Yakusatenda Mlungu Pakulosya Kuti Akusatunonyela

1. MLUNGU NI JWAKUSATENDEKASYA KUTI LYUŴA LIŴALEJE

Yili yangakomboleka pachilambopa kuŵa ya umi pali pangali lyuŵa. Machili ga lyuŵa gakusatendekasya yitela kola masamba, maluŵa, yisogosi nambosoni mbeju. Machiliga gakusigakamuchisyasoni yitela kuti yimweje mesi kutyochela mwitaka. Mesiga gakusigajawula m’masamba kaneko gakusakopoka ni kwawula kwinani.

2. MLUNGU NI JWAKUSATENDEKASYA KUTI WULA JIGWEJE

Wula jili chimo mwa yindu yambone yakusatupa Mlungu. Wulaji jikusatendekasya kuti mbeju simeleje. Mlungu ni jwakusatendekasya kuti wula jigweje soni ni jwakusayikasya ndaŵi ja yisogosi. Yeleyi yikusatendekasya kuti tukoleje yakulya soni tuŵeje ŵakusangalala.

3. MLUNGU NI JWAKUSATUPA YAKULYA SONI YAKUWALA

Ŵandu ŵajinji akusaŵa ŵakusachilila kulipatila liŵasa lyawo yakulya soni yakuwala. Maloŵe ga Mlungu gakusati, “Mlole yijuni ya mwinani: yangapanda, yangagowola mbeju kapena kututa ni kuja kutaga mu ngokwe. Nambope Atati ŵenu ŵakwinani akusayipaga yakulya. Nambi jemanja, ana nganimŵa ŵakusosekwa mnope kuyipunda yijuniyo?”—Mateyu 6:25, 26.

“Mlole maluŵa gakwitinji mugakukulila . . .  nambotu ngumsalichisya kuti, atamose Mwenye Solomoni jwene juŵaliji jwakusichila mnope nganawalaga yakusalala kulandanichisya ni limo lya maluŵaga. Mlungu ni jwakusagawecha chamti myoyo . . . , nambi kwa jemanja, ana mpaka alepele kum’wecha?”—Mateyu 6:28-30.

Pakuŵa Mlungu ni jwakusatupa yakulya soni yakuwala, jwalakwe ngasalepela kutupa yindu yatukusasosechela. Naga tukutenda yakusasosaga Mlungu, jwalakwe chachitukamuchisya kupata yakulya patulimile kapena chachitukamuchisya kupata masengo ni chakulinga chakuti tusume yindu yatukusosechela.—Mateyu 6:32, 33.

Kusala yisyene, patukuganichisya ya lyuŵa, wula, yijuni soni maluŵa, yikusatutendekasya kuti tumnonyeleje Mlungu. Ngani jakuyichisya chijisale yakusatenda Mlungu pakuŵechetana ni ŵandu.