Ana Chichi Champaka Chikamuchisye Liŵasa Kuŵa Lyakusangalala?

YAJIKUSASALA BAIBULO

“Akupunda kola upile ŵelewo ŵakupikana maloŵe ga Mlungu ni kugatendela masengo!”​—Luka 11:28.

ANA YELEYI YIKUTUKWAYA CHAMTULI?

Tukusapata chinonyelo chisyesyene.​—Aefeso 5:28, 29.

Tukusakola uchimbichimbi usyesyene.​—Aefeso 5:33.

Tukusapata chiteteyo chisyesyene.​—Maliko 10:​6-9.

ANA YISYENE TUKULUPILILEJE YAJIKUSASALA BAIBULO?

Elo, pamagongo gaŵili aga:

• Mlungu ni juŵatandisye liŵasa. Baibulo jikusasala kuti “liŵasa lililyose . . . ŵalipele lina” Yehofa Mlungu. (Aefeso 3:14, 15) Yeleyi yikulosya kuti Yehofa ni juŵatandisye liŵasa. Ana yeleyi yili yakamuchisya chamtuli?

  Awanichisye kuti akulya chakulya chakunong’a ni akusaka kumanyilila yakunonyelesya yatasile mu chakulyacho, ana mpaka am’wusye nduni? Mwangakayichila, mpaka am’wusye jwateleche.

  Mwakulandana ni yeleyi, kuti amanyilile yampaka yakamuchisye kuŵa ŵakusengwa mwiŵasa, yili yakusosekwa kum’wusya Yehofa, jwakutandisya liŵasa.​—Genesesi 2:18-​24.

• Mlungu ni jwakusatusamalila. Ana ligongo chichi luli lunda kuti maŵasa gaŵalanjeje Maloŵe ga Yehofa pakusaka kupata chikamuchisyo? ‘Ligongo jwalakwe ni jwakusatusamalila.’ (1 Petulo 5:6, 7) Yehofa akusatusosela yambone kutyochela mumtima, soni maloŵe gakwe gakusakamuchisya ndaŵi syosope!​—Misyungu 3:5, 6; Yesaya 48:17, 18.