ATENDEJE MAULENDO GAKUWILISYA
LIJIGANYO 7
Apitilisyeje Kwakamuchisya Ŵandu
Lilemba: “Ŵaliji mkwiganya nambosoni kulalichila mwangalechesya ngani syambone.”—Mase. 5:42.
Yaŵatesile Paulo
1. Alolele FIDIYO, kapena aŵalanje Masengo 19:8-10. Kaneko ajanje yiwusyo ayi:
Ana Paulo jwatesile yamtuli kuti apitilisye kwakamuchisya ŵandu ŵaŵalosisye chidwi atamose kuti ŵane ŵamsisyaga?
Ana Paulo jwajawulaga kukwalalichila ŵandu ŵaŵalosisye chidwiŵa kwa maulendo galingwa, soni ana yeleyi jwayitesile kwa ndaŵi jelewu wuli?
Ana Yaŵatesile Paulo Yikutujiganya Chichi?
2. Tukusosekwa tupateje ndaŵi soni tulipelecheje kuti tukombole kutendesya maulendo gakuwilisya gakamula mtima soni kuti tukombole kutandisya majiganyo ga Baibulo.
Amsyasyeje Paulo
3. Amjendeleje mundu pandaŵi jasagwile jwalakwejo. Aliwusyeje kuti: ‘Ana jwalakwe mpaka asache kuti tulijiganyeje pa ndaŵi japi soni kwapi?’ Aŵeje ŵakoseka kutenda ulendo wakuwilisya atamose kuti mundujo jusagwile ndaŵi jakuti wawojo ngajikwasangalasya.
4. Akamulaneje ya lisiku lyampaka asimanesoni. Panyuma paulendo wakuwilisya uliwose, akamulaneje ndaŵi jisyesyene jampaka asimanesoni. Atendeje yakomboleka kuti chakamsimane mundujo pandaŵi jakamulenejo.
5. Akajasaga mtima. Akajanguyaga kuganisya kuti mundu ngakusaka kulijiganya ligongo lyakuti ngakusamsimana panyumba jakwe soni ligongo lyakuti yikusamtupilaga yakutenda. (1 Akoli. 13:4, 7) Atamose pandaŵi jeleji, alinjejelinjeje kupata matala gakuti amsimane mundujo kwineku ali mkulolechesya kuti akukamulichisya masengo ndaŵi jawo mwalunda.—1 Akoli. 9:26.