ემსახურით იეჰოვას მთელ გურით!

1^—3. მუს ნიშნენს მთელ გურით ვემსახურათ იეჰოვას?

ჩქი არასრულყოფილეფ ვორეთ, ათეშგურშენ ხშირას ფჩირთუთ. მარა, თანდაბალეფ ქიპჸით, მიბნანიენთ დო იესო ქრისტეშ გიშაჸიდირალიშ რწმენას გეგმიფრჩქინანთ-და, იეჰოვა ჩქინ ცოდეფიშ გურშენ პასუხის ვამოფთხინა (ფსალმ. 103:10). მუჭოთ დავითიქ სოლომონს უწუნ თეშ, ჩქინ თაყვანიშცემაქ იეჰოვაშო მოსაწონქ ქიჸუას თიშენ, მთელ გურით ოკო ვემსახურათ თის (1 მატ. 28:9). მუჭო შემლებნა თეშ კეთება არასრულყოფილ კათას?

² თეშ გაგებას მიმეხვარებუნა მეფე ასა დო მეფე ამაციაშ ცხოვრებაშ ართიანწკუმა შედარება. იუდაშ ჟირხოლო მეფე სწორას იქციებუდ იეჰოვაშ თოლს, მარა ასა მთელ გურით იქციებუდ თაშ (2 მატ. 15:16, 17; 25:1, 2; იგავ. 17:3). ჟირხოლო არასრულყოფილ რდუ დო ჩირთუდეს. მარა ასას ვეგნურთაფ ღორონთიშ შარაშე, მუშენდა თინა მთელ გურით ომსახურუდ ღორონთის (1 მატ. 28:9). ამაცია ვარდ მთელ გურით იეჰოვაწკუმა. მუჟამსით თიქ ღორონთიშ მოწინააღმდეგეფს გიორჯგინუნ, დართუ მუშ ტყურა ღორონთეფს დო თინეფიშ თაყვანიშცემა ქიდიჭყუ (2 მატ. 25:11—16).

³ მთელ გურით ღორონთიშ მსახურება ნიშნენს ბოლოშა ართგურო ვემსახურათ თის. ბიბლიას სიტყვა „გური“ მეუთითენს კოჩიშ შინაგან პიროვნებაშა. თეშა მიშურს თიშ კორნებეფი, აზროვნება, განწყობა, დამოკიდებულება, შესაძლებლობეფი, მოტივაცია დო მიზნეფი. თაშ ნამდა, პიროვნება, ნამუთ ღორონთის მთელ გურით ომსახურუნ, თოთმაცობაშე შორს რე. იეჰოვას თინა ხვალე მიკასურებელო ვამსახურ. მუშ რაგად შილებე ჩქინდე? არასრულყოფილეფ ვორეთინ თიშ უმკუჯინუო, შემლებნა ღორონთის მთელ გურით ვემსახურათ, მუჟამსით გუვაგრძელენთ ღორონთიშ მსახურებას უთოთმაცურო (2 მატ. 19:9).

4. მუს გენიფხილენთ თე სტატიას?

⁴ მორთ გუვარჩუათ ასაშ დო იუდაშ შხვა მეფეეფიშ — იეჰოშაფატიშ, ხიზკიაშ დო იოშიაშ ცხოვრება, ნამუთ მთელ გურით ომსახურუდეს იეჰოვას დო ქიგებგათ, მუს ნიშნენს მთელ გურით ვემსახურათ იეჰოვას. ოთხოლოს შეცდომეფი მალედეს, მარა თინეფ იშენით იმსახურენდეს იეჰოვაშ მოწონას. მუშენ მირჩქინანდ ღორონთი, ნამდა თინეფ მთელ გურით ომსახურუდეს თის დო მუჭო შემლებნა მივაჸუნათ თინეფიშ მაგალითის?

ასა მთელ გურით ომსახურუდ იეჰოვას

5. მუჭო მიქცუ ასაქ გამეფებაშ უკულ?

⁵ ასა იუდაშ მასმა მეფე რდუ, თიმ დროშე მოჸუნაფილ, მუჟამსით ისრაელქ გირთუ ისრაელიშ ჩრდილოეთ ვით-ტომიან სამეფოთ დო იუდაშ ჟირტომიან სამეფოთ. თიქ მოსპუ მუშ სამეფოს კერპიშ თაყვანიშცემა დო გეგნარღუ ტაძარიშ მეძავ კოჩეფ. თიქ მუშ ბების მააქას დედოფლობა გაგლანწყუ, „მუშენდა თის საზიზღარი კერპი აფუდ კეთებულ წმინდა ბოძიშო“ (1 მეფ. 15:11—13). თეშ გარდა, ასა არწმუნენდ ხალხის „უგორდესკო იეჰოვა . . . დო შეუსრულებდესკო კანონი დო მცნება“. ნამდვილო, თინა ხუჯის უკინენდ ჭეშმარიტ თაყვანიშმცემლობას (2 მატ. 14:4).

6. მუჭო მიქცუ ასაქ, მუჟამსით ეთიოპეფქ გეგშართეს იუდაშ წინააღმდეგ?

⁶ ასაშ გამეფებაშე პირველ ვით წანას იეჰოვაქ მშვიდობათ აკურთხუ იუდა. უმოს გვიანო ეთიოპ ზერახიქ 1 000 000-იან ჯარით დო 300 ეტლით გეგშართ იუდაშ წინააღმდეგ (2 მატ. 14:1, 6, 9, 10). მუჭო მიქცუ ასაქ თეცალ რთულ დროს? თიქ იეჰოვაშ სრულ ნდობა გეგმირჩქინ (წეკითხით 2 მატიანეშ 14:11). ასაქ მთელ გურით ქილოც. თეშ პასუხო იეჰოვაქ თის ჩხუპ მაგებაფუ დო განადგურებაფუ ეთიოპეფიშ ჯარი (2 მატ. 14:12, 13). თიმ დროს ხოლო, მუჟამსით მეფეეფ თიშ ართგურეფ ვა რდესინ, იეჰოვა იშენით ოგებაფუანდ ჩხუპის მუშ სახელიშ გურშენ (1 მეფ. 20:13, 26—30). ასა იეჰოვას ონდუდ დო თინა პასუხენდ თიშ ლოცვას. მარა უმოს გვიანო, ასაქ ვე მიქცუ გონივრულო. მაგალთო, თიქ მოხვარა იეჰოვაშ მანგიორო, სირიაშ მეფეს ქოთხუ (1 მეფ. 15:16—22). თეშ უმკუჯინუო, ღორონთი თვალუნდ, ნამდა „ასა მთელ გურით რდუ იეჰოვაწკუმა მთელ მუშ ცხოვრებას“. მუჭო შემლებნა მივაჸუნათ ასაშ მაგალითის დო ვაკეთათ ჯგირ საქმე (1 მეფ. 15:14).

7, 8. მუჭო შეილებნა ასაშ მაგალითის მიაჸუნათ იეჰოვაშ მსახურებას?

⁷ არძას შეულებ გეგმირკუას მუშ გური დო ქოძირას, მთელ გურით ქამსახურ დო ვარ ღორონთის. ქოკითხით თქვან დუც: გინოჭყვიდილ ქუგაფუნა დო ვარ ქასიამოვნათ იეჰოვას, ქიგედირთათ ჭეშმარიტ თაყვანიშმცემლობაშ მხარეს დო დეცვათ ღორონთიშ ხალხი უზნეო გავლენაშე? დეფიქრით, მუშმადიდა გაბედულება ოსაჭირუდ ასას, მიდურთუმუდუკო მააქაშ წინააღმდეგ, ნამუთ დედოფალ რდუ! შილებე ზუსტას თეცალ სიტუაციას ვამოფხვადათ, მარა იჸუას შემთხვევაქ, მუჟამსით შემლებნა ასაშნერო მიფქცუათ. მაგალთო, მუჭო მიქციებუდით, მუჟამსით ოჯახიშ წევრ ვარდა ხოლოშიან მეგობარ ვემინანიენდ დო გერიცხებუდ კრებაშე? თქვა ხოლო ასაშნერო მიღენდითო ზომეფს დო მიოტენდითო თიწკუმა ურთიერთობას? მუს გიკარნახენდეს თქვან გური?

⁸ ასაშნერო თქვა ხოლო შეილებნა ოძირათ, ნამდა მთელ გურით ონდუთ ღორონთის, მუჟამსით შეთმოხვადუთ თიცალ წანააღამდეგობეფს, ნამუთ მოუგვარებელო მიგორჩქუნა. იეჰოვაშ მოწმე რეთინ თიშ გურშენ, შილებე სკოლას გლახათ გოქცუდან ვარდა გიგაძიცენდან. შილებე სამუშას ოძიცეთ ვაუბაღუდან, ნამდა სულიერ საქმეეფიშ გურშენ შვებულებას ეთმოჭოფუნთ დო ხშირას სამუშა საათეფიშ უკულ ვამუშენთ. თეცალ სიტუაციეფიშ დროს ასაშნერო თქვა ხოლო ლოცვათ მიმართით ღორონთის. გაბედულება გეგმირჩქინით, მიენდით იეჰოვას დო დღას ვეგნურთათ თის, მუთ გიჩქუნა, ნამდა გონივრულ დო სწორ რე. ქორშუდან, ღორონთი ამანგარენდ დო ოხვარუდ ასას დო თქვანწკუმა ხოლო თაშ მიქციებუ.

9. მუჭო შემლებნა ვოძირათ, ნამდა მთელ გურით ფქადაქენთ?

⁹ ღორონთიშ მსახურეფ ხვალე მუნეფიშ დუდშე ვაფიქრენა. ასა ხეს უნწყუნდ ჭეშმარიტ თაყვანიშმცემლობას დო თეშნერო ჩქი ხოლო შემლებნა მივეხვარათ შხვეფს, გეჩინებაფუან იეჰოვა. მუშნერ კმაყოფილ იჸი იეჰოვა, მუჟამსით ორწყე, მუჭო უქადაქენთ ჩქინ ხოლოშიანეფს დო შხვეფს; თეს თიშენ ვორთუთ, ნამდა მართალო მიჸორა იეჰოვა დო დაინტერესებულ ვორეთ ხალხიშ მომავალით!

იეჰოშაფატი გორუნდ იეჰოვას

10, 11. მუჭო შეილებნა მიაჸუნათ იეჰოშაფატიშ მაგალითის?

¹⁰ იეჰოშაფატი „გილეშ მუამუშიშ, ასაშ შარათ“ (2 მატ. 20:31, 32). თინა მუშ მუმაცალო ხალხის ხეს უნწყუნდ, უგორუდესკო იეჰოვა დო თეშ გურშენ თიშ ორგანიზება მანწყუ, ნამდა ხალხშა დუგურუაფდესკო „იეჰოვაშ კანონიშ წიგნიშე“ (2 მატ. 17:7—10). თიქ ისრაელიშ ჩრდილოეთ სამეფოშა, ეფრემიშ გვალა მხარეშა ხოლო მიდართ, ნამდა თინეფ „იეჰოვაშა, მუნეფიშ ჯვეშეფიშ ღორონთშა დურთინუაფუდკო“ (2 მატ. 19:4). იეჰოშაფატი რდუ მეფე, ნამუთ „მთელ გურით გორუნდ იეჰოვას“ (2 მატ. 22:9).

¹¹ ჩქი არძას შემლებნა მონაწილება მიბღათ დიდებულ ქადაქებაშ საქმეს, ნამუთ იეჰოვაშ ნებათ იკეთებუაფ ამდღა. ქორენო თქვან მიზან თინა, ნამდა თუთაქ თეშ ვემკორთას, ვაგურუათ ღორონთიშ სიტყვა შხვეფს დო ქიმეხვარათ თინეფს, ნამდა მთელ გურით ქიმიკორინუან ღორონთიშ მსახურება? თქვან მონდომათ დო ღორონთიშ კურთხევაშ ჭყოლოფუათ შეგალებენა ქიდიჭყათ ბიბლიაშ გურაფა. ქოლოცულენთო თე მიზანშენ? ქორექო მზათ თე საქმეშ ოკეთებელო, თი შემთხვევას ხოლო, მუჟამსით თეშა შილებე თავისუფალ დროქ გაჸუას დათმებელქ? იეჰოშაფატცალო, ნამუქით ეფრემშა იდუ, თიშგურშენ ნამდა ხალხი ჭეშმარიტ თაყვანიშმცემლობაშა დურთინუაფუდკონ, თეშ ჩქი ხოლო შემლებნა ქიმვაკითხუათ თინეფს, მით აქტიურეფ ვა რენა. თეს გეძინელ, კრებაშ უხუცესეფ იძირუანა დო ოხვარუნა მუნეფიშ კრებას ოკუთნუნან თი გარიცხულ პიროვნებეფს, ნამუსით მეტებულ აფნა ჯვეშ გლახა საქმეეფი.

12, 13. ა) ოშქურანჯ სიტუაციაშ დროს, მუჭო მიქცუ იეჰოშაფატიქ? ბ) მუშენ ოკო მივაჸუნათ იეჰოშაფატიშ მაგალითის დო ვაღიარათ ჩქინ სისუსტეეფი?

¹² თიშ უმკუჯინუო, ნამდა იეჰოშაფატის უკოროცხ ნტერ ორცქინანდუნ, თინა მუშ მუმა ასაცალო იეჰოვაშ ართგურ სკიდუდ (წეკითხით 2 მატიანეშ 20:2—4). იეჰოშაფატის აშქურინ დო „შურ დო გურით ქიდიჭყ იეჰოვაშ გორუა“. მუშ ლოცვას თიქ აღიარ, ნამდა ხალხის ვა უღუდ თიშ ძალა, წოხოლე ქეწუდირთესკო მუნეფიშ წინააღმდეგ გიშულირ ნტერს დო ვართ მუს დო ვართ თინეფს ვა უჩქუდეს მუ ქიმნესკო. თიქ ბოლოშა მიენდ იეჰოვას დო უწუ: „სი მიგოჯინე ჩქინ თოლეფი“ (2 მატ. 20:12).

¹³ მინშა ჩქი ხოლო იეჰოშაფატცალო შილებე ვა მიჩქუდან, მუ ვაკეთათ, მუჟამსით შკურნაფილ ვორეთ (2 კორ. 4:8, 9). მარა ქიგიშინით თინა, მუჭო აღიარ იეჰოშაფატიქ მუშ საჯარო ლოცვას, ნამდა მუ დო მუშ ხალხი სუსტეფ რდეს (2 მატ. 20:5). თინეფქ, მიდგას ოჯახიშ სულიერ ხემძღვანელობა ოვალუნან, ოკო მიაჸუნან იეჰოშაფატიშ მაგალითის დო პრობლემეფიშ დროს ხემძღვანელობა დო გამანგარება იეჰოვას ქოთხუან. ონჯღორექ ვადგაგურან ოჯახწკუმა ართო ლოცვაშ დროს თეცალ პრობლემეფ მოშინაფაშა. თინეფ ქოძირნა, ნამდა ონდუთ იეჰოვას. ღორონთქ მეხვარ იეჰოშაფატის დო თქვა ხოლო მიგეხვარებუნა.

ხიზკია მუთ სწორ რდუნ თის აკეთენდ

14, 15. მუჭო ოძირ ხიზკიაქ, ნამდა სრულას ონდუდ იეჰოვას?

¹⁴ ხიზკიას, ნამუთ იეჰოვაწკუმა მანგარ ხოლოს რდუნ, იეჰოშაფატიშ გინაწონს, გარზებელ აფუდ კერპთაყვანიშმცემლ მუმაშ გლახა გავლენაშა. ხიზკიაქ „მოსპუ ემაღალია ადგილეფი, აკოტახუ წმინდა სვეტეფი, მოჭკირუ წმინდა ბოძი დო დოტახუ მოსეშ ნაკეთებ სპილენძიშ გვერი“, ნამუსით გიმირინუანდეს კერპთაყვანიშმცემლობაშო. თინა ბოლოშა ონდუდ იეჰოვას დო „იცვენდ თიშ მცნებეფს, ნამუთ იეჰოვაქ უზოჯ მოსეს“ (2 მეფ. 18:1—6).

¹⁵ თიწკუმა ხოლო, მუჟამსით ასურეთიქ იუდა გეჭოფ დო იერუსალიმს ორცქინანდუნ, ხიზკიაქ მთელ გურით მიენდ იეჰოვას. ასურეთიშ მეფე სინახერიბი გაძიცანდ იეჰოვას დო ხიზკიაშ შკურნაფას ოცადუდ, ნამდა თის დათმობაშა მიდურთუმუდკო. მარა ხიზკიაქ მუშ ლოცვას იეჰოვაშ მარსხებელ ძალაშ დიდ ნდობა გიმოხანტუ (წეკითხით ესაიაშ 37:15—20). ღორონთქ ქუპასუხ თიშ ლოცვას თით, ნამდა გოუტუ მუშ ანგელოზ დო 185 000 ასურელ განადგურ (ეს. 37:36, 37).

16, 17. მუჭო შეილებნა მიაჸუნათ ხიზკიაშ მაგალითის ღორონთიშ მსახურებას?

¹⁶ უმოს გვიანო ხიზკიაქ დელახ დო ოღურუ კარს გერდუ. თინა თხულენდ იეჰოვას, ნამდა ქუგუშინუდკო, მუჭო გილეშ თინა მუშ წოხოლე (წეკითხით 2 მეფეეფიშ 20:1—3). ბიბლიაშე ბგებულენთ, ნამდა ჩქი ასე ვა ფცხოვრენთ თი დროს, მუჟამსით იეჰოვა სასწაულო ოსკილიდუანს ხალხის ვარდა დიდ ხანიშ სიცოცხლეს არზენს. მარა ხიზკიაშნერო, ჩქი არძას შემლებნა იეჰოვას ლოცვას უწუათ: „გილეფში სქან წოხოლე ჭეშმარიტებათ დო მთელ გურით“. ქორჯერანო, ნამდა იეჰოვას შეულებ დო სურვილით უღუ, ლახალაშ დროს ხოლო გარზებაშ ძალა ქიმერჩან? (ფსალმ. 41:3).

¹⁷ მუჟამსით ხიზკიაშ მაგალითშე ფიფქრენთინ, ხომ ვავორწყეთ თიშნერ მუთუნს, ნამუთ მოცილნა იეჰოვაწკუმა ურთიერთობას ვარა ჩქინ ყურადღებას გეგნიღანს ჭეშმარიტ თაყვანიშმცემლობაშე შხვა მუდგარენშა? არგამა რე, ვამკონა მივაჸუნათ თინეფს, მით გიმირინუანს სოციალურ ქსელს თიშენ, ნამდა ნამთინე კოჩ გაკერპან. მუშო ოკო რაგად, ნამთინე ქრისტიანს შილებე ოსიამოვნუდას ოჯახიშ წევრეფწკუმა ვარდა ხოლოშიან მეგობრეფწკუმა თე საშვალებეფით ურთიერთობა. მარა ამდღა ბრელს სოციალურ ქსელიშ საშვალებათ ურთიერთობა უღუ თიცალ ხალხწკუმა, ნამუსით შურო ვეჩინენა. ვარდა დიდ დროს უთმენა სურათეფიშ გოჯინას დო კომენტარეფიშ კითხირს. გლახა რე თინა, ნამდა მუთუნს ვამარზენან ფერ უმნიშვნელო საქმეეფს შეულებ დიდ დრო მიდამღან. ქრისტიანქ შილებე გეამაყას, მუჟამსით ქოძირუნს, ნამდა მუშ გედვალირ კომენტარეფს ვარდა სურათეფს ბრელ იწონუანს, ვარა შილებე ეწყინას, მუჟამსით მუშ გვერდის მითინ ვაგაჯინე. მუჭო ფიქრენთ, მოციქულ პავლე ვარდა აკვილა დო პრისკილა დუთმენდესო დროს ირ დღას შხვეფიშ სურათეფიშ გოჯინას, განსაკუთრებულო თინეფიშ, მიდგა ვა რდეს საჯიმალოშ წევრეფი? ჩქი პკითხულენთ, ნამდა პავლექ „მთლიანო ქეშუდირთ სიტყვაშ ქადაქებას“. პრისკილა დო აკვილა მუნეფიშ დროს გიმირინუანდეს, ნამდა შხვეფს უმოს ზუსტას გეუნწყესკო ღორონთიშ შარაშ გურშენ (საქ. 18:4, 5, 26). შემლებნა ჩქინ დუც პკითხათ: დუც ვარიდენქ დო ვარ კოჩიშ გაკერპებას ვარდა დროს ხომ ვა ვოდინუანქ მნიშვნელოვან ვარენ ფერ საკითხეფიშ გურშენ? (წეკითხით ეფესოელეფიშ 5:15, 16).

იოშია იცვენდ იეჰოვაშ მითითებეფს

18, 19. მუჭო შეილებნა მიაჸუნათ იოშიაშ მაგალითის?

¹⁸ ხიზკიაშ მოთაშმოთა, მეფე იოშია ხოლო „მთელ გურით“ იცვენდ იეჰოვაშ მითითებეფს (2 მატ. 34:31). დიო ხოლო თი დროს, მუჟამსით მარდუ რდუნ, თიქ „დავითიშ ღორონთიშ გორუა დიჭყუ“ დო 20 წანერ რდუნ თეშ ქიდიჭყ იუდაშ გასუფთება კერპეფშე (წეკითხით 2 მატიანეშ 34:1—3). იოშია იუდაშ ბრელ მეფეშე უმოსო რდუ მონდომებულ ასიამოვნუკო იეჰოვას. მუჟამს კანონიშ წიგნი ქოძირეს, ნამუთ შილებედ მოსეშ ნაჭარა რდუკონ დო თინა იოშიას წუკითხესინ, თიქ ქიმეხვად, ნამდა უმოს სრულას ოკო ემსახურესკო ღორონთს. თინა შხვეფს ხოლო მოუწოდენდ, ემსახურესკო იეჰოვას. შედეგო, ონდო თინა ცოცხალ რდუნ, ხალხის ვემუტებ იეჰოვაშ თაყვანიშცემა (2 მატ. 34:27, 33).

¹⁹ იოშიაცალო ახალგაზრდეფქ ხოლო ბაღანობაშე ოკო დიჭყან იეჰოვაშ გოროუა. იოშიაქ შილებედ ბრელ მუთუნ დიგურუკო ღორონთიშ ჭყოლოფაშ გურშენ მეფე მენაშეშე, ნამუქით ცოდეფ მინანუ. ახალგაზრდეფი, დეახლოვით ართგურ ხანშამიშულირეფს, მუჭოთ ოჯახის, თეშ კრებას დო დიგურეთ, მუჭო გიმოცადეს მუნეფიშ დუდშა, მუშმაჯგირა რე იეჰოვა. რშუდან, ნამდა წმინდა წერილეფიშ კითხირქ შეხუ იოშიაშ გურს დო მეხვარ სწორაშე მიქცუკონ. ღორონთიშ სიტყვაშ კითხირქ შილებე თქვა ხოლო მიგეხვარან სწორაშე მოქციებას, ნამდა უმოს ბედნერეფქ ქიჸუათ დო გამანგარათ თქვან ურთიერთობა იეჰოვაწკუმა; თეშ გარდა შეგალებენა შხვას ხოლო ქიმეხვარათ ღორონთიშ გორუას (წეკითხით 2 მატიანეშ 34:18, 19). ბიბლიაშ გურაფაშე ქოძირუნთ, მუჭო გაუჯგუშათ იეჰოვაშ მსახურება. თაშ ნამდა, თქვა ხოლო იოშიაცალო შეილებნა მიქცუათ.

ემსახურით იეჰოვას მთელ გურით!

20, 21. ა) მუთ გუდ თე ოთხ მეფე ართიანს? ბ) მუს გუვარჩიენთ ანწიან სტატიას?

²⁰ ქარწყეთო, მუ სარგებელიშ მეღება შილებე თაქ გარჩიებულ იუდაშ თი ოთხ მეფეშ მაგალითშე, ნამუთ მთელ გურით ომსახურდეს იეჰოვას? თინეფ მონდომებულო ასრულენდეს იეჰოვაშ ნებას დო ღორონთს ირიათო თაშ ომსახურდეს. საშიშ ნტერიშ წოხოლე გერდესინ თი დროს ხოლო თაშ იქციებუდეს. არძაშ უმოს მნიშვნელოვან თინა რდუ, ნამდა თინეფ სუფთა მოტივით ომსახურდეს იეჰოვას.

²¹ ანწიან სტატიას ქობძირუნთ, ნამდა თაქ მოშინაფილ ოთხოლო მეფე შეცთომეფს უშვენდ. მარა მუჟამსით გურეფს ორწყენ ფერ ღორონთქ თინეფიშ გური შეამოწმუნ, ქოძირუ, მუჭო მთელ გურით ომსახურდეს თის. ჩქი ხოლო არასრულყოფილეფ ვორეთ. მუჟამსით იეჰოვა მამოწმენან, ქარწყენო, ნამდა თის მთელ გურით ვომსახურუთ? თე საკითხის ანწიან სტატიას გუვარჩიენთ.