ᲝᲒᲣᲠᲐᲤᲐᲚ ᲡᲢᲐᲢᲘᲐ 47
ᲝᲑᲘᲠᲔᲨ 38 ღორონთ მერჩანს ძალას
„მანგარ ძვირფას რექჷ“!
„მანგარ ძვირფას რექჷ“ (ᲓᲐᲜ. 9:23).
ᲛᲘᲖᲐᲜ
თე სტატია ქიმეხვარებ დუდ მუთუნო ვემიორჩქუნან ფერეფს, ქოძირან, მუნერ ძვირფასეფ რენა იეჰოვაშო.
1, 2. მუ მიმეხვარებუნა თიშა დარწმუნებას, ნამდა იეჰოვაშო ძვირფასეფ ვორეთ?
ᲘᲔᲰᲝᲕᲐᲨᲝ მუშ მსახურეფ მანგარ ძვირფასეფ რენა, მარა ნამთინეს უჭირს თეშ დაჯერება, მუშენდა ვემიორჩქ დუდ იეჰოვაშ ჸოროფაშ ღირსო. შილებე თეშ მიზეზ თინა რდასჷ, ნამდა თინეფს გლახათ ოქცუდეს. სი ხოლო თაშ ხომ ვა რექჷ? თაშ ქორენ-და, მუჭო შეილებ დარწმუნე სქან დუდ, ნამდა იეჰოვაშ თოლს დიდ ფას გიღჷ?
2 ართ-ართ, მუთ თეს მიგეხვარებ, რე თი ბიბლიურ მონაკვეთეფშე დაფიქრება, სოვრეშეთ იძირე, მუჭო ოკო იეჰოვას, არძა ადამიანს ოქცუდანინ. თიშ სქუა, იესო, ადამიანეფს პატიცემათ დო გემუანო ოქცუდ, მუდგათ ქაძირუ, ნამდა მუშო დო მუამუშშო მანგარ ძვირფასეფ რენა თი ადამიანეფ, მით ფიქრენა, ნამდა ვა რენა დაფასებაშ ღირს (იოან. 5:19; ებრ. 1:3). თე სტატიას გუვარჩიენთ, 1) მუჭო ოძირანდჷ იესო ადამიანეფს, ნამდა იეჰოვაშო ძვირფასეფ რდესჷ დო 2) მუჭო შემლებუნა დუვარწმუნათ ჩქინ დუდ, ნამდა ჩქი ხოლო ძვირფასეფ ვორეთ თიშო (ანგ. 2:7).
ᲛᲣᲭᲝ ᲝᲒᲘᲜᲐᲤᲣᲐᲜᲓᲷ ᲘᲔᲡᲝ ᲐᲓᲐᲛᲘᲐᲜᲔᲤᲡ ᲓᲣᲓᲘᲡ ᲓᲐᲤᲐᲡᲔᲑᲣᲚᲝ?
3. მუჭო ოქცუდ იესო გალილეას მახორუ ხალხის, მიდგას თიშ მოხვარაშ იმენდ უღუდ?
3 გალილეაშა ოქადაგებშა მასმაშა რდჷ ინულირინ თიმწკუმა, იესოს ანაყუ ხალხ ეკოჸუნდჷ, მუშენდა თიშ გურაფაშ მორჩქილაფა დო შხვადოშხვა ლახალაშე სქილადა ოკოდეს. იესო ორწყედ, ნამდა თინეფ „უჭყიშე შხურცალო დაღამაკებულეფ დო მიკოცუმილეფ რდესჷ“ (მათ. 9:36). რელიგიურ ლიდერეფ თინეფს ჟიშე უჯინედეს დო ჭყელ ხალხის უძახუდეს (იოან. 7:47–49). მარა იესო თინეფშა გურაფას გუმურთუნდჷ დროს დო ოსქილიდუანდჷ, მუდგათ ოძირანდჷ, ნამდა პატის ცენდჷ (მათ. 9:35). მოხვარა უმოს ადამიანქ მიღუკონ, თიქ მუშ მოციქულეფს ხოლო ქუდაგურუ ქადაგება დო შხვადოშხვა ლახალაშ სქილიდაფაშ ძალა ქიმეჩ (მათ. 10:5–8).
4. მუშ გურაფა შემლებუნა თევრეშე, მუჭო ოქცუდ იესო თანდაბალ ადამიანეფს?
4 იესო მუშ მარჩქილეეფს პატიცემათ დო გემუანო ოქცუდუნ თეთ ქაძირუ, მუნერ ძვირფასეფ რენა მუშო დო მუამუშშო თი ადამიანეფ, მიდგას შხვეფ ჟიშე უჯინენა. იეჰოვას ქამსახურუთ, მარა თიშო ძვირფასეფ ქორეთ დო ვარინ თენა მინშა იშენით ქუგოეჭვუნან-და, ქიგიშინით, მუჭო ოქცუდ იესო თი თანდაბალ ადამიანეფს, მიდგას თიშე გურაფა ოკოდეს. თენა ქიმგეხვარებუნა, ქოძირათ, მუნერ ძვირფას რეთჷ იეჰოვაშო.
5. გეჭარით, მუ სიტუაცია უღუდ გალილეელ ოსურკოჩის, ნამდგას იესოქ შეხვად.
5 იესო ხვალე ართო აკოშაყარელ ხალხის ვაგურუანდუნ, პირადო ხოლო აქციენდჷ ადამიანეფს ყურადღებას. მაგალთო, გალილეას მსახურებაშ დროს თიქ შეხვად ართ ოსურკოჩის, მით ვითოჟირ წანას ზისხირიშ დენათ იტანჯებუდ (მარ. 5:25). კანონიშ თანახმას, თე ოსურ უწმინდურო ითვალუდ, ათეშენ თის ხეს მეთხუნდუნ თინა ხოლო უწმინდურო გინირთუდ. თეშ გურშენ, ალბათ თის თავისფალო ვეშიალებედ შხვეფწკუმა რინა დო უმენტაშო ხვალე იჸიდ. თეს გეძინელ, თის ვეშიალებედ ქაკათუკო თი ხალხის, მით იეჰოვაშ თაყვანიშოცემებელო სინაგოგას ვარდა დღახუეფიშ აღნიშნებელო იშაყარუდ (ლევ. 15:19, 25). თაშ ნამდა, თე ოსურკოჩის ხვალე ფიზიკურო ვარინ, ემოციურო ხოლო მანგარო უჭირდუკონ იჸიდ (მარ. 5:26).
6. მუჭო დოსქიდ ლახალაშე ზისხირიშ დენათ გაწამებულ ოსურკოჩიქ?
6 თე გაწამებულ ოსურკოჩის ოკოდ, იესოქ დასქილიდუკო, მარა პირდაპირ ვემურთუმ თიშა. მუშენ მიქცუ თაშ? შილებე თის მუშ მდგომარეობაშ გურშენ ონჯღორე უჩქუდუკო ვარდა შილებე ფიქრენდუკო, ნამდა უწმინდურ ოსურქ ხალხის აკათუნ თიშ გურშენ იესო განჭყორუდ. ათეშენ, თიქ უბრალოთ ონდეთ ქურაჸუ ხე თიშ გინაქუნალს, მუშენდა ჯერდჷ, ნამდა თენა ხოლო დასაბაღ იჸუაფუდ მუშ ოსქილიდაფარო (მარ. 5:27, 28). ძალიერ რწმენაშ შედეგო, თიქ დოსქიდ ლახალაშე. მუჟამსით იესოქ იკითხჷ, ხე მიქ მოფთხუა, თიქ ონდეთ გეკორაგადუ, ნამდა თენა მუქ აკეთ. მუჭო მიქცუ უკულ იესოქ?
7. მუჭო მექცუ იესოქ ლახალათ გაწვალებურ ოსურს? (მარ. 5:34).
7 იესოქ ჸოროფათ დო პატიცემათ მექცუ თე ოსურკოჩის, მუშენდა ორწყედ, მუნერ შქურნაფილ რდჷ დო მუჭო ცანცალანდჷ თინა (მარ. 5:33). იესოქ გემშართჷ თიშ მდგომარეობაშა, ათეშენ გემუანო დურაგადუ დო გურშა ელუკინ. თიქ სქუავა (პირდაპირ დოფთარგმნათინ „ცირასქუა“) დუძახ თე ოსურკოჩის, მუდგათ ხვალე პატიცემა ვარინ, ჸოროფა ხოლო ქაგინაფუ (წეკითხით მარკოზიშ 5:34). თენა რე ბიბლიას ინოჭარილ ხვალე ართ შემთხვევა, მუჟამსით იესოქ ოსურკოჩის თე სიტყვა დუძახ. შილებე თენა თიშენ აკეთუკო, ნამდა ორწყედ, მუ მდგომარეობას რდჷ თინა დო მუჭო ცანცალანდჷ. წერმიდგინით, მუჭო მოუდგუნდ შურს თის იესოშე თეშ მორჩქილაფა! იესოს თიშა თაშ ვა დურაგადუაფუდუკონ, თე ოსურ ფიზიკურო სქილიდაფირ მიდეშ, მარა გურდამონკებულ იჸიდ დო თი აზრ ვა მასვანჯუანდ, კანონით ვეშილებედუნ ფერ მუდგარენ მუშენ ფქიმინია. მარა იესოქ თე ოსურშო სქილიდაფაშე უმოს გაკეთ – დარწმუნ, ნამდა ზეციერ მუმაშო მანგარ ძვირფას რდჷ.
8. მუ სირთულე უღუდ ბრაზილიას მახორუ ართ დას?
8 ამდღა ხოლო ღორონთიშ ბრელ მსახურს უღჷ ჯანმრთელობაშ თიცალ პრობლემეფ, მუთ დუდის უღირსო ოგინაფუანს. ართ ბრაზილიელ დას, მარიას,a ნამუთ პიონერო მსახურენს, დაბადებაშე კვარჩხან ხე დო კუჩხეფ ვა უღჷ. თინა იჩიებ: „სკოლას ირიათო გუმაციგანუდეს ჩქიმ კილიშ გურშენ. კლასელეფ ცირკ სახელეფს მიძახუდეს. მინშა ოჯახიშ წევრეფ ხოლო თეშ მოქცუდეს, ნამდა ხოლო უფრაშო ბგინაფლენდჷ დუდის“.
9. მუქ მეხვარ მარიას თიშა დარწმუნებას, ნამდა იეჰოვაშო ძვირფას რე?
9 მუქ მეხვარ მარიას? მუჟამსით თიქ იეჰოვაშ მოწმეთ გინირთჷ, თანაქრისტიანეფქ გურშა ელუკინეს დო მეხვარეს, თეშ ქუჯინუკო მუშ დუდის, მუჭოთ იეჰოვა უჯინედ თის. მარია იჩიებ: „თიზმა და დო ჯიმაქ მიმეხვარ, ვართ გიმმაკოროცხე თინეფიშ სახელეფ. მთელ გურით უმარდუქ იეჰოვას, ნამდა თეცალ სასწაულ სულიერ ოჯახ მაჩუქ“. მარიას და დო ჯიმალეფქ მეხვარეს, ნამდა დერწმუნუკო იეჰოვაშ თოლს ძვირფას რენ.
10. მუ სირთულეეფ უღუდ მარიამ მაგდალელს? (ქოძირით სურათეფ).
10 გუვარჩუათ, მუჭო მეხვარ იესოქ ხოლო ართ ოსურკოჩის, მარიამ მაგდალელს, ნამდგას შქვით დემონ მიშუხედ (ლუკ. 8:2). ალბათ დემონეფ თის თიცალ მუდგარენეფს ოკეთებაფუანდეს დო თიცალ საქციელეფ გარდჷ, ნამდა ხალხ დუდის ურიდანდუკონ იჸიდ. თე ოსურს მანგარ გაჭირებულ ცხოვრება აღვენუდ, მუშენდა თის მითინ ვემკანჭუდკონ იჸიდ დო შქურნაფილ დო უიმენდოთ იჸუაფუდ. მუჭოთ იძირენ, იესოქ გიშარაჸ თიშე დემონეფ, მუდგაშ უკულ მარიამქ თიშ მიმაჸუნალო გინირთჷ. ხოლო მუ აკეთ იესოქ თიცალ, მუთ მარიამ მაგდალელს ქაძირანდჷ, ნამდა თინა ძვირფას რდჷ იეჰოვაშო?
მუჭო ოძირუ იესოქ მარიამ მაგდალელს, ნამდა ძვირფას რდჷ იეჰოვაშ თოლს? (ქოძირით აბზაცეფ 10, 11)
11. მუჭო ოძირუ იესოქ მარიამ მაგდალელს, ნამდა ძვირფას რდჷ იეჰოვაშო? (ქოძირით სურათეფ).
11 იესოქ მარიამ მაგდალელს პატი გედვჷ, ნამდა მუს დო მუშ მოწაფეეფს ოხოლუდკო, მუჟამსით ართ ტერიტორიაშე მაჟიაშა გილეშ ოქადაგებშა.b შედეგო, თის საშვალება უღუდ, ირიათო მირჩქილუკო იესოშ ქადაგება დო გურაფა. თეწკუმა ართო, იესოქ თის გეთელუნ თიმ დღას დუდ ოძირუ დო თინა რდჷ ართ-ართ პირველ მოწაფე, მიდგას იესოქ თიმ დღას დურაგადუ. იესოქ მარიამს თინა ხოლო დავალ, ნამდა შხვა მოციქულეფს ქუგაგებაფუკო მუშ გათელებაშ ამბე. მართალო, მუსხი მუდგარენით ოძირუ იესოქ მარიამ მაგდალელს, ნამდა იეჰოვაშ თოლს ფას უღუდ (იოან. 20:11–18).
12. გენწყით, მუშენ ფიქრენდჷ ლიდია, ნამდა დღას მითინ ვეჸოროფუანდ.
12 მარიამ მაგდალელცალო, ამდღა ხოლო ბრელს უღჷ თიცალ გრძნობა, ითამ მითინს ვა უჸორს დო კოჩის ვაკო. ართ ესპანელ და, ლიდია, იჩიებ, ნამდა დიამუშ მუშე ორსულო რდუნ თიმწკუმა, თიშ ჩათხინაფას ფიქრენდჷ. ლიდიას ამდღარ დღაშახ ალაშ, ბაღანობას მუ უგურეთ ოქცუდ დიამუშ დო მუ გურიშგასოფალ სიტყვეფს ურაგადუდ. თინა მირაგადუნა: „რახანს დიაჩქიმშე დღას ვამგინაფ ჸოროფა, ცხოვრებაშ მიზანო გინმართჷ, თენა შხვეფშე ქიბგინიკო. დიაჩქიმქ თეშ ქინომბეტონუ დუდშა, ნამდა გლახა ადამიან ვორდჷ, მოშქურუდ, დღას მითინ ვა მიჸოროფუანდ“.
13. მუქ მეხვარ ლიდიას თიშ ძირაფას, ნამდა იეჰოვაშო ძვირფას რე?
13 ჭეშმარიტებაშ გაგებაშ უკულ, ლოცვაქ, ბიბლიაშ გიმორკვიებაქ დო და დო ჯიმალეფიშ გემუან სიტყვეფ დო საქმეეფქ მეხვარ ლიდიას, ქოძირუკო, ნამდა იეჰოვაშ თოლს ძვირფას რე. თინა იჩიებ: „ჩქიმ ქომონჯ ხშირას მირაგად, მუ მანგარო უჸორქ. თინა ირო მიმოქციებაფუანს ყურადღებას ჩქიმ ჯგირ თვისებეფშა; ჩქიმ მეგობრეფ ხოლო თაშ ორთუნა“. შილებე კრებას თქვა ხოლო რჸუნდან ლიდიაცალ თანაქრისტიან, ნამდგას მოხვარა ოსაჭირ თიშო, ნამდა ქოძირას, იეჰოვაშო მუნერ ძვირფას რე. ეგება თქვან გემუან სიტყვეფით დო საქმეეფით შეგალებუან თიშ მოხვარაქ.
ᲛᲣ ᲛᲘᲛᲔᲮᲕᲐᲠᲔᲑᲣᲜᲐ, ᲩᲥᲘᲜ ᲓᲣᲓᲘᲡ ᲘᲔᲰᲝᲕᲐᲨ ᲗᲝᲚᲘᲗ ᲣᲯᲘᲜᲐᲗ?
14. მუჭოთ 1 სამუელიშ 16:7-შე იძირე, მუჭო უჯინე იეჰოვა ადამიანეფს? (ქოძირით ჩარჩო „მუშენ რე იეჰოვაშო მუშ ხალხ ძვირფას?“).
14 რშუდან, ნამდა იეჰოვა თეშ ვაიჯინენა, მუჭოთ ქვეყნიერება (წეკითხით 1 სამუელიშ 16:7). თინა თქვან მეჯინათ, მუზმა ფარა გიღუნან თით ვარდა მუზმა გაფუნა ნაგურეფუნ თით ვეგნოჭყვიდუნს, მუსხით ძვირფას რეთჷ თიშ თოლს (ეს. 55:8, 9). თაშ ნამდა, თქვან დუდ ქვეყნიერებაშ გინაჯინშე ვარინ, იეჰოვაშ გინაჯინშე შეაფასით. თეს მიგეხვარებუნა თიცალ ბიბლიურ მონაკვეთეფიშ კითხირ, სოვრეშეთ იძირე, ნამდა იეჰოვა მანგარო აფასენდჷ თიცალ ადამიანეფს, მიდგას დუდ მუთუნო ვემიორჩქუდეს, მაგალთო, ელია, ნაომი ვარდა ხანა. შილებე თქვანო ჯგირქ იჸუას თიცალ შემთხვევეფიშ გიმოჭარუაქ ხოლო, ნამუთ ცხოვრებას მიკოირთუმუნა დო გარწმუნენა, ნამდა იეჰოვას მართალო უჸორთ დო გაფასენა. თეწკუმა ართო, შეილებუნა ჩქინ პუბლიკაციეფს წეკითხათ ინფორმაცია თვითშეფასებაშ საკითხშე.c
15. მუშენ რდჷ დანიელ იეჰოვაშო „მანგარ ძვირფას“? (დან. 9:23).
15 ქუგაშინით თქვან დუდის, ნამდა ართგურობაშ გურშენ ძვირფას რეთჷ იეჰოვაშ თოლს. მუჭოთ ბიბლიაშე ბგებულენთ, ართ მომენტის წინასწარმეტყველ დანიელ, ნამდგას სოდგარენ ოშ წანაშა მუთუნ ვემუძუდუკონ იჸიდ, „შულადირ-ქერქილ“ დო გურგოტახილ რდჷ (დან. 9:20, 21). მუ აკეთ იეჰოვაქ თიშა ჭყანაშ მაკათაფალო? თიქ ანგელოზ გაბრიელ გოუტუ თიშა თიშ გაშინალო, ნამდა „მანგარ ძვირფას“ რდჷ დო თიშ ლოცვეფ მორჩქილაფირ აფუდ (წეკითხით დანიელიშ 9:23). მუშენ რდჷ დანიელ თეცალ ძვირფას იეჰოვაშო? შხვა ბრელ ჯგირ თვისებაწკუმა ართო, თიშენ, ნამდა სიმართლე უჸორდჷ დო ართგურ რდჷ (ეზეკ. 14:14). იეჰოვაქ თე ამბე მუშ სიტყვას ჩქინ გურიშეიოქექაფალო ინაჭარ (რომ. 15:4). თინა თქვან ლოცვეფს ხოლო ურჩქილე დო მანგარო გაფასენა, მუშენდა მუთ სწორ რენ თინა გიჸორა დო ართგურო ომსახურუთ თის (მიქ. 6:8, სქ; ებრ. 6:10).
16. მუ მიგეხვარებუნა, იეჰოვას მოჸოროფე მუმაცალო უჯინათ?
16 იეჰოვას მოჸოროფე მუმაცალო უჯინით. თის თქვან მოხვარა ოკო დო ვართ ხოლო გეჭოფუა დო კილიშ გორუა (ფსალმ. 130:3; მათ. 7:11; ლუკ. 12:6, 7). თეშ ჯგირო გააზრებაქ მეხვარ ბრელს, ჩეთხინუკო თიცალ აზრ, ნამდა მუთუნშა ვა ღირჷ. მაგალთო, ართ და ესპანეთშე, მიშელ, ფიქრენდჷ, ნამდა მითინს ვა უჸორდჷ დო მუთუნშა ვა ღირუდ, მუშენდა მუშ ქომონჯ წანეფიშ დინახალე შეურაცხყოფას მიორინუანდჷ. თინა იჩიებ: „მუჟამსით თეცალ ფიქრეფ გომრჩქინდუ, წერმიბდგინენქ, ნამდა იეჰოვას უხუტოლუქ გურშა, მიფერუანს დო ფთხილანს“ (ფსალმ. 28:9). სამხრეთ აფრიკას მახორუ ართ და, ლორენ, იჩიებ: „იეჰოვაქ მუშ ხოლოშა მემჸუნ, თეზმა წანას მუწკუმა პჸუნქჷ დო შხვეფშა მუდგარენიშ დაგურაფალო მირინუანსინ თენა გუმოშინანს, ნამდა ძვირფას ვორექ თიშო დო მუდგარენშო ვორგუქ“ (ოს. 11:4).
17. მუჭო შეილებუნა გეგათ, ნამდა იეჰოვაშ მოწონა გიღუნა? (ფსალმ. 5:12; ქოძირით სურათ).
17 რჯერდან, ნამდა იეჰოვაშ თოლს მოწონა გიღუნა (წეკითხით ფსალმუნეფიშ 5:12). დავით იეჰოვაშ მოწონას „დიდ ფარს“ ადარენს, ნამუთ თხილანს მართალეფს. იეჰოვაშ მოწონა გიღუნა დო თინა ალაირენან თიშ რჩქინა ქიმგეხვარებუნა, ვემკინჭათ თი აზრ, ნამდა მუთუნშა ვა ღირუთ. მუჭო ოკო გეგათ, იეჰოვაშ მოწონა გიღუნან? მუჭოთ ჟიშე იფჩით, ართ საშვალება თიშ სიტყვა რე, სოდეთ მარწმუნენა, ნამდა ძვირფას ვორეთ თიშო. თეწკუმა ართო, თინა ირინუანს უხუცესეფს, ჩქინ მეგობრეფს დო შხვეფს, ნამდა ქუგმოშინან, მუსხით ძვირფასეფ ვორეთ თიშ თოლს. თქვა მუთ შეილებუნა უპასუხათ თეცალ გურიშ ელაკინას?
იეჰოვაშ თოლს მოწონა მიღუნან თეშ რჩქინა ქიმმეხვარებუნა, ვენკიმჭათ თი აზრ, ნამდა მუთუნშა ვა ბღირუთ (ქოძირით აბზაც 17)
18. მუშენ ოკო დუჯერათ შხვეფს, მუჟამსით მოცქვანა?
18 მუჟამსით თი ადამიანეფ, მით ჯგირო გიჩინენა დო მანგარო უჸორთ, შურ დო გურით გოცქვანა, ვეფიქრათ, ნამდა თინეფ ჩირთუნა. ვაგგოჭყორდან, შილებე გვალო იეჰოვა ირინუანდას თე ადამიანეფს თქვანდა თიშ ოძირაფალო, ნამდა მუშ თოლს მოწონა გიღუნა. მიშელ, ნამუთ ჟიშე მიფშინეთ, იჩიებ: „ჭიე-ჭიეთ ბგურაფლენქ, ქიდებჯერე თი ოცქვაფურ სიტყვეფ, ნამდგას შხვეფ მირაგადუნა. თენა ვა რე ჩქიმო ადვილ, მარა მიჩქჷ, იეჰოვას ოკო, ნამდა თაშ მიფქცუე“. თე დას უხუცესეფქ ხოლო მანგარო მეხვარეს თიშ ძირაფას, ნამდა იეჰოვაშ თოლს ძვირფას ადამიან რე. თინა ასე პიონერო მსახურენს დო დისტანციურო ოხვარ ბეთელს.
19. მუშენ შეილებუნა რჯერდან, ნამდა იეჰოვაშ თოლს ძვირფას რეთჷ?
19 იესო მირაგადუნა, ნამდა ჩქინ ზეციერ მუმაშო მანგარ ძვირფასეფ ვორეთ (ლუკ. 12:24). ათეშენ შემლებუნა ბჯერდან, ნამდა იეჰოვაშ თოლს მანგარ დიდ ფას მიღუნა. მორთით, დღას ვეგიპჭყოლიდუათ თენა დო შხვეფს ხოლო ქიმვეხვარათ თიშ ძირაფას, მუშმაშხვა ფას უღუნა იეჰოვაშო!
ᲝᲑᲘᲠᲔᲨ 139 წერმიდგინ სქან დუდ ახალ ქიანას
a ნამთინე სახელ თირელ რე.
b მუჭოთ იძირენ, მარიამ მაგდალელ თი ოსურკათას ოკათუდ, მით იესოწკუმა ართო რდესჷ, მუჟამსით თინა ართ ტერიტორიაშე მაჟიაშა გილეშ. თინეფ მუნეფიშ ფარათ მიკაჯინედეს იესოშ დო თიშ მოციქულეფიშ საჭიროებეფს (მათ. 27:55, 56; ლუკ. 8:1–3).
c მაგალთო, ქოძირით წიგნიშ „დეახლოვ იეჰოვას“ 24-ა დუდ [ქორთ.] დო წეკითხით წიგნის „ბიბლია მოგურუანა ქრისტიანულ ცხოვრებას“, საკითხის „ეჭვეფ“ მოჩამილ ბიბლიურ მუხლეფ.