ახალგაზრდა ჯიმალეფ, მუჭო შეილებნა მიღათ შხვეფშე ნდობა?

1. მუშ რაგად შილებე ახალგაზრდა ჯიმალეფშე?

ახალგაზრდა ჯიმალეფ, ბრელ მუდგარენ შეილებნა აკეთათ კრებაშო. თქვანდე უმენტაშ ძალიერ დო ენერგიათ ეფშა რე (იგავ. 20:29). თქვა კრებაშო მართალო სასარგებლო რეთ. ალბათ უჯინეთ დროს, მუჟამსით მომსახურეთ დენიშნებუთ. მარა შილებე გინაფლენდათ, ნამდა შხვეფს ნაბეტან ახალგაზრდათ ვარდა გამოუცდელო მიორჩქუთ მნიშვნელოვან საქმეშ ოკეთებელო. მართალ რე, ახალგაზრდა რეთ, მარა ასე ხოლო შეილებნა მუდგარენეფიშ კეთება, თანაკრებელეფშე ნდობა დო პატიცემა დემსახურათინ.

2. მუს გუვარჩიენთ თე სტატიას?

² თე სტატიას ყურადღებას გუვამახვილენთ მეფე დავითიშ ცხოვრებაშე. ჩქი ქიგნვოჯინეთ იუდაშ ჟირ მეფეშ, ასა დო იეჰოშაფატიშ, ცხოვრებას მოხვალამირ შემთხვევეფს. გუვარჩიენთ ნამთინე სირთულეს, ნამდგას თე სუმ ქომოლკოჩიქ შეხვადჷ. მუჭო იმოქმედეს თინეფქ თეცალ დროს დო მუშ გურაფა შეულებნა ახალგაზრდა ჯიმალეფს თინეფიშ მაგალითეფშე.

მუს ბგურაფლენთ მეფე დავითშე?

3. მუ რე ართ-ართ მხარე, მუდგათ შეილებნა ქიმეხვარათ ხანშა მიშულირეფს კრებას?

³ ახალგაზრდობას დავითიქ გევითარ უნარეფ, ნამდგას შხვეფ აფასენდეს. არგამა რე, თინა სულიერ პიროვნება რდუ. დავითი ბრელს ხანდენდჷ, ნამდა ჯგირ მუსიკოს ჸოფედკო დო თე ნიჭის ღორონთიშ ცხებულ მეფე, საულს, ქასიამოვნუკონ თიშენ გიმირინუანდჷ (1 სამ. 16:16, 23). ახალგაზრდა ჯიმალეფ, ხომ ვაიღნა თიცალ უნარეფ, ნამდგათ შეილებნა მეხვარათ შხვეფს კრებას? მუშო ოკო რაგად, ბრელს გაღვენუნა. მაგალთო, შილებე ორწყედათ, ნამდა ხანშა მიშულირეფ აფასენა თქვან მოხვარას, მუჟამსით ოძირანთ, მუჭო გიმირინუან პლანშეტეფ დო შხვა ელექტრონულ საშვალებეფ, ბიბლიაშ პირად გურაფაშო დო კრებაშ შეხვალამეფშო. თქვა შეილებნა მეხვარათ ხანშა მიშულირეფს, მუშენდა გარჩქილენა თანამედროვე ტექნოლოგიეფიშ.

4. დავითცალო, მუ თვისებეფ ოკო გავითარან ახალგაზრდა ჯიმალეფქ? (ქოძირით სურათ გალენ გვერდის).

⁴ მუშ ირდღაშიან ცხოვრებათ დავითიქ დამტკიც, ნამდა რდუ პასუხიშმგებლობა უღუდ ფერ დო სანდო პიროვნება. მაგალთო, ახალგაზრდობას, თინა ბრელს ხანდენდჷ, ნამდა მუამუშიშ შხურშე ქიზრუნკო, მუდგაქ საშიშ საქმექ იჸუ. უმოს გვიანო დავითიქ მეფე საულს ეუნწყჷ: „სქან მსახურ მუამუშიშ შხურიშ ჭყიშ რე. ლომ ვარდა თუნთ თის ქიგიანთხუდ დო შხურს ქიხვამლუანდუნ, მა ქიგვათხოზუდ, ქუდვორაგუანდჷ დო პიჯშე მიდვუღანდჷ შხურს“ (1 სამ. 17:34, 35). დავით პასუხიშმგებლობას გინაფლენდჷ, ნამდა ქიზრუნკო შხურშე დო გაბედულო ბრძოლენდჷ თინეფიშ დაცვებელო. ახალგაზრდა ჯიმალეფს შეულებნა მიაჸუნან დავითიშ მაგალითის დო მთელ გურით შეასრულან დავალება, მუდგაქ მიაჩეს.

5. მუჭოთ ფსალმუნიშ 25:14-შე იძირე, მუ რე არძაშ უმოს მნიშვნელოვან, მუთ ახალგაზრდა ჯიმალეფს შეულებნა აკეთან?

⁵ ახალგაზრდა დავითიქ ღორონთწკუმა პირად, ხოლოშიან ურთიერთობა გევითარ. თე ურთიერთობა ბრელით უმოს მნიშვნელოვან რდუ, ვინემ თიშ გაბედულება ვარდა სიმებიან ინსტრუმენტიშ მეგამაშ უნარ. იეჰოვა დავითშო ხვალე ღორონთ ვარინ, ხოლოშიან მეგობარ ხოლო რდუ (წეკითხით ფსალმუნიშ 25:14). ახალგაზრდა ჯიმალეფ, არძაშ უმოს მნიშვნელოვან, მუთ თქვა შეილებნა აკეთათ, ზეციერ მუმაწკუმა ურთიერთობაშ გამანგარება რე დო შედეგო შილებე მეტ პასუხიშმგებლობეფ მიღათ კრებას.

6. მუ უარყოფით აზრეფ უღუდ ნამთინეს დავითიშ გურშენ?

⁶ დავითიქ ოკო გიორჯგინკო უარყოფით აზრეფს, ნამდგას შხვეფ თიშ გურშენ ფიქრენდეს. მაგალთო, მუჟამსით დავითიქ გეგნოჭყვიდ, ებრძოლკო გოლიათის, მეფე საულქ მინდომ, გეგნაფიქრებაფუკო დო უწუ: „დიო ხოლო ბაღანა ბოშ რექ“ (1 სამ. 17:31—33). ჭიჭე ხანიშ წოხოლე დავითის მუშ ჯიმალეფქ უპასუხიშმგებლობა ქეკაბრალეს (1 სამ. 17:26—30). მარა იეჰოვას დავითი გამოუცდელ დო უპასუხიშმგებლო პიროვნებათ ვემიორჩქუდ. თინა ჯგირო იჩინენდჷ თე ახალგაზრდას. მუშ მეგობარიშ, იეჰოვაშ, ძალაშა მენდებათ დავითიქ გოლიათ დოჸვილ (1 სამ. 17:45, 48—51).

7. მუშ გურაფა შეილებნა დავითიშ ართ-ართ შემთხვევაშე?

⁷ მუშ გურაფა შეილებნა დავითიშ შემთხვევაშე? თინა მოთვინებაშ ჯგირ მაგალითის ირზენს. შილებე ბაღანობაშე გიჩინენან თინეფს, დროქ დესაჭირან თიშ მიოხვამლაფარო, ნამდა უკვე მირდით. მარა დარწმუნებულ რდათ, იეჰოვა თიშე უმოს მეტის ორწყე, ვინემ გარეგნულო იძირე. თინა გიჩინენა დო უჩქჷ, მუშ კეთება შეილებნა (1 სამ. 16:7). გამანგარით ღორონთწკუმა თქვან ურთიერთობა. დავითი გურგედვალირო ოკვირუდ იეჰოვაშ გუნაჭყეფუეფს დო ფიქრენდჷ, მუს ოგურუანდჷ თე ირფელ გუმაჭყაფალიშ გურშენ (ფსალმ. 8:3, 4; 139:14; რომ. 1:20). თეს გეძინელ, შეილებნა იეჰოვას ქოთხუათ საჭირო ძალა. მაგალთო, თანაკლასელეფ ხომ ვაგგაძიცანა თქვან რწმენაშ გურშენ? თაშ ქორენ-და, ქოთხით იეჰოვას ლოცვათ, ქიმგეხვარან თე სირთულეშ გარზებას. გეგმირინეთ თი პრაქტიკულ რჩევეფ, ნამუთ მოჩამილ რე მუშ სიტყვას დო ბიბლიაშა გერსხილ პუბლიკაციეფს დო ვიდეოეფს. ირ შემთხვევას, მუჟამსით ორწყეთ, მუჭო გოხვარნა იეჰოვა სირთულეეფიშ გერჯგინას, უმოსო გეგემანგარებნა თიშ ნდობა. თეწკუმა ართო, იეჰოვაშა რეთ მენდებულინ თის, შხვეფ ქოძირნან, თინეფ ხოლო გონდუდან იჸი.

8, 9. მუქ მეხვარ დავითის, მოთვინებათ უჯინკო მუშ მეფობას დო მუშ გურაფა შეულებნა ახალგაზრდა ჯიმალეფს თიშ მაგალითშე?

⁸ გუვარჩუათ, ხოლო მუ განსაცდელს შეხვად დავითიქ. თიშ უკულ, მუთ მეფეთ იჸუ ცხებულქ, თის ბრელ წანას აჸუ ოჯინექ, სოიშახ ოფიციალურო გინირთუდ იუდაშ მეფეთ (1 სამ. 16:13; 2 სამ. 2:3, 4). მუქ მეხვარ დავითის, თე დროშ დინახალე, მოთვინებათ იჯინკო? თის გურ ვა გოტახუ დო უმოქმედოთ ვა რდუ. თეშ მანგიორო, თიშა აფუდ ყურადღება გინოღალირ, მუდგაშ კეთება შეულებუდ. მაგალთო, ფილისტიმელეფიშ დიხაშა ნტებულ დავითიქ, თე დრო ისრაელიშ ნტერეფიშ წინააღმდეგ ობრძოლებერო გეგმირინუ. თეშნერო თიქ დეცვჷ იუდაშ ტერიტორია (1 სამ. 27:1—12).

⁹ მუშ გურაფა შეულებნა ახალგაზრდა ჯიმალეფს დავითიშ მაგალითშე? ირნერ შესაძლებლობა გეგმირინეთ, ნამდა მემსახურათ იეჰოვას დო ჯიმალეფს. დეფიქრით ჯიმა რიკარდოშ მაგალითშე.b ბაღანობაშე მოჸუნაფილ თინა სრულ დროთ პიონერო მსახურებაშე ოცნებენდჷ, მარა უხუცესეფქ უწუეს, ნამდა დიო თეშო მზათ ვა რდუ. თის ვართ გურ ელაფ დო ვართ გურ მორთუმ, თეშ გინაწონს, უმოს მეტ დროს უთმენდჷ მსახურებას. რიკარდო იჩიებ: „მუჟამსით ულირს იფშინანქ, ვორწყექ, ნამდა მართალო მოსაჭირუდ გაუჯგუშება. ყურადღება ეფექტურ კინ მეკითხირეფიშ კეთებაშა გეგნიბღჷ დო ვოცადუდ არძაშა ქიმემრთუმუდკო, მით მსახურებას ინტერესის გიმირჩქინანდჷ. ართ პიროვნებაწკუმა ბიბლიაშ გურაფა ხოლო ქიდიბჭყჷ. გამოცდილებაწკუმა ართო, დუდიშ იმენდიქ ხოლო მუმაძინ“. ასე რიკარდო სრულ დროთ პიონერო დო მომსახურეთ მსახურენს.

10. მუ აკეთ დავითიქ ართშა, მნიშვნელოვან გადაწყვეტილებაშ მეღებაშახ?

¹⁰ დეფიქრით დავითიშ ხოლო ართ შემთხვევაშე. მუჟამსით თინა მუშ ხალხწკუმა ართო შხვა ქიანაშა რდუ ნტებულ, თექ მუნეფიშ ოჯახეფქ აჸუეს დატებელქ, ნამდა ოჩხუპებშა მიდურთუმდესკო. ქომოლკათა ჸუდეს ვა რდესინ თეშ, თინეფიშ ოჯახეფს ნტერქ ქიგიანთხჷ დო ტყვეეფ მიდეჸონეს. მუჭოთ გამოცდილ მებრძოლს, დავითის შეულებუდ იფიქრუკო, ნამდა თინეფიშ დარსხებელო ჯგირ გეგმა მაფიქრებედ. თეშ მანგიორო, დავითი ხემძღვანელობაშო იეჰოვას მიოჯინედ. მღვდელ აბიათარიშ საშვალებათ თიქ იეჰოვას კითხჷ: „გივათხოზაო ყაჩაღეფიშ რაზმის?“ იეჰოვაქ უწუ, ნამდა შეულებუდ თაშ მოქციება დო დარწმუნ, წარმატებულ იჸუაფუდუნ (1 სამ. 30:7—10). მუშ გურაფა შეილებნა თე შემთხვევაშე?

11. მუშ კეთება შეილებნა გადაწყვეტილებაშ მეღებაშახ?

¹¹ გადაწყვეტილებაშ მეღებაშახ შხვეფს ქელაკითხეთ. რჩევა ქოთხით მშობლეფს. გამოცდილ უხუცესეფწკუმა ჩიებაშ დროს ხოლო ჯგირ რჩევეფს მიღენთ. იეჰოვა ონდჷ თე დანიშნულ ქომოლკათას დო თქვა ხოლო შეილებნა ენდათ. თინა უხუცესეფს თეშ უჯინე, მუჭოთ „ძღვინს“ კრებაშო (ეფეს. 4:8). თინეფიშ რწმენაშ მაგალით დო ბრძნულ რჩევეფ ჯგირობუას მოიღანა. მორთ ასე გუვარჩუათ, მუშ გურაფა შემლებნა მეფე ასაშ მაგალითშე.

მუს ბგურაფლენთ მეფე ასაშე?

12. მუ თვისებეფ უღუდ ასას, მუჟამსით მეფობა დიჭყჷ?

¹² ახალგაზრდობას მეფე ასა თანდაბალ დო გაბედულ რდუ. მაგალთო, მუჟამსით მუშ მუმაშ, აბიაშ, უკულ მეფეთ გინირთჷ, თიქ კერპთაყვანიშმცემლობაშ წინააღმდეგ მიდართჷ. თეწკუმა ართო, „თიქ უწუ იუდას, ნამდა უგორდესკო იეჰოვა, მუნეფიშ ჯვეშეფიშ ღორონთ, დო დეცვესკო თიშ კანონეფ დო მცნებეფ“ (2 მატ. 14:1—7). მუჟამსით ეთიოპ ზერახიქ 1 000 000-იან ჯარით იუდაშ წინააღმდეგ გიშართჷ, ასაქ ბრძნულო მიქცუ დო იეჰოვას თხუ მოხვარა. თიქ უწუ: „იეჰოვა, სი ძალიერიშ მოხვარა ხოლო შეილებ დო უჭყანიეშ ხოლო. ქიმმეხვარით, იეჰოვა, ჩქინ ღორონთ, მუშენდა სქანდა ვორეთ მენდებულ“. ასაშ თე სქვამ სიტყვეფ ოძირანს, მუჭო ჯერდჷ თის, ნამდა იეჰოვას შეულებუდ დეცვუკო მუ დო მუშ ხალხ. ასაქ მიენდჷ მუშ ზეციერ მუმას დო „იეჰოვაქ გიორჯგინ ეთიოპეფს“ (2 მატ. 14:8—12).

13. მუ მდგომარეობას ინოლ ჭიჭე ხანშა ასაქ დო მუშენ?

¹³ მუშო ოკო რაგად, 1 000 000-იან ჯარშა შეხვალამა ვა რდუ ადვილ, მარა ასაქ თე სირთულეს წარმატებულო გიორჯგინ. სანარღოთ, უმოს ჭიჭე პრობლემას ქეშეხვადუნ, თის იეჰოვაშა ველუკითხირალ. მუჟამსით ისრაელიშ უბადო მეფე ბააშაქ იუდაშ წინააღმდეგ გიშულა მინდომ, ასაქ მოხვარა სირიაშ მეფეს ქოთხუ. თე გადაწყვეტილებას უბედრობაქ ქუმაჸუნ! თიშ უკულ ასას ირიათო ომეფ უღუდ. მუ რდუ თეშ მიზეზ? წინასწარმეტყველ ხანანიშ საშვალებათ იეჰოვაქ უწუ, ნამდა თენა იეჰოვაშ მანგიორო სირიაშ მეფეშა მენდებაშ შედეგ რდუ (2 მატ. 16:7, 9; 1 მეფ. 15:32). მუშ გურაფა შეილებნა თავრეშე?

14. მუჭო შეილებნა მიენდათ იეჰოვას დო მუჭოთ 1 ტიმოთეშ 4:12-ს ჭარჷ, მუ მაჸუნუ თეს შედეგო?

¹⁴ ვადინუათ თანდაბლობა დო ვემიოტუათ იეჰოვაშა მენდება. მუჟამსით ინათით, იეჰოვაშ დიდ რწმენა დო ნდობა გიმირჩქინით დო თიქ ხოლო ხიოლით მერჩეს თიშ პატი, ჸოფედითკო მუშ ოჯახიშ წევრეფ. ასე მთავარ რე, გაგრძელათ თიშა მენდება. შილებე დიდ გადაწყვეტილებეფიშ დროს ადვილ რდას იეჰოვაშა მენდება, მარა მუ ირაგადე შხვა სიტუაციეფიშ გურშენ? მანგარ მნიშვნელოვან რე, მივენდათ იეჰოვას თიცალ გადაწყვეტილებეფიშ დროს ხოლო, ნამუთ გართობას, სამუშას დო ცხოვრებისეულ მიზნეფს ოხუ! თიშ მანგიორო, ნამდა თქვან სიბრძნეს ენდათ, დოგორით თიცალ ბიბლიურ პრინციპეფ, ნამუთ თქვან მდგომარეობას მეურე დო გეგმირინეთ თინა (იგავ. 3:5, 6). თაშ ქიმიქციებუთ-და, იეჰოვას გურს გუხარენთ დო პატიცემას დემსახურენთ თანაკრებელეფშე (წეკითხით 1 ტიმოთეშ 4:12).

მუს ბგურაფლენთ მეფე იეჰოშაფატშე?

15. მუჭოთ 2 მატიანეშ 18:1—3; 19:2-ს ჭარჷ, მუ შეცდომეფს უშვენდჷ იეჰოშაფატი?

¹⁵ მუშო ოკო რაგად, არძა პიროვნება არასრულყოფილ რე დო თინეფ შქას თქვა ხოლო, ათეშენ მინშა მეჩირთუთ. მარა თექ ოკო ვეგეცილან, მუთ შეილებნან ირფელ გაკეთათ იეჰოვაშ მსახურებას. დეფიქრით მეფე იეჰოშაფატიშ მაგალითშე. თის ბრელ ჯგირ თვისება უღუდ. ახალგაზრდობას „მუამუშიშ ღორონთის ომსახურუდ“ დო თიშ მცნებეფს იცვენდჷ. თეს გეძინელ, თიქ მთავრეფ გოუტუ იუდაშ შხვადოშხვა ქალაქეფშა, ნამდა უგურუაფდესკო ხალხშა იეჰოვაშ გურშენ (2 მატ. 17:4, 7). თიშ უმკუჯინუო, ნამდა იეჰოშაფატი ჯგირ გურიშ კოჩ რდუ, მინშა არასწორ გადაწყვეტილებეფს ღებულენდჷ. ართ თეცალ გადაწყვეტილებაშ გურშენ თის იეჰოვაშ წინასწარმეტყველქ მკაცრ რჩევა ქიმეჩ (წეკითხით 2 მატიანეშ 18:1—3; 19:2). მუშ გურაფა შეილებნა თე შემთხვევაშე?

16. მუშ გურაფა შეილებნა რაჯივიშ მაგალითშე?

¹⁶ მიღით რჩევა დო ქიმიაჸუნით თის. ბრელ ახალგაზრდა ჯიმაცალო, ალბათ თქვანო ხოლო რთულ რე, იეჰოვაშ მსახურება პირველ ადგილს ქიგიორინუათ. გურქ ვა გოიტირხან. დეფიქრით ართ ახალგაზრდა ჯიმაშ, რაჯივიშ, მაგალითშე. მუშ მოზარდობაშ წანეფიშ გურშენ თინა იჩიებ: „მინშა ვა მიჩქუდ, მუშ კეთება მოკოდ. შხვა ახალგაზრდეფცალო, მა ხოლო უმოსო სპორტ დო გართობა მოინტერესუდ, ვინემ კრებაშ შეხვალამეფშა დო მსახურებაშა ულა“. მუქ მეხვარ რაჯივის? ართ უხუცესიქ, ნამუთ თიშ მდგომარეობათ დაინტერესებულ რდუ, რჩევა ქიმეჩ. რაჯივი იშინანს: „თიქ მიმეხვარ, 1 ტიმოთეშ 4:8-ს ინოჭარილ პრინციპის ქინვანჭკო“. რაჯივქ თანდაბლურო მიღჷ რჩევა დო დეფიქრჷ, მუ რდუ მთავარ მუშ ცხოვრებას. თინა იჩიებ: „გინობჭყვიდ, ჩქიმ ცხოვრებას სულიერ მიზნეფ პირველ ადგილს ქიგემრინუაფუდკო“. მუქ მაჸუნ თეს შედეგო? მუსხირენ წანაშ უკულ რაჯივქ მომსახურეთ დენიშნჷ.

ქეცადით, თქვან ზეციერ მუმას ოამაყუდათ

17. მუჭო უჯინე უნჩაშ კათა თი ახალგაზრდა ჯიმალეფს, მით იეჰოვას ომსახურნა?

¹⁷ ახალგაზრდა ჯიმალეფ, რჯერდან, უნჩაშ კათა, მიდგაწკუმა ართო ომსახურუთ იეჰოვას, მანგარო გაფასენა! (სოფ. 3:9). თინეფს უჸორა თქვან დუდგინოდვალირობა, მონდომება დო ენთუზიაზმ, ნამდგას საქმეშ ოკეთებელო გიმირჩქინანთ. თინეფშო მანგარ ძვირფასეფ რეთ (1 იოან. 2:14).

18. მუჭოთ იგავეფიშ 27:11-ის ჭარჷ, მუს გინაფლენს იეჰოვა თი ახალგაზრდა ჯიმალეფიშ მიმართ, მით თის ომსახურნა?

¹⁸ დღას ვაგგოჭყორდან, იეჰოვას უჸორთ დო გონდუნა. თიქ იწინასწარმეტყველ, ნამდა ბოლო დღალეფს ახალგაზრდეფიშ ჯარ იჸუაფუდ, მით მზადყოფნას გეგმირჩქინანდჷ (ფსალმ. 110:1—3). იეჰოვას უჩქჷ, ნამდა გიჸორა თინა დო გოკონა, ნამ შეილებნან თით ემსახურათ. ათეშენ მუთვინით შხვეფს დო თქვან დუდის ხოლო. მუჟამსით მეჩირთუთ, ქუმურჩქილეთ თინეფს, მით გოგურუანა დო რჩევას გარზენა; თე ირფელს თეშ უჯინით, მუჭოთ იეჰოვაშე მოჩამილს (ებრ. 12:6). ირფელ გაკეთით ნებისმიერ დავალებაშ შეიოსრულებერო, ნამუთ მიგაჩამუნა. მუთ მთავარ რე, ქეცადით, არძა საქმეთ, მუდგას ორთუთ, თქვან ზეციერ მუმას ოამაყუდათ (წეკითხით იგავეფიშ 27:11).