დღას ვა ვორეთ ხვალე

1, 2. ა) მუშენ მარაგადენა, ნამდა სირთულეეფწკუმა დღას ვა ვორეთ ხვალე? ბ) მუს გუვარჩიენთ თე სტატიას?

ᲛᲣᲟᲐᲛᲡᲘᲗ სერიოზულ განსაცდელეფიშ წოხოლე გივორეთ, შილებე დუდის თეშ ბგინაფლენდათ, ნამდა პოპორანსინ ფერ ზღვას აკაბცხა ნავით აშვოხეთ ხვალე. მარა, სინამდვილეს, დღას ვა ვორეთ ხვალე პრობლემეფწკუმა. მოჸოროფე ზეციერ მუმა ქოთ ორწყე ჩქინ პრობლემეფს დო ქოთ მოპირუნა, ნამდა ქიმმეხვარებუნა თინეფიშ გინოღალას. თინა თითოულ მუშ ართგურ მსახურს ურაგად: „მა მიგეხვარებუქ“ (ეს. 41:10).

² თე სტატიას გუვარჩიენთ ოთხ მხარეს, მუჭო მოხვარუნა იეჰოვა: 1) აწოპჸუნა, 2) ვა მარკენა აუცილებერს, 3) ფთხილანა დო 4) გურშა ემქექუანა. იეჰოვა სიტყვას მარზენა, ნამდა ცხოვრებას მუდგა სირთულეს ვეშეფხვადათინ, დღას ვა გომჭყოლიდუანა დო მუთუნით ვემმოტენა. თაშ ნამდა, დღას ვეპჸით ხვალე.

ᲘᲔᲰᲝᲕᲐ ᲐᲬᲝᲞᲸᲣᲜᲐ

3, 4. მუჭო აწოპჸუნა იეჰოვა? (ფსალმ. 48:14).

³ წეკითხით ფსალმუნეფიშ 48:14. იეჰოვას უჩქჷ, ნამდა ჩქინით ვა მაჸუნნენა ჩქინ ცხოვრება, ათეშენ მუ აწოპჸუნა. მუჭო ორთჷ თეს? ართ-ართ, მუდგას თეშო ირინუანს, ბიბლია რე (ფსალმ. 119:105). მუშ სიტყვაშ საშვალებათ, თინა მოხვარუნა, მიბღათ ჭკვერულ გადაწყვეტილებეფ დო ჩქინ აზროვნება დო საქციელ მუშის ქოუგურუათ. მუჟამსით იბრინუანთ ბიბლიაშე ნაგურეფუს, უმოს ბედნერ ცხოვრება მიღუნა უკვე ამდღარშე დო მიღუნა იმენდ, ნამდა მარადიულო იფცხოვრენთ მომავალს.a მაგალთო, ზეციერ მუმა მოგურუანა, ნამდა გურშა ჟღამ ველებდვათ, პატიოსანეფ ვორდათ ირნერ საქმეს დო მთელ გურით მიჸორდან შხვეფ (ფსალმ. 37:8; ებრ. 13:18; 1 პეტ. 1:22). მუჟამსით თაშ იფქციებუთ, უჯგუშ მშობლეფო, მეუღლეეფო დო მეგობრეფო გინიბრთუთ.

⁴ შხვა ირფელწკუმა ართო, იეჰოვაქ მუშ სიტყვას ქინაჭარ რეალურ ადამიანეფიშ ისტორიეფ, მიდგას ჩქინცალ პრობლემეფ დო გრძნობეფ უღუდეს (1 კორ. 10:13; იაკ. 5:17). მუჟამსით პკითხულენთ თე ადამიანეფიშ შემთხვევეფს დო ნაგურეფუს იბრინუანთ, თენა არძაშ უკლაშ ჟირ მუდგარენს მოხვარუნა: 1) ფხვადუთ, ნამდა ხვალე ვა პჸოფეთ – რდესჷ შხვეფ ხოლო, მიდგას ზუსტას ჩქინცალ სიტუაცია უღუდეს დო გიორჯგინეს მუნეფიშ სირთულეს (1 პეტ. 5:9). 2) ბგურაფლენთ, მუჭო ოკო გინიბღათ ჩქინ განსაცდელეფ (რომ. 15:4).

5. მიშ საშვალებათ აწოპჸუნა იეჰოვა?

⁵ შემლებუნა ფთქუათ, ნამდა იეჰოვა თანაქრისტიანეფიშ საშვალებათ ხოლო აწოპჸუნა.b მაგალთო, რაიონულ ზედამხედველეფ ირიათო იძირუანა ჩქინ კრებეფს დო გურშა ელამკინანა. თინეფიშ მოხსენებეფ რწმენას მიმანგარენა დო მოხვარუნა, ვა ვოდინუათ ართობა (საქ. 15:40–16:5). კრებეფს პჸუნა უხუცესეფ ხოლო, მით ირნერო ოცადუნა, სულიერო ჯგირო ქუვორდათ (1 პეტ. 5:2, 3). მშობლეფ ოხვარუნა მუნეფიშ სქუალეფს, ქიჸოროფუან იეჰოვა, გევითარან სწორ აზროვნება დო უღუდან ჯგირ ჩვევეფ (იგავ. 22:6). სულიერო მოწიფულ ოსურკათა ხოლო ოცად, რდანჷ ჯგირ მაგალით უმოს ახალგაზრდა დალეფშო, პრაქტიკულ რჩევეფ ქიმეჩან თინეფს დო ჸოროფათ გურშა ელუკინან (ტიტ. 2:3–5).

6. მუ შემთხვევას მომღანა ჯგირობუას იეჰოვაშ ხელმძღვანელობა?

⁶ მუჭოთ ვორწყეთ, იეჰოვა მუშ ოკეთებელს ორთჷ დო აწოპჸუნა. მუ ოკო ვაკეთათ ჩქი? იგავეფიშ 3:5, 6 ელამჩანა: „მთელ გურით მიენდ იეჰოვას დო სქან ჭკუაშ იმენდ ვედეკინა“. მუჟამსით თაშ იფქციებუთ, იეჰოვა „გამსწორენა ოულარს“, მუთ ნიშნენს, ნამდა ბრელ პრობლემას ემოჩილითუანა დო მიმეხვარებუნა, უმოს ბედნერ ცხოვრება მიღუდან. მართალო, მუ მარდულ ვაფუთ იეჰოვას, ნამდა თითოულს ჸოროფათ მარზენა თი რჩევას, ნამუთ მოსაჭირუნა (ფსალმ. 32:8).

ᲘᲔᲰᲝᲕᲐ ᲕᲐ ᲛᲐᲠᲙᲔᲜᲐ ᲐᲣᲪᲘᲚᲔᲑᲔᲠᲡ

7. მუჭო ზრუნენს იეჰოვა ჩქინდე? (ფილ. 4:19).

⁷ წეკითხით ფილიპელეფიშ 4:19. სულიერო აწოპჸუნან თიწკუმა ართო, იეჰოვა ფიზიკურო ხოლო ზრუნენს ჩქინდე დო მუჟამსით უდუზარებუო ფხანდენთ, მარზენა საშვალებას, ქომღუდან ოჭკუმალ, მიკაქუნალ დო დუდიშგითაფორაფალ (მათ. 6:33; 2 თეს. 3:12). მუთუნ გასაკვირ ვა რე, მაფიქრუაფუდან თე საკითხეფშე, მარა იეჰოვა ელამჩანა, ნამდა თეშე ფიქრის გინოჸუნელ ვა ვორდათ (მათ. 6:25). მუშენ ოკო ვა მაღოლან თექ? მუშენდა ჩქინ ზეციერ მუმა დღას ვემიოტენს მუშ ართგურ მსახურეფს გაჭირებაშ დროს (მათ. 6:8; ებრ. 13:5). რახანს იეჰოვა იჩიებ, ნამდა აუცილებერს ვამმარკენა, ესეიგ გაკეთენს თეს, ათეშენ ოკო მივენდათ თის.

8. მუ აკეთ იეჰოვაქ დავითშო?

⁸ დეფიფქრათ თიშე, მუჭო ოხვარუდ იეჰოვა დავითის. თიმ წანეფს, მუჟამსით თინა ნტებულ რდჷ დო მეფე საულს ატყობუდ, მანგარ რთულ პერიოდ მიკორთჷ, მარა იეჰოვას აუცილებერ ვემურკებ თიშა დო თიშ ხალხშა. მუჟამსით იშინანდჷ, მუჭო ოხვარუდ იეჰოვა წანეფიშ დინახალე, დავითიქ ჭარჷ: „ახალგაზრდათ ქუვორდჷ დო ქოთ დიბრჩინ, მარა დღას ვამძირ მართალ კოჩ უმინჯურო წუმოტებულ, ვართ თიშ სქუალეფ – ქობალს თხულენდესკონ თეშ“ (ფსალმ. 37:25). დავითცალო ალბათ თქვა ხოლო ბრელშა გიძირუნა, მუჭო მუხვარებ იეჰოვას თქვანდა ვარდა თანაქრისტიანეფშა გაჭირებაშ დროს.

9. მუჭო ზრუნენს იეჰოვა მუშ ხალხშე, მუჟამსით შხვადოშხვა უბედრობა გიოტირხუნა? (ქოძირით სურათეფ).

⁹ იეჰოვა თიმწკუმა ხოლო ზრუნენს ჩქინდე, მუჟამსით შხვადოშხვა უბედრობა გიმოტირხუნა, იჸუაფუნო თენა სტიქიურ დოვარ კოჩიშ მიზეზით მოხვალამირ. მაგალთო, მუჟამსით პირველ საუკუნეს შქირენაქ იჸუ, შხვადოშხვა დიხას მახორუ ქრისტიანეფქ გეკოშაყარუეს, მუთ შეულებუდეს დო მიდუჯღონეს უჭირდესინ თი თანაქრისტიანეფს (საქ. 11:27–30; რომ. 15:25, 26). ღორონთიშ ხალხ ამდღა ხოლო თეშნერო ელურე ართიანს. მაგალთო, მუჟამსით სოდგაინ სტიქიურ უბედრობა ხვადუ, იეჰოვა მუშ ხალხიშ ხეთ ოხვარ მუშ თიცალ მსახურეფს, მიდგას სტიქია აზარალენს. თინეფ ღებულენა თიცალ აუცილებერ მუდგარენეფს, მუნერით რე ოჭკუმალ, წყარ, მიკაქუნალ დო წამალეფ. თეწკუმა ართო, სამშენებლო ჯგუფეფ ურემონტანა ჸუდეეფს დო შეხვალამეფიშ ოტარებელ დარბაზეფს. იეჰოვაშ მსახურეფ ემოციურო დო სულიერო ხოლო ელურენა თინეფს, მიდგაქ თე დროს დუდიშგითაფორაფალ ვარდა საჸოროფო ადამიან ოდინუ.c

10, 11. მუს გურაფლენთ ბორისიშ შემთხვევაშე?

¹⁰ იეჰოვა თინეფწკუმა ხოლო ხეგოფაჩილ რე, მით დიო ვამსახურ თის. თეშნერო, ჩქი ხოლო ირნერო ვოცადუთ, ჯგირო მივექცუათ თი ხალხის, მიდგას ვაკო ჩქინ რწმენა (გალ. 6:10). მინშა თენა საშვალებას მარზენა, იეჰოვა გუვოჩინებაფუათ ადამიანეფს. დეფიქრით ართ კოჩიშ, ბორისიშ, შემთხვევაშე, ნამუთ უკრაინას ცხოვრენს დო სკოლაშ დირექტორ რე. მართალ რე, თინა იეჰოვაშ მოწმე ვა რე, მარა ირო ჯგირო ოქცუდ იეჰოვაშ მოწმე მოსწავლეეფს დო პატის ცენდჷ თინეფიშ რწმენას. ჩხუპიქ ქიდიჭყუნ, ბორისიქ გინოჭყვიდ, უმოს უსაფრთხო ადგილშა ინტუკო, მუდროსით ჯიმალეფქ მანგარო მეხვარეს. უკულ თე კოჩიქ ქრისტეშ ღურაშ გოშინაშ ონჯუას ქიდესწრჷ. მუჟამსით იშინანს, მუჭო მეხვარეს ჩქინეფქ, ბორის იჩიებ: „იეჰოვაშ მოწმეეფქ მანგარ ყურადღება მუმაქცუეს დო ელამდირთეს. მარდულ ვაფუქ თე ხალხის“.

¹¹ მოკონა, ჩქინ მოჭყოლოფე ზეციერ მუმაცალო, ჸოროფათ მივექცუათ თინეფს, მიდგას უჭირა, გოკონ-და, შურო ვა რდანჷ ჩქინ თანაქრისტიანეფ (ლუკ. 6:31, 36). იმენდ მიღუნა, თეცალ ჸოროფაშ ძირაფა თინეფს სურვილს გოურჩქინანს, ქრისტეშ მოწაფეეფო გინირთან (1 პეტ. 2:12). თაშ ვა მოხვადასინ ხოლო, ჩქი იშენით ხიოლს ქიბგინანთ, მუშენდა „შხვაშა ჯგირიშ კეთებას უმოს ბედნერობა მოუღ, ვინემ თის, ნამდა აშო გიკეთენა ჯგირს“ (საქ. 20:35).

ᲘᲔᲰᲝᲕᲐ ᲤᲗᲮᲘᲚᲐᲜᲐ

12. მუს ოპირ იეჰოვა მუშ ხალხის, მუჭოთ ჯგუფის? (ფსალმ. 91:1, 2, 14).

¹² წეკითხით ფსალმუნეფიშ 91:1, 2, 14. ამდღა იეჰოვა მოპირუნა, ნამდა სულიერო დოფთხილანა. თენა ნიშნენს, ნამდა სატანას მუთუნით ვა გაჩერებე ჭეშმარიტ თაყვანიშმცემლობა (იოან. 17:15). მარა, მუჟამსით „დიდ გაჭირება“ ქიდიჭყაფუ, ართ წუთის ხოლო ოკო ვედმეეჭვან, ნამდა იეჰოვა შეასრულენს მუშ სიტყვას დო მუშ ხალხის ხვალე სულიერო ვარინ, ფიზიკურო ხოლო დოთხილანს (გამოცხ. 7:9, 14).

13. მუ დო მუ საშვალებათ ფთხილანა იეჰოვა თითოულს?

¹³ მუჭო ფთხილანა იეჰოვა თითოულს? მუშ სიტყვაშ საშვალებათ თინა მოხვარუნა, ქინვანჭათ, მუ რე სწორ დო მუ – არასწორ (ებრ. 5:14). მუჟამსით ღორონთიშ სიტყვას მოჩამილ პრინციპეფიშ თანახმას ფცხოვრენთ, ქოთ სულიერო დო ქოთ ფიზიკურო იფთხილანთ დუდის (ფსალმ. 91:4). თეწკუმა ართო, იეჰოვა კრებაშ შეხვალამეფიშ საშვალებათ ხოლო ფთხილანა (ეს. 32:1, 2). ჩქინ და დო ჯიმალეფს უჸორა იეჰოვა დო ომორჩილუნა თის, ათეშენ თინეფწკუმა ართო შეხვალამეფშა გილულა, მსახურება დოვარ დროშ გატარება, გურშა ელამკინანა დო მოხვარუნა, დუდ აურიდათ თის, მუთ გლახას ქუმომღანა (იგავ. 13:20).

14. ა) მუშენ ვემოჩილითუანა იეჰოვა არძა სირთულეს? ბ) მუშა მარწმუნენა ფსალმუნეფიშ 9:10? (ქოძირით სქოლიო).

¹⁴ ჯვეშო იეჰოვა მუშ მსახურეფს ფიზიკურო თხილანდჷ დო ღურას გინასქილიდუანდჷ, მარა თეს არძა შემთხვევას ვართუდ. მუჭოთ ბიბლიაშე ბგებულენთ, „არძა ადამიანშა დრო დო შემთხვევა მოქმედენს“ (ეკლ. 9:11). თეწკუმა ართო, იეჰოვა მუშ მსახურეფიშ თხოზინს დო ღურას ხოლო უშვენდჷ, ნამდა დამტკიცესკო, სატანა მეტყურე რდუნჷ (იობ. 2:4–6; მათ. 23:34). თი ირფელქ, მუთ ჯვეშ დროს იეჰოვაშ მსახურეფქ გინიღეს, შილებე ამდღა ჩქი ხოლო მაჸუან გინაღალარქ. მართალ რე, იეჰოვა ამდღა არძა სირთულეს ვამთხინუანა, მარა შემლებუნა ბჯერდან, ნამდა დღას ვემიოტენს თინეფს, მიდგას თინა უჸორსd (ფსალმ. 9:10).

ᲘᲔᲰᲝᲕᲐ ᲒᲣᲠᲨᲐ ᲔᲛᲥᲔᲥᲣᲐᲜᲐ

15. მუჭო ელამკინანა გურშა ლოცვა, ღორონთიშ სიტყვა დო თანაქრისტიანეფ? (2 კორ. 1:3, 4).

¹⁵ წეკითხით 2 კორინთელეფიშ 1:3, 4. მინშა ოწუხებელ დო ონერვიანებელ მიღუნა, მუთ გურს მიმონკენა. შილებე თეცალ რთულ სიტუაციას ასე რდათჷ დო ფიქრენდათ, ნამდა ხვალე რეთჷ თქვან პრობლემეფწკუმა. ქარჩქილენო მითინს, მუს გინაფლენთ? მუშო ოკო რაგად, იეჰოვას არჩქილე თქვან. მარა თის ჩქინ ჭუა უბრალოთ ვარჩქილენ, „ირნერ გაჭირებას გურშა ემქექუანა“. მუჭო ორთჷ თეს? მაგალთო, მუჟამსით თის ლოცვას გურს გინუფაჩუნთ, მარზენა „მშვიდობას, მუნერით კოჩის აზრო ხოლო ვა მალე“ (ფილ. 4:6, 7). თეწკუმა ართო, გურშა ემქექუანა ბიბლიას ინოჭარილ იეჰოვაშ სიტყვეფ ხოლო. თიშ საშვალებათ იეჰოვა მარწმუნენა მუშ ჸოროფაშა დო მარზენა სიბრძნეს დო იმენდის, მუთ ემქექუანა. გურშა ელამკინანა კრებაშ შეხვალამეფს მორჩქილაფირ ბიბლიურ აზრეფ დო და დო ჯიმალეფწკუმა ურთიერთობა ხოლო.

16. მუს გურაფლენთ ნათანიშ დო პრისკილაშ შემთხვევაშე?

¹⁶ გუვარჩუათ ამერიკას მახორუ ჩილ დო ქომონჯიშ, ნათანიშ დო პრისკილაშ, შემთხვევა, სოვრეშეთ ჯგირო იძირე, მუჭო ემქექუანა იეჰოვა გურშა მუშ სიტყვაშ საშვალებათ. მუსხირენ წანაშ წოხოლე თინეფქ ოცხოვრებშა გეგნორთეს თი ტერიტორიაშა, სოდეთ მაქადაგებელეფიშ საჭიროება რდჷ. ნათან იჩიებ: „დარწმუნებულ ვორდით, იეჰოვა აკურთხენდჷ ჩქინ თე გადაწყვეტილებას დო ირფელ გვალო ჯგირო მიდეშ“. მარა თი ტერიტორიაშა გეგნორთესინ, ველუდესინ თეშ, ჯანმრთელობაშ პრობლემეფქ ქაშუეს დო სამუშაქ ხოლო ვაგორეს, ათეშენ ჸუდეშა აჸუეს დართალქ. დუნორთის, თექ ხოლო ფინანსურ პრობლემეფქ ქაშუეს. ნათან იშინანს: „ვა მარჩქილედ, მუშენ ვემმეხვარეს იეჰოვაქ თეშ, მუჭოთ ჩქი ველუდით. თიშე ფიქრ ხოლო ქიდიპჭყჷ, მუთუნ ხომ ვა მაფუდ დაშებულ თიშ წოხოლე“. მარა, ჭიჭე ხანშა, ნათან დო პრისკილაქ ქიმეხვადეს, ნამდა იეჰოვას სინამდვილეს ვემუტებ თინეფ. ნათან აგრძელენს: „თე რთულ პერიოდის, ბიბლიაქ ჩქინო ჯგირ მეგობარცალო გინირთჷ – გურშა ელამკინანდეს დო საჭირო რჩევეფს მარზენდეს. ვოცადუდით, მთელ ყურადღება ჩქინ პრობლემეფშა ვარინ, თიშა გეგნიბღითკო, მუჭო მოხვარუდეს იეჰოვა გარზებას. შედეგო, თე ირფელქ გამიმანგარეს თიშ რწმენა, ნამდა ანწ მუდგა სირთულეს ვეშეფხვადათინ, იეჰოვა აუცილებერო ქიმმეხვარებუნა“.

17. მუჭო მიღჷ იეჰოვაშე გურიშ ექექაფა ჰელგაქ? (ქოძირით სურათ).

¹⁷ იეჰოვა ჩქინდა გურიშ ელაკინალო და დო ჯიმალეფს ხოლო ირინუანს, მუდგას ჯგირო ოძირანს უნგრეთის მახორუ ჩქინ დაშ, ჰელგაშ, შემთხვევა. წანეფიშ დინახალე თინა შხვადოშხვა სირთულეს ობრძოლუდ, მუთ ძალეფს მიდმუღანდჷ დო დუდის თეშ ოგინაფუანდჷ, ითამ მუთუნიშ მოღე ვა რდჷ. მარა, მუჟამსით ულირ წანეფს იშინანს, ორწყე, მუჭო ელუკინანდჷ იეჰოვა გურშა თის თანაქრისტიანეფიშ საშვალებათ. ჰელგა მირაგადუნა: „ქიანაშის მუფშენდჷ, ლეხ სქუას ულუანდჷ დო შხვა პრობლემეფ ხოლო მიღუდ. მუჟამსით იეჰოვა ორწყედ, ნამდა თე ირფელ ძალეფს მიდმამღანდჷ, ირიათო მოხვარუდ. 30 წანაშ დინახალე ართ დღას ხოლო ვემკურთუმ თეშ, თის ჩქიმდა გურშა ველუკინუდუკონ. თინა მამანგარენს და დო ჯიმალეფიშ რაგადებულ გემუან დო გურიშ ემაქექაფალ სიტყვეფით. თანაქრისტიანეფშე ზუსტას თიმ დროს ბღებულენქ წერილეფს დო ბარათეფს დო თიმწკუმა მოცქვანა, მუჟამსით თენა არძაშ უმოსო მოსაჭირ“.

18. მუჭო შემლებუნა გურშა ეუქექუათ შხვეფს?

¹⁸ ჩქი მიღუნა პატი, მივაჸუნათ ღორონთიშ მაგალითის დო გურშა ეუქექუათ შხვეფს. მუჭო შემლებუნა თეშ კეთება? მოთვინებათ ოკო ქუმურჩქილუათ, გემუანო ვეჩუათ დო პრაქტიკულო ხოლო ქალუდირთათ (იგავ. 3:27). ჩქი არძას ეუქექუანთ გურშა, თინეფ შქას თიცალეფს ხოლო, მით დიო ვამსახურუნა იეჰოვას. მიდგაინს გაჭირება, ლახალა ვარდა ოწუხებელ ქუღუნ-და, მივაკითხანთ, ურჩქილეთ დო გურიშ ემაკინალ ბიბლიურ აზრეფს ურაგადუთ. მუჟამსით „ირნერო გურიშ ემაქექაფალ“ ღორონთცალო, ჩქი ხოლო ირკოჩშა გურიშ ელაკინას ვოცადუთ, თეშნერო თანაქრისტიანეფს სირთულეეფიშ გინოღალაშ ძალას ვარზენთ დო ღორონთის ვამსახურუნან თინეფს შილებე თიშ გაჩინებაფაშ სურვილ გურჩქინათ (მათ. 5:16).

ᲘᲔᲰᲝᲕᲐ ᲘᲠᲘᲐᲗᲝ ᲥᲘᲛᲛᲔᲮᲕᲐᲠᲔᲑᲣᲜᲐ

19. მუს ორთჷ იეჰოვა ჩქინო დო მუჭო შემლებუნა მივაჸუნათ თიშ მაგალითის?

¹⁹ იეჰოვაშო მანგარ მნიშვნელოვან რე თინეფიშ ჯგირობუა, მიდგას თინა უჸორს. შემლებუნა ბჯერდან, ნამდა პრობლემეფიშ დროს თინა ართ წუთით ხოლო ვემმოტენა. მუჭოთ მოჸოროფე მშობელ გალუაფ დუდის მუშ ბაღანას, თეშ იეჰოვა ხოლო ზრუნენს მუშ ართგურ მსახურეფშე. თინა აწოპჸუნა, აუცილებერს ვა მარკენა, ფთხილანა დო გურშა ემქექუანა. ჩქი ხოლო მეპჸუნთ ჩქინ მოჸოროფე ზეციერ მუმაშ მაგალითის, მუჟამსით სირთულეეფიშ დროს ელურეთ დო გურშა ელუკინანთ შხვეფს. თე ქვეყნიერებას დუდ ვემაჩილითენა გაჭირებაშა დო სირთულეეფშა, მარა შემლებუნა ბოლოშა ვორდათ დარწმუნებულ, ნამდა იეჰოვა ჩქინწკუმა რე. თინა მოპირუნა: „ვა გაშქურინას, მუშენდა სქანწკუმა ვორექ!“ (ეს. 41:10). თე დუნაპირებ მარწმუნენა, ნამდა დღას ვა ვორეთ ხვალე.