იეჰოვა თხილანს იეჰოშაფატის

იუდაშ მეფე იეჰოშაფატიქ მთელ ისრაელს მოსპჷ ბაალიშ სამსხვერპლოეფ დო კერპეფ. თის ოკოდ, ხალხის ნოჩქვედუკო იეჰოვაშ კანონეფ. ათეშენ თიქ მთავარეფ დო ლევიანეფ მიდაშქვჷ მთელ იუდეაშა, ნამდა ხალხის იეჰოვაშ კანონეფ ქუდაგურუესკო.

გოხოლუა ერეფს ოშქურუდეს იუდაწკუმა ჩხუპიშ წუმოჭყაფაშა, მუშენდა უჩქუდეს, ნამდა იეჰოვა მუკურდჷ თე ხალხის. ინა ვარ, თინეფქ მეფე იეჰოშაფატის ძღვინეფ ქიმუღეს. მარა მოაბელეფქ, ამონელეფქ დო სეირიშ მხარეშ მახორუეფქ იუდაშა ოჩხუპებელო ქუმორთეს. იეჰოშაფატის არჩქილედ, ნამდა იეჰოვაშ მოხვარა ოსაჭირუდ. ათეშენ თიქ იერუსალიმს გეკოშაყარუ არძა ქომოლკათა, ოსურკათა დო ბაღანეფ. უკულ თინეფიშ წოხოლე ქილოც დო ღორონთის თხუ: იეჰოვა, უსქანეთ თინეფშა ვამმარიებენა. რთხინქჷ, ქომწით, მუ ვაკეთათ.

იეჰოვაქ ქუპასუხ თიშ ლოცვას დო უწუ: ვა გაშქურინან. მა მიგეხვარებუთ. გიშელით, ქიგედირთით დო ქოძირით, მუჭო გირსხენთ. მუ აკეთ იეჰოვაქ თინეფიშ ორსხებელო?

მაჟია ოჭმარეს იეჰოშაფატიქ გეგშაგორ მაბირეეფ დო უწუ, ნამდა ჯარს ქეწაჸუნესკო. თინეფქ იერუსალიმშე ეყარეს დო ქიმერთეს ობრძოლებერ ადგილშა, ნამდგას თეკოა ჯოხოდ.

მაბირეეფ ხონარმაღალო დო ხიოლით ადიდენდეს იეჰოვას; ავრე იეჰოვა ბრძოლენდჷ მუშ ხალხშო. თიქ თეშ აბორჯჷ ამონელეფ დო მოაბელეფ, ნამდა ართიანს ქიმშაკათეს. თინეფშე ართ კაკალ ვეგნოსქილადე. იეჰოვაქ დოთხილუ იუდაშ მახორუეფ, ჯარიშკოჩეფ დო მღვდელეფ. თე ამბე გოხოლუა ქიანეფს მახორუ არძა ხალხიქ ქიგეგ. თინეფქ ქიმეხვადეს, ნამდა იეჰოვა კინ თხილანდჷ მუშ ხალხის. ამდღა მუს ორთჷ იეჰოვა მუშ ხალხიშ ორსხებელო? თინა ბრელნერ საშვალებას ირინუანს დო თეშ ოკეთებელო კოჩიშ მოხვარა ვასაჭირ.