გემანგარით თიშ რწმენა, მუდგაშ იმენდ გიღუნა

1, 2. ა) მუთ გენესხვავებ ჭეშმარიტ ქრისტიანეფიშ იმენდ შხვა ხალხიშ იმენდშე? ბ) მუ მნიშვნელოვან კითხვეფს გენიფხილენთ?

მუშმადიდა იმენდ მიღუნა ჭეშმარიტ ქრისტიანეფს! ჩქი არძას, ცხებულ ქრისტიანეფს დო შხვა შხურს, თიშ იმენდ მიღუნა, ნამდა ქობძირუნთ, მუჭო შესრულებ ღორონთიშ დუდშეიან დუნაპირებ დო გენიწმინდებ იეჰოვაშ სახელი (იოან. 10:16; მათ. 6:9, 10). თეშ უჯგუშ იმენდი, მუ ოკო არსებენდას. ჩქი ველუთ ღორონთიშ დუნაპირებ მარადიულ სიცოცხლეშ ჯილდოს, თენა ზეცას იჸი დო ვარ დედამიწას (2 პეტ. 3:13). თეშობას იმენდ მიღუნა, ნამდა ღორონთიშ ხალხი სულიერო მირდუ დო გემანგარებ.

² მუდგარენიშ იმენდ იეჰოვა ღორონთიშ მსახურეფი ვარენან თინეფს ხოლო უღუნა, მარა თე იმენდიშ შესრულებაშა გვალო ვა რენა დარწმუნებულ. მაგალთო, მილიონობით კოჩის იმენდ უღუ, ნამდა აზარტულ ლაჸაფეფით დიდ თანხას მიგენს, მარა თინეფ დარწმუნებულ ვა რენა, თენა თაშ ქიჸინ. სინამდვილეს, ნამდვილ რწმენა თიშ საფუძვლიან მოლოდინ რე, მუდგაშ იმენდ მიღუნან თინა, აუცილებერო შესრულებ (ებრ. 11:1). მარა მუჭო შემლებუნა ქრისტიანეფს, ხოლო უმოსო დებრწმუნათ თე იმენდშა? დო მუ ჯგირობუა მოუღ თიშ რწმენას, მუდგაშ იმენდ მიღუნა?

3. მუ ფაქტშა რე გერსხილ ჭეშმარიტ ქრისტიანულ რწმენა?

³ ჩქი არძა ცოდამეფ ვორეთ, ათეშგურშენ რწმენა მითინს ვა მოჸუნს დაბადებაშე დო თინა მუშით ვენვითარებ. რწმენაშ მიოღებელო კოჩის ღორონთიშ წმინდა შური ოხვარ, მარა თის მორჩილ გური ოკო უღუდას (გალ. 5:22). ბიბლია ვეჩიებ, ნამდა იეჰოვას უღუ ვარდა ოსაჭირ რწმენა. იეჰოვა ირფელიშ შემალებე დო ბრძენ ღორონთ რე, ათეშგურშენ თის მუთუნ ვეშუშალენს ხეს, შეასრულას მუშ განზრახვა. ჩქინ ზეციერ მუმაშო მუშ დუნაპირებ კურთხევეფ თიცალ რეალურ რე, ნამდა შესრულებულ აფუდასინ თეშ მიორჩქ. ათეშგურშენ თინა იჩიებ: „შისრულუ!“ (წეკითხით გამოცხადებაშ 21:3—6). ქრისტიანულ რწმენა გერსხილ რე თი ფაქტიშა, ნამდა იეჰოვა „ართგურ ღორონთ რე“, ნამუთ ირო ასრულენს მუშ დუნაპირებუს (კან. 7:9).

ჯვეშ დროშ ართგურ მსახურეფიშ რწმენაშ მაგალითეფი

4. მუ იმენდ უღუდეს ქრისტიანობაშა ცხოვრენდესინ თი ართგურ ქომოლკათას დო ოსურკათას?

⁴ ებრაელეფიშ მა-11 დუდის მოშინაფილ რე 16 ქომოლკოჩიშ დო ოსურკოჩიშ სახელეფი, ნამუსით მანგარ რწმენა უღუდეს. პავლექ ღორონთიშ შურიშ მოხვარათ თინეფწკუმა ართო შხვეფ ხოლო მიშინუ, მიდგას „რწმენათ მიაჩუ დამოწმებაქ“ (ებრ. 11:39). თინეფს საფუძვლიან მოლოდინ უღუდეს, ნამდა ღორონთ ქუმაშკვანდ დუნაპირებ „შთამომავალს“, ნამუთ სატანაშ ეტახილ ბუნტის აკარღვანდ დო შეასრულენდ ღორონთიშ დუდშეიან განზრახვას (დაბ. 3:15). მინ ართგურ მსახურქ თეიშა ღურ, სოიშახ დაპირებულ „შთამომავალ“ იესო ქრისტე, ზეციურ ცხოვრებაშო შარას გონწყუნდ (გალ. 3:16). მარა იეჰოვაშ დუნაპირებუშ ჭყოლოფუათ, თინეფ კინ გეცოცხლებუნა დო იცხოვრენა მარადიულო სამოთხეს დედამიწას (ფსალმ. 37:11; ეს. 26:19; ოს. 13:14).

5, 6. მუშ იმენდ უღუდეს აბრაამი დო თიშ ჸუდეშარეფს დო მუჭო ინარჩუნენდეს რწმენას? (ქოძირით სურათ 21-ა გვერდის)

⁵ ებრაელეფიშ 11:13-ს პავლე მოციქულ ქრისტიანობაშა ცხოვრენდესინ ფერ, ნამთინე ართგურ მსახურიშ გურშენ იჩიებ: „თენეფქ არძაქ რწმენას დოღურეს, მართალ რე, ვემუღებუნა დუნაპირებ, მარა თის შორშე ორწყედეს [დო] ოხიოლუდეს“. თენეფშე ართ-ართ რდუ აბრაამი. ქუღუდუო თის იმენდი, ნამდა იცხოვრნედ ბედნერო დუნაპირებ „შთამომავალიშ“ მართველობაშ დროს? იესოქ არგამათ უპასუხ თე კითხვას, მუჟამსით მუშ მოწინაღმდეგეფს უწუ: „თქვან მუმას, აბრაამს გურს უხარენდ თიშ იმენდ, ნამდა ქოძირუნდ ჩქიმ დღას. ქოთ გოძირ დო გეხარ“ (იოან. 8:56). თეშ რაგად შილებე სარაშენ, ისაკშენ, იაკობშენ დო შხვა მსახურეფშენ, მიდგას იმენდ უღუდეს მომავალ სამეფოშ, „ნამუშ მაშენებელ დო გუმაჭყაფალ ღორონთ რე“ (ებრ. 11:8—11).

⁶ მუჭო ინარჩუნენდეს აბრაამი დო თიშ ჸუდეშარეფ მანგარ რწმენას? საეგებიოთ, ღორონთიშ გურშენ თინეფქ მუნეფშე უნჩაშ ართგურ კათაშე, ღორონთიშ გამოცხადებეფშე დო ჯვეშ ნაჭარა სანდო წერილეფშე გეგეს. მუთ მთავარ რე, თინეფს ვაჭყორდუდეს ღორონთიშ დუნაპირებუ დო მოთხოვნეფი დო თეშე ფიქრენდეს. თე ქომოლკათა დო ოსურკათა დარწმუნებულ რდეს მუნეფიშ იმენდშა დო მზათ რდეს, ღორონთიშ ართგურობაშ გურშენ ირნერ ტანჯება გინუღალდესკო.

7. მუ აკეთ იეჰოვაქ გემემანგარან რწმენაქინ თიშო დო ჩქი მუ ოკო ვაკეთათ?

⁷ იეჰოვაქ მუშ სიტყვა, ბიბლია მუჩეს, ნამდა მიღუდან მანგარ რწმენა. ბედნერეფ დო წარმატებულეფ ვორდათინ თიშენ, ვეცადათ ოკო ბიბლია ირ დღას იპკითხათ (ფსალმ. 1:1—3; წეკითხით საქმეეფიშ 17:11). თეშ გარდა, ქრისტიანობაშა ცხოვრენდეს ფერ ართგურ თაყვანიშმცემელეფცალო, ჩქი ხოლო ოკო იფიფქრათ ღორონთიშ დუნაპირებშენ დო დევემორჩილათ თიშ მოთხოვნეფს. იეჰოვა თით ხოლო ვამარკენა კურთხევას, ნამდა ართგურ დო გონიერ მონაშ მეშვეობით მარზენა ხვეიანო სულიერ საზრდოს (მათ. 24:45). თაშ ნამდა, ირიათო ოკო იფიფქრათ თი სულიერ საზრდოშენ, ნამუსით იეჰოვა მარზენა დო ჩქი ხოლო ჯვეშ დროშ ართგურ მსახურეფცალო მაღვენუნა სამეფოშ იმენდი.

8. მუჭო მიმანგარენა ლოცვა რწმენას?

⁸ ქრისტიანობაშა ცხოვრენდესინ ფერ ართგურ მსახურეფს ლოცვა ოხვარუდ, უღუდესკონ მანგარ რწმენა. თინეფს რწმენა ემანგარებუდეს, მუჟამსით ღორონთი პასუხენდ თინეფიშ ლოცვეფს (ნეემ. 1:4, 11; ფსალმ. 34:4, 15, 17; დან. 9:19—21). შემლებუნა ჩქინ ოწუხებელ ხოლო მივანდათ ღორონთის დო დარწმუნებულ ვორდათ, თინა ქუმომჩრქილუანა დო გუმამანგარენა, ნამდა ვემემდინან ხიოლქ. მუჟამსით ჩქინ ლოცვეფიშ პასუხეფს მიბღენთინ, რწმენა გემემანგარებუნა (წეკითხით 1 იოანეშ 5:14, 15). რწმენა ღორონთიშ შურიშ ნაყოფიშ ნაწილ რე, ათეშგურშენ, მუჭოთ იესოქ მიწუესინ, ოკო „იფთხუათ ღორონთიშ შურ“ (ლუკ. 11:9, 13).

9. პირად საკითხეფიშ მეტ, ხოლო მუ დო მუშენ ოკო იბლოცათ?

⁹ ხვალე ჩქინ პრობლემეფშენ ოკო ვაფთხუათ ღორონთის. ჩქი ვამათვალენა თი დიდებულ საქმეეფი, ნამუშ გურშენ შემლებუნა ირ დღას მადლობა უწუათ იეჰოვას დო განვადიდათ! (ფსალმ. 40:5). ჩქინ ლოცვეფშე თინა ხოლო ოკო რჩქუდას, ნამდა „ფშუნა ციხეს რენან თინეფ, ითამ თინეფწკუმა ართო ჭოფილ ვორდათინ თეშ“. ოკო იბლოცათ მსოფლიო საჯიმალოშო, განსაკუთრებულო თინეფშო, მიდგას ჩქინ შქას ხემძღვანელობა ოვალ. გურს ემკინანა, მუჟამსით ვორწყეთ, მუჭო პასუხენს იეჰოვა თეცალ ლოცვეფს! (ებრ. 13:3, 7)

თინეფქ დათმობაშა ვედეს

10. ღორონთიშ მსახურეფიშ ართგურობაშ მუ მაგალითეფ მიშინუ პავლექ დო სოვრეშე ღებულენდეს ძალას, ნამდა დათმობაშა ვაულინდესკონ?

¹⁰ ებრაელეფიშ მა-11 დუდის პავლე მოციქულ იჩიებ თი განსაცდელეფშენ, ნამუთ ღორონთიშ მსახურეფქ გინიღეს, მარა თინეფიშ სახელეფს ვემიშინუანს. პავლეს თი ოსურკათაშ მაგალითეფ მოჸუნს, მიდგას სქუალეფქ უღურეს, მარა ჭიჭე ხანშა ღორონთიქ გაცოცხლ თინეფ. პავლე თინეფს ხოლო მიშინუანს, მიდგაქ „ვარია თქუეს ირნერ გიშაჸიდირალით გათავისუფლებაშე, უჯგუშ გათელებაშა ქიმუჭირინუაფდესკონ თიშენ“ (ებრ. 11:35). ზუსტას ვამარაგადენა, მიშ გურშენ იჩიებ პავლე, მარა თინეფ ნაბოთ დო ზაქარიაცალო, ღორონთიშ მორჩილებაშ დო თიშ ნებაშ შესრულებაშ გურშენ ქუალეფიშ ჸოთამათ დოჸვილეს (1 მეფ. 21:3, 15; 2 მატ. 24:20, 21). ართგურობას ქუდათმენდეს-და, დანიელ დო მუშ ამხანაგეფს ხოლო უღუდეს გათავისუფლებაშ საშვალება. მარა თინეფს ღორონთიშ მანგარ რწმენა უღუდეს დო თაშ ქოფთქუათინ, „ჯილოეფს პიჯის ეუკილანდეს“ დო „დაჩხერიშ ძალას ურზუდეს“ (ებრ. 11:33, 34; დან. 3:16—18, 20, 28; 6:13, 16, 21—23).

11. მუ განსაცდელეფს შეხვად ბრელქ რწმენაშ გურშენ?

¹¹ წინასწარმეტყველეფქ მიქაია დო იერემიაქ მუნეფიშ რწმენაშ გურშენ, გეძიცა დო ციხეს დოხუნა გინიღეს. ელიაცალო, შხვეფ ხოლო „გილეშეს კოჩ ვარდუნ ფერ ადგილეფს, გვალეფს, გითოხილ კირდეეფს დო დედამიწაშ რობუეფს“. თინეფქ მითვინეს, მუშენდა თინეფიშ იმენდის საფუძველ უღუდ (ებრ. 11:1, 36—38; 1 მეფ. 18:13; 22:24—27; იერ. 20:1, 2; 28:10, 11; 32:2).

12. მიქ დომტუეს განსაცდელეფიშ გინოღალათ არძაშ უჯგუშ მაგალით დო მუქ მეხვარ თის?

¹² ართგურ ქომოლკათა დო ოსურკათაშ მოშინაფაშ უკულ პავლე მოციქულქ დიდ ყურადღება მიაქცუ არძაშ უმოს დიდ მაგალითის — ჩქინ უფალ იესო ქრისტეშ მაგალითის. ებრაელეფიშ 12:2-ს თინა იჩიებ: „თი ხიოლიშ გურშენ, ნამუთ მელუდ, თიქ ონჯღორე მუთუნო ვემირჩქინ დო ბოძის წამებას ქუგურზ, თეშ უკულ ღორონთიშ ტახტიშ მარძგვანშე ქუდოზოჯ“. დეფიფქრათ ოკო იესოშენ, ნამუქით საშინელ განსაცდელეფი გინიღუ (წეკითხით ებრაელეფიშ 12:3). იესოცალო, პირველ ქრისტიანეფ ხოლო წამებათ დოჸვილეს, მუშენდა ვადათმეს მუნეფიშ ართგურობა, მაგალთო თეცალ რდუ მოციქულ ანტიპა (გამოცხ. 2:13). ღორონთი თინეფს ზეციურ ცხოვრებაშო გათელენდ დო თეგვარო დაჯილდოვენდ. თე ზეციურ აღდგომა „უჯგუშ აღდგომაშე“ აღმატებულ იჸუაფუდ, ნამდგას ჯვეშ დროშ ღორონთიშ ართგურ მსახურეფ ელუდეს (ებრ. 11:35). 1914 წანას ქრისტეშ გამეფებაშ უკულ არძა ართგურ ცხებულქ, ნამუთ ღურაშ ლურით რდეს მიკოლურაფილინ, გეთელეს ზეცაშ მაცხოვრებელო, ნამდა იესოწკუმა ართო უმართველებდესკო კაცობრიობაშა (გამოცხ. 20:4).

რწმენაშ თანამედროვე მაგალითეფი

13, 14. მუ განსაცდელეფი გინიღუ რუდოლფ გრეიხენქ დო მუქ მეხვარ თის თე ირფელიშ გინოღალას?

¹³ ამდღა მილიონობით იეჰოვაშ მსახურ მეჸუნს იესოშ მაგალითის — თინეფს დღას ვაჭყორდუნა იმენდი დო ვარზენა განსაცდელეფს თიშ უფლებას, ნამდა დასუსტას მუნეფიშ რწმენა. ქობძირათ რუდოლფ გრეიხენიშ მაგალითი, ნამუქით გერმანიას 1925 წანას დებად. თინა გიშინ სურათეფ ბიბლიურ სცენეფით, ნამუთ მუშ ჸუდეს კიდალეფს მიკობუდ. თიქ თქუ: «ართ სურათშე იძირედ „გერ დო კირიბი, ქაცარ დო ჯიქი, გინ დო ჯილო — თინეფ ართიანს ვაცილუნა დო ბაღანა ბოშ ეწოჸუნს . . .“. თეცალ სურათეფქ მანგარო იმოქმედ ჩქიმწკუმა» (ეს. 11:6—9). ჯიმა რუდოლფის ვაუდინუაფ რწმენა, თიშ უმკუჯინუო ნამდა თის წანეფიშ დინახალე თხოზუდ გესტაფო დო უკულ აღმოსავლეთ გერმანიაშ კომუნისტურ „შტაზი“.

¹⁴ თის შხვა საშინელ განსაცდელეფქ ხოლო აჸუ გინაღალარქ. თიშ დიდაქ რავენსბრუკიშ საკონცენტრაციო ბანაკის ტიფით დოღურ, თიშ მუმაქ თეშ მისუსტ რწმენას, ხე ქუმაჭარ დოკუმენტის, სოდეთ აცხადენდ, ნამდა უკვე ვარდ იეჰოვაშ მოწმე. ციხეშე გითულაშ უკულ რუდოლფი სარაიონო ზედამხედველო მსახურება ქიდიჭყ; ჭიჭე ხანიშ უკულ სკოლა „გალაადი“ გემკორთ. სკოლაშ თებაშ უკულ ჩილეშა გუტუეს, სოდეთ სარაიონო ზედამხედველო მსახურენდ. მარა რუდოლფიშ განსაცდელეფ კინ იგრძელებუდ. თიქ, მისიონერო მსახურენდუნ ფერ და, პაციწკუმა დექორწინ ართ წანაშ უკულ თინეფს ახალდაბადებულ ბაღანაქ დუღურეს. ჭიჭე ხანიშ უკულ რუდოლფის მუშ საჸოროფო ოსურქ ხოლო დოუღურ, ნამუთ 43 წანერ რდუ. რუდოლფიქ თე ირფელ გეგნიღ. მართალ რე, თინა უკვე ასაკის რდუ დო ჯამრთელობა ხოლო ვა უღუდ, მარა პიონერო დო უხუცესო მსახურენდ, მუჟამსით თიშ ბიოგრაფიაქ იჭარ 1997 წანაშ 1 აგვისტოშ „გინაჯინალ კოშკის“, (გვ. 20—25) ^[1]

15. მუ თანამედროვე მაგალითეფ მიღუნა თიშ, ნამდა იეჰოვაშ მოწმეეფ ურზუნა თხოზინს?

¹⁵ იეჰოვაშ მოწმეეფი თხოზინიშ უმკუჯინუო ხიოლ დო იმენდის ვადინუანა. მაგალთო, ჩქინ და დო ჯიმალეფი ციხეს ხენა ერიტრეას, სინგაპურს დო სამხრეთ კორეას, მუშენდა თინეფ იესო ქრისტეშ სიტყვას მეჸუნა, ნამდა ვეჭოფან იარაღი (მათ. 26:52). ოშობით პატიმარეფ შქას რენა ისაკი, ნეგადა დო პაულოსი, თინეფი 20 წანაშე მეტ რე ერიტრეაშ ციხეს ხენა! თექ სასტიკო ოქცუნა, თიშ საშუალება ვა უღუნა მშობლეფს მიკულუან, დო ვართ თიშ — დექორწინან. თეშ უმკუჯინუო, იშენით ართგურო სკიდუნა. ჩქინ ვებ-გვერდის jw.org შემლებუნა ბძირათ, მუშმამანგარა რწმენა რჩქუ თინეფიშ სახეეფშე. ციხეშ მათხილეფ ხოლო დიდ პატის ცენა თინეფს.

16. მუჭო ფთხილანა მანგარ რწმენა?

¹⁶ ღორონთიშ ხალხის არძას ვათხოზუნა სასტიკო. თინეფიშ რწმენაშ გამოცდეფი შხვადოშხვანერ რე. ბრელ სიღარიბეს ეთურე, ნამთინე ჩხუპიშ დო არეულობაშ თუდო ცხოვრენს ვარდა სტიქიურ უბედრობა გიანთხუ დუც. ბრელქ მოსე დო შხვა პატრიარქეფცალო ვარია თქუ კარიერაშე დო თიშე, ნამდა თე ქიანას წარმატებულ დო გიმორჩქინელ რდესკონ. თინეფ მთელ მუნეფიშ ძალეფით ოცადუნა, ვეგნაჸუნან ქონებაშ შაყარუას დო ვეფიქრან ხვალე მუნეფიშ დუდშო. თეშო თინეფს ოხვარ იეჰოვაშ ჸოროფა დო თი დუნაპირებუშ მანგარ რწმენა, ნამდა ღორონთ მოსპუნს უსამართლობას დო მუშ ართგურ მსახურეფს დაჯილდოვენს მარადიულ სიცოცხლეთ ახალ სამართლიან ქიანას (წეკითხით ფსალმუნიშ 37:5, 7, 9, 29).

17. მუშ კეთება გაფუ გინოჭყვიდილ დო მუ იჸუაფ განხილულ უკულიან სტატიას?

¹⁷ თე სტატიაშე ქობძირით, ნამდა ლოცვა დო ღორონთიშ დუნაპირებშე ფიქრის შეულებ გამიმანგარან რწმენა. თენა მიმეხვარებუნა, ქუგურზათ რწმენაშ გამოცდეფს დო მთელ ჩქინ ყურადღება გეგნიბღათ თი იმენდიშა, ნამუშ საფუძვლიან მოლოდინ ნამდვილო მიღუნა. მარა რწმენა, ნამუშ გურშენ ბიბლიას ჭარუნ, ხოლო მეტის ნიშნენს. თეშ გურშენ რაგად იჸუაფ უკულიან სტატიას.