მუჭო გასამართლენს იეჰოვა ადამიანეფს „დიდ გაჭირებას“?

1. მუშენ შემლებუნა თიშ რაგად, ნამდა განსაკუთრებულ დროს ფცხოვრენთ?

ᲩᲥᲘ განსაკუთრებულ დროს ფცხოვრენთ, მუშენდა ჩქინ თოლიშ წოხოლე ისრულებ ქიანაშ ბიბლიურ წინასწარმეტყველება. მაგალთო, ვორწყეთ, ნამდა „ჩრდილოეთიშ“ დო „სამხრეთიშ მეფეეფ“ ართიანს ონირზუნა მსოფლიოშ მართველობას (დან. 11:40). სახიოლო ამბეშ ქადაგება მთელ მსოფლიოს მეურს, მუდგაშ შედეგო მილიონობით ადამიან გინოჭყვიდუნს იეჰოვაშ მსახურებას (ეს. 60:22; მათ. 24:14). სულიერ საზრდოს ხოლო მუშ დროს ხვეიანო ბღებულენთ (მათ. 24:45—47).

2. მუშა შემლებუნა ვორდათ დარწმუნებულ დო მუ ოკო მარჩქილედან?

² იეჰოვა ირიათო მოხვარუნა, უმოს ქიგებგათ თი მნიშვნელოვან მოვლენეფიშ გურშენ, ნამდგაქ მალას ოკო მოხვადას (იგავ. 4:18; დან. 2:28). შემლებუნა დარწმუნებულეფ ვორდათ, ნამდა „დიდ გაჭირებაშ“ დოჭყაფაშ დროს მარჩქვენუნა ირფელ, მუთ საჭირო რე, ნამდა თი რთულ პერიოდის ვა ვოდინუათ ართობა დო იეჰოვაშ ართგურობა. მარა ოკო მარჩქილედან, ნამდა ბრელ მუდგარენ დიო ხოლო ვა მიჩქუნა თი მოვლენეფიშ გურშენ, ნამდგაქ ანწ ოკო მოხვადას. თე სტატიას პირველ რიგის გუვარჩიენთ, მუჭო ემნწყუნდით აიშახ თი მოვლენეფს, ნამდგაქ მომავალს ოკო მოხვადას დო მუშენ იჸუ საჭიროქ მუდგარენეფიშ თირუაქ. თის ხოლო ქობძირუნთ, მუ მიჩქუნა მომავალ მოვლენეფიშ დო თიშ გურშენ, მუს გაკეთენს ჩქინ ზეციერ მუმა.

ᲛᲣ ᲕᲐ ᲛᲘᲩᲥᲣᲜᲐ

3. მუს ფიფქრენდით აიშახ დო მუშენ?

³ აიშახ ფიფქრენდით, ნამდა, მუჟამსით „დიდ გაჭირება“ ქიდიჭყაფუდ, თინეფს, მით ვამსახურუნა იეჰოვას, ვაღვენუდეს საშვალება, ქიგედირთესკო ღორონთიშ მხარეს დო გინოსქიდესკო არმაგედონს. თეს თიშენ იფჩიებუდით, ნამდა მიმორჩქუდეს, ნოეშ დროს მოხვალამირ დიდწყარალას წინასწარმეტყველურ მნიშვნელობა უღუდ. მაგალთო, ფიფქრენდით, ნამდა იეჰოვაქ დიდწყარალაშ დროს კიდობანიშ კარ კილუნ თეშ, „დიდ გაჭირებაშ“ დროს ხოლო, თაშ ქოფთქუათინ, „ქინაკილანდ კარს“ სატანაშ ქვეყნიერებაშო დო მითინს ვეშიალებედ ღორონთჸურე მიკორთა დო გინოსქილადა (მათ. 24:37—39).

4. ასე მუშენ ვა ფიფქრენთ, ნამდა დიდწყარალას წინასწარმეტყველურ მნიშვნელობა უღჷ? გენწყით.

⁴ უღუნო ნოეშ დროს მოხვალამირ დიდწყარალას წინასწარმეტყველურ მნიშვნელობა? ვარ, ბიბლიას თენა სოთინ ვერწყებე.a მართალ რე, იესოქ მუშ მოულაშ დრო ნოეშ დღალეფს შეუდარ, მარა ვა უთქუალ, ნამდა დიდწყარალას წინასწარმეტყველურ მნიშვნელობა უღუდ დო თიმ დროს მოხვალამირ არძა მოვლენას მომავალს უმოს დიდ შესრულება აღვენუდ, მაგალთო, თიცალ დეტალს, მუნერით რე კიდობანიშ კარიშ ინოკილუა. მარა თენა ვა ნიშნენს, ნამდა შურო მუთუნიშ გურაფა ვეშემლებუნა ნოეშ დროშე დო დიდწყარალაშე.

5. ა) მუჭო იძირ ნოეშ რწმენაქ? (ებრ. 11:7; 1 პეტ. 3:20). ბ) მუთ მოგენს ჩქინ დო ნოეშ სიტუაცია ართიანს?

⁵ მუჟამსით იეჰოვაქ ნოე გაფრთხილ, ღორონთიშ თე ართგურ კოჩიქ რწმენა გეგმირჩქინ დო ქიდიჭყჷ კიდობანიშ შენება (წეკითხით ებრაელეფიშ 11:7; 1 პეტრეშ 3:20). თეშნერო თინეფქ, მით სახიოლო ამბეს გებულენა, რწმენა საქმეეფით ოკო ქაძირუან დო გეგმირინუან ნაგურეფ (საქ. 3:17—20). პეტრე მოციქულქ ნოეშენ თქუ, ნამდა თინა „სიმართლეშ მაქადაგებელ“ რდჷ (2 პეტ. 2:5). მარა, მუჭოთ წოხოლენ სტატიას გუვარჩით, სოთინ ვერწყებე, ნამდა ნოექ დიდწყარალაშახ არძა, მით თიმ დროს დედამიწას ცხოვრენდჷ, თითო-კაკალო გაფრთხილ. ამდღა ჩქი ირნერო ვოცადუთ, მთელ მსოფლიოს უქადაგათ სახიოლო ამბე ადამიანეფს, მარა მუდგანერო ვევეცადათინ, ვართ ჩქი შემალებენა აღსასრულიშ მოულაშახ თითო-კაკალო არძაშა ქიმეფრთათ დო უქადაგათ. მუშენ იფჩიებუთ თეს?

6, 7. მუშენ იფჩიებუთ, ნამდა აღსასრულიშ მოულაშახ ვეშმალებენა მთელ მსოფლიოს არძა ადამიანს ქუქადაგათ? გენწყით.

⁶ დეფიქრით, მუ თქუ იესოქ ქადაგებაშ საქმეშ გურშენ. თიქ იწინასწარმეტყველ, ნამდა „სახიოლო ამბეს სამეფოშ გურშენ“ არძა ქიმირჩქილუანდ მთელ მსოფლიოს (მათ. 24:14). თე წინასწარმეტყველებაშ შესრულებას ამდღა ჩქინ თოლო ვორწყეთ. სახიოლო ამბეშ ქადაგება 1 000-შე უმოს ნინაშა მეურს. თეს გეძინელ, მთელ მსოფლიოს ხალხიშ უმენტაშშო ხეშამალაფარ რე ჩქინ ვებგვერდ jw.org, მუდგაშ საშვალებათ თინეფ გებულენა სახიოლო ამბეს.

⁷ მარა იესოქ მუშ მოწაფეეფს თინა ხოლო უწუ, ნამდა თიშ მოულაშახ „ქალაქეფიშ ბოლოშახ მოლება“ ვაჭიშედეს (მათ. 10:23; 25:31—33). იესოშ თე სიტყვეფ თის ნიშნენდჷ, ნამდა, ონდო თინა კაცობრიობაშ გასასამართლებერო მიშჷ, თიშ მოწაფეეფს ვეშიალებედეს გვალო არძას ქუქადაგესკო სახიოლო ამბე. ქოთ თაშ ხვადუ ამდღა. მილიონობით ადამიან თიცალ ქიანეფს ცხოვრენს, სოდეთ სახიოლო ამბე თავისფალო ვა მაქადაგებენა. თეს გეძინელ, მთელ მსოფლიოს ირწუთის ოშობით ბაღანა იბადებ. მართალ რე, ჩქი ირნერო ვოცადუთ, ნამდა სახიოლო ამბე „არძა ერიშ, ტომიშ დო ნინაშ“ ხალხშა ქიმიბღათ, მარა მარჩქილენა ნამდა, მუდგა ვა ვაკეთათინ, აღსასრულიშ მოულაშახ მუთუნით ვეშმალებენა მთელ მსოფლიოს არძა ადამიანს თითო-კაკალო უქადაგათ სახიოლო ამბე (გამოცხ. 14:6).

8. მუ კითხვაქ შილებე გომრჩქინდან? (ქოძირით სურათეფ).

⁸ თე ირფელიშ გარჩიებაშ უკულ შილებე გომრჩქინდან კითხვაქ: მუ ელჷ თი ხალხის, მიდგას „დიდ გაჭირებაშ“ დოჭყაფაშახ ვა ნოღვე საშვალება, ქიმირჩქილუკო სახიოლო ამბე? მუჭო გინოჭყვიდუნა თინეფიშ ამბეს იეჰოვა დო თიშ სქუა, მიდგაშა გასამართლებაშ საქმე რე მენდებულ? (იოან. 5:19, 22, 27; საქ. 17:31). მუჭოთ თე სტატიაშ მთავარ მუხლშე ვორწყეთ, იეჰოვას ვაკო, მითინქ გენადგურას, თის ოკო, „არძაქ ინარღას დაშებულ“ (2 პეტ. 3:9; 1 ტიმ. 2:4). მართალ რე, იეჰოვაქ ქუგმოგებაფუეს, ნამდა ვაკო მითინიშ ღურა, მარა თინა ვა უთქუალ, მუ განაჩენს გიშუღანს თი ადამიანეფს, მიდგას დღას ვა მურჩქილუაფ სახიოლო ამბე. მუშო ოკო რაგად, ღორონთ ვართ რე ვალდებულ, ქომწუან ირფელ თიშ გურშენ, მუთ ულირს უკეთებ დო მუდგას მომავალს გაკეთენს.

9. მუს მოგებაფუანა იეჰოვა ბიბლიაშე?

⁹ მარა შურო მუთუნ ვა მიჩქუნან თეშ ხოლო ვა ვორეთ. მაგალთო, იეჰოვა მუშ სიტყვაშ საშვალებათ მირაგადუნა, ნამდა სიცოცხლეს დურთინუანს „მართალ ვა რენან“ ფერეფს, მიდგას ვა უღუდეს საშვალება, ქიგეგესკო სახიოლო ამბე დო დითირესკო (საქ. 24:15; ლუკ. 23:42, 43). მარა თენა შხვა კითხვეფს ხოლო მირჩქინანა.

10. ხოლო მუ კითხვეფ რჩქინდუ?

¹⁰ ვა გათელენსო იეჰოვა თინეფს, მით „დიდ გაჭირებაშ“ დროს დოღურუნა? წმინდა წერილეფ არგამათ მირაგადუნა, ნამდა ღორონთიშ მოწინააღმდეგეეფ, მით არმაგედონს იეჰოვაშ დო თიშ ჯარიშ ხეშე გენადგურებუნა, ვეგეთელებუნა (2 თეს. 1:6—10). მარა მუშ რაგად შემლებუნა თინეფშე, მიდგაქ შილებე „დიდ გაჭირებაშ“ დროს ლახალაშ, ხანიშ დო უბედურ შემთხვევაშ შედეგო დოღურას ვარდა მიდგაინქ დოჸვილას? (ეკლ. 9:11; ზაქ. 14:13). ქიჸუაფუნო თენეფშე ნამთინე „მართალ ვა რენან“ ფერ კათა შქას, მით ახალ ქვეყნიერებას გეთელებუნა? თეშ პასუხ ვა მიჩქუნა.

ᲛᲣ ᲛᲘᲩᲥᲣᲜᲐ

11. მუშ მიხედვით გასამართლენს იესო ადამიანეფს?

¹¹ რე მუდგარენეფ, მუთ მიჩქუნა მომავალიშ გურშენ. მაგალთო თინა, ნამდა ადამიანეფიშ გასამართლებაშ დროს იესო თიშ მიხედვით გინოჭყვიდუნს, მი იჸუაფ „შხურ“ დო მი იჸუაფ „თხა“, მუჭო ოქცუდეს თიშ ცხებულ ჯიმალეფს (მათ. 25:40). თინეფს, მით ცხებულეფს დო ქრისტეს ხუჯის უკინენდეს, იესო „შხურეფო“ მირჩქინანს. თინა ხოლო მიჩქუნა, ნამდა ცხებულეფ დიდ გაჭირებას ჩქინწკუმა ართო იჸინა დო არმაგედონიშ დოჭყაფაშახ გვალო ჭიჭე ხანით ადრე იჸუაფუნა ზეცაშა ჸუნაფილ. ონდო ცხებულეფ დიო ხოლო დედამიწას იჸინა, ადამიანეფს აღვენუნა საშვალება, ხუჯ ქუდუკინან თინეფს დო საქმეს, ნამდგას თინეფ ხემძღვანელენა (მათ. 25:31, 32; გამოცხ. 12:17). მუშენ რე თეშ რჩქინა მნიშვნელოვან?

12, 13. მუჭო შილებე ნამთინექ მიქცუას, მუჟამსით „დიდ ბაბილონიშ“ განადგურებას ქოძირუნს? (ქოძირით სურათეფ).

¹² მუჟამსით „დიდ გაჭირებაშ“ დროს ნამთინე „დიდ ბაბილონიშ“ განადგურებას ქოძირუნს, ალბათ ქუგაშინე, ნამდა იეჰოვაშ მოწმეეფ თეს ბრელ ხანიშ წოხოლე იჩიებუდეს. შილებენო თეცალ მოვლენეფიშ მიმაჯინუ ნამთინექ ქირწმუნას იეჰოვა დო თიშ ხალხის ქაკათას? (გამოცხ. 17:5; ეზეკ. 33:33).

¹³ თეცალ მუდგარენქ ვა მოხვადუო ისრაელეფიშ ეგვიპტეშე გიშულაშ დროს ხოლო?! ბიბლიას ჭარჷ, ნამდა თინეფს „შხვადოშხვა ერიშ ხალხიქ ქეკაჸუნ“ (გამ. 12:38). შილებე ნამთინექ თიმწკუმა ირწმუნ იეჰოვა, მუჟამსით ქოძირ, ნამდა მუდგას მოსე იჩიებუდ, ირფელქ გერთჷ დო ეგვიპტელეფს ვით სასჯელქ ქიგიოტირხეს. „დიდ ბაბილონიშ“ განადგურებაშ უკულ ხოლო თეცალ მუდგარენქ ქუმოხვად-და, იფიფქრენთო, ნამდა უსამართლო რე, ხალხის ბოლო წუთის ქიმიაჩ გინოსქილადაშ დო ახალ ქვეყნიერებას ცხოვრებაშ საშვალებაქინ? მუშო ოკო რაგად, ვარ. ჩქი ხომ მოკონა, ჩქინ ზეციერ მუმას ვაგურათ, ნამუთ „მოჭყოლოფე, შხვეფიშ გაჭირებაშ გურშა მიმაღალარ დო ხეთეშე ვერისხებუნ ფერ ღორონთ რე, გურხვე რე სიჯგირას დო ჭეშმარიტებას“?b (გამ. 34:6).

14, 15. მიღენს დო ვარ ადამიან მარადიულ სიცოცხლეს, რენო დამოკიდებულ თიშა, მუჟამ ღურჷ ვარდა სო ცხოვრენს? გენწყით. (ფსალმ. 33:4, 5).

¹⁴ ალბათ გაჸინა გუნაგებ, ნამდა მინშა ნამთინე ჩქინ თანაქრისტიან მუშ ხოლოშიანიშ გურშენ თქუანს: «ეგება უჯგუდას „დიდ გაჭირებაშახ“ ღურუნ, ასე გათელებაშ იმენდ ვარა ქომიღ“». მუშო ოკო რაგად, თეს ჯგირ გურით იჩიებუნა. მარა ადამიან მარადიულო ქიცხოვრენს დო ვარ, თიშა ვა რე დამოკიდებულ, მუჟამ ღურუ. იეჰოვა სრულყოფილ მოსამართლე რე დო ირფელს სამართლიანო გინოჭყვიდუნს (წეკითხით ფსალმუნიშ 33:4, 5). ათეშენ შემლებუნა დარწმუნებულ ვორდათ, ნამდა „მთელ დედამიწაშ მოსამართლე“ ირფელს სწორას გაკეთენს (დაბ. 18:25).

¹⁵ ადამიან მარადიულ სიცოცხლეს მიღენს დო ვარ, ვართ თიშა რე დამოკიდებულ, სო ცხოვრენს თინა. გამორიცხულ რე, იეჰოვაქ მილიონობით ადამიან „თხალეფო“ ხვალე თიშ გურშენ მირჩქინას, ნამდა თიცალ ადგილს ცხოვრენა, სოდეთ დღას ვეშიალებენა სახიოლო ამბეშ მორჩქილაფა (მათ. 25:46). მთელ დედამიწაშ სამართლიან მოსამართლეს ჩქინ უმოსის ოწუხ ადამიანეფიშ ამბე. ჩქი ზუსტას ვა მიჩქუნა, მუჭო იჸონანს იეჰოვა მოვლენეფს „დიდ გაჭირებაშ“ დროს დო მუჭო განწმინდენს მუშ სახელს ხალხეფიშ წოხოლე (ეზეკ. 38:16). შილებე ნამთინეს, მიდგას ვა ნოღვე საშვალება, ქიმირჩქილუკო სახიოლო ამბე, ზუსტას „დიდ გაჭირებაშ“ დროს მოხვალამირ მოვლენეფქ გინაჭყვიდირაფუას, ქირწმუნას იეჰოვა დო თიშ მხარე ქიდეკინას.

16. მუ მიჩქუნა იეჰოვაშ გურშენ? (ქოძირით სურათ).

¹⁶ მუჭოთ ბიბლიაშე ბგებულენთ, იეჰოვაშო მანგარ ძვირფას რე ადამიანიშ სიცოცხლე. თიქ მუშ საჸოროფო სქუა დათმჷ ჩქინო, ნამდა მიღუდესკო მარადიულ ცხოვრებაშ საშვალება (იოან. 3:16). იეჰოვა მშობელცალო გუმალუაფუნა, მუთ არძას ბრელშა გუმომცადებუნა ჩქინ დუდშა (ეს. 49:15). თის თითოულიშ სახელ უჩქჷ დო თიცალ ჯგირო მიჩინენა, ნამდა დობღურათინ ხოლო, შეულებ გუმათელან კინ თიცალეფ, მუნერით ღურაშახ ვორდით დო დომრთინუან არძა მოგონება, მუშენდა ჩქინ გურშენ აკაბურცხა დეტალეფ ხოლო შჷ (მათ. 10:29—31). თაშ ნამდა, შემლებუნა დარწმუნებულეფ ვორდათ, თეცალ მოჸოროფე ზეციერ მუმა არძას სამართლიანო გასამართლენს, მუშენდა თინა ბრძენ დო მოჭყოლოფე რე (იაკ. 2:13).

17. მუს გუვარჩიენთ ანწიან სტატიას?

¹⁷ თე საკითხეფიშ უჯგუშო ინონჭაფაქ ხოლო უმოსო ქუმოძირუეს, ნამდა მთელ მონდომათ ქადაგება ამდღა რენ თიცალ აუცილებერ დღას ვა ჸოფე. მუშენ იფჩიებუთ თეს დო მუ აღბძრენა, დუდ ვა დაბზოგათ სახიოლო ამბეშ ქადაგებაშო? თე კითხვეფს უკულიან სტატიას ქუპასუხენთ.