ვაშქირიტათ „იაჰიშ ალ“

1. მუჭო რე ბიბლიას ეჭარილ ნამდვილ ჸოროფა?

ᲸᲝᲠᲝᲤᲐᲨ „ალ ბორბონჩია დაჩხირ რე, იაჰიშ ალ რე. ჸოროფა ბრელ წყარს ხოლო ვაშქირიტე, ვართ მალწყარეფს მარიებე თიშა“b (ქებ. 8:6, 7). მუშმასქვამათ რე ეჭარილ ნამდვილ ჸოროფა! თე სიტყვეფ არწმუნენს დაქორწინებულ წყვილეფს, ნამდა შეულებნა უღდან ძალიერ დო ულიებ ჸოროფა ართიანიშ მიმართ.

2. მუ ოკო აკეთან ჩილ დო ქომონჯიქ, ნამდა თინეფიშ ჸოროფაქ ვაშქირტას?

² ჩილ დო ქომონჯშა რე დამოკიდებულ, იჸუაფ დო ვარ თინეფიშ ჸოროფა ირიათო ძალიერ. მაგალთო, დაჩხირს ირიათო დიშკას ქიმთუტურუანთ-და, ბორბონჩია იჸუაფ, მარა თეშ კეთებას მივოტენთ-და, თინა დოშქირტუ. თეშნერო, ჩილ დო ქომონჯიშ ჸოროფა უმოს ძალიერ იჸუაფ, მუჟამსით ჟირხოლო მუთხილუანს თი ურთიერთობას, ნამუთ ართიან შქას უღნა. მინშა შილებე ფინანსურ დო ჯამრთელობაშ პრობლემეფქ ვარდა ბაღანეფიშ რდუალაწკუმა დაკავშირებულ სირთულეეფქ იმოქმედას ჩილ დო ქომონჯიშ ჸოროფაშა დო ჭიე-ჭიეთ დოშქირიტას თინა. დაქორწინებულ ქორეთ-და, მუჭო შეილებნა ვაშქირიტათ „იაჰიშ ალ“ დო გიღდან ბედნერ ქორწინება? თე სტატიას გუვარჩიენთ სუმ რჩევას, ნამუთ მიგეხვარებნა, გამანგარათ ართიანწკუმა ხოლოშიან ურთიერთობა დო გიღდან ბედნერ ოჯახურ ცხოვრება.c

ᲒᲐᲛᲐᲜᲒᲐᲠᲘᲗ ᲘᲔᲰᲝᲕᲐᲬᲙᲣᲛᲐ ᲮᲝᲚᲝᲨᲘᲐᲜ ᲣᲠᲗᲘᲔᲠᲗᲝᲑᲐ

3. მუჭო მეხვარებ წყვილს იეჰოვაწკუმა ხოლოშიან ურთიერთობა, ნამდა უღდან ძალიერ ჸოროფა ართიანიშ მიმართ? (ეკლ. 4:12; ქოძირით სურათ).

³ „იაჰიშ ალქ“ ვაშქირტასინ, ჩილ დო ქომონჯიქ ირფელ ოკო გაკეთან, ნამდა გამანგარან იეჰოვაწკუმა ხოლოშიან ურთიერთობა. მუჭო მეხვარებ თენა თინეფიშ ქორწინებას? მუჟამსით ჩილ დო ქომონჯის ხოლოშიან ურთიერთობა უღნა იეჰოვაწკუმა, ირიათო მზათ რენა, მიღან რჩევეფ მუნეფიშ ზეციერ მუმაშე. თენა ოხვარ თინეფს, ეიჩილითუან პრობლემეფ დო გიორჯგინან თი ირფელს, მუდგაქ შილებე „დოშქირიტას“ თინეფიშ ჸოროფა (წეკითხით ეკლესიასტეშ 4:12). სულიერო მოწიფულ ადამიან ოცად, მიაჸუნას იეჰოვაშ მაგალითის დო გავითარას თიცალ თვისებეფ, მუნერით იეჰოვას უღჷ, მაგალთო: სიკეთე დო მოთვინება, დო თეს გეძინელ, აპატუას შხვეფს, მუჭოთ თეს ღორონთ ორთჷ (ეფეს. 4:32—5:1). თი ჩილ დო ქომონჯის, მით თეცალ თვისებეფს გიმირჩქინანა, უმოს ადვილ აფნა, გამანგარან ართიან შქას ჸოროფა. ართ და, ლენა, ნამუთ 25 წანაშე უმოს რე, მუთ დაქორწინებულ რე, იჩიებ: „უმოს ადვილ რე, გიჸორდას დო პატის ცენდე თიცალ პიროვნებას, მით სულიერო მოწიფულ რე“.

4. მუშენ გიშეგორ იეჰოვაქ იოსებ დო მარიამ მესიაშ მშობლეფო?

⁴ გუვარჩუათ ბიბლიურ მაგალით. მუჟამსით იეჰოვაქ ოკო გინოჭყვიდკო, მი იჸუაფდეს მესიაშ მშობლეფ, თიქ დავითიშ ანაყუ გამნარყშე მარიამ დო იოსებ გიშეგორ. მუშენ აკეთ თენა? მუშენდა ქოთ იოსების დო ქოთ მარიამს ხოლოშიან ურთიერთობა უღდეს თიწკუმა. თეს გეძინელ, იეჰოვას ჯგირო უჩქუდ, ნამდა თე წყვილ მუნეფიშ ქორწინებას, ზუსტას თიშ ჸოროფათ გამანგარენდჷ. მუშ გურაფა შეულებნა დაქორწინებულ წყვილეფს იოსებ დო მარიამიშ მაგალითშე?

5. მუშ გურაფა შეულებნა ქომონჯეფს იოსებშე?

⁵ იოსებ ირიათო მეჸუნდჷ იეჰოვაშ ხემძღვანელობას, მუდგაქ მეხვარ თის, ჸოფედკო ჯგირ ქომონჯ. ბიბლიას მოშინაფილ რე სუმ შემთხვევა, მუჟამსით თიქ ღორონთშე კონკრეტულ მითითებეფ მიღჷ. სუმხოლო შემთხვევას იოსებიქ დემორჩილ იეჰოვას, თიშ უმკუჯინუო, ნამდა თენა იშენდოიშენ ადვილ ვა რდჷ თიშო (მათ. 1:20, 24; 2:13—15, 19—21). ზუსტას მორჩილებაშ შედეგ რდჷ თინა, ნამდა იოსებ ირიათო თხილანდჷ მარიამს, ელურდჷ დო ზრუნენდჷ თიშე. მუშო ოკო რაგად, თე ირფელიშ გურშენ მარიამს უმოსო ქეჸოროფებუდ იოსებ დო ხოლო უმოსო ცენდკონ იჸიდ პატის. ქომონჯეფ, თქვა შეილებნა მიაჸუნათ იოსებიშ მაგალითის დო ბიბლიაშა გერსხილ რჩევეფით იზრუნათ თქვან ოჯახშა.d ბიბლიურ რჩევეფიშ მეჸუნათ, თიმწკუმა ხოლო, მუჟამსით თენა ადვილ ვა რე, გიმირჩქინანთ მეუღლეშ ჸოროფას დო უმოსო ამანგარენთ ქორწინებას. ვანუატუს მახორუ ართ და, ნამუთ 20 წანაშე უმოს რე, მუთ დაქორწინებულ რე, თეცალ მუდგარენს იჩიებ: „მუჟამსით ჩქიმ ქომონჯ გორუნს დო მეჸუნს იეჰოვაშ ხემძღვანელობას, ხოლო უმოსო ფცენქ პატის. შედეგო, დუდის უმოს თხილერო ბგინაფლენქ დო თიშ გადაწყვეტილებეფს ვონდუქ“.

6. მუშ გურაფა შეულებნა დაქორწინებულ დალეფს მარიამშე?

⁶ მარიამს პირად ხოლოშიან ურთიერთობა უღუდ იეჰოვაწკუმა. თინა ვებაღინუანდჷ ხვალე თის, მუდგას იოსებ ორთუდ იეჰოვაშო დო მუშ რწმენაშ გამანგარებელო პირადო ზრუნენდჷ. მარიამს ჯგირო უჩქუდ წმინდა წერილეფ (ლუკ. 1:46).e თეს გეძინელ, დროს გიმურთუნდჷ თი ირფელშე ფიქრის, მუდგას გურაფლენდჷ (ლუკ. 2:19, 51). მუშო ოკო რაგად, იეჰოვაწკუმა ხოლოშიან ურთიერთობა მეხვარებუდ მარიამს, რდუკო ჯგირ მეუღლე. ამდღა ბრელ დაქორწინებულ და მეჸუნს თიშ მაგალითის. მაგალთო, ართ და სახელო ემიკო თეცალ მუდგარენს იჩიებ: „გათხუალაშახ ჯგირ სულიერ განრიგ მიღუდ, მარა დაქორწინებაშ უკულ, ჩქიმ ქომონჯ ლოცულენდჷ ჩქინო დო ატარენდჷ ოჯახურ თაყვანიშცემას. ვატყუაფუდ, ნამდა ხვალე თის გებჯერდუდ, მუდგას თინა ორთუდ. უკულ ქიმეფხვად, ნამდა ხვალე თე ირფელ ვა რდჷ დასაბაღ დო საჭირო რდჷ, პირადო მა იბზრუნკო თიშო, ნამდა მიღუდკო იეჰოვაწკუმა ხოლოშიან ურთიერთობა. ათეშენ, ასე ირიათო ვოცადუქ, დრო გეგმურთე ლოცვას, ბიბლიაშ კითხირს დო ნაკითხირშე დაფიქრებას, მუთ მოხვარ, მიღდას იეჰოვაწკუმა პირად ხოლოშიან ურთიერთობა“ (გალ. 6:5). დაქორწინებულ დალეფ, მუჟამსით იეჰოვაწკუმა ხოლოშიან ურთიერთობას გავითარენთ, თქვან ქომონჯის უმოს მიზეზ აღვენუ, ქუგოცქუან დო ხოლო უმოსო ქოიჸოროფუან (იგავ. 31:30).

7. მუშ გურაფა შეულებნა წყვილეფს მარიამ დო იოსებიშ მაგალითშე ღორონთიშ ართო თაყვანიშცემაწკუმა დაკავშირებით?

⁷ იოსებ დო მარიამ ართო ხოლო ამანგარენდეს იეჰოვაწკუმა ხოლოშიან ურთიერთობას, მუშენდა ჯგირო არჩქილედეს, მუსხით მნიშვნელოვან რდჷ იეჰოვას ცესკო თაყვან, მუჭოთ ართ ოჯახიქ (ლუკ. 2:22—24, 41; 4:16). თინეფს ბრელ ბაღანა ჸუნდეს დო დიდ ოჯახ უღდეს, მუდგაშ გურშენ შილებე თე ირფელიშ კეთება ადვილ ვა რდჷ თინეფშო, მარა იშენით ორთუდეს თეს. მუ ჯგირ მაგალით რე დაქორწინებულ წყვილეფშო! თქვა ხოლო სქუალეფ ქორჸუნან-და, შილებე ადვილ ვა რდას კრებაშ შეხვალამეფშა დასწრება დო ოჯახურ თაყვანიშცემაშ რეგულარულო ჩატარება. შილებე რთულ თინა ხოლო რდას, ნამდა დრო გეგმურთათ მუდგაინ საკითხიშ ართო გიმორკვიებას დო ართო ლოცვას. მარა რშუდან, მუჟამსით ირფელს გაკეთენთ, ნამდა იეჰოვას ართო ქოცათ თაყვან, უმოსო დეახლოებუთ, მუჭოთ თის, თეშ ართიანს ხოლო. თაშ ნამდა, ირფელ გაკეთით, ნამდა ღორონთიშ თაყვანიშცემა პირველ ადგილს ქიგიორინუათ.

8. ჩილ დო ქომონჯის დაძაბულ ურთიერთობა ქოუღნან-და, მუ ოკო აკეთან, ნამდა უმოს ჯგირობუა მიღან ოჯახურ თაყვანიშცემაშე?

⁸ მარა მუშ რაგად შილებე ჩილ დო ქომონჯის ართიან შქას დაძაბულ ურთიერთობა ქოიღნან-და? თეცალ დროს ოჯახურ თაყვანიშცემაშ ართო ჩატარება შილებე იშენდოიშენ სასიამოვნო პროცეს ვა რდას. ათეშენ, დუდშე შეილებნა ჭიჭე დრო გეგმურთათ ოჯახურ თაყვანიშცემაშ ართო ჩატარებას დო გეგშაგორათ თიცალ თემა, ნამუთ ჟირხოლოს გოინტერესნა. თეშ კეთებათ ართიან ხოლო უმოსო ქიგეჸოროფებნა დო გაღვენუნა თიშ ძალიერ სურვილ, ნამდა ართო ემსახურათ იეჰოვას.

ᲓᲠᲝ ᲒᲔᲒᲛᲣᲠᲗᲘᲗ ᲐᲠᲗᲘᲐᲜᲡ

9. მუშენ ოკო გიმურთან ჩილ დო ქომონჯიქ ართიანს დრო?

⁹ დაქორწინებულ წყვილეფ, თქვან „ჸოროფაშ ალქ“ ვაშქირტასინ, საჭირო რე, დრო გიმურთათ ართიანს. თაშ ქიმიქციებუთ-და, უმოს ხოლოს იჸუაფუთ ართიანწკუმა დო ირიათო გარჩქვენუნა, მუს ფიქრენს დო მუს გინაფლენს თქვან მეუღლე (დაბ. 2:24). ქიდეკვირით, მუ დასკვნაშა მერთჷ ართ წყვილქ, რუსლანქ დო ლილიაქ, დაქორწინებაშ უკულ ხეთეშე. ლილია იჩიებ: „ფიფქრენდით, ნამდა დაქორწინებაშ უკულ, ართიანშო ქიანაშ დრო მაღვენუდეს, მარა თექ თაშ ვა მოხვად. ჟირხოლო მანგარ დაკავებულეფ ვორდით, მუფშენდით დო ჸუდეშ საქმეეფს ვორთუდით. უმოს გვიანო, თე ირფელს ბაღანეფიშ რდუალაქ ქიგიაძინ დო ათეშენ, ართიანშო დრო ვამოსქიდუდეს. ქიმეფხვადით, ნამდა ართიანს დროს ვეგმურთუნდით-და, ჩქინ ურთიერთობა გორგიდუდ დო ჭიე-ჭიეთ ართიანს ჩევეთხიებუდით“.

10. მუჭო შეულებნა დაქორწინებულ წყვილეფს გეგმირინუან ეფესოელეფიშ 5:15, 16-ის მოჩამილ პრინციპ?

¹⁰ მუ ოკო აკეთან წყვილეფქ, ნამდა ართო გატარან დრო? თეშო შილებე საჭიროქ იჸუას დროშ გიშართუალაქ დო გეგმაშ შედგენაქ (წეკითხით ეფესოელეფიშ 5:15, 16). ართ ნიგერიელ ჯიმა, სახელო უზონდუ, თეცალ მუდგარენს იჩიებ: „მუჟამსით გეგმეფს ვონწყუნქ, მუ მუჟამ ოკო ვაკეთე, ჩქიმ ოსურწკუმა ურთიერთობაშო ხოლო გიმოფრთუნქ დროს დო მუთუნს ვა ვარზენქ უფლებას, თე დრო შხვა მუდგარენქ მიდამღას“ (ფილ. 1:10). მოლდოვას მახორუ ართ და ანასტასია, მით რაიონულ ზედამხედველიშ ოსურ რე, გონივრულო ირინუანს მუშ დროს. თინა თეცალ მუდგარენს იჩიებ: „ონდო ჩქიმ მეუღლე მუშ პასუხიშმგებლობეფს ასრულენს, მა ვოცადუქ, თე დრო ჩქიმ პირად საქმეეფშო გეგმიბრინუე. შედეგო, უმოს დრო მოსქიდუნა ართიანწკუმა ურთიერთობაშო“. მარა მუ ოკო აკეთათ, მუჟამსით თიცალ დაკავებულეფ რეთ, ნამდა გიჭირა დრო დოგორათ ართიანწკუმა ურთიერთობაშო?

11. მუ საქმეეფს ორთუდეს ართო აკვილა დო პრისკილა?

¹¹ დაქორწინებულეფს ბრელ მუდგარენიშ გურაფა შეულებნა ქრისტიან წყვილშე, აკვილა დო პრისკილაშე, მით პირველ საუკუნეს ცხოვრენდეს დო და დო ჯიმალეფ მანგარო აფასენდეს (რომ. 16:3, 4). მართალ რე, ბიბლია დეტალურო ვეჭარუნს თინეფიშ ოჯახურ ცხოვრებას, მარა თევრეშე ბგებულენთ, ნამდა აკვილა დო პრისკილა ართო ქადაგენდეს, ართო მუშენდეს დო ართო ოხვარდეს შხვეფს (საქ. 18:2, 3, 24—26). არგამა რე, მუჟამსით ბიბლიას თინეფიშ გურშენ ბკითხულენთ, ირიათო ართო რენა მოშინაფილ დო ვართ ხოლო ცალ-ცალკე.

12. მუშ კეთება შეულებნა ჩილ დო ქომონჯის, ნამდა უმოს დრო გიმურთან ართიანს? (ქოძირით სურათ).

¹² მუჭო შეულებნა წყვილეფს, მიაჸუნან აკვილა დო პრისკილაშ მაგალითის? დეფიქრით, მუშ კეთება შეილებნა თქვა დო თქვან მეუღლეს ართო. მაგალთო, ხომ ვა რე თიცალ საქმეეფ, მუდგას ცალ-ცალკე ორთუთ, მარა შეილებნა ართო გაკეთათ? მუჭოთ მიფშინეთ, აკვილა დო პრისკილა ართო ქადაგენდეს. თქვა ქოქადაგენთო ართო რეგულარულო? თინეფ სამუშას ხოლო ართო რდეს. შილებე თქვა დო თქვან მეუღლე ართო ვა მუშენთ, მარა შეილებნანო ჸუდეშ საქმეეფ გაკეთათ ართო? (ეკლ. 4:9). მუჟამსით თე ირფელს გაკეთენთ, ართიანწკუმა ჩიებაშ შესაძლებლობა ქუმგაჩამნა დო უმოსო ქიგინანთ, ნამდა ართ გუნდ რეთ. ართ ჯიმა რობერტ, ნამუთ 50 წანაშე უმოს რე დაქორწინებულ რე, თეცალ მუდგარენს იჩიებ: „ალალას ქოფთქუენ, მა დო ჩქიმ მეუღლეს ართო მოსვანჯაშო ბრელ დრო ვამოსქიდნა, მარა მუჟამსით მა სენეფს ფრჩხუნქ დო თინა ოსქირუანს ვარდა გალე ეზოს მუფშენქ დო თინა ჩქიმ მახვარებშა გიმურს, დუდის მანგარ ბედნერო ბგინაფლენქ. საქმეეფიშ ართო კეთება მა დო ჩქიმ ოსურს მოხვარნა, უმოსო დევეახლოვათ ართიანს დო ჩქინ ჸოროფა ხოლო უმოსო ირდუ“.

13. მუშ კეთება შეულებნა ჩილ დო ქომონჯის, ნამდა ართიანშქას ურთიერთობა გამანგარან?

¹³ რშუდან, ართო ცხოვრება ვა ნიშნენს, ნამდა ართიანწკუმა ხოლოშიან ურთიერთობა გაღვენუნა. საჭირო რე, მუდგარენ გაკეთათ. ბრაზილიას მახორუ ართ და იჩიებ: „ამდღა ბრელ მუდგარენ მიდმამღანა დროს, ათეშენ ადვილ რე იფიფქრათ, ნამდა რახანს მეუღლეწკუმა ართო ართ ჸუდეს ფცხოვრენთ, ესეიგ ართიანს ხოლო გიმურთუნთ დროს. ქიმეფხვად, ნამდა ხოლოშიან ურთიერთობაშო უბრალოთ ართო ცხოვრება დასაბაღ ვა რე. საჭირო რე, ყურადღება გიმიფრჩქინე მეუღლეშ მიმართ დო იბზრუნე თიშ საჭიროებეფშე“. ქიდეკვირით, მუს ორთნა ართ ჩილ დო ქომონჯ, ბრუნო დო ტაის. ბრუნო იჩიებ: „მუჟამსით თავისუფალ დრო მიღნა დო თის ართო იბრინუანთ, გინობდვანთ ჩქინ ტელეფონეფს დო მუთუნს ვა ვარზენთ საშვალებას, მეცილან ართიანწკუმა ურთიერთობას“.

14. მუშ კეთება შეულებნა ჩილ დო ქომონჯის დროშ ართო გატარება ვასიამოვნუნან-და?

¹⁴ მუშ რაგად შილებე, მუჟამსით თქვა დო თქვან მეუღლეს ართიანწკუმა დროშ გატარება ვა გოსიამოვნუნა? შილებე თეშ მიზეზ თინა რდას, ნამდა შხვადოშხვა მუდგარენეფ მორწონა ვარდა მუჟამსით ართო რეთ, ართ აზრშა ვამგართინენა დო ნირზის იჭყანთ. მუშ კეთება შეილებნა თეცალ დროს? მორთ დუვართათ დაჩხირიშ მაგალითის, ნამუთ სტატიაშ დაჭყაფუს მიფშინეთ. დაჩხირ დორზამაშე ხეთეშე ბორბონჩიათ ვეგნირთუ. საჭირო რე, ჭიე-ჭიეთ უმოს დიდ დიშკეფ ქიმთუტურუათ, ნამდა დაჩხირს უმოსო ქუმაძინას. თეშნერო, თქვა ხოლო, დუდშე ჭიჭე დრო გეგმურთით ართიანს. გაკეთით თიცალ მუდგარენ, მუთ ჟირხოლოს გოსიამოვნუნა დო ვართ ხოლო თინა, მუთ ნირზშახ ქიმეიჸუნანა (იაკ. 3:18). თეშ უკულ შილებე ქოძირათ, ნამდა თქვან შქას ჸოროფაქ უმოსო მიძინ.

ᲐᲠᲗᲘᲐᲜᲘᲨ ᲛᲘᲛᲐᲠᲗ ᲞᲐᲢᲘᲪᲔᲛᲐ ᲒᲔᲒᲛᲘᲠᲩᲥᲘᲜᲘᲗ

15. მუშენ რე ქორწინებას მნიშვნელოვან ართიანიშ მიმართ პატიცემაშ გიმორჩქინა?

¹⁵ პატიცემაშ გიმორჩქინა, მანგარ მნიშვნელოვან რე ქორწინებას. თინა მოგენს ჟანგბადის, ნამდგაშ უმშო დაჩხირ ბორბონჩიათ ვეგნირთუ დო მალას დოშქირტუ. თეშნერო, წყვილ ართიანიშ მიმართ პატიცემას ვეგმირჩქინანს-და, თინეფიშ ჸოროფაქ შილებე ჭიე-ჭიეთ გორგიდას. მარა მუჟამსით ჩილ დო ქომონჯ ირნერო ეცადებნა, გეგმირჩქინან ართიანიშ მიმართ პატიცემა, თინეფიშ „ჸოროფაშ ალ“ დღას ვა შქირტუ. მარა ართ მუდგარენ ოკო ფშუდან — შილებე ჩქი ფიფქრენდათ, ნამდა პატიცემას გიმიფრჩქინანთ მეუღლეშ მიმართ, მარა მთავარ რე, ქოგინაფლენსო თინა თეს. ართ და პენი, ნამუთ 25 წანაშე უმოს რე, მუთ დაქორწინებულ რე, თეცალ მუდგარენს იჩიებ: „მა დო ჩქიმ მეუღლე ართიანიშ მიმართ პატიცემას გიმიფრჩქინანთ, მუდგაშ ჭყოლოფათ გემუან დო ჸოროფათ ეფშა ოჯახ მიღნა. ჩქი თავისფალო გიმოფხანტუნთ ჩქინ გრძნობეფს, მუშენდა მიჩქნა, ნამდა ჟირხოლო ვაფასენთ ართიანიშ აზრის“. მუ შეილებნა აკეთათ, ნამდა მეუღლექ თქვან მხარეშე პატიცემა ქიგინას. გუვარჩუათ აბრაამ დო სარაშ მაგალით.

16. მუშ გურაფა შეულებნა ქომონჯეფს, აბრაამიშ მაგალითშე? (1 პეტ. 3:7; ქოძირით სურათ).

¹⁶ აბრაამ პატის ცენდჷ სარას დო ითვალისწინენდჷ თიშ აზრეფს დო გრძნობეფს. ართშა სარა თიცალ განერვიანებულ რდჷ, ნამდა აბრაამს ქიგნანქირუ გურ დო ოჯახის უღდესინ თი პრობლემაშენ ხოლო თის ქიგედვჷ ბრალ. გერისხუო აბრაამქ დო გენჭირელო მეჩუო პასუხ სარას? ვარ. თიქ ყურადღებათ ქუმურჩქილუ მუშ ოსურს დო ეცად თე პრობლემაშ მოგვარებას. აბრაამქ თაშ თიშენ მიქცუ, ნამდა სარა ირიათო ხუჯის უკინენდჷ დო ომორჩილუდ მუშ ქომონჯის (დაბ. 16:5, 6). ქომონჯეფ, მუშ გურაფა შეილებნა აბრაამიშ მაგალითშე? მართალ რე, ოჯახის გადაწყვეტილებეფიშ მეღება თქვა გოვალნა (1 კორ. 11:3), მარა გეგმირჩქინით ჸოროფა დო ონდო მუდგაინს გინოჭყვიდუნდათ, აზრ ქელაკითხეთ მეუღლეს, განსაკუთრებულო თიცალ გადაწყვეტილებეფიშ მეღებაშახ, ნამუთ თის ხოლო ოხუ (1 კორ. 13:4, 5). მინშა, თქვან მეუღლე შილებე მუდგარენშე წუხენდას დო მუშ გრძნობეფიშ გურშენ ჩიება ოკოდას. თე დროს ხოლო პატიცემას გიმირჩქინანთ, მუჟამსით ყურადღებათ ქუმურჩქილუანთ თის (წეკითხით 1 პეტრეშ 3:7). ანჟელა დო დიმიტრი, სოდგარენ 30 წანა რე, მუთ დაქორწინებულეფ რენა. ანჟელა ენწყუნს, მუჭო გინაფლენს მუშ ქომონჯშე პატიცემას: „დიმიტრი ირიათო მზათ რე ქუმომრჩქილუას, მუჟამსით მუდგარენ მაწუხენს ვარდა უბრალოთ ჩიება მოკო. თინა მოთვინებას გიმირჩქინანს, მუჟამსით განერვიანებულ ვორექ დო ემოციეფიშ კონტროლ მიჭირს“.

17. მუშ გურაფა შეულებნა დაქორწინებულ დალეფს სარაშ მაგალითშე? (1 პეტ. 3:5, 6).

¹⁷ სარა პატის ცენდჷ აბრაამს თით, ნამდა ხუჯის უკინენდჷ თიშ გადაწყვეტილებეფს (დაბ. 12:5). ართშა აბრაამს ველუდუნ ფერ სტუმარეფქ ქადირთჷ დო გეგნოჭყვიდ, თინეფიშ მიმართ სტუმარიშჸოროფა გეგმირჩქინკო. თიქ სარას უწუ, მიოტუკო ირფელ, მუდგას ორთუდ დო ხვეიანო მამზადკო ოჭკუმალ (დაბ. 18:6). სარაქ ხოლო დემორჩილ მუშ ქომონჯის დო ხეთეშე ქიდიჭყჷ მოქმედება. დაქორწინებულ დალეფ, შეილებნა მიაჸუნათ სარაშ მაგალითის დო ხუჯ ქუდუკინათ თქვან ქომონჯიშ გადაწყვეტილებეფს, მუდგათ ხოლო უმოსო გამანგარენთ ქორწინებას (წეკითხით 1 პეტრეშ 3:5, 6). წოხოლენ აბზაცის მოშინაფილ დიმიტრი მირაგადნა, მუჭო გინაფლენს მუშ ოსურშე პატიცემას. თინა იჩიებ: „მანგარო ვაფასენქ, მუჟამსით ანჟელა ირნერო ოცად, ხუჯ ქუდუკინას ჩქიმ გადაწყვეტილებეფს, თიმწკუმა ხოლო, მუჟამსით განსხვავებულ აზრ მიღნა. ჩქიმ გადაწყვეტილებას ჯგირ შედეგიქ ვა მაჸუნ-და, თინა ჩქიმ კრიტიკას ვეჭყანს“. მანგარ ადვილ რე, გიჸორდას თიცალ პიროვნება, მით პატის რცენს.

18. მუ ჯგირობუას მოუღანს ჩილ დო ქომონჯის, მუჟამსით ირნერო ქეცადებნა, გამანგარან მუნეფიშ ჸოროფა?

¹⁸ სატანას ოკო, დო ირფელს ორთჷ, ნამდა ქრისტიან ჩილ დო ქომონჯის ართიანშქას ჸოროფა მეუდინუას, მუშენდა უჩქჷ, ნამდა თინეფს ართიანშქას ჸოროფაქ მეუდინეს-და, ჭიე-ჭიეთ იეჰოვას ხოლო დეთხიებნა. მარა ნამდვილ ჸოროფაშა მუთუნს ვა მარიებე! თქვან ჸოროფა ხოლო თიცალ ძალიერ ჸოფედას, მუნერით ქებათა ქებას რე ეჭარილ. ირფელ გაკეთით, ნამდა გამანგარათ იეჰოვაწკუმა ხოლოშიან ურთიერთობა. დრო გეგმურთით ართიანს, პატი ცით ართიანიშ გრძნობეფს დო გეთვალისწინით ართ მაჟიაშ საჭიროებეფ. თაშ ქიმიქციებუთ-და, თქვან ქორწინება განადიდენს იეჰოვას, მიდგაშეთ მოურს ჸოროფა, დო ხვალე თენა ვარინ, თქვან ჸოროფა იჸუაფ ბორბონჩია დაჩხირცალ, ნამუთ დღას ვა შქირტუ.