შეილებუნა რჯერდან, ნამდა იეჰოვას უჸორთ

1. მუშენ მეუძღვინით დუდ იეჰოვას? (ქოძირით სურათ).

ᲥᲝᲠᲨᲣᲜᲐᲜᲝ თი მომენტ, მუჟამსით დუდ მეუძღვინით იეჰოვას? თენა თიქ გინგოჭყვიდირაფუეს, ნამდა გეჩინებაფეთ იეჰოვა დო ქიგეჸოროფეს თიქ. მეძღვინუაშ ლოცვაშ დროს თქვა თის სიტყვა მეჩით, ნამდა თიშ ნებას ცხოვრებას პირველ ადგილს ქიგიორინუანდით დო ირიათო გიჸორდესკონ იჸიდ თინა „მთელ გურით, შურით, გონებათ დო ძალათ“ (მარ. 12:30). მუშო ოკო რაგად, თევრეშე მოჸუნაფილ თქვან ჸოროფა იეჰოვაშ მიმართ ირიათო ირდუ. ამდღა მიდგაინქ ქორკითხანინ, დასურო ქოიჸორსიაო იეჰოვა, წამს ვედეფიქრებუთინ თეშ ალბათ უპასუხენთ: მითინ დო მუთუნ ვა მიჸორს იეჰოვაცალო!

2, 3. მუშა ოკო იეჰოვას, დარწმუნებულ ვორდათ დო მუს გუვარჩიენთ თე სტატიას? (იერ. 31:3).

² მუს უპასუხენდით, მიდგარენს ქუკითხირუდუკონ: ქორჯერსო, ნამდა იეჰოვას მართალო უჸორქ? შილებე ფიქრენდე, ნამდა ვა რხვადჷ იეჰოვაშ ჸოროფა, მუშენდა ვა რექჷ თიცალ ჯგირ. ართ და, ნამდგას გლახა ბაღანობა უღუდ, თეცალ მუდგარენს იჩიებ: „იეჰოვა მთელ გურით მიჸორს, თეშა დარწმუნებულ ვორექ. მარა ბოლოშა ვა ბჯერსჷ, ნამდა თის აშო ხოლო უჸორქ“. მუ მიმეხვარებუნა, დებრწმუნათ, ნამდა იეჰოვას უჸორთ?

³ იეჰოვას ოკო, ბოლოშა ბჯერდან, ნამდა თის უჸორთ (წეკითხით იერემიაშ 31:3). ფაქტ რე, იეჰოვაქ მუშ ხოლოშა მემიჸონეს, დო მუჟამსით დიმნათით დო დუდ მეუძღვინით თის, თიქ ძვირფას განძ მაჩუქეს – მუშ ართგურ ჸოროფა. ღორონთიშ თე ჸოროფა ძალიერ დო ულიებ რე, მუდგაშ გურშენ თინა მუშ ართგურ მსახურეფს, თინეფ შქას თქვა ხოლო, მუშ ძვირფას საკუთრებათ მირჩქინანს (მალ. 3:17). იეჰოვას ოკო, თეშ ვორდათ დარწმუნებულ თიშ ჸოროფაშა, მუჭოთ თეშა მოციქულ პავლე რდჷ დარწმუნებულ, ნამდგაქ ჭარჷ: „ბოლოშახ ბჯერსჷ, ნამდა ვართ ღურას, ვართ სიცოცხლეს, ვართ ანგელოზეფს, ვართ ხელისუფლებეფს, ვართ თის, მუთ ასე რე დო მუთ ანწ იჸუაფ, ვართ ძალეფს, ვართ სიმაღალეს, ვართ სიტომბას, ვართ მუთუნნერ შხვა გუნაჭყეფუს ვენკვაჸოთინეთ ღორონთიშ ჸოროფაშე“ (რომ. 8:38, 39). თე სტატიას გუვარჩიენთ, მუშენ რე მნიშვნელოვან, ხოლო უმოსო ბჯერდან, ნამდა იეჰოვას უჸორთ დო მუ მიმეხვარებუნა თეშ კეთებას.

ᲛᲣᲨᲔᲜ ᲝᲙᲝ ᲑᲯᲔᲠᲓᲐᲜ, ᲜᲐᲛᲓᲐ ᲘᲔᲰᲝᲕᲐᲡ ᲣᲸᲝᲠᲗ?

4. მუ ოკო სატანას, დუმოჯერუან დო მუჭო შემლებუნა ქივეწინააღმდეგათ თის?

⁴ იეჰოვას უჸორთინ თენა ქობჯერან-და, შემალებენა „მტკიცას ქაწუდირთათ ეშმაკიშ მაზაკვალურ გეგმეფს“ (ეფეს. 6:11). სატანა ირფელს გაკეთენს, ნამდა მიმოტებაფუან იეჰოვაშ მსახურება. თიშ ართ-ართ მეთოდ რე, ქუდმოჯერუან, ნამდა იეჰოვას ვა უჸორთ, მუთ ტყურა რე. ბიბლია სატანას ლომს ადარენს (1 პეტ. 5:8, 9). ლომ ხშირას თიცალ ცხოველს გიანთხუ დუდის, ნამუთ დასუსტებულ რე დო დუდიშ დაცვება ვეშულებ. თეშნერო, სატანა ხოლო ოცად, თი დროს გიმანთხან, მუჟამსით ულირს გინოღალირ გლახა ამბეშ, ამდღარ პრობლემეფიშ ვარდა მომავალიშ შიშიშ გურშენ დუდის სუსტას ბგინაფლენთ, გინოშულადირ ვორეთ ვარდა ემოციურო მიჭირა (იგავ. 24:10). სატანას იმენდ უღჷ, ნამდა თეშ ქუდმორაგუანა, მივოტენთ იეჰოვაშ მსახურებას. მარა, მუთ უმოსო დებრწმუნებუთ იეჰოვაშ ჸოროფაშა, თით უმოსო შემალებენა ქივეწინააღმდეგათ სატანას დო დუდ დიფთხილუათ თიშ მაზაკვალურ გეგმეფშე (იაკ. 4:7).

5. მუშენ რე მნიშვნელოვან, ბჯერდან, ნამდა იეჰოვას უჸორთ?

⁵ იეჰოვას უჸორთინ თეშ ქობჯერან-და, უმოსო დევეახლოებუთ თის. მუშენ შემლებუნა თეშ რაგად? იეჰოვაქ გუმოჭყეს თი მოთხოვნილებათ, ნამდა ქოთ იშო მიჸორდან შხვეფ დო ქოთ აშო უჸორდათ. მუჟამსით ბგინაფლენთ, ნამდა მიდგარენს უჸორთ, თენა ჩქი ხოლო მიჸოროფუანა თის. თაშ ნამდა, მუთ უმოსო ბგინაფლენთ იეჰოვაშ ჸოროფას, თით უმოსო მირჩქინდუნა სურვილ, ჩქი ხოლო იგივეთ უპასუხათ (1 იოან. 4:19). დო მუთ უმოსო ირდუ ჩქინ ჸოროფა ღორონთიშ მიმართ, თით უმოსო ვეჸოროფებუთ თის ხოლო. ბიბლია ხოლო ზუსტას თეს მირაგადუნა: „დეახლოვით ღორონთის დო თინა ხოლო დეგეახლოვებუნა“ (იაკ. 4:8). ათეშენ, მუჭო შემლებუნა ხოლო უმოსო დებრწმუნათ თიშა, ნამდა იეჰოვას უჸორთ?

ᲛᲣ ᲓᲣᲛᲐᲠᲬᲛᲣᲜᲔᲜᲐ ᲮᲝᲚᲝ ᲣᲛᲝᲡᲝ ᲗᲘᲨᲐ, ᲜᲐᲛᲓᲐ ᲘᲔᲰᲝᲕᲐᲡ ᲣᲸᲝᲠᲗ?

6. მუშ კეთება შეილებუნა, ნამდა დერწმუნათ, იეჰოვას უჸორთინ?

⁶ კონკრეტულო დო ხშირას ქილოცით თე საკითხშე (ლუკ. 18:1; რომ. 12:12). ქოთხით იეჰოვას – საჭიროქ ქიჸუ-და, დღაშე მუსხირენშა – ქიმგეხვარან, მუშ თოლით ქუჯინათ თქვან დუდის. შილებე თქვან დუდ თისხით გლახათ მიგორჩქუდან, ნამდა გიჭირდან თიშ დაჯერა, იეჰოვას უჸორთინ. მარა ოკო რშუდან, ნამდა იეჰოვა თქვან „გურშე დიდ რე“ (1 იოან. 3:19, 20). თინა თიშე უჯგუშო გიჩინენა, ვინემ თქვა იჩინენთ თქვან დუდის დო თიცალ მუდგარენეფიშ ძირაფა ხოლო შეულებ, მუდგას თქვა ვარწყეთ (1 სამ. 16:7; 2 მატ. 6:30). თაშ ნამდა, გურ გეგნუფაჩით თის დო ქოთხით, დუგარწმუნან, ნამდა უჸორთ (ფსალმ. 62:8). უკულ ლოცვაშ თანახმას მიქცით დო გეგმირინეთ რჩევეფ, ნამუთ თუდო რე მოჩამილ.

7, 8. მუჭო მარწმუნენა ფსალმუნეფ, ნამდა იეჰოვას უჸორთ?

⁷ ენდით ღორონთიშ სიტყვას. ღორონთიშ შთაგონებათ ბიბლიაშ მაჭარალეფქ თინა თეშ გუმოჩინებაფუეს, მუნერით სინამდვილეს რე. დეკვირით, მუ სარკოთ ეჭარუნს ფსალმუნმაბირე დავით იეჰოვას: „იეჰოვა ხოლოს რე გურგოტახილეფწკუმა; თინა ირსხენს შურგანწარებულეფს“ (ფსალმ. 34:18). მუჟამსით გურგოტახილ ვორეთ, შილებე ფიფქრენდათ, ნამდა ჩქინ მითინს ვარჩქილე. მარა იეჰოვა მოპირუნა, ნამდა თეცალ დროს ჩქინწკუმა რე, მუშენდა ორწყე, ნამდა თეცალ მომენტეფს არძაშ უმოსო მოსაჭირუნა თიშ ელარნა. ხოლო შხვა ფსალმუნს დავით ჭარუნს: „დოშაყარე ჩქიმ ჩილამურეფ სქან ტიკის“ (ფსალმ. 56:8). იეჰოვა ორწყე, მუ გისოფუანა დო მუ გიჭირა. თის მანგარო ოწუხ თქვან მდგომარეობა დო ზრუნენს თქვანდე. მუჭოთ უდაბნოს მეურსუნ ფერ კოჩშო რე ძვირფას წყარიშ ირ ჭვეთ, ნამუთ წყარიშ ჭკუდშა ინუდგ, თეშ იეჰოვაშო ხოლო ჩქინ დობუნილ ირ ჩილამურ ძვირფას რე. 139-ა ფსალმუნიშ მა-3 მუხლის პკითხულენთ: „სი გიჩქჷ ჩქიმ შარეფ“. იეჰოვა ორწყე ირფელს, მუდგას ვორთუთ, მარა თის ყურადღება ხვალე ჯგირშა გინუღ (ებრ. 6:10). მუშენ? მუშენდა თინა აფასენს ირფელს, მუდგას თიშ გურიშ გახარებელო ვორთუთ.a

⁸ თეცალ გურიშემაკინალ მუხლეფით, ნამუთ იეჰოვაქ მუშ სიტყვაშა ინაჭარაფუ, თინა ფაქტიურო მირაგადუნა: „მოკო გიჩქუდას, ნამდა მანგარო მიჸორქ დო ძვირფას რექჷ ჩქიმო“. მარა, მუჭოთ ჟიშე იფჩით, სატანას ოკო, დუმოჯერუან, ნამდა იეჰოვას ვა უჸორთ. თაშ ნამდა, მინშა იეჰოვაშ ჸოროფაშა ეჭვ ქიმშაიღუნან-და, ქოკითხით თქვან დუდის: მის დუჯერქ, „ტყურაშ მუმას“ დოვარ „სიმართლეშ ღორონთის“? (იოან. 8:44; ფსალმ. 31:5).

9. მუშა არწმუნენს იეჰოვა თინეფს, მიდგას თინა უჸორა? (გამ. 20:5, 6).

⁹ დეფიქრით, მუთ პასუხენს იეჰოვა თინეფს, მიდგას თინა უჸორა. ქიგიფშინათ, მუ უწუ იეჰოვაქ მოსეს დო ისრაელეფს (წეკითხით გამოსვლაშ 20:5, 6). იეჰოვა პირობას ირზენს, ნამდა მუს ხოლო ირიათო უჸორდას იჸი თინეფ, მიდგას იშო ხოლო უჸორა თინა. თე სიტყვეფ მარწმუნენა, ნამდა ღორონთ დღას ვართინუანს ოჭიშის მუშ ხალხის, მით ჸოროფათ ომსახურ თის (ნეემ. 1:5). თაშ ნამდა, იეჰოვას უჸორთინ თენა მინშა ქუგოეჭვუნან-და, ქოკითხით თქვან დუდის: მა ხომ ქომიჸორს იეჰოვა? უკულ თეცალ მუდგარენშე დეფიქრით: იეჰოვა ქოიჸორა დო თიშ გურიშ გახარებელო ირფელს ქართუთ-და, თინა მუშ სიტყვათ გარწმუნენა, ნამდა მუს ხოლო მანგარო უჸორთ (დან. 9:4; 1 კორ. 8:3). შხვანერო ქოფთქუათინ, თქვა იეჰოვა იშო გიჸორან თენა ვა გოეჭვუნან-და, იმწკუმა თის აშო უჸორთინ თენა ხოლო ვა რე საეჭვო. თაშ ნამდა, შეილებუნა რჯერდან, ნამდა იეჰოვას უჸორთ დო ირიათო უჸორდათ იჸი.

10, 11. მუნერ დამოკიდებულება ოკო იეჰოვას, გიშაჸიდირალიშ მიმართ მიღუდანინ? (გალ. 2:20).

¹⁰ დეფიქრით გიშაჸიდირალშე. იეჰოვაქ ადამიანეფს არძაშ უმოს დიდ საჩუქარ მეჩჷ, მუჟამსით მუშ სქუა დათმჷ თინეფშო (იოან. 3:16). მარა პირადო სქან საჩუქარ ხოლო ქორენო თინა? მუშო ოკო რაგად, ქო! ქიგიფშინათ პავლე მოციქულიშ შემთხვევა. ქრისტიანო გინორთაშახ თინა სერიოზულო აშენდჷ დო უკულ ხოლო უხვადუდ მუშ სისუსტეეფწკუმა ბრძოლა (რომ. 7:24, 25; 1 ტიმ. 1:12–14). მარა, მუჭოთ ბიბლიაშე ბგებულენთ, პავლექ დერწმუნ, ნამდა იეჰოვაქ საჸოროფო სქუაშ სიცოცხლე პირადო თიშო ხოლო დათმჷ (წეკითხით გალატელეფიშ 2:20). ვაგგოჭყორდან, ნამდა თე სიტყვეფ ბიბლიაშა პავლეს იეჰოვაქ ინაჭარაფუ დო მუჭოთ მიჩქუნა, ირფელ, მუთ ბიბლიას ჭარჷ, ჩქინ ოგურაფალო ჭარჷ (რომ. 15:4). თაშ ნამდა, პავლეშ სიტყვეფშე იძირე, მუ დამოკიდებულება ოკო იეჰოვას, გიშაჸიდირალიშ მიმართ მიღუდან – თის პირადო ჩქინდა კეთებულ საჩუქარო ოკო უჯინედათ. გიშაჸიდირალშე თეშნერო ქიფიფქრენთ-და, უმოსო ბჯერდან იჸი, ნამდა იეჰოვას თითოულ პირადო უჸორთ.

¹¹ მარდულ ვაფუთ იეჰოვას, ნამდა იესო ჩქინ გიშაჸიდირალო მაშქვჷ დედამიწაშა. მარა ხოლო ართ მიზეზ, მუდგაშეთ თიქ დედამიწაშა მორთჷ, თინა რდჷ, ნამდა ქეჩუკო შხვეფს სიმართლე ღორონთიშ გურშენ (იოან. 18:37). ართ-ართ სიმართლე, მუთ იესოქ იეჰოვაშ გურშენ გუმოგებაფუეს, თინა რე, ნამდა თის მანგარო უჸორს მუშ სქუალეფ.

ᲛᲣᲭᲝ ᲛᲐᲠᲬᲛᲣᲜᲔᲜᲐ ᲘᲔᲡᲝ, ᲜᲐᲛᲓᲐ ᲘᲔᲰᲝᲕᲐᲡ ᲣᲸᲝᲠᲗ?

12. მუშენ შემლებუნა ბჯერდან, ნამდა მუდგას იესო იეჰოვაშ გურშენ იჩიებ, სანდო რე?

¹² დედამიწას ცხოვრებაშ დროს იესო ირიათო ეჩიებუდ შხვეფს, მუნერ ღორონთ რე იეჰოვა (ლუკ. 10:22). მართალო შემლებუნა ფთქუათ, ნამდა იესოშ ნარაგად სანდო რე, მუშენდა თინა დედამიწაშა მოულაშახ იეჰოვაწკუმა მილიარდობით წანას ცხოვრენდჷ (კოლ. 1:15). თაშ ნამდა, იესო მუშ თოლით ორწყედ, მუნერ ჸოროფათ ოქცუდ იეჰოვა მუშ სქუალეფს ქოთ ზეცას დო ქოთ დედამიწას. მუჭო მარწმუნენა იესო, ნამდა იეჰოვას უჸორთ?

13. მუჭო ოკო იესოს, იეჰოვას უჯინედათინ?

¹³ იესოს ოკო, იეჰოვას თიცალ პიროვნებათ იფჩინენდათ, მუნეროთ მუ იჩინენს. სახარებეფს თინა იეჰოვას 160-შე უმოსშა მიშინუანს, მუჭოთ „მუმას“. მუჟამსით მუშ მიმაჸუნალეფს ეჩიებუდ, თინეფს ურაგადუდ, იეჰოვა „თქვან ზეციერ მუმა“ რენია, მუდგათ ოძირანდჷ, ნამდა თინა თინეფიშ მუმა ხოლო რდჷ (მათ. 5:16; 6:26). იესოშ დედამიწაშა მოულაშახ იეჰოვაშ მსახურეფ ღორონთის მიშინუანდეს, მუჭოთ „ირფელიშშემალებე“, „უზენაეს“, „დიდებულ გუმაჭყაფალ“ დო შხვა თეცალ ტიტულეფით. მარა იესო ხშირას მიშინუანდჷ თის, მუჭოთ ჩქინ „მუმას“, მუდგათ ოძირანდჷ ხალხის, მუნერ ურთიერთობა ოკო იეჰოვას მუშ მსახურეფწკუმა უღუდასინ – ზუსტას თიცალ, მუნერით სქუას დო მოჸოროფე მუმას უღუნა ართიან შქას. არგამა რე, იესოს ოკო, თეშ უჯინედათ იეჰოვას, მუჭოთ მუ უჯინე – მუჭოთ მოჸოროფე მუმას, ნამდგას ქიანაშა უსხუნ სქუალეფ. მორთ გუვარჩუათ ჟირ შემთხვევა, სოდეთ იესო იეჰოვას „მუმათ“ მიშინუანს.

14. მუჭო ოძირუ იესოქ, ნამდა ჩქინ ზეციერ მუმაშო თითოულ ძვირფასეფ ვორეთ? (მათ. 10:29–31; ქოძირით სურათ).

¹⁴ დუდშე გუვარჩუათ იესოშ სიტყვეფ, ნამუთ ინოჭარილ რე მათეშ 10:29–31-ის (წეკითხით). ბაღირეფ რენა აკაბცხა ფრინველეფ, ნამდგას ვართ იეჰოვაშ ჸოროფა შეულებუნა დო ვართ თიშ თაყვანიშცემა. მარა ჩქინ მუმაშ თოლს თინეფ თიცალ ძვირფასეფ რენა, ნამდა ირო უჩქჷ, სო რენა თინეფ. დეფიქრით, მუსხით უმოსო უჸორს დო მუსხით უმოსო ზრუნენდას იჸი იეჰოვა მუშ ართგურ მსახურეფშე, მით თაყვანს ცენა თის დო უჸორა?! იესოქ თინა ხოლო თქუ, ნამდა მუაჩქინს ჩქინ დუდის თუმაშ ღერეფ ხოლო კოროცხილ აფჷ. რახანს იეჰოვას ჩქინ გურშენ თეცალ ჭიჭე დეტალეფ ხოლო უჩქჷ, გიშურს, ნამდა თიშო მანგარ ძვირფასეფ ვორეთ. თე ირფელ ოძირანს, მუჭო ოკო იესოს, ბჯერდან, ნამდა იეჰოვას მანგარო უჸორთ.

15. მუს ბგებულენთ იოანეშ 6:44-ის ინოჭარილ იესოშ სიტყვეფშე ჩქინ ზეციერ მუმაშ გურშენ?

¹⁵ გუვარჩუათ მაჟია შემთხვევა, სოდეთ იესოქ იეჰოვა მიშინუ, მუჭოთ „მუმა“ (წეკითხით იოანეშ 6:44). ზეციერ მუმაქ პირადო თქვა მეიჸუნეს მუშ ხოლოშა – გუგოჩინებაფუეს დო ქოიჸოროფუეს მუშ დუდ. მუშენ აკეთ თენა? მუშენდა თიქ ქოძირ თქვან ჯგირ თვისებეფ (საქ. 13:48). მუჟამსით იესოქ იოანეშ 6:44-ის მოჩამილ სიტყვეფ თქუ, თინა შილებე თე სტატიაშ მთავარ მუხლის, იერემიაშ 31:3-ს, მოჩამილ იეჰოვაშ სიტყვეფშე იჩიებუდუკო, სოდეთ თინა მუშ ხალხის ურაგად: „თიშენ მოიჸუნ ჩქიმ ხოლოშა, ნამდა ართგურ ჸოროფათ მიჸორქ“ (ქეშუდარით ოსიაშ 11:4). დეფიქრით, მუს ნიშნენს თენა. ზეციერ მუმა ირიათო ორწყე ჩქინ თიცალ ჯგირ თვისებეფს, ნამდგას შილებე ჩქი ვა ვორწყედათ.

16. ა) ფაქტიურო მუს მირაგადუნა იესო დო მუშენ ოკო ბჯერდან თიშ სიტყვეფიშ? ბ) მუჭო შეილებუნა უმოსო დერწმუნათ, ნამდა იეჰოვა რე არძაშ უჯგუშ მუმა? (ქოძირით ჩარჩო „არძაშ უჯგუშ მუმა“).

¹⁶ მუჟამსით იესო იეჰოვას ჩქინ მუმათ მიშინუანს, თინა ფაქტიურო მირაგადუნა: „იეჰოვა ხვალე ჩქიმ მუმა ვარინ, სქან მუმა ხოლო რე. რჯერდას, ნამდა თიშო ძვირფას რექჷ დო მანგარო უჸორქ“. თაშ ნამდა, იეჰოვას უჸორთინ თენა დღას დეგეეჭვებუნან-და, ქოკითხით თქვან დუდის: ოკო ვა ბჯერდასო თი პიროვნებაშ სიტყვეფ, მით არძაშ უჯგუშო იჩინენს ჩქინ მუმას დო მით ირო სიმართლეს იჩიებ? (1 პეტ. 2:22).

ᲘᲠᲘᲐᲗᲝ ᲣᲛᲝᲡᲝ ᲓᲔᲠᲬᲛᲣᲜᲘᲗ, ᲜᲐᲛᲓᲐ ᲘᲔᲰᲝᲕᲐᲡ ᲣᲸᲝᲠᲗ

17. მუშენ ოკო დებრწმუნათ ირიათო უმოსო, ნამდა იეჰოვას უჸორთ?

¹⁷ ირნერო ოკო ვეცადათ, უმოსო დებრწმუნათ, ნამდა იეჰოვას მანგარო უჸორთ. მუჭოთ ბძირით, სატანა ირფელს გაკეთენს, ნამდა იეჰოვაშ მსახურება მიმოტებაფუან. ათეშენ თინა ირნერო ეცადებ, იეჰოვაშ ჸოროფაშა ეჭვ გემშმოღალაფუან. მუთუნით ოკო ვემეფჩათ თის საშვალება, თეს ქიმიოჭირინუას! (იობ. 27:5).

18. მუჭო შეილებუნა უმოსო დერწმუნათ იეჰოვაშ ჸოროფაშა?

¹⁸ თე სტატიას გუვარჩით, მუშ კეთება შეილებუნა, ნამდა უმოსო რჯერდან, იეჰოვას უჸორთინ. ლოცვას ქოთხით თის მოხვარა, ნამდა ქოძირათ თქვან თი ჯგირ თვისებეფ, ნამდგას ვარწყეთ. ჯგირო დეფიქრით თი ბიბლიურ მუხლეფშე, სოდეთ იეჰოვაშ ჸოროფაშე მეურს ჩიება. დეფიქრით თიშე ხოლო, მუჭო პასუხენს იეჰოვა თინეფს, მიდგას თინა უჸორს. თის თეცალ ადამიანეფ მთელ გურით უჸორს. ვართ თიქ გუგოჭყორდან, ნამდა იეჰოვაქ გიშაჸიდირალ პირადო თქვანო ხოლო გინიგ. დო ბოლოს, ქენდით იესოშ სიტყვეფს, ნამდა იეჰოვა თქვან ზეციერ მუმა რე. თეშ უკულ მიდგაინქ ქორკითხან, ქორჯერსიაო, იეჰოვას მართალო უჸორქიან, თამამას გარაგადენა: ქო, ბჯერსჷ! დო მა ხოლო ირნერო ვოცადუქ, ჩქიმ ჸოროფა ქუვოძირუე!