მუს მოგურუანა თი ირფელ, მუთ იესოქ გათელებაშ უკულ 40 დღას აკეთ?

1, 2. მუქ მოხვად, მუჟამსით იესოშ ჟირ მოწაფე ემაუსშა მიშჷ?

ᲐᲮ. Წ. 33 წანაშ 16 ნისან რე. იესოშ მოწაფეეფ განადგურებულ რენა თიშ ღურაშ გურშენ დო შიშ აფუნა ინოჭკირილ. თიშ ჟირ მოწაფე იერუსალიმშე მეურს დო სოფელ ემაუსიშ შარას გიოდირთუ, ნამუთ თე ქალაქშე 11 კილომეტრიშ მაშორას რე. თე კოჩეფ ღურათებულეფ მეულა, მუშენდა იესო, მიდგას თეზმა ხანს ეკოჸუნდეს დო მესიათ მიორჩქუდეს, დოჸვილეს. თინეფს შურ ოლუდეს, მუჟამ დიჭყანდ იესო თი ირფელიშ კეთებას, მუდგას მესიაშე ელუდეს, მარა ასე უიმენდოთ რენა. მარა მალას თიცალ მუდგარენ ხვადუ, მუდგას ალბათ მუთუნით ვეფიქრენდეს.

² ემაუსშა მეულან თეშ, მიდგარენ უჩინებ კოჩ მეურს თე ჟირ მოწაფეშა დო თინეფწკუმა ართო აგრძელენს შარას. გურშეჭირებულ მოწაფეეფ თე კოჩის ეჩიებუნა, მუქ აღოლ იესოს. უკულ თე უჩინებ კოჩ იჭყანს ჩიებას, ნამუთ თე მოციქულეფს დღას ვა გაჭყორდუდეს. თიქ „მოსეშე ქიდიჭყჷ დო არძა წინასწარმეტყველიშ წიგნშე გეუნწყჷ“, მუშენ ოკო იტანჯუკო დო ღურუკო მესიაქ. ემაუსშა ენილესინ, მოწაფეეფქ ქიმეხვადეს, ნამდა თე უჩინებ კოჩ სინამდვილეს, გათელებურ იესო რდჷ. წერმიდგინით, მუშმადიდა ხიოლს მოუღანდ მოწაფეეფს თიშ გაგება, ნამდა მესია კინ ცოცხალ რდჷ! (ლუკ. 24:13—35).

3, 4. მუ აკეთ იესოქ მოწაფეეფიშ მახვარებელო დო მუ რდჷ თეშ შედეგ? (საქ. 1:3).

³ გათელებაშ უკულ 40 დღაშ დინახალე იესოქ მუშ მოწაფეეფს მუსხირენშა ოძირუ დუდa (წეკითხით საქმეეფიშ 1:3). შედეგო, გურშეჭირებულ დო შქურნაფილ მოწაფეეფს გურქ ხიოლით ეიაფშეს დო სახიოლო ამბეშ ქადაგებაშ დო შხვეფშა გურაფაშ გაბედულებაქ ქიმიაჩეს.

⁴ ბრელ მუდგარენიშ გურაფა შემლებუნა თი ირფელშე, მუთ იესოქ თე დროშ დინახალე აკეთ. თე სტატიას გუვარჩიენთ: 1) მუჭო ელუკინ გურშა იესოქ მუშ მოწაფეეფს, 2) მუჭო მეხვარ, უჯგუშო ქინანჭესკო წმინდა წერილეფს დო 3) მუჭო მამზად უმოს დიდ საქმეშ ოკეთებელო. თითოულ მხარეშ გარჩიებაშ დროს ქობძირუნთ, ჩქი ხოლო მუჭო შემლებუნა მივაჸუნათ იესოშ მაგალითის.

ᲒᲣᲠᲨᲐ ᲔᲚᲣᲙᲘᲜᲘᲗ ᲨᲮᲕᲔᲤᲡ

5. მუშენ ოსაჭირუდეს მოწაფეეფს გურიშ ელაკინა?

⁵ მოწაფეეფს ოსაჭირუდეს გურშა ელაკინა, მუშენდა თინეფშე ნამთინექ, იესოწკუმა რდუკონ თიშენ, ოჯახ დო სამუშა დიტუ (მათ. 19:27). ნამთინე, იესოშ მოწაფეთ გინირთუნ თიშენ, ხალხიქ გიჯოგუ (იოან. 9:22). მოწაფეეფქ თეშმადიდა მსხვერპლშა თიშენ იდეს, ნამდა წანდეს იესო მესია რდუნჷ (მათ. 16:16). მარა მუჟამსით თინა დოჸვილეს, მანგარო გუტირხეს გურქ, მუშენდა თინეფიშ იმენდიქ გემტყუნ.

6. მუ აკეთ იესოქ გათელებაშ უკულ?

⁶ იესოს ვა უფიქრებ, ნამდა მოწაფეეფქ სუსტ რწმენა უღუდესინ თიშენ გიშქვეს თეშმანწარას თიშ ღურა გურშა. თის ჯგირო არჩქილედ, ნამდა გასაკვირ ვა რე, საჸოროფო ადამიანიშ ღურას მანგარო გენიცადენდენ. ათეშენ გეთელუნ თიმ დღაშე ქიდიჭყჷ მეგობრეფშა გურიშ ელაკინა. მაგალთო, მაგდალელ მარიამს ოძირუ დუდ, მუჟამსით თინა „სასაფლაშ გოხოლუას გერდჷ დო ინგარდჷ“ (იოან. 20:11, 16). თეწკუმა ართო, თიქ დუდ ოძირუ სტატიაშ დაჭყაფუს მოშინაფილ ჟირ მოწაფეს, მით ემაუსშა მიშეს, დო უკულ პეტრე მოციქულს ხოლო (ლუკ. 24:34). მორთ გუვარჩუათ, მუ აკეთ იესოქ, მუჟამსით მარიამს ოძირუ დუდ დო ქიგებგათ, მუშ გურაფა შემლებუნა თევრეშე.

7. მუ მდგომარეობას რდჷ მარიამ სასაფლაშა მერთუნ თიმ ოჭმარეს დო მუ აკეთ იესოქ? (იოან. 20:11—16; ქოძირით სურათ).

⁷ წეკითხით იოანეშ 20:11—16. 16 ნისანს, ოჭმარეს ადრე, მუსხირენ ოსურკოჩიქ მიდართჷ თი ადგილშა, სოდეთ იესო სვანჯუდ (ლუკ. 24:1, 10). თინეფშე ართ-ართ რდჷ მარიამ მაგდალელ. მუჟამსით თიქ იესოშ სასაფლაშა ქიმერთჷ, ცარიელქ ქუდოხვად, ათეშენ ხეთეშე ირულ პეტრე დო იოანეშა დო ქოუწუ თე ამბე. თინეფქ რულაიათ მოლართეს სასაფლაჸურე დო მარიამქ ხოლო ქეკაჸუნ. მუჟამსით მოციქულეფქ ქოძირეს, ნამდა სასაფლა მართალო ცარიელ რდჷ, ჸუდეშა დირთეს, მარა მარიამქ თექ ქუდოსქიდ დო ინგარდჷ. მუს იფიქრენდ მარიამ, ნამდა თე დროს იესო უჯინედ?! თინა ორწყედ, ნამდა თე ოსურ ჩხე ჩილამურით ინგარდჷ, მუდგაქ მანგარო იმოქმედ თიშა. ათეშენ, დუდ ქაძირუ მარიამს დო ართ მეჯინათ ჭიჭე მუდგარენ აკეთ, მუთ მანგარო ელუკინანდ გურშა თე ოსურკოჩის — ქუდურაგადუ თის დო მნიშვნელოვან დავალება ქიმეჩ: მარიამქ იესოშ ჯიმალეფს ოკო ქუგაგებაფუკო, ნამდა ქრისტექ გეთელ (იოან. 20:17, 18).

8. მუჭო შემლებუნა მივაჸუნათ ქრისტეშ მაგალითის?

⁸ მუჭო მივაჸუნათ ქრისტეშ მაგალითის? შემლებუნა ჩქი ხოლო ქიმვეხვარათ და დო ჯიმალეფს, ართგურო გაგრძელან იეჰოვაშ მსახურება. თეშო საჭირო რე, იესოცალო, ყურადღება ქიმვაქცუათ თი თანაქრისტიანეფს, მიდგას სირთულეეფ უღუნა. ქივეცადათ, ქინვანჭათ, მუს გინაფლენა დო გურშა ეუქექუათ. გუვარჩუათ ჩქინ ართ დაშ, ჯოსელინიშ, შემთხვევა, ნამდგას უკლაშ დაქ უბედურ შემთხვევას დოუღურ. თინა იჩიებ: „მუსხირენ თუთას მანგარ გლახათ ვორდჷ“. ართ ჩილ დო ქომონჯიქ, მიდგას უჩქუდ, მუ მდგომარეობას რდჷ ჯოსელინ, ჸუდეშა ქუდაპატიჟ თინა. თინეფქ შურ დო გურით ქუმურჩქილუეს თე დას დო ქაძირუეს, მუსხით ძვირფას რდჷ ღორონთიშ თოლს. ჯოსელინ იჩიებ: „ქარბორიაშ დროს შქა ზღვას იფშქვიდუდიკონ თეშ ვორდჷ, მარა იეჰოვაქ თე ჩილ დო ქომონჯიშ ხეთ, თაშ ქოფთქუათინ, ნავშა გეშამიჸონ. თინეფქ გუმამანგარეს დო ძალა ქომუჩეს, გუვაგრძელიკო იეჰოვაშ მსახურება“. ჩქი ხოლო შემლებუნა შურ დო გურით ქუმურჩქილუათ შხვეფს, მუჟამსით მუნეფიშ გაჭირებას მეჩიებუნა, დო გემუან სიტყვათ გურშა ეუქექუათ. თეშნერო ქიმვეხვარებუთ თინეფს, იეჰოვას ემსახურან (რომ. 12:15).

ᲥᲘᲛᲔᲮᲕᲐᲠᲘᲗ ᲨᲮᲕᲔᲤᲡ ᲦᲝᲠᲝᲜᲗᲘᲨ ᲡᲘᲢᲧᲕᲐᲨ ᲘᲜᲝᲜᲭᲐᲤᲐᲡ

9. მუ სირთულეს შეხვადეს იესოშ მოწაფეეფქ დო მუჭო მეხვარ იესოქ თინეფს?

⁹ იესოშ მოწაფეეფქ ირწმუნეს ღორონთიშ სიტყვა დო ირნერო ოცადუდეს, მიაჸუნესკო თის (იოან. 17:6). მარა, მუჟამსით თინა უბადოშ მაკეთებელცალო ღურათ დასაჯეს, მოწაფეეფს გაუჭირდეს თიშ ინონჭაფაქ, მუშენ მოხვად თექ. იესოს არჩქილედ, ნამდა მოწაფეეფს ეჭვეფქ რწმენაშ სინაკლებეშ დო ღორონთ ვა უჸორდესინ თიშენ ვარინ, წმინდა წერილეფს ჯგირო ვენანჭუდესინ თიშენ გოურჩქინდეს (ლუკ. 9:44, 45; იოან. 20:9). ათეშენ თიქ ქუდაგურუ თინეფს, მუჭო ინანჭესკო ღორონთიშ სიტყვას. ქობძირათ, მუჭო აკეთ თენა იესოქ თი ჟირ მოწაფეწკუმა, ნამდგას ემაუსიშ შარას ოძირუ დუდ.

10. მუჭო მეხვარ იესოქ მოწაფეეფს თიშ ძირაფას, ნამდა მართალო მესია რდჷ? (ლუკ. 24:18—27).

¹⁰ წეკითხით ლუკაშ 24:18—27. ქაკვირუთო, ნამდა იესოს ხეთეშე ვა უთქუალ თე კოჩეფშა, მი რდჷ სინამდვილეს. თეშ მანგიორო კითხვეფ დაუსვჷ თინეფს. მუშენ აკეთ იესოქ თენა? ალბათ ოკოდ, მუნეფს ქარაგადაფუკო, მუს ფიქრენდეს. მოწაფეეფქ ქოთ ქეჩუეს თის, მუ უღუდეს გურს; უწუეს, ნამდა იმენდ უღუდეს, იესო გინირთუდ ისრაელიშ მეფეთ დო რომაელეფიშ ხეშე დერსხენდ ხალხის. თიშ უკულ, მუთ მოწაფეეფქ ალალას ქეჩუეს თის, მუდგას ფიქრენდეს, იესოქ წმინდა წერილეფშე ქაძირუ თინეფს, ნამდა მუდგაქ მოხვადუნ თი ირფელით წინასწარმეტყველებეფქ შისრულ.b თიმ ონჯუას იესოქ შხვა მოწაფეეფს ხოლო ქიმეხვარ თეშ ძირაფას (ლუკ. 24:33—48). მუშ გურაფა შემლებუნა თავრეშე?

11, 12. ა) მუჭო მივაჸუნათ იესოშ მაგალითის შხვეფშა გურაფაშ დროს? (ქოძირით სურათეფ). ბ) მუჭო მეხვარ ნორტის ბიბლიაშ მასწავლებერქ?

¹¹ მუჭო მივაჸუნათ ქრისტეშ მაგალითის? მაგალთო, მუჟამსით ბიბლიაშ მაგურაფალს ოგურუანთ, შეილებუნა ტაქტიან კითხვეფ გეგმირინუათ, ნამდა ქიგეგათ, მუს ფიქრენს (იგავ. 20:5). მუჟამსით ქიგეგენთ, მუ ნოღვე გურს, ქაძირეთ, მუჭო გორას თიცალ ბიბლიურ მუხლეფ, ნამუთ მუშ სიტუაციას გიმადირთუ. თქვა ვა უწუათ, მუ ოკო აკეთას. თეშ მანგიორო, ქუწით, დეფიქრას კითხირებულ მუხლეფშე დო ქინანჭას, მუჭო შეულებ თექ ინოდვალირ პრინციპიშ ცხოვრებას გიმორნაფა. დეფიფქრათ ართ ჯიმაშ, ნორტიშ, შემთხვევაშე, ნამუთ განას ცხოვრენს.

¹² 16 წანერ რდუნჷ თეშ, ნორტიქ ბიბლიაშ გურაფა ქიდიჭყჷ. მალას თიქ ოჯახშე წინააღმდეგობას ქეშეხვად. მუქ მეხვარ ნორტის მანგარო ქიგედირთუკო? თიშა ბიბლიაშ მასწავლებერს მათეშ მა-10 დუდშე აფუდ ძირაფილ, ნამდა ჭეშმარიტ ქრისტიანეფს თხოზუდესკონ იჸიდ. ნორტი იჩიებ: „თაშ ნამდა, მუჟამსით წინააღმდეგობა ქუდომჭყეს, თექ ხოლო უმოსო დუმარწმუნ, ნამდა, მუდგას ბგურაფლენდჷ, ჭეშმარიტება რდჷ“. ბიბლიაშ მასწავლებერქ თის მათეშ 10:16 ხოლო ქაძირუ დო უკულ ართო ქიჩუეს, მუჭო მეხვარებუდ თე მუხლ ნორტის, ფრთხილას დო პატიცემათ ქიჩუკო მუშ რწმენაშ გურშენ ოჯახიშ წევრეფწკუმა. ნათუაშ უკულ თის მიზანო პიონერობაშ დოჭყაფა უღუდ, მარა მუამუშის ოკოდ, თიქ უნივერსიტეტის ჩაბარუკო. ბიბლიაშ მასწავლებერს თიშა ვა უთქუალ, მუ ოკო აკეთუკო. თეშ მანგიორო, კითხვეფ ქუდუსვჷ დო ქიმეხვარ, დეფიქრუკო ბიბლიურ პრინციპეფშე, მუთ მეხვარებუდ სწორ გადაწყვეტილებაშ მეღებას. მუ რდჷ შედეგ? ნორტიქ პიონერო მსახურება ქიდიჭყჷ, მუდგაშ უკულ მუამუშიქ თინა ჸუდეშე გეგნაჸათ. დეკვირით, მუს იჩიებ ნორტი თე ირფელიშ უკულ: „ბოლოშა ვორექ დარწმუნებულ, ნამდა სწორას მიფქცი“. თაშ ნამდა, მუჟამსით შხვეფს ელუჩანთ, დეფიქრან წმინდა წერილეფშე, ვოხვარუთ, გინირთან მოწიფულ ქრისტიანეფო (ეფეს. 3:16—19).

ᲛᲐᲛᲖᲐᲓᲘᲗ ᲯᲘᲛᲐᲚᲔᲤ ᲞᲐᲡᲣᲮᲘᲨᲛᲒᲔᲑᲚᲝᲑᲔᲤᲨᲝ

13. მუ აკეთ იესოქ, ნამდა ზეცაშა დორთაშ უკულ ქადაგებაშ საქმექ ვა გაჩერდუკო? (ეფეს. 4:8).

¹³ დედამიწას ცხოვრებაშ დროს, იესო კილ-კილშა ასრულენდჷ მუამუშშე მეღებულ დავალებას (იოან. 17:4). მარა თინა ვა ფიქრენდჷ, ნამდა თეშ კეთება მუშ მეტის შხვას მითინს ვეშიალებედ დო ვეჩიებუდ: „საქმექ ჯგირო გეკეთინასინ ქუგოკონ-და, სი ოკო მეთხე ხე“. თეშ მანგიორო, დედამიწას მსახურებაშ დროს, სუმ წანა დო გვერდიშ დინახალე, თინა შხვეფს ხოლო ამზადენდჷ იეჰოვაშე მეღებულ დავალებაშ შეიოსრულებერო. იესო ონდუდ მუშ მოწაფეეფს. თიქ თინეფს სახიოლო ამბეშ ქადაგება დო გურაფაშ დო იეჰოვაშ შხურიშ ჭყიშუაშ პასუხიშმგებლობა მეჩჷ. თე მოწაფეეფშე ნამთინე შილებე 20-შე 30 წანაშახ ჸოფედუკო (წეკითხით ეფესოელეფიშ 4:8). ქობძირათ, ზეცაშა ულაშახ, მუჭო მეხვარ იესოქ თე ართგურ დო დუდგინოდვალირ ქომოლკათას, რდესკო „ძღვინ“ და დო ჯიმალეფშო.

14. მუჭო მეხვარ იესოქ გათელებაშ უკულ 40 დღაშ დინახალე მუშ მოწაფეეფს, სულიერო მირდესკო? (ქოძირით სურათ).

¹⁴ იესოქ გათელებაშ უკულ 40 დღაშ დინახალე მუშ მოწაფეეფს პირდაპირ, მარა ჸოროფათ მეჩჷ რჩევეფ. მაგალთო, ნამთინე მოწაფეს ვა ჯერდჷ, ნამდა იესოქ დოღურ დო გეთელ. ათეშენ თიქ რჩევაშ მეჩამათ მეხვარ თინეფს ეჭვეფიშ ჩათხინაფას (ლუკ. 24:25—27; იოან. 20:27). თეწკუმა ართო, უწუ, ნამდა მთელ ყურადღება ფარაშ შიბაშა ვარინ, ღორონთიშ ხალხიშ ჭყიშუაშა გეგნიღესკო (იოან. 21:15). იესოქ თინა ხოლო ქუგაშინ მოწაფეეფს, ნამდა მიდგაინ იეჰოვაშ მსახურებას ახალ პასუხიშმგებლობას ქიმიღენდ-და, გურ ვეგიტახესკო დო დუდ ვეშუდარესკო შხვეფს (იოან. 21:20—22). მოწაფეეფს არასწორო არჩქილედეს ღორონთიშ სამეფოშ მოულაშ საკითხ ხოლო, ათეშენ იესოქ შეუსწორ თინეფს აზრ დო უწუ, მთელ ყურადღება სახიოლო ამბეშ ქადაგებაშა გეგნიღესკო (საქ. 1:6—8). მუშ გურაფა შეულებუნა უხუცესეფს იესოშე?

15, 16. ა) მუჭო შეულებუნა უხუცესეფს იესოშ მაგალითიშ მეჸუნა? ბ) მუ ჯგირ შედეგეფ მოუღ პატრიკის ჯიმალეფიშ რჩევეფიშ დოჸუნაქ?

¹⁵ მუჭო შეულებუნა უხუცესეფს მიაჸუნან ქრისტეშ მაგალითის? თინეფქ ოკო მამზადან ჯიმალეფ, თინეფ შქას ახალგაზრდეფ ხოლო, ნამდა მზათ ქიჸუან უმოს დიდ პასუხიშმგებლობეფშო.c უხუცესეფს ოკო არჩქილედან, ნამდა თი ჯიმალეფ, მიდგას ამზადენა, სრულყოფილეფ ვეჸინა დო შილებე ბრელ მუდგარენქ აჸუან დაგურაფალქ. თინეფქ ჸოროფათ ოკო მეჩან ახალგაზრდა ჯიმალეფს რჩევეფ, მუთ მეხვარებ თინეფს, მიღან გამოცდილება დო ქოძირან, მუსხით მნიშვნელოვან რე, რდანჷ თანდაბალეფ, ართგურეფ დო მზათ შხვეფიშ მახვარებელო (1 ტიმ. 3:1; 2 ტიმ. 2:2; 1 პეტ. 5:5).

¹⁶ გუვარჩუათ ართ ჯიმაშ, პატრიკიშ, შემთხვევა, მიდგას უხუცესეფშე მეღებულ რჩევაქ მანგარო აწადირთჷ. უმოს ახალგაზრდა რდუნჷ თიმწკუმა, თის ჸინჩ ჩიება დო უხეშ მოქციება უჩქუდ შხვეფწკუმა, თინეფ შქას დალეფწკუმა ხოლო. ართ უხუცესის ქუმუოლ თექ თოლშა დო პატრიკის ჸოროფათ, მარა გასაგებო გეუნწყჷ, ნამდა თე საკითხშე ომუშებელ აფუდ. დეკვირით, მუს იჩიებ პატრიკ მეღებულ რჩევაშ გურშენ: „მარდულ ვაფუქ თი ჯიმას, თენა ქომწუნ“. პატრიკ ხოლო ართ საკითხშე მეჩიებუნა, მუდგაშ გაუჯგუშებას ჯიმალეფიშ რჩევაქ მეხვარ: „გურ მიტირხუდ, მუჟამსით შხვა ჯიმალეფ ღებულენდეს მა მოკოდუნ თი პასუხიშმგებლობეფს. უხუცესიშ რჩევაქ ქიმმოხვამილუ, ნამდა ჩქიმო მთავარ პასუხიშმგებლობაშ მეღება ვარინ, და დო ჯიმალეფშა თანდაბალო მომსახურება ოკო რდუკო“. პატრიკიქ ქუდაჸუნ ჯიმალეფიშ რჩევეფს დო შედეგო, 23 წანერ რდუნჷ თეშ უხუცესო დენიშნჷ (იგავ. 27:9).

17. მუჭო ოძირუ იესოქ, ნამდა ონდუდ მუშ მოწაფეეფს?

¹⁷ იესოქ მუშ მოწაფეეფს ხვალე ქადაგებაშ ვარინ, გურაფაშ პასუხიშმგებლობა ხოლო მიანდჷd (მათ. 28:20). თინეფ შილებე ფიქრენდესკო, ნამდა ვა რდესჷ მზათ თე დავალებაშ შეიოსრულებერო, მარა იესოს ართ წუთით ხოლო ვაეჭვუდ, ნამდა მუშ მოწაფეეფს შეიალებედეს თეშ კეთება. ათეშენ თინეფს თეცალ სიტყვეფ უწუ: „მუჭოთ მუმაქ მუმაშქვჷ, მა ხოლო თეშ გიტენთ თე ქიანაშა!“ (იოან. 20:21).

18. მუჭო შეულებუნა უხუცესეფს, მიაჸუნან იესოშ მაგალითის?

¹⁸ მუჭო შეულებუნა უხუცესეფს მიაჸუნან ქრისტეშ მაგალითის? უხუცესეფ ჭკვერულს ორთუნა, მუჟამსით შხვეფს უნაწილენა პასუხიშმგებლობეფს (ფილ. 2:19—22). მაგალთო, უხუცესეფქ შილებე ახალგაზრდეფს მონაწილება მიოღებაფუან დარბაზიშ დასუფთებას დო მიკოლუაფას. მუჟამსით მიდგაინს საქმეს ქუდავალენა, თე ჯიმალეფ ოძირანა, ნამდა ონდუნა თინეფს, ართ თით, ნამდა ოგურუანა, მუჭო შეასრულან მეჩამილ დავალება დო მაჟია თით, ნამდა აცალენა საქმეშ კეთებას, მუშენდა ჯერა, ჯგირო გაკეთენა. ართ ჯიმა, მეთიუ, ნამდგაქ ბრელ ხან ვა რე უხუცესო დენიშნჷ, მანგარ მარდულ აფჷ გამოცდილ უხუცესეფს, მით დიო ჯგირო ოგურუანდეს საქმეს დო უკულ მიაშქვანდეს თიშ ოკეთებშა. თინა იჩიებ: „ჩქიმო მანგარ ჯგირქ იჸუ, ნამდა, მუჟამსით შეცდომეფ მიღუდ, ჯიმალეფს გურ ვეუოლუდეს ჩქიმდა დო მოხვარუდეს, შეცდომეფშე დიბგურეკო, ნამდა უკულიანშო უჯგუშო გეგშამირთუკო საქმექ“.e

19. მუშ კეთება ოკო მაფუდან გინოჭყვიდილ?

¹⁹ გათელებაშ უკულ იესო 40 დღას რდჷ დედამიწას. თე დრო თიქ თიშო გიმირინუ, ნამდა გურშა ელუკინუკო, ქუდაგურუკო მოწაფეეფს დო მამზადუკო თინეფ. მორთ, გინოჭყვიდილ მაფუდან, ჩქი ხოლო მივაჸუნათ თიშ მაგალითის (1 პეტ. 2:21). იესო აუცილებერო ქიმმეხვარებუნა თეშ კეთებას, თიქ ხომ სიტყვა მუჩეს: „მა ირდღას თქვანწკუმა იპჸიქ თე ქვეყნიერებაშ ბოლოშახ!“ (მათ. 28:20).