ქეშეილებუნანო ჭეშმარიტებაშ დო ტყურაშ ართიანშე გიშაგორუა?

1. მუჭო უჯინე ღორონთიშ ხალხ ბიბლიას ინოჭარილ ჭეშმარიტებას?

ᲩᲥᲘᲜᲝ, იეჰოვაშ ხალხშო, მანგარ ძვირფას რე ჭეშმარიტება, ნამუთ ბიბლიაშე გებგით. ჩქინ რწმენა ზუსტას თიშა რე გერსხილ (რომ. 10:17). ჩქი ბჯერა, ნამდა ქრისტიანულ კრება რე „სიმართლეშ ხუჯიშდუმაკინებელ დო ოსხირ“ (1 ტიმ. 3:15). თეწკუმა ართო, მზათ ვორეთ, დევემორჩილათ თინეფს, მიდგას ჩქინ შქას ხელმძღვანელობა ოვალ. თინეფ ემინწყუნა ბიბლიას ინოჭარილ ჭეშმარიტებას დო მარზენა მითითებეფს, ნამუთ ღორონთიშ ნებაშ შესრულებას მოხვარუნა (ებრ. 13:17).

2. მუჭოთ იაკობიშ 5:19-შე იძირე, მუ საფრთხეშ წოხოლე გივორეთ?

² მართალ რე, ჩქი მიბღით ჭეშმარიტება დო ბჯერა, ნამდა ოკო მივაჸუნათ ღორონთიშ ორგანიზაციაშ ხელმძღვანელობას, მარა იშენით შილებე ეფჩირთათ ჭეშმარიტებაშ შარას (წეკითხით იაკობიშ 5:19). სატანა ირიათო თის გეუხე, ნამდა მემდინუან ბიბლიაშ დო თი მითითებეფიშ ნდობა, ნამდგას იეჰოვაშ ორგანიზაციაშე ბღებულენთ (ეფეს. 4:14).

3. მუშენ რე მნიშვნელოვან, მტკიცას გივორდათ ჭეშმარიტებას? (ეფეს. 6:13, 14).

³ წეკითხით ეფესოელეფიშ 6:13, 14. მალას სატანა მთელ მსოფლიოშ ერეფს მუშ ტყურეფით დაღორენს, ნამდა იეჰოვაშ წინააღმდეგ გეგშართან (გამოცხ. 16:13, 14). თეწკუმა ართო, მიჩქუნა, ნამდა თინა უმოსო დო უმოსო ეცადებ, ღორონთიშ ხალხ ხოლო მიოჩილითუას (გამოცხ. 12:9). ათეშენ, მნიშვნელოვან რე, მიჩქუდან, მუჭო გიშაბგორათ ართმაჟიაშე ჭეშმარიტება დო ტყურა დო მუჭო მივაჸუნათ ბიბლიაშე ნაგურეფ ჭეშმარიტებას, მუშენდა დიდ გაჭირებაშ დროს ჩქინ გინოსქილადა ზუსტას თეშა იჸუაფ დამოკიდებულ (რომ. 6:17; 1 პეტ. 1:22).

4. მუს გუვარჩიენთ თე სტატიას?

⁴ თე სტატიას ჩიება მაღვენუნა ჟირ თვისებაშე, ნამუთ მოსაჭირუნა, ნამდა გეგშეფჩინათ ბიბლიურ ჭეშმარიტება დო მივაჸუნათ ღორონთიშ ორგანიზაციაშ ხელმძღვანელობას. უკულ სუმ რჩევაშე ხოლო ქობრაგადანთ, ნამდგაშ მეჸუნა მიმეხვარებუნა, მტკიცას ქიგებდირთათ ჭეშმარიტებას.

ᲗᲕᲘᲡᲔᲑᲔᲤ, ᲜᲐᲛᲣᲗ ᲛᲝᲡᲐᲭᲘᲠᲣᲜᲐ ᲭᲔᲨᲛᲐᲠᲘᲢᲔᲑᲐᲨ ᲒᲘᲨᲐᲩᲘᲜᲔᲑᲔᲚᲝ

5. მუჭო მოხვარუნა იეჰოვაშ მიმართ შიშ ჭეშმარიტებაშ გიშაჩინებას?

⁵ ღორონთიშ შიშ. ღორონთიშ მიმართ ჯანსაღ შიშ მიღუდანინ თენა ნიშნენს, ნამდა თეშ მიჸორდან თინა, ვა მოკოდან თიცალ მუთუნ გუვაკეთათ, მუთ გურს უწყუნუანს. ათეშენ, ირნერო ვოცადუთ, ქიდიბგურუათ სწორ დო არასწორიშ — ტყურაშ დო ჭეშმარიტებაშ — ართიანშე გიშაგორუა, ნამდა იეჰოვაშ მოსაწონო მიფქცუათ (იგავ. 2:3—6; ებრ. 5:14). მანგარ მნიშვნელოვან რე, იეჰოვაშ მიმართ ჩქინ ჸოროფას დღას ვა დარჯგინას კოჩიშ შიშიქ. თაშ ქუმოხვად-და, თის ვორთუდათ იჸი, მუთ ადამიანეფს მოწონა. ვარინ, უმენტაშო ადამიანეფს თიცალ მუდგარენ მოწონა, მუთ იეჰოვას ვა მოწონს.

6. მუჭო ეიოჩილითუ ჭეშმარიტებაშ შარას ისრაელიშ დუდკოჩეფ ადამიანიშ შიშიქ?

⁶ ღორონთიშ უმოსო ადამიანეფიშ შიშ ქუმაღვენუნან-და, ეფჩირთუთ ჭეშმარიტებაშ შარას. ქიგიფშინათ, მუქ მოხვად, მუჟამსით მოსექ ისრაელიშ 12 დუდკოჩ გოუტუ, ნამდა მილესკო ქანაანიშ დიხა, ნამუთ იეჰოვას თინეფშა აფუდ შეპირებულ, დო ამბე ქიმიღესკო. თე ვითოჟირშე ვითიშ შემთხვევას იეჰოვაშ ჸოროფას ქანაანელეფიშ შიშიქ დარჯგინ. დეკვირით, მუ ამბე მოუღეს თინეფქ ისრაელეფს: „ჩქი ვა მაჩხუპებენა თე ხალხშა; თინეფ ჩქინდე ბრელით უმოს ძალიერეფ რენა“ (რიცხ. 13:27—31). ხვალე ადამიანურ გინაჯინშე ქიფიფქრენთ-და, თინეფ მართალს იჩიებუდეს; ქანაანელეფ მართალო უმოს ძალიერეფ რდესჷ. მარა, ქანაანელეფშა ვეგმარჯგინენანია იჩიებუდუნ თი კოჩის ვა შუდჷ, ნამდა იეჰოვა რდჷ ისრაელეფწკუმა. თე ვით კოჩის მთელ ყურადღება იეჰოვაშ დავალებაშა დო თიშა გეგნუღალუდკო, მუ აკეთ თინეფშო გვალო ამარდე იეჰოვაქინ, თენა ვაღოლედეს დო ქიმეხვადუდეს, ნამდა ქანაანელეფიშ ძალა ირფელიშშემალებე ღორონთიშ ძალაშ კარს მუთუნ ვა რდჷ. მარა, თინეფიშ გინაწონს, ჟირ დუდკოჩის, იესო ნავეშ სქუას დო ქალებ იეფუნეშ სქუას, რწმენაქ დაუბაღეს დო იეჰოვაშ მოსაწონო მიქცუეს. თინეფქ ხალხის უწუეს: „იეჰოვა ჩქინჸურე ქორენ-და, აუცილებერო ქუდმოხორუანა თი დიხას“ (რიცხ. 14:6—9).

7. მუჭო შემლებუნა უმოსო გებვითარათ იეჰოვაშ მიმართ ჯანსაღ შიშ? (ქოძირით სურათ).

⁷ იეჰოვაშ მიმართ ჯანსაღ შიშ უმოსო გებვითარათინ, ირ გადაწყვეტილებაშახ ოკო დეფიფქრათ, მუ იჸუაფ თიშო მოსაწონ (ფსალმ. 16:8). ირო, მუჟამსით ბიბლიას კითხულენთ, დეფიქრით: თე სიტუაციას მა ქუვორდიკონ, მუს გინოპჭყვიდუნდ? წერმიდგინით, ნამდა ვით დუდკოჩიშ მოღალირ გლახა ამბეს ურჩქილეთ. დუჯერდითო თინეფიშ ნარაგადის დო კოჩიშ შიშ ინგაჭკირუდესო დოვარ იეჰოვაშ ჸოროფა დო თიშ გურიშ გახარებაშ სურვილ გეგნოწონუნდ შიშის? მუ გლახა რე, ნამდა ისრაელეფიშ მთელ თე თაობას ვეგშაჩინებუ, მუ რდჷ ჭეშმარიტება დო ვა ურჩქილ იესო ნავეშ სქუას დო ქალებ იეფუნეშ სქუას. შედეგო, თინეფს დუნაპირებ დიხაშა ვემშართინეს (რიცხ. 14:10, 22, 23).

8. ნამ თვისებაშ გავითარებას ოკო ვეცადათ ირნერო დო მუშენ?

⁸ თანდაბლობა. იეჰოვა ჭეშმარიტებას ხვალე თინეფს უცხადენს, მით თანდაბალეფ რენა (მათ. 11:25). თანდაბალეფ ვა ვორდითკონ, ვემიბღენდით შხვეფშე მოხვარას, ნამდა ჭეშმარიტება ქუდმოგურუესკო (საქ. 8:30, 31). მარა თის ოკო ვეცადათ, ანწ ვეგნიფრთათ ამაყეფო, მუშენდა, თექ ქუმოხვად-და, ჩქინ პირად შეხედულებეფს ბიბლიურ პრინციპეფს დო იეჰოვაშ ორგანიზაციაშე მეღებულ ხელმძღვანელობას გაუმანგენთ დო იფიფქრენთ, ნამდა ჩქინ აზრეფ ხოლო ვა რე ნაკლებ ჭკვერულ.

9. მუ ოკო ვაკეთათ, ნამდა ვა ვოდინუათ თანდაბლობა?

⁹ თანდაბლობა ვა ვოდინუათინ, ირიათო ოკო ფშუდან, ნამდა იეჰოვაშ კარს ჩქი მუთუნ ვა ვორეთ (ფსალმ. 8:3, 4). თეწკუმა ართო, იეჰოვას ოკო ქოფთხუათ მოხვარა, ნამდა უმოს თანდაბლობა მიღუდან დო მზათ ქუვორდათ გურაფაშო. თინა ქიმმეხვარებუნა, მუშ ძვირფას აზრეფ, ნამდგას ბიბლიაშ დო მუშ ორგანიზაციაშ საშვალებათ გინოფჩანა, ჩქინ აზრეფშე უმოს მაღალას ქიგვორინუათ. ბიბლიაშ კითხირიშ დროს განსაკუთრებულ ყურადღება ქიმიაქცით თი ადგილეფს, სოვრეშეთ იძირე, მუჭო უჸორს იეჰოვას თანდაბლობა დო მუჭო ჯოგჷ სიამაყე, ამპარტავნობა დო დუდძირგალობა. თანდაბლობაშე განსაკუთრებულო თიმწკუმა ოკო იმუფშუათ, მუჟამსით თიცალ დანიშნულებას ბღებულენთ, ნამუთ მუდგარენ ძალაუფლებას მარზენა ვარდა შხვეფიშ თოლს უმოსო მიკმორჩქინანა.

ᲛᲣᲭᲝ ᲒᲔᲑᲓᲘᲠᲗᲐᲗ ᲛᲢᲙᲘᲪᲐᲡ ᲭᲔᲨᲛᲐᲠᲘᲢᲔᲑᲐᲡ

10. მუჭო ხელმძღვანელენს იეჰოვა მუშ ხალხის ჯვეშ დროშე მოჸუნაფილ?

¹⁰ ვადინუათ თი ხელმძღვანელობაშ ნდობა, ნამდგას იეჰოვაშ ორგანიზაციაშე ღებულენთ. ჯვეშ ისრაელს იეჰოვა დიო მოსეს დო უკულ იესო ნავეშ სქუას ირინუანდჷ მუშ ხალხშა მითითებეფიშ გინაჩამალო (იეს. 1:16, 17). მუჟამსით ისრაელეფს ჯერდეს, ნამდა თე კათა იეჰოვაშ გერნაფილ რდჷ დო მეჸუნდეს თინეფიშ მითითებეფს, ირფელ ჯგირო მიშჷ. საუკუნეეფქ მიკილ დო ქრისტიანულ კრებაქ ქიჸუნ თიშ უკულ, იეჰოვაშ ნებათ, 12 მოციქულ ხელმძღვანელენდჷ ქრისტეშ მიმაჸუნალეფს (საქ. 8:14, 15). უკულ, თე ხელმძღვანელ ჯიმალეფს იერუსალიმს რდესინ თი უხუცესეფქ ხოლო ქიმიაძინეს. ღორონთიშ თე ართგურ ჯიმალეფიშ მითითებეფიშ მეჸუნაშ შედეგო, „კრებეფ რწმენას იმანგარებუდ დო მოწაფეეფიშ რიცხვის ირდღას აძინუდ“ (საქ. 16:4, 5). ამდღა ხოლო თაშ რე; მუჟამსით მეპჸუნთ ღორონთიშ ორგანიზაციაშ ხელმძღვანელობას, იეჰოვა ჩქი ხოლო ვა მარკენა კურთხევეფს. მარა, მუნერ გურ აჸი იეჰოვას, მუშ გერნაფილ ჯიმალეფიშ ხელმძღვანელობას ვემვაჸუნით-და? თეშ გაგებელო, ქიგიფშინათ, მუქ მოხვად, ონდო ისრაელეფ დუნაპირებ ქიანაშა მიშეშეს.

11. მუ მოუღ ნამთინე ებრაელს ღორონთიშ გერნაფილ ხელმძღვანელიშ წინააღმდეგ ულაქ? (ქოძირით სურათ).

¹¹ მუჟამსით ისრაელეფ დუნაპირებ დიხაჸურე მიშეს, სახელუან კოჩეფქ მოსეშ წინააღმდეგ მიდართეს დო ეჭვ გემშეღეს თიშა, ნამდა თინა იეჰოვაშ გერნაფილ რდჷ. თინეფ იჩიებუდეს: „[ხვალე მოსე ვარ] მთელ ხალხ წმინდა რე დო იეჰოვა რე თინეფ შქას“ (რიცხ. 16:1—3). იეჰოვაშ თოლს მთელ ისრაელ მართალო წმინდა რდჷ, მარა თის მოსე აფუდ გერნაფილ თინეფიშ წინამძღოლო (რიცხ. 16:28). თიშ წინააღმდეგ ულათ, თე კათა ღორონთიშ წინააღმდეგ მიშჷ. თინეფს იეჰოვაშ ნებაშა ვარინ, თიშა აფუდეს ყურადღება გინოღალირ, მუნეფს მუ ოკოდეს — ძალაუფლებაშა დო სახელშა. ღორონთიქ ღურათ დასაჯ თინეფ, მით ბუნტის დუდენდეს დო თინეფწკუმა ართო ანთასობით ებრაელ, მიდგაქ თინეფს ალუდირთჷ (რიცხ. 16:30—35, 41, 49). თე შემთხვევა ჯგირო ოძირანს, ნამდა იეჰოვა ამდღა ხოლო ვეწონუანს თიცალეფს, მით ვემეჸუნს მუშ ორგანიზაციაშ ხელმძღვანელობას.

12. მუშენ შემლებუნა მიღუდან ღორონთიშ ორგანიზაციაშ ნდობა?

¹² მუშენ შემლებუნა მიღუდან ღორონთიშ ორგანიზაციაშ ნდობა? მუჟამსით ხელმძღვანელ ჯიმალეფ ორწყენა, ნამდა ბიბლიურ გურაფეფს ვარდა ორგანიზაციულ საკითხეფს მუდგარენ რე ოთირალ, ხეთეშე გინოდგუნა საჭირო ნაბიჯეფს (იგავ. 4:18). თეს თიშენ ორთუნა, ნამდა თინეფშო არძაშ უმოს მნიშვნელოვან იეჰოვაშ გურიშ გახარება რე. თეწკუმა ართო, თე ჯიმალეფ ირნერო ოცადუნა, მუდგას გინოჭყვიდუნან, ირფელ ჩქინ მთავარ სახელმძღვანელოშა, ღორონთიშ სიტყვაშა, რდასჷ გერსხილ.

13. მუ იგულისხმებ „სიმართლეშ სიტყვეფს“ დო, მუჭოთ იეჰოვაშ ორგანიზაცია მირაგადუნა, მუ ოკო ვაკეთათ?

¹³ „ირიათო მიაჸუნ სიმართლეშ სიტყვეფს“ (2 ტიმ. 1:13). „სიმართლეშ სიტყვეფს“ იგულისხმებ ღორონთიშ სიტყვას მოჩამილ ქრისტიანულ გურაფეფ (იოან. 17:17). ზუსტას თე გურაფეფშა მაფუნა გერსხილ ჩქინ რწმენა. ათეშენ, იეჰოვაშ ორგანიზაცია ირიათო გუმოშინანა, ნამდა მივაჸუნათ თე გურაფეფს. თაშ ქიმიფქციებუთ-და, ჯგირ შედეგეფს მიბღენთ.

14. მუჭო დეღორ ნამთინე ქრისტიანქ პირველ საუკუნეს?

¹⁴ მუ შედეგის მიბღენთ „სიმართლეშ სიტყვეფს“ ვემვაჸუნუთ-და? ქობძირათ, მუქ აღოლეს ქრისტიანეფს პირველ საუკუნეს. ქრისტიანეფ შქას ნამთინე ავრცელენდჷ ტყურას, ითამ ღორონთიშ დღა მოულირ რდჷ. მუჭოთ იძირე, თე აზრ ჭარუდ წერილს, ნამუთ პავლეშ ნაჭარა თ მიორჩქუდეს. მუთუნ ვეგნუმოწმებუნან თეშ, თე ამბე ნამთინე თესალონიკელ ქრისტიანქ ხოლო ქიდეჯერ დო შხვეფწკუმა გილარაგად ხოლო ქიდიჭყჷ. თე ქრისტიანეფს ვა გოშინუნა თი ირფელ, მუდგას პავლე ოგურუანდჷ, მუჟამსით თინეფწკუმა რდჷ. პავლეშე ნაგურეფ ქუგუშინუდესკონ, თენა ვაღოლედეს (2 თეს. 2:1—5). ათეშენ, მოციქულქ ელუჩ თინეფს, ნამდა, მუდგას გეგენდეს, ირფელ ვედეჯერესკო დო ანწიანშო თაშ ვედეღორესკონ თიშენ, თესალონიკელეფშა მეჭარილ მუშ მაჟია წერილ თეცალ სიტყვეფით ათუ: „მა, პავლე, ჩქიმ ხეთ რჭარუნთ მოკითხვას. ირიათო თეშნერო პჭარუნქ, მუდგათ გიშგაჩინებენა ჩქიმ წერილეფ“ (2 თეს. 3:17).

15. მუ ოკო ვაკეთათ, ნამდა ვედებღორათ? ქიმიჸუნით მაგალით (ქოძირით სურათეფ).

¹⁵ მუშ გურაფა შემლებუნა თესალონიკელეფშა მეჭარილ პავლეშ სიტყვეფშე? გურიშგოჩამა მოსაჭირუნა, მუჟამსით ბიბლიას ვემურენ ფერ აზრის იფრჩქილუაფუთ ვარდა მუდგარენ მანგარ გასაკვირ ამბეს ბგებულენთ. დეკვირით, მუქ მოხვად საბჭოთა კავშირიშ დროს. ართშა ჯიმალეფქ მთავარ სამმართველოშ სახელით მიღეს წერილ, ნამუთ, სინამდვილეს, მთავრობაშ მიშნაჯღონა რდჷ. თე წერილ ჯიმალეფს ჩქინ ორგანიზაციაშე გიშართუალას დო ცალკე ორგანიზაციაშ ჩამოყალიბებას ელუჩანდჷ. ართ მეჯინათ თეშ იძირედ, ნამდა მუთუნ ვა რდჷ საეჭვო, მარა ართგურ ჯიმალეფქ ვედეღორეს. თინეფქ ქიმეხვადეს, ნამდა თე წერილს ინოჭარილ ვემურდჷ თი ირფელს, მუთ აიშახ აფუდეს ნაგურეფ ორგანიზაციაშე. ამდღა ხოლო ჩქინ ნტერეფ ინტერნეტის დო სოციალურ მედიას ირინუანა, ნამდა ეჭვეფ გომრჩქინან დო აკოფრთან. თეცალ დროს ოკო ვებობრჯათ დო ემოციეფს ვევაჸუნათ. თექ ვა მაღოლანინ, გურ ოკო ქუგუჩათ, ქიმურენ დო ვარ თი ირფელ, მუდგას იფრჩქილეთ ვარდა პკითხულენთ, თი ჭეშმარიტებას, მუთ აიშახ მაფუნა ნაგურეფ (2 თეს. 2:2; 1 იოან. 4:1).

16. მუჭოთ რომაელეფიშ 16:17, 18-შე იძირე, მუ ოკო ვაკეთათ, მიდგაინ ჭეშმარიტებას ვემურენ ფერ ტყურეფს ქავრცელენს-და?

¹⁶ რდათჷ თინეფწკუმა, მით ართგურო ომსახურუნა იეჰოვას. ღორონთის ოკო, მუშ მსახურეფქ გაერთიანებულო ცანჷ თის თაყვან. ართობას ვა ვოდინუანთ, მუჟამსით მტკიცას ქიგებდირთუთ ჭეშმარიტებას. თინეფ, მით თიცალ ტყურეფს ავრცელენა, ნამუთ ვემურე ბიბლიურ ჭეშმარიტებას, კრებაშ აკორთუალას უნწყუნა ხეს. ათეშენ, ღორონთ მაფრთხილენა, ნამდა „დუდ აურიდათ“ თეცალეფს. თაშ ვა ვაკეთით-და, ეფჩირთუთ ჭეშმარიტებაშ შარას (წეკითხით რომაელეფიშ 16:17, 18).

17. მუ ჯგირ შედეგეფს მომღანა, მუჟამსით მარჩქვენუნა, მუჭო გიშეფჩინათ ჭეშმარიტება დო მტკიცას დეფცვენთ თის?

¹⁷ მუჟამსით მარჩქვენუნა, მუჭო გიშეფჩინათ ჭეშმარიტება დო მტკიცას დეფცვენთ თის, რწმენა ვედმესუსტებუნა დო იეჰოვაწკუმა ხოლოშიან ურთიერთობა მაღვენუნა (ეფეს. 4:15, 16). თეწკუმა ართო, ვედებღორებუთ სატანაშ ტყურა გურაფეფით დო ჭორეფით დო დიდ გაჭირებაშ დროს იეჰოვაშე თხილერ იპჸით. თაშ ნამდა, მტკიცას ქიგედირთით ჭეშმარიტებას დო „მშვიდობაშ ღორონთ თქვანწკუმა იჸუაფ“ (ფილ. 4:8, 9).