მუს ბგურაფლენთ ღურაშ წოხოლე რაგადებულ იაკობიშ წინასწარმეტყველებაშე? (ნაწილ 2)

1. მუს გუვარჩიენთ თე სტატიას?

ᲘᲐᲙᲝᲑᲘᲨ ქომოლსქუალეფ ართო რენა აკოშაყარელ დო ყურადღებათ ურჩქილენა ხანშამიშულირ მუმას. მუჭოთ წოხოლენ სტატიას ბძირით, იაკობიქ რეუბენს, სიმონს, ლევის დო იუდას თიცალ მუდგარენეფ უწუ, მუდგაშ მორჩქილაფას ალბათ ველუდეს დო ოინტერესუდესკონ იჸიდ, მუს უწინდ თინა დანარჩენ ბრუო სქუას. მორთ გუვარჩუათ, მუშ გურაფა შემლებუნა იაკობიშ სიტყვეფშე, ნამუთ ზებულონს, ისაქარს, დანის, გადის, აშერს, ნაფთალის, იოსების დო ბენიამინს უწუ.a

ᲖᲔᲑᲣᲚᲝᲜᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

2. მუ უწუ იაკობიქ ზებულონს დო მუჭო ეურთჷ თე სიტყვეფქ? (დაბ. 49:13; ქოძირით ჩარჩო).

² წეკითხით დაბადებაშ 49:13. იაკობიქ ზებულონს უწუ, ნამდა თიშ გამნარყ ზღვაპიჯის იცხოვრენდ, დუნაპირებ დიხაშ ჩრდილოეთით. სოდგარენ 200 წანაშ უკულ ზებულონიშ ტომქ მიღჷ დახორინალ დიხა, ნამუთ გალილეაშ დო ხმელთაშუა ზღვაშ შქას რდჷ. მართალ რე, თინეფ გვალო ზღვაპიჯის ვალახორანდეს, მარა იშენით უღუდეს ხიოლიშ მიზეზ, მუშენდა ხოლოს რდესჷ ზღვეფწკუმა დო თავისფალო შეულებუდეს ართ ზღვაპიჯშე მაჟიაშა გეგნორთესკო დო ივაჭრესკო შხვადოშხვა ადგილს. ალბათ ათეშენ თქუ მოსექ ზებულონიშ გურშენ: „ზებულონ, ხიოლ გიძირუდას ირ გიმულას!“ (კან. 33:18).

3. მუ მიმეხვარებუნა, ბედნერ ვორდათ თით, მუთ მიღუნა?

³ მუს ბგურაფლენთ? ვა უღჷ მნიშვნელობა, სო ფცხოვრენთ დო მუნერ მდგომარეობას ვორეთ, ხიოლიშ მიზეზ ირიათო მიღუნა. მუთ მიღუნან თის ქიგებჯერდუთ-და, დღას ვა ვოდინუანთ ხიოლს (ფსალმ. 16:6; 24:5). მინშა შილებე გვალო ადვილო გეგნიბღათ ყურადღება თიშა, მუთ ვა მიღუნა, დო ეშობას გეგშმოსქიდან თი ირფელქ, მუდგას ბედნერობა მოუღ ჩქინდა. ათეშენ, ირნერო ქეცადით, მუდგაინ ჯგირ დოგორათ თი სიტუაციას, ნამდგას ასე რეთჷ (გალ. 6:4).

ᲘᲡᲐᲥᲐᲠᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

4. მუ უწუ იაკობიქ ისაქარს დო მუჭო შისრულ თიშ სიტყვეფქ? (დაბ. 49:14, 15; ქოძირით ჩარჩო).

⁴ წეკითხით დაბადებაშ 49:14, 15. იაკობიქ ქაცქუ ისაქარს თიშ გურშენ, ნამდა ბრელს ხანდენდჷ, დო შეადარ მანგარ ძვალამ ვირს, ნამდგას მონკა ოღალიშ ღალა შეულებ. თიქ თინა ხოლო უწუ, ნამდა ოცხოვრებელო ჯგირ დიხას მიღენდჷ. იაკობიშ სიტყვეფქ შისრულ დო ისაქარიშ ტომქ მალწყარ იორდანეწკუმა ჸოფიერ დიხა მიღჷ (იეს. 19:22). მუშო ოკო რაგად, თინეფ ქიანაშის ხანდენდეს დო ულუანდეს მუნეფიშ დიხას, მარა ვართ შხვეფიშ მახვარებელო ზოგენდეს დუდის (1 მეფ. 4:7, 17). მაგალთო ართშა, მუჟამსით მსაჯულ ბარაკიქ დო წინასწარმეტყველ დებორაქ ისრაელეფს სისერაწკუმა ბრძოლას მოხვარა თხუეს, ისაქარიშ ტომ რდჷ ართ-ართ, მიდგაქ თინეფს მეხვარ. ხვალე თე შემთხვევას ვარინ, თინეფ შხვა დროს ხოლო ირიათო მზათ რდესჷ ობრძოლებერო (მსაჯ. 5:15).

5. მუშენ ოკო ვეცადათ, ნამდა ბრელ იფხანდათ?

⁵ მუს ბგურაფლენთ? იეჰოვა მუჭოთ ისაქარიშ ტომიშ ხანდას აფასენდჷ, თეშ ვემკაკორდუ დო მანგარო აფასენს თი ირფელს, მუდგას თიშ მსახურებაშო ვორთუთ (ეკლ. 2:24). მაგალთო, დეფიფქრათ უხუცესეფშე, მით ბრელს ხანდენა კრებაშო (1 ტიმ. 3:1). მართალ რე, თინეფს პირდაპირ გაგებათ ბრძოლა ვა უხვადუნა, მარა, ღორონთიშ ხალხ სულიერ ზიანშე დოფთხილუანინ თიშენ, დუდ აფუნა გინოდვალირ (1 კორ. 5:1, 5; იუდ. 17–23). თეწკუმა ართო, ქიანაშის ხანდენა, ნამდა მამზადან დო გაკეთან გურიშემაკინალ მოხსენებეფ, ნამუთ გამანგარენს და დო ჯიმალეფს (1 ტიმ. 5:17).

ᲓᲐᲜᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

6. მუ მნიშვნელოვან დავალება მიღჷ დანიშ ტომქ? (დაბ. 49:17, 18; ქოძირით ჩარჩო).

⁶ წეკითხით დაბადებაშ 49:17, 18. იაკობ დანს ადარენს გვერს, ნამუთ მუშე ბრელით უმოს დიდ ცხოველს, ცხენს, გიანთხუ დო გითარაგუანს თის გიმახენ თი კოჩის. იაკობიშ სიტყვეფქ ქოთ შისრულ. დანიშ ტომ გაბედულო გიანთხუდ დუდის ისრაელიშ ნტერეფს. მუჟამსით ისრაელ ერ დუნაპირებ დიხაჸურე მიშჷ, დანიშ ტომ უკახალე ეკოჸუნდჷ „მთელ ბანაკის [დო] უმანგარენდჷ ოჭიშის“ (რიცხ. 10:25). მართალ რე, მთელ ისრაელ ვარწყედ, მუშმადიდა საქმეს ორთუდეს დანიშტომელეფ, მარა თინეფ მანგარ მნიშვნელოვან დავალებას ასრულენდეს.

7. მუ ოკო ფშუდან ნებისმიერ თეოკრატიულ დავალებაშ შესრულებაშ დროს?

⁷ მუს ბგურაფლენთ? შილებე თიცალ დავალება გიღუდან, ნამდა შხვეფ ვარწყედან თქვან კეთებულ საქმეს. მაგალთო, შილებე მონაწილენდათ დარბაზიშ დასუფთებაშ დო მიკოლუაფაშ ვარდა კონგრესეფწკუმა დაკავშირებულ საქმეეფს ვარდა ხოლო შხვა მუდგაინ საქმეს ორთუდათ. თაშ ქორენ-და, ოცქვაფალ რეთჷ თეშო! დღას ვაგგოჭყორდან, იეჰოვა ორწყე დო მანგარო აფასენს ირფელს, მუდგას თიშო ორთუთ. თეწკუმა ართო, თის განსაკუთრებულო ოხიოლ, მუჟამსით საქმეს თიშ გურშენ ორთუთ, ნამდა თქვან ჸოროფა ქაგინაფუათ დო ვართ ხოლო თიშ გურშენ, ნამდა შხვეფქ ქოძირან თქვან კეთებულ საქმე დო ქუგოცქუან (მათ. 6:1–4).

ᲒᲐᲓᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

8. მუშენ შეულებუდეს ნტერეფს, ადვილო ქიგიანთხესკო გადიშ ტომს? (დაბ. 49:19; ქოძირით ჩარჩო).

⁸ წეკითხით დაბადებაშ 49:19. იაკობიქ იწინასწარმეტყველ, ნამდა გადის ყაჩაღეფ ქიგიანთხუდეს. სოდგარენ ჟირ საუკუნეშე უმოსიშ უკულ, გადიშ ტომქ გეჭოფ მალწყარ იორდანეშ აღმოსავლეთ ნაწილ, თი ტერიტორია, ნამუთ გვალო მოწინააღმდეგე ქიანეფიშ საზღვარს რდჷ. ათეშენ, რახანს თეცალ ადგილს უხვადუდეს ცხოვრება, ნტერეფს ადვილო შეულებუდეს ქიგიანთხესკო თინეფს. მარა გადიშ ტომს იშენით ოკოდ თე ადგილს იცხოვრუკო, მუშენდა თექ ბრელ მინდორია რდჷ საქონელშო (რიცხ. 32:1, 5). ირწყებე, ნამდა თე ხალხ მართალო მანგარ გაბედულ რდჷ. თეს გეძინელ, თინეფ ონდუდეს იეჰოვას, ნამდა თინა ქიმეხვარებუდ, ყაჩაღეფშე დოთხილუესკო ღორონთშე მეღებულ მუნეფიშ დიხა. ხვალე თენა ვარინ, თინეფ მანგარ შორშა ოჯღონანდეს მუნეფიშ სამხედრო ძალეფს წანეფიშ დინახალე, ნამდა ქიმეხვარესკო შხვა ტომეფს ხოლო თი დიხეფიშ ეჭოფუას, ნამუთ მალწყარ იორდანეშ დასავლეთით რდჷ (რიცხ. 32:16–19). თინეფს იეჰოვაშ იმენდ უღუდეს, ნამდა თინა დოთხილანდჷ მუნეფიშ ჩილ დო სქუას, ონდო ქომოლკათა ულირ იჸუაფუდ. იეჰოვა ქოთ ვარკენდჷ თინეფს კურთხევეფს მუნეფიშ გაბედულებაშ დო დუდგინოდვალირობაშ გურშენ (იეს. 22:1–4).

9. მუჭო მიფქციებუთ, იეჰოვას ქუვონდუთ-და?

⁹ მუს ბგურაფლენთ? სირთულეეფიშ დროს იეჰოვაშ მსახურებაქ ქეშმალებუანინ, ოკო ვონდუდათ თის (ფსალმ. 37:3). ბრელ იეჰოვაშა მენდებას თით ოძირანს, ნამდა მსხვერპლშა მეურს დო მონაწილენს თეოკრატიულ სამშენებლო პროექტეფს, მსახურენს თექ, სოდეთ მანგარ საჭიროება რე, ვარდა ხოლო შხვა დავალებეფს ასრულენს. თინეფ თაშ თიშენ იქციებუნა, ნამდა ჯერა, იეჰოვა ირო იზრუნენს თინეფშე (ფსალმ. 23:1).

ᲐᲨᲔᲠᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

10. მუ შეცდომეფ დაუშვჷ აშერიშ ტომქ? (დაბ. 49:20; ქოძირით ჩარჩო).

¹⁰ წეკითხით დაბადებაშ 49:20. იაკობიქ იწინასწარმეტყველ, ნამდა აშერიშ ტომ ქონებიერ იჸუაფუდ დო თიშ სიტყვეფქ ზუსტას შისრულ. აშერიშ ტომს მთელ ისრაელს ართ-ართ არძაშ უმოს ჸოფიერ დიხა უღუდ (კან. 33:24). თინეფ ხმელთაშუა ზღვაშ ხოლოს ოხორანდეს დო თინეფიშ დიხაშა მიშეშ სიდონიშ პორტ, სოდეთ ფინიკიელეფ ვაჭრენდეს. მარა აშერიშ ტომქ თის ჩირთჷ ნამდა, ქანაანელეფ ვეგნურაჸ მუშ დიხაშე (მსაჯ. 1:31, 32). მუჭოთ იძირენ, ქონებაქ დო ქანაანელეფიშ გლახა გავლენაქ ეცილ თე ტომს, დუდგინოდვალირო იხანდუკო იეჰოვაშ ნებაშ შესრულებაშო. ხოლო ართ გლახა, მუთ თე ხალხიქ ქიმინ, თინა რდჷ, ნამდა, მუჟამსით მსაჯულ ბარაკიქ ისრაელეფს ქანაანელეფიშ წინააღმდეგ ობრძოლებერო მოხვარა თხუ, თინეფქ ვემეხვარეს. შედეგო თე ტომს ვეშიალებუ, ქოძირუკო, მუ სასწაულო მეხვარ იეჰოვაქ მუშ ხალხის „მეგიდოშ წყარეფწკუმა“ ნტერეფშა გერჯგინას (მსაჯ. 5:19–21). ალბათ აშერს ონჯღორე დაგურედ, მუჟამსით ბარაკ დო დებორაშ გამარჯვებაშ ობირეშის ქიმირჩქილუანდ: „უსაქმურო ქელუხუნ აშერს ზღვაპიჯის“ (მსაჯ. 5:17).

11. მუშენ ოკო ვეგემირდან ცხოვრებას პირველ ადგილს ფარა?

¹¹ მუს ბგურაფლენთ? მოკონა, მუთ შემლებუნა ირფელს ვორთუდათ იეჰოვაშ მსახურებას დო ვა ვაგურათ თე ქვეყნიერებას მახორუ ხალხის, მიდგას ფარა დო ქონება პირველ ადგილს გეურე (იგავ. 18:11). მუშო ოკო რაგად, ფარა საჭირო რე, მარა არძაშ უმოს მთავარ იეჰოვაშ მსახურება რე (ეკლ. 7:12; ებრ. 13:5). ათეშენ ვა მოკონა, ნამდა ჩქინ დრო დო ენერგია თიცალ მუდგარენეფიშ შიბას ვარდა შაყარუას ქიმკვალუათ, მუთ სინამდვილეს ვა მოსაჭირუნა დო გენკმოჸოთანა იეჰოვაშ მსახურებას. თეშ მანგიორო, ვოცადუთ, მუთ შემლებუნან ირფელ გუვაკეთათ იეჰოვაშო, მუშენდა ბჯერა, ნამდა გემუან დო უსაფრთხო ცხოვრებას, სინამდვილეს იეჰოვა მიმზადენა მომავალს (ფსალმ. 4:8).

ᲜᲐᲤᲗᲐᲚᲘᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

12. საეგებიოთ, მუჭო შისრულ ნაფთალიწკუმა დაკავშირებულ წინასწარმეტყველებაქ? (დაბ. 49:21; ქოძირით ჩარჩო).

¹² წეკითხით დაბადებაშ 49:21. იაკობიქ ნაფთალიშე იწინასწარმეტყველ, ნამდა თინა „სქვამ სიტყვეფით“ რაგადანდუკონ იჸიდ. შილებე თე სიტყვეფქ იესოშე შისრულუკო, ნამუთ მანგარ ჯგირ მორაგადე დო მასწავლებერ რდჷ (იოან. 7:46). ქო მარა, მუ კავშირ უღუდ იესოს ნაფთალიწკუმა? იესო ქიანაშ ხანს ცხოვრენდჷ კაპერნაუმს, ნამუთ ნაფთალიშ ტომიშ ტერიტორიას რდჷ, ათეშენ ბიბლია იესოშ კაპერნაუმშა ინულაშ გურშენ იჩიებ, „მუშ ქალაქშა“ მერთუა (მათ. 4:13; 9:1). თეს გეძინელ, ესაიაქ იწინასწარმეტყველ, ნამდა ზებულონიშ დო ნაფთალიშ ტომეფ „დიდ სინთეს“ ქოძირუნდეს (ეს. 9:1, 2). მუშ გურაფეფით იესო მართალო რდჷ ნამდვილ სინთე, „ნამუთ არძანერ ადამიანს უსინთანს“ (იოან. 1:9).

13. მუ შემთხვევას იჸუაფ ჩქინ ჩიება სასიამოვნო იეჰოვაშო?

¹³ მუს ბგურაფლენთ? იეჰოვაშო მანგარ მნიშვნელოვან რე მუს დო მუჭო იფჩიებუთ. ჩქი მუჭო შემლებუნა იფჩუათ „სქვამ სიტყვეფით“, ნამუთ იეჰოვას გურს გუხარენს? მაგალთო, ართ-ართ მხარე თინა რე, ნამდა ირო სიმართლე იფჩუათ (ფსალმ. 15:1, 2). თეწკუმა ართო, ჩქინ ჩიება ირო გურიშ ემაკინალ ოკო რდასჷ. თეშა მიშურს, ნამდა ხშირას ქუვოცქუათ ართიანს, ვა ვორდათ კრიტიკულეფ დო ირო უკმაყოფილება ვეგმოფხანტათ (ეფეს. 4:29). თეს გეძინელ, ჯგირ იჸუაფ თინა ხოლო მიღუდან მიზანო, ნამდა მსახურებაშ დროს გებუჯგუშათ ჩიებაშ წუმოჭყაფას, მუთ ადამიანეფწკუმა ჯგირო ქადაგებაშ საშვალებას ქომუჩანა.

ᲘᲝᲡᲔᲑᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

14. გენწყით, მუჭო შისრულ იოსებშა რაგადებულ სიტყვეფქ (დაბ. 49:22, 26; ქოძირით ჩარჩო).

¹⁴ წეკითხით დაბადებაშ 49:22, 26. იაკობის მანგარო ოამაჸუდუკონ იჸიდ იოსებ. იეჰოვაშ ნებათ თინა გიშაგორილ იჸუაფუდ მუშ ჯიმალეფ შქას. მუამუშიქ თინა მიშინუ, მუჭოთ „ჸოფიერ ჯაშ ელნაფალა“. ჯა იაკობ რდჷ, თიშ ქომოლსქუა იოსებ თე ჯაშ ნოჸელაცალ რდჷ. მართალ რე, იაკობიშ პირველ ქომოლსქუა რეუბენ რდჷ, ნამუთ ლეაშე ჸუნდჷ, მარა იაკობიქ თქუ, ნამდა შხვა ქომოლსქუალეფიშ კარს, ჟირშე უმოს წილს, რეუბენიშ მანგიორო, იოსებ მიღენდჷ, ნამუთ მუშ საჸოროფო ოსურშე, რახელშე, პირველ ქომოლსქუა რდჷ (დაბ. 48:5, 6; 1 მატ. 5:1, 2). თე წინასწარმეტყველებაქ თიმწკუმა შისრულ, მუჟამსით იოსებიშ ქომოლსქუალეფშე, ეფრემშე დო მენაშეშე, ჟირ ტომქ გეგშართჷ დო ჟირხოლოქ ცალ-ცალკე მიღჷ წილ (დაბ. 49:25; იეს. 14:4).

15. მუ აკეთ იოსებიქ, მუჟამსით უსამართლოთ მექცუეს?

¹⁵ იაკობიქ თინა ხოლო თქუ, ნამდა „მშვილდოსანეფ თხოზუდეს, ოჸოთანდეს დო ონტერუდეს“ იოსების (დაბ. 49:23). თექ იოსებიშ ჯიმალეფიშ გიშასწორებაშახ მოხვად, მუშენდა თინეფს ონჯარუდეს იოსებიშ დო ბრელ უსამართლობა, ნამდგაქ იოსების შეხვად, ზუსტას მუშ ჯიმალეფიშ კისერს რდჷ. მარა თის ვა გოჯოგაფ თინეფ დო ვართ იეჰოვაშე მორთუმ გურ. მუჭოთ იაკობიქ თქუ, „[იოსებიშ] მშვილდ გამზადებულ რდჷ; თის ძალიერ დო მორძგვ ხელეფ უღუდ“ (დაბ. 49:24). იოსების შეულებუდ ნტერალაშ „ისარეფით“ ქუპასუხუკო მუშ ჯიმალეფს, მარა თეშ მანგიორო, თინეფშე ნტერალას, თაშ ქოფთქუათინ, ჸოროფაშ დო სიკეთეშ „ისარეფ ქაჸათ“ დო თეშნერო გიორჯგინ. თინა სირთულეეფიშ დროს იეჰოვაშა რდჷ მენდებულ დო მუშ ჯიმალეფს ხვალე ვაპატუნ, ჯგირ ხოლო გუკეთ (დაბ. 47:11, 12). იოსებიქ სირთულეეფ თიშო გიმირინუ, ნამდა უჯგუშ პიროვნებათ გინორთედუკო (ფსალმ. 105:17–19). თე ირფელიშ ჭყოლოფათ იეჰოვაქ თის დიდებულ საქმეეფ გაკეთებაფუ.

16. მუჭო შემლებუნა იოსებცალო მიფქცუათ სირთულეეფიშ დროს?

¹⁶ მუს ბგურაფლენთ? მორთ დღას ვემეფჩათ სირთულეეფს თიშ უფლება, ნამდა იეჰოვას დო თანაქრისტიანეფს ჩამთხინუან. ვაგმოჭყორდან, იეჰოვაქ შილებე დაუშვას, ნამდა ქეშეფხვადათ რწმენაშ გამოცდეფს, დო თენა ჩქინ გაუჯგუშებელო გეგმირინუას (ებრ. 12:7). თექ შილებე მიმეხვარან, გებვითარათ დო გებუჯგუშათ თიცალ ქრისტიანულ თვისებეფ, მუნერით რე ჭყოლოფა დო პატიება (ებრ. 12:11). ბჯერდან, ნამდა იეჰოვა იოსებცალო ჩქი ხოლო მაკურთხენა მოთვინებაშე.

ᲑᲔᲜᲘᲐᲛᲘᲜᲨᲐ ᲠᲐᲒᲐᲓᲔᲑᲣᲚ ᲡᲘᲢᲧᲕᲔᲤ

17. მუჭო შისრულ ბენიამინიშ გურშენ რაგადებულ წინასწარმეტყველებაქ? (დაბ. 49:27; ქოძირით ჩარჩო).

¹⁷ წეკითხით დაბადებაშ 49:27. იაკობიქ იწინასწარმეტყველ, ნამდა ბენიამინელეფ გერცალო მანგარ მაჩხუპებელეფ იჸუაფუდეს (მსაჯ. 20:15, 16; 1 მატ. 12:2). თე წინასწარმეტყველებას რაგადებულ „ოჭმარექ“ თიმწკუმა ქუდოდირთჷ, მუჟამსით იეჰოვაქ ისრაელიშ პირველ მეფეთ საულ ქიგიორინუ, ნამუთ ბენიამინიშ ტომშე მიშჷ. თიქ დიდ წარმატებეფს მიოჭირინუ ფილისტიმელეფწკუმა ბრძოლეფს (1 სამ. 9:15–17, 21). „ონჯუაქ“ თიმწკუმა ქუდოდირთჷ, მუჟამსით ბენიამინელ დედოფალქ, ესთერქ, დო სპარსეთიშ სამეფოს მაჟია კოჩიქ, მორდოქაიქ, ირსხეს ისრაელეფ განადგურებაშე (ესთ. 2:5–7; 8:3; 10:3).

18. მუჭო შემლებუნა მივაჸუნათ ბენიამინელეფიშ ართგურობაშ მაგალითის?

¹⁸ მუს ბგურაფლენთ? მუშო ოკო რაგად, ბენიამინელეფს მანგარო ოამაყუდესკონ იჸიდ, ნამდა იეჰოვაქ მუნეფიშ ტომშე გეგშეგორ ისრაელიშ მეფე. მარა მუჟამსით იეჰოვაქ მეფობა იუდაშ ტომიშ წარმომადგენელს, დავითის, გეგნოჩ, თინეფქ ქუდაჸუნეს თე ცვლილებას (2 სამ. 3:17–19). ვითობით წანაშ უკულ, მუჟამსით შხვა ტომეფქ ებუნტეს, ბენიამინელეფქ ხუჯ ქუდუკინეს იუდას დო იეჰოვაშ გერნაფილ მეფეს (1 მეფ. 11:31, 32; 12:19, 21). მორთ გინოჭყვიდილ მაფუდან, ნამდა ჩქი ხოლო ბენიამინელეფცალო ხუჯ ქუდუკინათ თი ქომოლკათას, ნამუთ იეჰოვას მუშ ხალხიშ ოხელმძღვანელებერო აფჷ გერნაფილ (1 თეს. 5:12).

19. მუ ჯგირობუა მოუღ ჩქინდა თი წინასწარმეტყველებაშ გარჩიებას, ნამუთ იაკობიქ ღურაშ წოხოლე თქუ?

¹⁹ მუჭოთ ბძირით, ბრელ მუდგარენიშ გურაფა შემლებუნა ღურაშახ რაგადებულ იაკობიშ წინასწარმეტყველებაშე. თიშ გარჩიება, მუჭო შისრულ თიშ სიტყვეფქ, მიმანგარენა რწმენას დო ნდობას, ნამდა იეჰოვაშ წინასწარმეტყველებეფ ირო ისრულებ. თეწკუმა ართო, თიშე დაფიქრება, მუჭო მიღეს იაკობიშ ქომოლსქუალეფქ კურთხევეფ, მოხვარუნა, უჯგუშო ქიგებგათ, მუ შემლებუნა ვაკეთათ, ნამდა იეჰოვას გურ გუხარათ.