UMI WAKUSAWUSYA UKUTANDA

KUSA kwa mgunda wa Edeni, Adamu ni Hawa ŵalasile mnope. Ŵasosekwaga kukamula masengo mnope kuti apate yakulya. Mmalo mwa yitela yakusalala, ŵagambaga kusiwona miŵa ni matungwisa yili mkumela paŵatamagapo. Yeleyi ni yayatendecele Adamu ni Hawa ali alepele kumpikanila Mlungu, soni Mlungu paŵalesile kuŵa mjawo.

Nambo yakutesya canasa mnope yaliji yakuti, Adamu ni Hawa ŵatandite kuwa. Akumbucile kuti, Mlungu ŵasalile kuti caciwa nditu naga akulya cisogosi ca mucitela cila. Sambano pa lisiku lyaŵagambile kulya cisogosico ŵatandite kuwa. Kwaliji kuloŵela mnope ngampikanila Mlungu!

Ŵanace wosope ŵa Adamu ni Hawa ŵapagwile Mlungu ali ŵatyosisye acinangolo ŵawoŵa mu mgunda wa Edeni. Yeleyi yikugopolela kuti nombe nawo ŵanacewo ŵasosekwaga kucekulupa ni kuwa.

Adamu ni Hawa akapikanile Mlungu, akatemi ni umi wakusangalasya yalumo ni ŵanace ŵawo. Akatemi ni umi wangamala, soni mwakusangalala pacilambo capasi. Pangali jwakacekulupaga, kulwala, soni kuwa.

Mlungu akusasaka kuti ŵandu atameje ni umi wangamala mwakusangalala. Jwalakwe asasile kuti lisiku line yeleyi yicikomboleka. Ngaŵa kuti cilamboci cicigamba kuŵa cakusalalape, nambosoni ŵandu wosope cacikola umi wambone. Mundu jwalijose caciŵa paunasi wambone ni mundu mjakwe, soni ni Mlungu.

Nambo Hawa ŵalesile kuŵa paunasi ni Mlungu. Ni paŵaŵelekaga ŵanace yaliji yakusawusya. Ŵapikanaga kupweteka. Pelepa nikuti ŵasimanaga ni yipwetesi yejinji ligongo lyangapikanila Yehofa. Ngaŵa m’yoyo?

Adamu ni Hawa ŵakwete ŵanace ŵacilume ni ŵacikongwe. Mwanagwawo jwandanda kupagwa, ŵamkolasile kuti Kaini. Mwanagwawo jwaŵili kupagwa ŵamkolasile kuti Abele. Ana cici cicatendecele jemanjaji? Ana akumanyilila?