’ye vawaaatta ni ntthu mmodha mmulokoni. (Yak. 3:2) Ni akina apanke etampi yuulupale ekuuliwa muru oveka nikhalihero. Ndho moohixikha etthu ewiirinheni, eseeni munreerela nnyu opaka akhala wiira moohiya onrumeela Yehova ni othukumana vamodha ni muloko? Eseeni nkuttho wawoopola onootumereryaawani opaka?

15. Yehova onoonela dhai iputtiputthi irimeenle? (Ezekiyeli 34:11, 12, 16)

¹⁵ Muupuwelele moopora Yehova onwoonela iye ale ahin’ye onrumeela vamodha ni muloko. Owo khananariwe ni khaanyanyanle. Ohiya-vo, owo onnaadhya iputtiputthi irimeenle, onniciha ni okhalihera wiira itthikele wa veene. (Munsome Ezekiyeli 34:11, 12, 16.) Niire Yehova ompaka etthu emodharu wa nyuwo? Aayo! Nthowa ninwiirihani nenna-va osoma mwaha ola, okhala wiira wiira nanlelo munnitthuna onhakalaliha. Vaavo Yehova ookhalihenreiyeni ohudhera ekhweeli, elo entaphulela wiira aahoona mikhalelo dhinyu dhooreera. Owo ontthuna wiira ntthikele onrumeela vamodha ni muloko.

16. Eseeni en’ya waakhalihera ale ahin’ye onrumeela Yehova ni othukumana vamodha ni muloko otthikela wa veene? (Moone-tho efootu.)

¹⁶ Ebroxuura Muhokolowele wa Yehova, yookhalana moolumo ala oolipiha: “Nkhupali wiira Yehova onoowaakhelani mwatthikela wa veene. Owo onawookhaliherani ovilela mixankiho dha mweekumini, onyoonyiheya ni ophwanya nrettele wa mmuupuweloni ni vanrimani mwaha wa okhalana yawuupusera ya nrima yooreera. Ndho elo enawookhaliherani ophwanya ikuru dha otthuna otthikela onrumeela Yehova vamodha ni anna ni arokora.” Nitho nhiliyale wiira asitokweene ari oolikana ene wiira yookhalihereni. Awo pooti okhala nkhama ‘ntthawelo okathi wa ettheku, ni opuro wootthawela okathi wa epula yawaatta.’ (Yes. 32:2) Mooniheraka oxukhurela yawoopola, mwiikohe wiira: ‘Eseeni kinreerela aka opaka nenna-va wiira kitthikele okhala nxirikha a Yehova?’ (Yes. 1:18; 1 Ped. 2:25) Mwa ntakihero, niire mwaanwerya orowela mithukumano Empa ya Omwene? Aahiidho niire mwaanwerya olotta ni ntokweene wiira ookhalihereni nkhalelo wa omunepani? Woonawene owo pooti opaka mareheryo wiira ntthikele osomihiwa Biibiliya mwa okathi vakhaani. Nkhupali wiira Yehova onooreeliha wiilipihera winyu ni mavekelo mumpaka nnyu wiira moonihere oxukhurela nkuttho wawoopola wa Mwane.

MUN’YA WOONIHERA DHAI OXUKHURELA YAWOOPOLA?

17-18. Nin’ya orumeela dhai okathi nhu mwa miruku nihinaakuve ophiya nihiku na Wuupuwelela wa ntano?

¹⁷ Yeesu aalontte wiira yawoopola evahiwe wiira ‘ootheene ale an’ya woonihera waamini ehipwetesiwe, masi ephwanye ekumi yoohimala.’ (Yohani 3:16) Yawoopola enamuna Yehova orumeenle iye wiira anoopole mwa etampi ni okhwa. Ndho nihikhala-khale nihiyaka woonihera oxukhurela yawoopola. (aRoma 3:23, 24; 2 aKor. 6:1) Vaavo ninaattamela awa nihiku na nthukumano wa Wuupuwelela, okathi owo ninnikhalana eparakha wiira nuupuwelele opheta Yehova ni Yeesu anoonihenre awa, ni opheta iwo ohaana onitumererya woonihera oxukhurela.

¹⁸ Mun’ya woonihera dhai oxukhurela winyu yawoopola? Waakhula winyu pooti ovirikana ni wa atthu akina. Masi nkhupali wiira Yehova onooreeliha wiilipihera winyu wiira mwiirele mphantta ekhurupu ya atthu imilyau dhawaatta aninkokhorela, yaawo ‘ahiniidhiveliha adhineene, masi anindhiveliha Kriistu, yoowo okhwiye mwaha wa atthu awo.’—2 aKor. 5:15.