LIGONGO LYAKWE NGANAJENDELECELA KUTAMA MU MGUNDA WAKUSALALA

ALOLE sambano yayikutendekwayo. Adamu ni Hawa akwatopola mu mgunda wakusalala wa Edeni. Ana alimanyi ligongo lyakwe?

Lili ligongo lyakuti ŵatesile cindu cakusakala mnope. Ni Yehofa akwapa cilango. Ana akumanyilila cakusakala ciŵatesile Adamu ni Hawa?

Jemanjaji ŵatesile cindu caŵasalile Mlungu kuti akacitenda. Mlungu ŵasalile kuti alyeje yakulya ya mu yitela yosope ya mu mgundamo. Nambo Mlungu ŵalekasisye kuti akalya ya mucitela cimo, naga akulya caciwa. Mlungu ŵasagwile citelaci kuti ciŵe cakwecakwepe. Tukumanyilila kuti kuli kulemwa kujigala cindu camsyene, ngati m’yoyo? Ana sambano catendekwe cici?

Lisiku line Hawa paŵaliji jika mumgunda, lijoka lyaŵecetene najo. Agambe ganisya! Lyamsalile Hawa kuti alye cisogosi ca mucitela caŵasalile Mlungu kuti akalya. Nambo Mlungu paŵapanganyaga majoka, nganagapanganya kuti gakomboleje kuŵeceta. Yeleyi yikulosya kuti jwine jwakwe jwatendekasisye kuti lijokalyo likombole kuŵeceta. Ana jwaliji nduni?

Nganaŵa Adamu. Komboleka kuŵa jumo mwa ŵandu ŵaŵapanganyisye Mlungu mkanapanganye cilambo capasici. Ŵele ŵanduŵa ali malayika, nambo ngaŵa mkwawona jemanjaji. Lilayikali lyatandite kulikwesya mnope. Lyatandite kuganisya ya kukola ulamusi mpela wakwete Mlungu. Ni lyasakaga kuti ŵandu alipikanileje, m’malo mwakumpikanila Yehofa. Lyele lilayikali ni lilyatendekasisye kuti lijoka lila liŵecete.

Lilayikali lyakombwele kumlambusya Hawa. Palyagambile kumsalila Hawa kuti caciŵa jwakulandana ni Mlungu pacalye cisogosico, jwalakwe ŵakulupilile yeleyi. Jwalakwe ŵalile, nombe najo Adamu ŵalilesoni. Adamu ni Hawa nganapikanila Mlungu, ni ligongo lyakwe jemanjaji nganajendelecela kutama mu mgunda wakusalala ula.

Nambo lisiku line Mlungu cacilolecesya kuti cilambo cosopeci ciŵe cakusalala mpela muwaŵelele mgunda wa Edeni. M’bujomu citulijiganye yampaka tutende nawo pakusalalisya cilamboci. Sambano, kwende tulole yayatendecele Adamu ni Hawa.