Yampaka Atende Kuti Chatame m’Chilambo Chasambano

Mu ngani jipite jila, tuyiweni kuti Mlungu chamasye yakusawusya yosope pachangakaŵapa. Tukusosekwa kukulupilila kuti yeleyi yichitendekwa nditu. Ligongo chichi tukuŵecheta myoyo? Ligongo maloŵe ga Mlungu Baibulo gakusatusalila kuti:

“Chilambo chapasi chikumala.”—1 YOHANE 2:17.

Tukulupilileje kuti ŵandu ŵane chachikulupuka. Ligongo lilembali likusasalasoni kuti:

“Mundu jwakutenda yakusasaka Mlungu, akusatama chitamile kwa ndaŵi syosope.”

Naga tukusaka kuti chitukulupuche tukusosekwa kutendaga yakusasaka Mlungu. Kuti tukombole kutenda yeleyi, chandanda tukusosekwa kummanyilila chenene Mlungu.

KUTI CHITUKULUPUCHE TUKUSOSEKWA ‘KUMMANYILILA’ MLUNGU

Collage: 1. Nesi atemi pasi soni akulaga nganisyo kwabasi. 2. Jwalakwe ajawile kukupumula ni akuwona mjakwe ali mkuŵalanga magasini mwakusangalala. 3. Mjakweju akumŵalanjila lilemba kaneko akumpa kadi jakusala ya jw.org.

Yesu ŵatite, “Umi wangamala ugopolela kuti ŵandu ŵamanyilile ŵalakwe ŵali Mlungu jikape jwakuwona.” (Yohane 17:3) Kuti chitukulupuche ni kutama ni umi kwangamala tukusosekwa ‘kummanyilila’ Mlungu. Yeleyi ngayikugopolela kuti tugambeje kwikutila ni yindu yamnono yatukumanyilila pakwamba Mlungu. Mmalo mwakwe tukusosekwa kuŵa najo paujakwe. Kuti tuŵe paujakwe ni mundu jwine, tukusasosekwa kupataga ndaŵi jakunguluka najo. Mwelemutu ni mwayiŵelelesoni ni Yehofa. Kwende tulole yindu yatukusalijiganya m’Baibulo yampaka yitukamuchisye kuti tuŵe paujakwe wambone ni Mlungu.

Yindu Yisyesyene Yatukusalijiganya m’Baibulo

Tukusalijiganya kuti Mlungu jwasakaga kuti tutameje m’Paladaiso.

Jwalakwe paŵampangenye Adamu ni Hawa, ŵaŵisile mumgunda ŵakusalala mnope wa Edeni. Jemanjaji ŵaliji ŵamlama. Sonitu Mlungu ŵapele yindu yosope yakusosekwa kuti asangalaleje ni umi. Yikaliji yakomboleka kuti atame mpaka kalakala. Adamu ni Hawa ngakanawa yikaŵe kuti ŵapitilisye kuŵa paujakwe ni Mlungu. Nambo jemanjaji ŵasagwile kuti akapikanila lilamusi lyangasawusya lyaŵapele Mlungu.

Tukusalijiganya ligongo lyakwe tukusalaga.

Ligongo lyakuti Adamu nganampikanila Mlungu, jwajasile upile wakutama ni umi wangamala. Jwalakwe jwajonasilesoni sogolo ja ŵanache ŵakwe wosope. Baibulo jikusati, “Ulemwa wayiche pa chilambo chapasi ligongo lya mundu jumo, nipo ulemwawo wayiche nacho chiwa. Myoyo chiwa chijendelechele kwa ŵandu wosope ligongo jwalijose alemwisye.” (Aloma 5:12) Mpela mwayikusaŵela kuti mundu mpaka ajigalile ulwele kwa achinangolo ŵakwe, m’wejisoni twajigalile ulemwa kwa Adamu jwali nangolo jwetu. Yeleyi ni yayikusatendekasya kuti tukalambale soni kuwa.

Tukusalijiganya yaŵatesile Mlungu pakusaka kutukamuchisya.

Baibulo jikusatusalila kuti, “Mlungu ŵachinonyele chilambo chapasi mnope mwakuti jwalakwe ŵampeleche Mwanache jwakwe jumopejo, ni kuti jwalijose jwakukulupilila mwa jwalakwejo akawa nambo akole umi wangamala.” (Yohane 3:16) Mlungu ŵamtumisye Yesu pachilambopa kuti apeleche umi wakwe pakusaka kutuwombola. Pakusala ya chinonyelo cha Mlunguchi, jwamlume jwa yaka 86 jwa ku India lina lyakwe Prabhakar jwatite, “Yehofaa ŵanonyele mnope. Yeleyi yikusamba chembecheyo cha umi wangamala.”

Tukusalijiganya yampaka tutende pakuyamichila yaŵatutendele Mlungu.

Baibulo jikusatusalila kuti mpaka tulosye kuyamichila yaŵatutendele Mlungu naga ‘tukusagakuya Malamusi’ gakwe. (1 Yohane 2:3) Mwachinonyelo, Yehofa Mlungu akusatusalila yampaka tutende kuti tuŵeje ŵakusangalala. (Yesaya 48:17, 18) Mlungu ngakusasaka kuti tulajeje. Jwalakwe akusatusalila kuti naga tukupikanila malamusi gakwe tuchiŵa ŵakusangalala apano soni tuchikola umi wangamala msogolomu.

AŴALANJEJE MALOŴE GA MLUNGU LISIKU LILILYOSE

Pandaŵi jakupumula nesi akuŵalanga Baibulo soni akulola kwinani. — Kuti chakulupuche apopeleje kwa Yehofa kuti ŵakamuchisyeje soni kuti atendeje yakusasaka jwalakwe

Tukusalya kuti tukole umi. Nambope Yesu ŵasasile kuti, “Mundu ngaŵa mkuŵa ni umi ligongo lya mkatepe, nambo ni maloŵe gosope gakusaŵecheta Mlungu.”—Mateyu 4:4.

Masiku agano, tukusapata maloŵe ga Yehofa m’Baibulo. Pakulijiganya Baibulo chachimanyilila yaŵatesile Mlungu mu ndaŵi jakala, yakutenda masiku agano soni yachatende kusogoloku.

APOPELEJE KWA MLUNGU KUTI ŴAKAMUCHISYEJE

Ana mpaka atende wuli, naga akulepela kuleka kutenda yindu yele Mlungu akusaŵengana nayo? Chakusosekwa kutenda chili kummanyilila chenene Mlungu.

Aganichisye ya jwamkongwe jwine jwatumkolasile kuti Sakura. Jwalakwe jwanonyelaga kutenda yachikululu. Nambo paŵalijiganyisye Baibulo, jwamanyilile lilamusi lyaŵapeleche Mlungu lyakuti “msitile ndamo sya chikululu.” (1 Akolinto 6:18) Sakura jwapopelaga kwa Mlungu kuti amkamuchisye kuleka ndamo jakusakalaji. Nambope jwalimbanaga ni nganisyo syakulemwechekwa. Jwalakwe jwatite, “Nganisyo syakutenda chikululu pasiyichile ngusapopela kwa Yehofa mwakutyochela pasi pamtima. Ngusamanyilila kuti pajika nganimba ngombwele kumalana ni yeleyi. Lipopelo lingamuchisye kuti mbe paunasi ni Yehofa.” Mpela mwayiŵelele ni Sakura, ŵandu ŵajinji atandite kummanyilila Mlungu. Sonitu Mlungu akwakamuchisya kuleka ndamo syakusakala ni kutendaga yindu yayikusamsangalasya jwalakwe.—Afilipi 4:13.

Patandite kummanyilila Mlungu, nombe najo ‘chachamanyilila’ chenene wawojo. (Agalatiya 4:9; Salimo 25:14) Kaneko chachikola upile wakutama ni umi wangamala m’chilambo chasambano. Nambo ana chilambo chelechi chichiŵa chamtuli? Ngani jakuyichisya chijijanje chiwusyochi.

a Baibulo jikusasala kuti lina lya Mlungu lili Yehofa.