1921 Yaka 100 Yipiteyo

SANJA JA MLONDA ja Januwale 1, 1921, jawusisye Ŵakulijiganya Baibulo chiwusyo chakuti, “Ana tukwembecheya kukamula masengo gamtuli m’chaka chelechi?” Pakwanga chiwusyochi, Sanjaji jakamwile maloŵe ga pa Yesaya 61:1, 2, gagakumbusyaga ya masengo gakulalichila. Palilembali pakusati, “AMBUJE asagwile ni kunduma une kuti ngalalichile ngani syambone kwa ŵandu ŵakulaga . . , kuja kusala ya ndaŵi jele AMBUJE tachikulupusya ŵandu ŵakwe ni kwapa chilango amagongo ŵawo.”

ŴAKULALICHILA ŴAKULIMBA MTIMA

Kuti akombole kukamula masengo gelega, Ŵakulijiganya Baibulo ŵasosekwaga kuŵa ŵangali woga. Ngaŵa kuti jemanjaji ŵasosekwaga kwamba kulalichila ngani syambone kwa ŵandu ŵakulaga, nambo ŵasosekwagasoni kusala ya ndaŵi jele ‘Ambuje chachipeleka chilango’ kwa ŵandu ŵakusakala.

M’bale J. H. Hoskin, juŵatamaga ku Canada, jwalalichile mwakulimba mtima atamose kuti ŵane ŵamsisyaga. M’chaka cha 1921, jwalakwe jwasimene ni m’busa jwine jwakwe, kaneko M’bale Hoskin ŵatandite kuŵechetana ni m’busajo kuti, “Chitukambilane ngani sya m’Baibulo. Nambo uli tutende yeleyi mwamtendele. Atamose kuti pa yindu yine chitulekanganeje nganisyo nambo chitukambilanepe mwamtendele.” Nambo yeleyi nganiyikomboleka. M’bale Hoskin jwatite, “Tuli tugambile kambilana panandi, m’busa jula jwaputile litanga mwamachili, mwamti une naganisyaga kuti ligalasi lya palitanga likasiche.”

Kaneko m’busa jula jwaŵechete mwakalipa kuti, “Uli ngajawula kwa ŵandu ŵangakulupilila ni mkasalileje yeleyi?” M’bale Hoskin nganajanga chilichose, mwamti paŵalekanganaga jwagambile kuyiwona kuti m’busajo atesile yindu mpela mundu jwangammanyilila Mlungu.

M’busa jula pajwalalichilaga kuchalichi kwakwe lisiku lyakuyichisya jwasasile yindu yakusakala yakwamba M’bale Hoskin. M’baleju jwatite, “M’busa jula ŵasalile ŵandu ŵa kuchalichi kwakwe kuti uneji ndili jwaunami soni ngusosekwa kuwulajidwa.” Nambo m’baleju nganaleka kulalichila ligongo lya yeleyi, mwamti jwakombwele kwalalichila ŵandu ŵajinji. M’baleju jwatite, “Nasangalele mnope kulalichila mtawuni jeleji. Ŵandu ŵane ŵasalilaga kuti, ‘Tukumanyilila kuti wawojo ali mundu jwa Mlungu.’ Soni ŵasalilaga kuti ŵaliji ŵakoseka kungamuchisya pa yindu yanasosechelaga.”

KULIJIGANYA PAJIKA SONI PEŴASA

Pakusaka kwakamuchisya ŵandu ŵaŵasakaga kumanyilila yejinji, Ŵakulijiganya Baibulo ŵatandite kuŵika ngani syakwakamuchisya ŵakulijiganya m’magasini ga The Golden Age.a Ngani syakulijiganyasi syakwetesoni yiwusyo yakuti achinangolo akambilaneje ni ŵanache ŵawo. Achinangolo ŵasosekwaga “kambilana ni ŵanachewo yiwusyo yeleyi soni kwakamuchisya kuti apate kwanga kwakwe m’Baibulo.” Yiwusyo yakwe yaliji mpela yakuti “Ana m’Baibulo mwana mabuku galingwa?” Yine yaliji yakuti, “Ana Mklistu jwalijose akusosekwa kwembecheya kulagasidwa?” Yiwusyo yeleyi yakamuchisyaga ŵachinyamata kulalichila mwangali woga.

Papalisoni yiwusyo yakutyochela m’Baibulo yaŵalembelaga ŵandu ŵaŵamanyililaga panandi yakwamba Baibulo. Kwanga kwa yiwusyoyi kwasimanikwaga m’buku jandanda jakuti Studies in the Scriptures. Ŵandu ŵajinji ŵapindulaga ni pologalamu jeleji. Nambo magasini ja The Golden Age ja Disemba 21, 1921, jasasile kuti mapologalamu gosopega ngagakopokagasoni. Ligongo chichi papali kuchenga kweleku?

KOPOKA KWA BUKU JASAMBANO

Buku ja *The Harp of God*

Kadi jakulosya yakusosekwa kuŵalanga mundu

Kadi jakola yiwusyo yakuti mundu ajanje

Abale ŵaŵalongolelaga masengo pandaŵijo ŵayiweni kuti ŵandu ŵasosekwaga kulijiganya Baibulo m’litala lyangasawusya. Litala lyakwe lyaliji lyakuti alijiganyeje ngani jilijose pajika. Ligongo lya yeleyi, mu Nofemba 1921, pakopweche buku jakuti The Harp of God. Ŵandu ŵaŵasakaga kumanyilila yejinji ŵapochelaga bukuji soni ŵatandaga majiganyo gaŵasosekwaga kulijiganya jwalijose pajika. Majiganyoga gakamuchisyaga ŵakuŵalanga kumanyilila “chakulinga cha Mlungu chakuti ŵandu chatameje ni umi wangamala pachilambopa.” Ana yeleyi yakwete yakuyichisya yamtuli?

Mundu papochele bukuji, ŵampagasoni kakadi kakulosya mapeji gakusosekwa kuŵalanga. Wiki jakuyichisya ŵampagasoni kadi jine jakola yiwusyo yakuti ajanje kutyochela mungani syaŵalasilesyo. Kumbesi kwa kadi japochelejo kwalosyaga yachalijiganye wiki jakuyichisya.

Wiki jilijose kwa mawiki 12, jwakulijiganyajo jwapochelaga kadi jasambano kutyochela kwa ŵandu ŵali mumpingo wakuŵandikana najo. Ndaŵi syejinji abale ni alongo ŵachikulile soni ŵanganaŵa akombwele kulalichila ku nyumba ni nyumba ni ŵaŵatumisyaga makadiga. Mwachisyasyo, Anna K. Gardner, jwa ku U.S.A., jwatite, “Kopoka kwa buku jakuti The Harp of God, kwatendekasisye kuti chemwali ŵangu lina lyawo Thayle, atumisyeje nawo makadi gakola yiwusyo wiki jilijose.” Mundu pamalisisye kulijiganya pajika ŵamtumichisyaga m’bale kapena mlongo kuti akatande kulijiganya najo Baibulo mwakutamilichika.

Thayle Gardner ali atemi panjinga ja ŵalemale

MASENGO GAGASOSEKWAGA KAMULIDWA

Chakumbesi kwa chaka cha 1921, M’bale J. F Rutherford jwatumisye yikalata m’mipingo josope. Mu yikalatayo jwalakwe jwalembile kuti, “M’chaka chelechi masengo gakulalichila ya Uchimwene gakamulidwe mnope soni gakamuchisye ŵandu ŵajinji kupunda yaka yine yipiteyi.” M’baleju jwasasilesoni kuti, “Pana masengo gejinji gatukusosekwa kamula. Myoyo akusosekwa kwalimbikasya ŵandu ŵajinji kuti akamule nawo masengo gelega.” Mwangakayichila, Ŵakulijiganya Baibulo wosope ŵapikanile yeleyi. Mwamti mu 1922, Ŵakulijiganya Baibulo ŵalalichile mwakulimba mtima kupunda kalakose.

Kola Achimjakwe Ŵakulimba Mtima

Ŵakulijiganya Baibulo ŵalosyaga kunonyelana mwakamusyangana jwine ni mjakwe. Kusala yisyene, ŵaliji ŵandu ŵakulimba mtima ‘ŵaŵapagwile kuti akamuchisyeje pandaŵi ja yisawusyo.’ Yeleyi yikuwonechela munganiji.—Mis. 17:17.

Pa Meyi 31, 1921, jwamlume jwampiliwu jwine jwa mumsinda wa Tulsa (Oklahoma, U.S.A) ŵamŵisile mundende ligongo lya kumkamulila msimayi jwachisungu. Kaneko, kagulu kachiwawa ka ŵandu ŵakupunda 1,000 ŵaŵaliji ŵachisungu, ŵatandite kumenyana ni kagulu kamwana ka ŵandu ŵachapiliwu. Kumenyanaku kwakusile mnope mwamti kwajambuchile kudela ja Greenwood kukwatamaga ŵandu ŵachapiliwu ŵajinji. Nyumba syakupunda 1,400 syajochedwe moto soni katundu jwamjinji jwajiŵidwe. Malipoti gakusalosya kuti ŵandu ŵakwana 36 ŵawile. Nambo yisyesyene yakwe komboleka kuti chiŵandika ŵandu 300 ni ŵaŵawile.

Jwakulijiganya Baibulo jwine jwampiliwu lina lyakwe Richard J. Hill jwa ku Greenwood, jwalondesisye yayatendekwe palisikuli. Jwalakwe jwatite, “Chilo cha lisiku liyatendekwaga yachiwawayi twatendaga misongano jetu jampingo. Panyuma pa misonganoji, twapikene wuti sili mkulila mtawuni ja Tulsa. Mpaka patwajawulaga kukugona wutisi syapikanikagape.” Lyatatu pa Juni 1, yindu yayiche pakusawusya mnope. “Ŵandu ŵane ŵayiche nikutusalila kuti naga tukusaka kuŵa ŵakuteteyeka, tutilile ku chinyumba chine chakusatendelaga ŵandu msongano.” Myoyo M’bale Richard Hill ni ŵamkwakwe soni ŵanache ŵakwe 5 ŵatilile ku chinyumba chelechi. Kweleko kwapali ŵandu ŵachapiliwu chiŵandika 3,000. Nambo kwapalisoni asilikali ŵele boma jatumisye kuti akatamilikasye mtendele pasikati pa ŵanduŵa.

Pandaŵi jijiji, m’bale jwine jwachisungu lina lyakwe Arthur Claus, jwatesile yindu mwakulimba mtima. Jwalakwe jwatite, “Panagambile kupikana kuti ŵandu ŵachiwawa akocha majumba soni kwiŵa katundu ku Greenwood, naganisisye yakuti njawule kukoko ngalole mwayiŵelele yindu paumi wa M’bale Hill. Jwalakwe ŵaliji mjangu jwapamtima.”

M’bale Arthur ŵajiganyaga ŵanache ŵakwana 14 pakamulichisya masengo buku ja The Harp of God

M’bale jwachisunguju ali ayiche kunyumba ja M’bale Hill, ŵam’weni mundu jwine jwachisungu ali anyakwile wuti. Munduju ŵatamaga mwakuŵandikana ni nyumba ja M’bale Hill soni ŵaliji mjakwe. Myoyo ali am’weni Arthur, jwapelaga kuti ali mu gulu jakutenda yachiwawa. Mwamti ŵamwusisye kuti, “Ana myiche kukutenda chichi akuno?”

M’bale Arthur jwatite, “Yikaŵe kuti nganinjanga yakumsangalasya munduju, mpaka akangombele uti. Namsimichisye kuti une ndili mjakwe jwa M’bale Hill soni kwika akunoku nganikuŵa kutanda.” Kaneko Arthur pampepe ni mundu jula ŵakamusyangene kuteteya katundu jwa M’bale Hill kuti akajiŵidwa.

Kaneko Arthur jwamanyilile kuti M’bale Hill ni liŵasa lyakwe ali kumalo kwakusatendela ŵandu msongano. Myoyo jwapikene kuti ŵandu ŵachapiliwu ngakukundidwa kutyoka kweleko naga nganakola chipepala chesayinile jwamkulungwa jwa asilikali chakwakunda kuti atyoche. Arthur jwatite, “Yaliji yakusawusya kuti ngawonegane ni jwamkulungwa jwa asilikali. Nambope ndili mbite ni kwasalila kuti njiche kukulijigala liŵasa lya Hill, ŵambusisye kuti, ‘Ana chimkakombole kwalolela chenene jemanjajo soni kwasamalila?’ Najanjile kuti kwabasi.”

Yili yikomboleche kujigala chipepalachi, Arthur jwapite ku chinyumba chakutendela msongano kula. Ali ayiche, jwapeleche chipepalachi kwa jwamkulungwa jwakulolela kumaloko. Ni jwatite, “Yikomboleche chamtuli yeleyi, yikuwoneka kuti asayinile jwamkulungwa jwa asilikalitu achi! Nambo mkumanyilila kuti mmwejo ni ŵamli ŵandanda kukundidwa kumkoposya mundu amumu?” Kaneko wosope ŵakamusyangene kumsosa M’bale Hill ni liŵasa lyakwe mpaka ŵapatile. Kaneko M’bale Hill ni liŵasa lyakwe ŵakwesile galimoto ja Arthur ni kuwujilaga kunyumba.

M’bale Arthur Claus jwalolechesye kuti M’bale Hill ni liŵasa lyakwe ali ŵakuteteyeka. Yaŵatesile m’baleju pakulosya chinonyelo soni kulimba mtima, ŵandu ŵane ŵatesile nayo chidwi. Arthur jwatite, “Mundu jwine juŵakamuchisye kulindilila katundu jwa M’bale Hill jula, jwatandite kwanonyela ŵa Mboni sya Yehofa kupunda muŵatendelaga pandanda. Soni ŵandu ŵane ŵatandite kusaka kulijiganya usyesyene ligongo ŵayiwonaga kuti ŵandu ŵa Mlungu nganakola lusagu kapena kwawona ŵane kuŵa ŵakusosekwa mnope kwapunda achimjawo.”

a Magasini ja The Golden Age ŵajikolangaga kuti Consolation mu 1937, nambo mu 1946 ŵatandite kujikolanga kuti Ajimuche!