Cilanga ca Yefita

Ayisalayeli ŵalesilesoni kulambila Yehofa ni ŵalambilaga milungu jaunami. Aamoni ali ŵajimucile Ayisalayeli, milungu jaunamiji nganijakamucisya cilicose. Ayisalayeli ŵalasile ni jemanjaji kwa yaka yejinji. Pambesi pakwe Ayisalayeliwo ŵamsalile Yehofa kuti, ‘Tulemwisye. Conde atukulupusye kwa acimmagongo ŵetu.’ Kaneko Ayisalayeli ŵajonasile milungu jaunami jila nikutandilasoni kulambila Yehofa. Yehofa nganasakasoni kwawona Ayisalayeli ali mkulaga.

Msilikali jwine jwakolanjidwa kuti Yefita jwasagulidwe kuti ŵalongolele ŵandu pangondo jakulimbana ni Aamoni. Jwalakwe jwamsalile Yehofa kuti, ‘Naga catukamucisye kupunda ngondoji, ngutenda cilanga ni wawojo cakuti pacinjiwujaga kutyocela ku ngondo, cinjapa mundu jwandanda kopoka m’nyumba mwangu kukunjingamila.’

Yefita pawawujaga ku ngondo, mundu jwandanda kopoka m’nyumba mwakwe kukumcingamila jwaliji mwanagwe jwamkongwe. Jwalakwe jwakwete mwanace jumopejo. Mwanacejo jwaliji mkuŵina soni kwimba kangoma. Ana Yefifa ŵatesile cici? Jwalakwe jwakumbucile cilanga cakwe cila ni jwatite, ‘Mwanangu! Mundengwisye. Natesile cilanga ni Yehofa. Kuti ngwanilisye cilangaco, ngusosekwa kumtumisya mmwejo kuti mkatumicile Yehofa kunyumba jakulambilila ku Silo.’ Nambo mwanacejo ŵatite, ‘Baba naga ŵatesile cilanga ni Yehofa akusosekwa kucikwanilisya. Cinguŵenda uneji nicakuti angunde njawule kwitumbi ngatame kweleko miyesi jiŵili ni acimjangu, kaneko cinjijawula ku Silo.’ Mwanace jwamkongwe jwa Yefita jwatumicile mwakulupicika kunyumba jakulambilila kwa umi wakwe wosope. Caka cilicose, acimjakwe ŵajawulaga ku Silo kukumlola.