3 Jikusakamucisya Kupilila Yakusawusya

ULWELE WANGALI MTELA

Rose jwatite, “Ngwete ulwele wanajigalile kwa acinangolo ŵangu. Ulwelewu ukusatendekasya kuti cilu cangu cipweteceje ndaŵi syosope. Yindu ngayikusanjendela cenene paumi wangu.” Cindu cimo caŵadandawulaga naco mnope caliji cakuti ulwelewu wamtendekasyaga kuti akaŵalangaga Baibulo soni kuti akatendaga cenene yindu yine yakwayana ni kulambila Mlungu. Nambo ŵapatile cikamucisyo kutyocela ku maloŵe ga Yesu ga pa Matayo 19:26, gakuti, “Ni Mlungu yosope yili yakomboleka.” Kaneko Rose, jwayiweni kuti pana matala gane gampaka akamulicisye masengo pakulijiganya Baibulo. Ligongo lyakuti ulwelewu wamtendekasyaga kuti yimlemeje kuŵalanga Baibulo, jwalakwe jwatandite kulijiganya Baibulo soni mabuku gane mwagamba kupikanila.a Ali atandite kutenda yeleyi kaneko jwatite, “Yikaŵe kuti pangali matala mpela gelega, ngangumanyilila kuti ngatesile yamtuli kuti mbeje paunasi ni Mlungu jwangu.”

Rose ndaŵi sine patengwice ligongo lyakulepela kutenda yindu yine yaŵatendaga cenene munyumamu, akusapata cilimbikasyo kutyocela pa lilemba lya 2 Akolinto 8:12, lyalikusati, “Mtuka wakupeleka kutyocela pasi pamtima, Mlungu akusasangalala nawo ligongo jwalakwe akusasaka kuti mundu apelece yampaka akombole ngaŵa yanganaŵa akombwele.” Lilembali likusamkumbusya jwalakwe kuti Mlungu akusasangalala ni yindu yakutenda ligongo akusatenda yampaka akombole mwakamulana ni mwaŵelele.

CIWA

Delphine, jwatumkolasile mungani sipite sila, pakumbucila yayamtendecele jwatite, “Panyuma pa ciwa ca mwanace jwangu jwamkongwe, yambwetece mnope mumtima mwamti nasakaga ndili mbwile. Yindu nganiyiŵasoni mpela mwayaŵelele pandanda.” Jwalakwe jwapatile citondoyo kutyocela pa lilemba lya Salimo 94:19. Pakusala ya Mlungu, jwamalumbo pa lilembali jwatite, “Panalagaga mnope nganisyo, ŵangamucisye soni ŵandamice mtima pasi.” Delphine jwatite, “Napopesile kwa Yehofa kuti angamucisye kutenda yindu yakungamucisya kuti nalipikaneje cenene mumtima mwangu.”

Jwalakwe jwakolaga yejinji yakutenda pamasengo gakwe gaŵakamulaga. Pali papite ndaŵi, Delphine jwasasile kuti jwaliji mpela cekeni cakuti atamose pacitemecetemece cikusakamulape masengo. Mwakulandana ni cekenici, jwalakwe jwayiweni kuti mpaka akombole kwakamucisyasoni ŵane atamose kuti jwatengwice ni yakusawusya yaŵasimene nayo. Pakumbucila mwaŵatite Yehofa pakumtondoya jwatite, “Napataga cilimbikasyo pangwatondoya ŵandu ŵanatendaga nawo majiganyo ga Baibulo. Yehofa ŵakamulicisyaga masengo litala lyeleli pakulimbikasya.” Delphine jwalembilesoni mena ga ŵandu ŵane ŵa m’Baibulo ŵaŵasimene ni yakusawusya mpela yeleyi, nambosoni kulola cacakamucisye. Jwalakwe jwatite, “Nasimonjile kuti ŵandu wosopeŵa ŵapopelaga kwa Yehofa kuti apate cilimbikasyo.” Jwalakwe jwalijiganyisyesoni kuti “mpaka akombole kupilila yakusawusya yakwe mwakuŵalanga Baibulo.”

Kulijiganya Baibulo kwamkamucisye Delphine kuganicisya yamsogolo ngaŵa yamunyuma. Maloŵe gakupeleka cembeceyo gagakusimanikwa pa Masengo 24:15, gakusamtondoya. Lilembali likusati, “kuciŵa kwimuka kwa ŵakulungama ni ŵangalungama ŵakwe.” Ana lilembali likusamlimbikasya camtuli jwalakwe pakwamba ya kwimuka kwa mwanace jwakwe? Delphine jwatite, “Ngwembeceya ndaŵi jele Mlungu cacajimusya ŵandu kuŵawe kuti cinam’wonesoni mwanace jwangu. Ngusinganicisya ndili yalumo ni mwanace jwangu mumgunda wetu, soni ndili mkumlosya cinonyelo mpela mwanatendalaga palisiku lyakupagwa kwakwe.”