Mlungu Ŵapanganyisye Jwamlume ni Jwamkongwe Jwandanda

Yehofa ŵapanganyisye mgunda kumalo gakolanjidwa kuti Edeni. Mgundawo waliji wegumbale ni maluŵa, yitela soni yinyama. Kaneko Mlungu jwapanganyisye jwamlume jwandanda. Lina lyakwe lyaliji Adamu. Mlungu jwampanganyisye jwalakweju kutyocela ku luwundu ni ŵampujile lipuje mumbula mwakwe. Ana mkumanyilila cicatendekwe panyuma pakwe? Mundujo jwaŵele jwacijumi. Yehofa ŵam’ŵisile Adamu kuŵa jwakulolela mgundawo, soni ŵamsalile kuti apelece mena ga yinyama yosope.

Yehofa ŵampele Adamu lilamusi lyakusosekwa mnope. Jwalakwe ŵamsalile Adamu kuti, ‘Yisogosi ya citela cilicose ca mumgundamo komboleka kulya nambo mkasilya yisogosi ya citela cimo capajika. Naga mkulya yisogosi ya citela celeco cimciwa.’

Kaneko Yehofa ŵatite, ‘Cimbanganye jwakumkamucisya Adamu.’ Jwalakwe ŵamtendekasisye Adamu gona lugono lwakuwa nalyo, ni kaneko Mlungu ŵakamulicisye masengo luŵalati lumo lwa Adamu kuti apanganyicisye jwamkongwe jwa Adamu. Lina lyakwe lyaliji Hawa. Adamu ni Hawa ŵaŵele liŵasa lyandanda. Ana Adamu ŵapikene uli mumtima ligongo lya jwamkongwejo? Jwasangalele mnope ni jwatite, ‘Alole yapanganyisye Yehofa kutyocela m’luŵalati lwangu! Sambano aju ali jwakulandana ni une.’

Yehofa ŵamsalile Adamu ni Hawa kuti aŵelece ŵanace ni agumbale pacilambo capasi. Jwalakwe ŵasakaga kuti jemanjajo akamuleje masengo yimpepe mwakusangalala pakulinganya cilambo capasi kuŵa paladaiso kapena kuti mgunda wakusalala mpela mgunda wa Edeni. Nambo yindu nganiyijenda mpela muŵasacilaga Yehofajo. Ana ligongo cici? Tulijiganye yejinji mumtwe wakuyicisya.