იოანე
2 მასმა დღას გალილეაშ კანას კამპანია რდჷ. იესოშ დიდა ხოლო თექ რდჷ. 2 კამპანიაშა იესო დო მუშ მოწაფეეფ ხოლო რდესჷ დაპატიჟებულეფ.
3 ღვინ ილიებუდუნ, იესოშა დიამუშიქ ქიმერთჷ დო უწუ: „ღვინ ვა უღუნა“. 4 იესოქ უპასუხ: „უკულ მა დო სი მუ შქას ვორეთ?! ჩქიმ დროს დიო ვა მურთუმ“. 5 დიამუშიქ სუფრას ომსახურუდესინ თინეფს უწუ: „მუდგას გიწინან, თინა გაკეთით!“ 6 თექ წყარშო ამშვ ქუაშ ჭკუდ გედგუდ, მუჭოთ თეს იუდეველეფიშ განწმენდაშ წეს ითხინდჷ. თითო ჭკუდშა 44 -შე 66 ლიტრაშახ* ენიშ. 7 იესოქ თინეფს უწუ: „ჭკუდეფ წყარით გეიოფშით“. თინეფქ ხოლო ბოლოშა გეიოფშეს. 8 უკულ უწუ: „ასე გეშეღით დო სუფრაშ დუდკოჩის ქიმუღით“. თინეფქ ხოლო ქიმუღეს. 9 სუფრაშ დუდკოჩის ვა უჩქუდ, მუდგაქ მოხვად (წყარიშ ღვინო გინორთაშ ამბე ხვალე სუფრას ომსახურუდესინ თინეფს უჩქუდეს). მუჟამსით თიქ ღვინო გინორთელ წყარს გემო გუსინჯჷ, სინჯას ქუდუძახ 10 დო უწუ: „დიო ჯგირ ღვინს მიკიღანა დო, ხალხ გელეშუმუნ უკულ — დარეს, მარა სი ასეშახ ჩუანდჷ ჯგირ ღვინს“. 11 იესოქ თენა გალილეაშ კანას აკეთ დო თაშ დიჭყჷ სარკო საქმეეფიშ კეთება. თეშნერო გაცხად მუშ დიდება; მუშ მოწაფეეფქ ქირწმუნეს თინა.
12 თეშ უკულ თიქ, დიამუშიქ, მუშ ჯიმალეფქ დო მოწაფეეფქ კაპერნაუმშა გენორთეს, მარა თექ ბრელ ხანს ვა დოსქილადენა.
13 მონჭაფილ რდჷ იუდეველეფიშ პასექ, ათეშენ იესოქ იერუსალიმშა გეკორთჷ. 14 ტაძარს ქოძირ საქონელიშ, შხურეფიშ დო ტორონჯეფიშ გიმმაჩამალეფ, თექ ხედეს ფარაშ გინმახურდალეფ ხოლო. 15 თიქ თოკეფშე მართახ გაკეთ დო ტაძარშე გეგმორაჸ არძა მუნეფიშ შხურეფ დო საქონელწკუმა ართო, ფარაშ გინმახურდალეფს ფარა ქუდურღვჷ დო სტოლეფ გამნურთინუ. 16 ტორონჯეფიშ გიმმაჩამალეფს უწუ: „ჩაუთხინეთ თენეფ თაქიანობას! მიოტეთ ჩქიმ მუმაშ ჸუდეშ ოვაჭრებელ ადგილო გიმორნაფა!“ 17 თიმწკუმა მოწაფეეფს ქუგაშინეს ჭარილქ: „სქან ჸუდეშ ძალიერ ჸოროფა დაჩხირცალო გეირზამუ ჩქიმ გურს“.
18 იუდეველეფქ კითხეს: „მუ ნიშანს მოძირანთ თიშ დამტკიცებელო, ნამდა თეშ კეთებაშ უფლება გიღჷ?“ 19 იესოქ უპასუხ თინეფს: „გეკარღვით თე ტაძარ დო მა სუმ დღაშა კინ გევაშენენქ თის!“ 20 თიმწკუმა იუდეველეფქ უწუეს: „თე ტაძარ 46 წანას იშენებუდ დო სი სუმ დღაშა აშენენქო?!“ 21 მარა იესოს მუშ სხეულიშ ამბე აფუდ, მუჟამსით ტაძარშე იჩიებუდ. 22 იესოქ გეთელუნ, მოწაფეეფს ქუგაშინეს, ნამდა თეს ხშირას იჩიებუდ. თინეფქ ქირწმუნეს წმინდა წერილეფ დო იესოშ ნარაგად ხოლო.
23 იერუსალიმს, პასექიშ დღახუს ბრელქ ქოძირ იესოშ კეთებულ სარკო საქმეეფ დო ირწმუნ თინა*. 24 მარა იესო თე ხალხის ბოლოშა ვანდუდ, მუშენდა ჯგირო იჩინენდჷ თინეფს; 25 თის ვასაჭირუდ, მითინქ გეუნწყუკო, მუნერ რდჷ კოჩ, მუშენდა თეშ ხოლო ჯგირო უჩქუდ, მუ უღჷ კოჩის გურს.