კორინთელეფშა მეჭარილ პირველ წერილ

5 იფრჩქილუაფუქ, ნამდა თქვან შქას სექსუალურ უზნეობა* რე. მუჭოთ მიწუეს, ართ კოჩ მუამუშიშ ოსურწკუმა ცხოვრენს. თეცალ უზნეობა თე ქიანაშ ხალხ შქას ხოლო ვა ხვადუ. 2 ინგარდათინ თიშ მანგიორო, იცქვანთო თეშ გურშენ?! დატებელ გაფუნანო თქვან შქას თეცალ კოჩ?! 3 მართალ რე, თქვანწკუმა ვა ვორექ, მარა აზრით თექ ვორექ დო თი კოჩ, ითამ თექ ვორდენ თეშ, უკვე გასამართლებურ მაფჷ. 4 მუჟამსით ჩქინ უფალ იესოშ სახელით ართო იშაყარუთ, გიჩქუდან, ნამდა მა ხოლო აზრით თქვანწკუმა ვორექ* დო თქვანწკუმა რე ჩქინ უფალ იესოშ ძალა. 5 თეცალ კოჩ სატანას ოკო გეგნოჩათ, ნამდა ჩეთხინუათ ცოდა, ნამუთ თიქ კრებაშა მიშეღ, დო კრებაშ სულიერ აზროვნება თხილერ რდასჷ უფალიშ დღას.

6 ვა რე ჯგირ, თე ამბეთ იცქვანთინ. მეტო ვაიჩქუნანო, ნამდა აკაბცხა ცომიშ ეიოჸუნაფალ მთელ ცომს ეიჸუნანს?! 7 ჩეთხინეთ ჯვეშ ცომიშ ეიოჸუნაფალ, ნამდა ახალ ცომქ ქიჸუათ. სინამდვილეს ქოთ რეთჷ ეიოჸუნაფალ ვა უღუნ ფერ ცომცალ, მუშენდა თქვანო იჸუ შეწირულქ ქრისტექ, ჩქინ პასექიშ კირიბიქ. 8 თაშ ნამდა, კინ იბზეიმათ დღახუ*, მარა ჯვეშ ცომიშ ეიოჸუნაფალით, ცოდაშ დო უბადობაშ ცომიშ ეიოჸუნაფალით ვარინ, ქობალით, ნამდგას შურო ვა უღჷ ეიოჸუნაფალ; სიალალეშ დო სიმართლეშ ქობალით.

9 თეიშახ მორჭარით, ნამდა მეტო მუთუნნერ ურთიერთობა ვაიღუდესკო უზნეო* კათაწკუმა. 10 მარა თე ქიანას მახორუ უზნეოეფიშ*, ჰარამეფიშ, მიდმაღალარეფიშ ვარდა კერპთაყვანიშმცემელეფიშ ამბე ვა მაფუდ, იმწკუმა თე უბადო ქიანა დატებელ გაჸიდეს. 11 ასე რჭარუნთ, ნამდა მეტო ვაიღუდან მუთუნნერ ურთიერთობა თიწკუმა, მიდგას ჯიმა ჯოხო, მარა უზნეო* ცხოვრებას მეჸუნს, ვარდა რე ჰარამ, ვარდა კერპთაყვანიშმცემელ, ვარდა მალანძღარ, ვარდა შუმილია, ვარდა მიდმაღალარ; თეცალეფწკუმა ართო ოჭკუმალ ხოლო ვა ჭკუმათ. 12 კრებაშ გალე რენან თინეფიშ გასამართლება ჩქიმ საქმე ვა რე. თქვა თინეფ ოკო გასამართლათ, მით კრებაშ დინახალე რენა, 13 დო კრებაშ გალე რენან თინეფს ღორონთ გასამართლენს; წმინდა წერილეფს ჭარილ რე: „ვედიტუათ უბადო კოჩ თქვან შქას!“