მუსხით მნიშვნელოვან რე იეჰოვაშ სახელ იესოშო?

1, 2. ა) მუ აკეთ იესოქ ღურაშ წოხოლენ სერს? ბ) მუ კითხვეფს გუვარჩიენთ თე სტატიას?

ᲐᲮ. Წ. 33 წანაშ 14 ნისან რე, ცააშხა ონჯუა. იესოქ ამარდე ათუ გოშინაშ ონჯუაშ აღნიშნება მუშ ართგურ მოციქულეფწკუმა ართო. თის უჩქჷ, მუ მოხვადუ მალას – იუდა გეგმოჩანს, უკულ ბრალს ქიგედვანა, ოჭოფუნა, ძელს ქიმკაჭკადანა დო დოჸვილუნა. ათეშენ ოსერშეშ უკულ თინა მოწაფეეფს გურშა ელუკინანს დო, ონდო თინეფწკუმა ართო იშას, მანგარ მნიშვნელოვან ლოცვას იჩიებ. თე ლოცვა მოციქულ იოანექ მუშ სახარებას ინაჭარ დო თის მა-17 დუდის შეფხვადუთ.

² თე სტატიას პასუხის ქიმეფჩანთ ჟირ კითხვას: პირველ, მუჭო იძირე იესოშ ლოცვაშე, მუ რდჷ თიშ ოფიქრებელ ღურაშახ? დო მაჟია, მუჭო იძირე თე ლოცვაშე, მუ რდჷ ირფელშე უმოს მნიშვნელოვან იესოშო დედამიწას მსახურებაშ დროს?

„ᲛᲐ ᲡᲥᲐᲜ ᲡᲐᲮᲔᲚ ᲒᲐᲣᲪᲮᲐᲓ ᲗᲘᲜᲔᲤᲡ“

3. მუ თქუ იესოქ იეჰოვაშ სახელიშ გურშენ დო მუს გულისხმენდჷ თინა? (იოან. 17:6, 26).

³ ლოცვას იესოქ იეჰოვას უწუ: „მა სქან სახელ გაუცხად თინეფს“. თე ლოცვაშ დროს თიქ ჟირშა უწუ იეჰოვას, ნამდა თიშ სახელ გაუცხად მუშ მოწაფეეფს (წეკითხით იოანეშ 17:6, 26). მუს გულისხმენდჷ იესო? თისო, ნამდა თე ხალხის თინა გაგებაფუ, ღორონთიშ სახელ იეჰოვა რენია? ვარ, იესოშ მოწაფეეფ ებრაელეფ რდესჷ დო თეშით ხოლო უჩქუდეს ღორონთის იეჰოვა ჯოხოდუნ, მუშენდა ებრაულ წერილეფს ღორონთიშ სახელ 7 000-შე უმოსშა რე მოშინაფილ. თაშ ნამდა, მუჟამსით იესოქ თქუ, სქან სახელ გაუცხადია თინეფს, გულისხმენდჷ, ნამდა თიქ ხალხის დაგურუ, მუნერ ღორონთ რე იეჰოვა. იესოქ მუშ მიმაჸუნალეფს უჯგუშო გაჩინებაფუ იეჰოვა – ქუგაგებაფუ, მუ რე თიშ განზრახვა, მუ აფჷ ნაკეთებ, მუს გაკეთენს დო მუნერ თვისებეფ უღჷ. იესოშ უჯგუშო თენა მითინს ვაკეთებედ, მუშენდა თინა იჩინენს იეჰოვასინ თეშ მითინ ვეჩინენს.

4, 5. ა) მუჭო შილებე მიდგაინიშ სახელქ უმოს მნიშვნელოვანო გინირთას ჩქინო? ქიმიჸუნით მაგალით. ბ) მუჭო გეჩინებაფუეს იესოშ მიმაჸუნალეფქ უჯგუშო იეჰოვა?

⁴ ქიმიპჸუნათ თეცალ მაგალით: წერმიდგინით, ნამდა თქვან კრებაშ უხუცეს, სიტყვაშა დავით, ნამდგას ბრელ ხან რე იჩინენთ, პროფესიათ ქირურგ რე. ართ დღას მანგარ გლახათ გინმირთუთ დო სასწრაფოთ ექიმიშ მოხვარა გოსაჭირუნა, მუდროსით მეურთ თი საავადმყოფოშა, სოდეთ თე ჯიმა მუშენს. თინა თქვან მახვარებელო ირფელს ორთჷ დო ღურას გინგოსქილიდუანა. თეშ უკულ თე ჯიმა ხოლო უმოსო გეჸოროფებუნა დო თინა თქვანო უბრალოთ ართ-ართ უხუცეს ვარინ, თქვან გინმასქილიდაფარ რე.

⁵ თეშნერო, იესოშ მიმაჸუნალეფს ხოლო უჩქუდეს ღორონთიშ სახელ, მარა თიშ უკულ, მუთ იესოქ მუშ მსახურებათ თინეფს იეჰოვაშ უჯგუშო გაჩინებაფას მეხვარ, თე სახელქ უმოს მნიშვნელოვანო გინირთჷ თე ადამიანეფშო. მუშენ იფჩიებუთ თეს? მუშენდა, მუდგას იესო იჩიებუდ დო ორთუდ, ირფელს მუამუშიშ მაგალითის მეჸუნდჷ. თაშ ნამდა, მუჟამსით იესოშ მიმაჸუნალეფ ირჩქილედეს თიშ ქადაგებას დო ოკვირუდეს, მუჭო ოქცუდ თინა ადამიანეფს, უჯგუშო „იჩინებაფუანდეს“ იეჰოვას (იოან. 14:9; 17:3).

„ᲡᲥᲐᲜ ᲡᲐᲮᲔᲚ, . . ᲜᲐᲛᲣᲗ ᲛᲐ ᲛᲣᲩᲷ“

6. მუ გაგებათ მეჩჷ იეჰოვაქ იესოს მუშ სახელ? (იოან. 17:11, 12).

⁶ მუშ მოწაფეეფიშ გურშენ იესოქ იეჰოვას ლოცვას უწუ: „დოთხილე თინეფ სქან სახელიშ გურშენ, ნამუთ მა მუჩჷ“ (წეკითხით იოანეშ 17:11, 12). ნიშნენდუო იესოშ თე სიტყვეფ, ნამდა თის იეჰოვაშ სახელ გიადვალუდ? ვარ. ქიდეკვირით, მუჟამსით თიქ იეჰოვას დურაგადუ, უწუ, „სქან სახელია“. თაშ ნამდა, იესოს პირდაპირ გაგებათ ვეგედვალუ იეჰოვაშ სახელ. იმწკუმა მუს ნიშნენდჷ იესოშ სიტყვეფ? თინა იეჰოვაშ წარმომადგენელ რდჷ დო თიშ გურშენ ეჩიებუდ ხალხის. თიქ დედამიწაშა მუამუშიშ სახელით მორთჷ დო თიშ სახელით ორთუდ სასწაულეფს (იოან. 5:43; 10:25). თეწკუმა ართო, იესოშ სახელ ნიშნენს „იეჰოვა რე რსხება“. თაშ ნამდა, იესოშ სახელ დაკავშირებულ რდჷ იეჰოვაშ სახელწკუმა.

7. მუშენ შეულებუდ იესოს, იეჰოვაშ სახელით იჩუკო? ქიმიჸუნით მაგალით.

⁷ ქიმიპჸუნათ ელჩიშ მაგალით. რახანს თინა პრეზიდენტიშ წარმომადგენელ რე, შეულებ თიშ სახელით იჩუას. ათეშენ თიშ სიტყვეფს თიცალ ძალა უღჷ, მუნერით პრეზიდენტიშ სიტყვეფს აღვენუდ. თეშნერო, იესო ხოლო იეჰოვაშ წარმომადგენელ რდჷ დედამიწას დო ხალხის თიშ სახელით ეჩიებუდ (მათ. 21:9; ლუკ. 13:35).

8. სოვრეშე იძირე, ნამდა იესო დედამიწაშა მოულაშახ ხოლო რდჷ იეჰოვაშ წარმომადგენელ? (გამ. 23:20, 21).

⁸ ბიბლია იესოს მიშინუანს, მუჭოთ სიტყვას, მუშენდა იეჰოვა თის ირინუანდჷ ანგელოზეფშა დო ადამიანეფშა მუშ ორაგადეშ გინაჩამალო (იოან. 1:1–3). შილებე იესო რდუკო თი ანგელოზ, მით იეჰოვაქ გოუტუ მუშ ხალხიშ მახვარებელო, მუჟამსით თინეფ უდაბნოს რდესჷ. იეჰოვაქ ისრაელეფს უწუ, დემორჩილესკო თე ანგელოზის დო გეუძინ: „მუშენდა თინა ჩქიმ სახელით მოქმედენს“a (წეკითხით გამოსვლაშ 23:20, 21). თე სიტყვეფით იეჰოვაქ თინა თქუ, ნამდა იესო ირიათო თიშ სახელით იჩიებ დო თინა რე მთავარ პიროვნება, მით ამტკიცენს, ნამდა ღორონთ ირიათო სამართლიანო იქციებ დო წმინდა რე.

„ᲛᲣᲛᲐ, ᲒᲐᲜᲐᲓᲘᲓ ᲡᲥᲐᲜ ᲡᲐᲮᲔᲚ“

9. სოვრეშე იძირე, ნამდა იესოშო მანგარ მნიშვნელოვან რდჷ იეჰოვაშ სახელ?

⁹ მუჭოთ ბძირით, იესოშო, დედამიწაშა მოულაშახ ხოლო, მანგარ მნიშვნელოვან რდჷ იეჰოვაშ სახელ. მუშო ოკო რაგად, დედამიწას ცხოვრებაშ დროს ხოლო ირფელით, მუდგას ქიჩიებუდ დო ქართუდ, ოძირანდჷ თეს. დედამიწას მსახურებაშ ბოლოს თიქ იეჰოვას თხუ: „მუმა, განადიდ სქან სახელ“. იეჰოვაქ ხეთეშე ზეცაშე ხონარმაღალო უპასუხ თის: „განვადიდ დო ხოლო განვადიდენქ“ (იოან. 12:28).

10, 11. ა) მუჭო განადიდ იესოქ იეჰოვაშ სახელ? (ქოძირით სურათ). ბ) მუშენ ოსაჭირ იეჰოვაშ სახელს განწმენდა?

¹⁰ იესოქ ხოლო განადიდ მუამუშიშ სახელ. მუჭო? ართ თით, ნამდა ხალხის გაგებაფუ ღორონთიშ დიდებულ თვისებეფიშ დო საქმეეფიშ გურშენ. მარა იეჰოვაშ სახელიშ განდიდებელო ხოლო უმოსიშ კეთება რდჷ საჭირო. იესოქ ოკო განწმინდუკო იეჰოვაშ სახელ დო დამტკიცუკო, ნამდა თინა სამართლიან ღორონთ რე. იესოშო მუამუშიშ სახელიშ განწმენდა მუსხით მნიშვნელოვან რდუნ თენა თიმწკუმა ხოლო ქაძირუ, მუჟამსით მუშ მოწაფეეფს ლოცვა დაგურუ. თიქ თაშ ილოც: „ჩქინ ზეციერ მუმა, წმინდა რდასჷ სქან სახელ“ (მათ. 6:9).

¹¹ მუშენ ოსაჭირ იეჰოვაშ სახელს განწმენდა? მუშენდა ედემიშ ბაღის სატანაქ ტყურეფ ეკაწამ ღორონთის. თიქ თქუ, ნამდა იეჰოვა მეტყურე რდჷ დო მუდგარენ ჯგირს უფულუნდჷ ადამ დო ევას (დაბ. 3:1–5). თეშნერო, ეშმაკიქ იეჰოვას თინა ხოლო ქეკაწამ, ნამდა სამართლიან ღორონთ ვა რდჷ. სატანაშ თე ტყურეფქ იეჰოვას სახელ გუტახ. წანეფიშ უკულ, იობიშ დროს, ეშმაკიქ თინა ხოლო ქოთქუ, ნამდა ადამიანეფ იეჰოვას ხვალე მანგიორიშ მიოღებელო ომსახურუნა. თიშ ნარაგადით, მითინს ვა უჸორს იეჰოვა თიშმანწარას, ნამდა სირთულეეფიშ დროს ხოლო ვემიოტუას თიშ მსახურება დო თიშ ართგურქ ქუდოსქიდას (იობ. 1:9–11; 2:4). დრო რდჷ საჭირო თიშ დამტკიცებელო, მი რდჷ სინამდვილეს მეტყურე – იეჰოვა დოვარ სატანა.

„ᲓᲣᲓᲘᲡ ᲑᲓᲕᲐᲜᲥᲷ ᲝᲦᲣᲠᲐᲚᲝ“

12. მუშ ოკეთებელო რდჷ მზათ იესო?

¹² იესოს თიშმანწარას უჸორდჷ იეჰოვა, ნამდა ოკოდ, თიშ სახელიშ განწმინდებელო, მუთ შეულებუდუნ ირფელ გაკეთუკო. თიქ თქუ: „დუდის ბდვანქჷ ოღურალო“ (იოან. 10:17, 18). თინა მზათ რდჷ, მუამუშიშ სახელიშ განწმენდაშო დოღურუკო.b პირველ სრულყოფილ ადამიანეფქ, ადამ დო ევაქ, ოჭიშ ქურთინუეს მუნეფიშ გუმაჭყაფალს დო სატანაშ მხარე ქიდეკინეს. მარა, თინეფიშ გინაწონს, იესო მზათ რდჷ, დედამიწაშა ქუმორთუკო დო მუშ ჸოროფა ქაძირუკო ზეციერ მუმას. იესოქ ქოთ გაკეთ თენა. თიქ მუშ სიტყვეფით დო საქმეეფით ქაძირუ, ნამდა ომორჩილუდ იეჰოვას (ებრ. 4:15; 5:7–10). თიქ წამებაშ ძელს ღურაშახ ართგურქ ქუდოსქიდ (ებრ. 12:2). თეშნერო დამტკიც, ნამდა უჸორდჷ იეჰოვა დო თიშ სახელ.

13. მუშენ შემლებუნა ფთქუათ, ნამდა არძაშ უჯგუშო იესოს შეულებუდ დამტკიცუკო სატანა მეტყურე რდუნ? (ქოძირით სურათ).

¹³ იესოქ მუშ ცხოვრებათ დამტკიც, ნამდა მეტყურე იეჰოვა ვარინ, სატანა რე (იოან. 8:44). იესოშ უჯგუშო იეჰოვას მითინ ვეჩინენს. სატანაშ ეკოწამებულ ტყურეფს სიმართლეშ მირცხალ ვარა ქოჸოფედუკონ, იესოს თენა აუცილებერო არჩქვენუდ. მარა თის უჩქუდ, ნამდა სატანაშ ნარაგად სარხოს ხოლო ვა რდჷ სიმართლეწკუმა, ათეშენ მტკიცას იცვენდჷ მუამუშიშ სახელს დო დუდის ვა ზოგენდჷ თიშ განწმენდაშო. თიმწკუმა ხოლო, მუჟამსით თეშ იძირედ, ითამ იეჰოვაქ მიოტუ თინა, იესო იშენით მზათ რდჷ, დოღურუკო მუამუშშო დო ართ წუთით ხოლო ვა უფიქრებ, ნამდა ოჭიშ ქურთინუკო თის (მათ. 27:46).c

„ᲑᲝᲚᲝᲨᲐ ᲥᲘᲛᲘᲞᲸᲣᲜ ᲗᲘ ᲡᲐᲥᲛᲔ, ᲜᲐᲛᲓᲒᲐᲨ ᲙᲔᲗᲔᲑᲐ ᲡᲘ ᲓᲣᲛᲐᲕᲐᲚ“

14. მუჭო აკურთხჷ იესო იეჰოვაქ ართგურობაშენ?

¹⁴ ღურაშ წოხოლენ სერს რაგადებულ ლოცვას იესოს სინამდვილეს უღუდ თიშ ოჭიშ, ნამდა იეჰოვას უწუკო: „ბოლოშა ქიმიპჸუნ თი საქმე, ნამდგაშ კეთება სი დუმავალ“. იესოს ჯერდჷ, ნამდა იეჰოვა აუცილებერო აკურთხენდ ართგურობაშენ (იოან. 17:4, 5). თის ტყურელო ვა უღუდ მუამუშიშ ნდობა. იეჰოვას ღურაშ უკულ ხოლო ვემუტებ თინა, გათელ დო „უმოს მაღალ ადგილ უძღვინ ზეცას“ (საქ. 2:23, 24; ფილ. 2:8, 9). საბოლათ, იესოქ მეფობა ქიდიჭყჷ ღორონთიშ სამეფოს. მუს გაკეთენს თე სამეფო? თეშ პასუხის მოწაფეეფშა მეჩამილ ლოცვაშ ნიმუშშე ბგებულენთ. თექ იესო იეჰოვას ურაგად: „ქუმორთას სქან სამეფოქ, შისრულას სქან ნებაქ, მუჭოთ ცას რენ თეშ დედამიწას“ (მათ. 6:10).

15. ხოლო მუს გაკეთენს იესო?

¹⁵ მალას იესო ღორონთიშ ნტერეფიშ წინააღმდეგ გეგშურს დო უბადოეფს არმაგედონიშ ომს განადგურენს (გამოცხ. 16:14, 16; 19:11–16). თეშ უკულ თინა სატანას „წკვარამს“ ქინაჸათანს, სოდეთ მუთუნიშ კეთება ვეშიალებე (გამოცხ. 20:1–3). მუშ ანთასწანიან მეფობაშ დროს იესო მშვიდობას დურთინუანს მთელ კაცობრიობას დო ადამიანეფს გასრულყოფილენს. თინა გათელენს ღურელეფს დო მთელ დედამიწას სამოთხეთ გინართინუანს. თეშნერო შისრულებ იეჰოვაშ განზრახვა (გამოცხ. 21:1–4).

16. მუნერ ცხოვრება იჸუაფ იესოშ ანთასწანიან მმართველობაშ ბოლოს?

¹⁶ მუნერ ცხოვრება იჸუაფ იესოშ ანთასწანიან მმართველობაშ ბოლოს? მთელ კაცობრიობა საბოლათ გეთავისფალებ ცოდა დო ღურაშ მონობაშე. ადამიანეფს მეტო ვედესაჭირებუნა მუნეფიშ ცოდეფიშ გურშენ პატიებაშ თხუალა იეჰოვაშა. თინეფშო ვართ 144 000-იშ დო ვართ იესოშ აშმაჸვენჯობა იჸუაფ საჭირო იეჰოვაწკუმა ურთიერთობაშო. თეწკუმა ართო, მთელ კაცობრიობაშ „ბოლო ნტერ“, ადამიშ მოღალირ ღურა, მისპუ. ღურელეფ გეთელებუნა დო დედამიწას მახორუ არძა ადამიან სრულყოფილ იჸუაფ (1 კორ. 15:25, 26).

17, 18. ა) მუ მოხვადუ ქრისტეშ ანთასწანიან მეფობაშ ბოლოს? ბ) მუს გაკეთენს იესო მუშ მმართველობაშ ბოლოს? (1 კორ. 15:24, 28; ქოძირით სურათ).

¹⁷ ქრისტეშ ანთასწანიან მეფობაშ ბოლოს ხოლო ართ მნიშვნელოვან მუდგარენ მოხვადუ. იეჰოვაშ სახელ საბოლათ განწმენდილ იჸუაფ დო არძა დერწმუნებ, ნამდა თინა სამართლიან ღორონთ რე. მუჭოთ მიჩქუნა, ედემიშ ბაღის სატანაქ იეჰოვას ეკაწამ, ნამდა მეტყურე რდჷ დო ვა უჸორდჷ ადამიანეფ. თევრეშე მოჸუნაფილ, ღორონთიშ ართგურ მსახურეფ იეჰოვაშ სახელიშ განწმენდას ღებულენა მონაწილებას. თაშ ნამდა, ანთასწანიან მმართველობაშ ბოლოს იეჰოვაშ სახელ სრულას განწმენდილ იჸუაფ. იეჰოვა დამტკიცენს, ნამდა თინა მოჸოროფე ზეციერ მუმა რე.

¹⁸ საბოლათ დემტკიცებ, ნამდა ირფელ, მუდგას სატანა იეჰოვაშ გურშენ იჩიებუდ, ტყურა რე. მუს გაკეთენს იესო მუშ მმართველობაშ ბოლოს? სატანა დო თიშ დემონეფცალო იეჰოვაშ წინააღმდეგ ურსო? ვარ, მუშო ოკო რაგად (წეკითხით 1 კორინთელეფიშ 15:24, 28). თინა თანდაბლურო დურთინუანს სამეფოს მუამუშის. თაშ რე, სატანაშ გინაწონს, იესო მზათ რე, მთელ ძალაუფლება იეჰოვას გეგნოჩას, მუშენდა უჸორს თინა.

19. მუსხით მნიშვნელოვან რე იესოშო იეჰოვაშ სახელ?

¹⁹ გასაკვირ ვა რე, მუშენ რდჷ იეჰოვა მზათ, მუშ სახელ ქიმეჩუკო იესოს. მუჭოთ იეჰოვაშ წარმომადგენელქ, იესოქ, ირფელ კილ-კილშა სრულყოფილო შეასრულ. თაშ ნამდა, იესოშო მუშ ზეციერ მუმაშ სახელ ირფელშე უმოს მნიშვნელოვან რე. თინა მზათ რდჷ, იეჰოვაშ სახელიშ გურშენ დოღურუკო დო თიშო ხოლო მზათ რე, ნამდა ანთასწანიან მმართველობაშ ბოლოს ძალაუფლება იეჰოვას დურთინუას. მუჭო შემლებუნა მივაჸუნათ იესოშ მაგალითის? უკულიან სტატიას თე კითხვაშ პასუხის გუვარჩიენთ.